ඒ කඳුළු පාස්කු ඉරිදාව පසුකර දින සති ගතවෙමින් තිබුණි. ආරක්ෂක අංශ මුසල්මානු වහාබ් අන්තවාදීන් සහ ඔවුන්ගේ අඩුමකුඩුම සොයා ලැසි මෙහෙයුමක් අරඹා තිබුණි. ඒ අනුව රටේ හැම අස්සකින්ම වාගේ කඩු කිනිසි බෝම්බ වැනි ද්‍රව්‍යයද ත‍්‍රස්ත සැකකරුවන්ද අත්අඩංගුවට පත්වෙමින් තිබුණි. ඒ අනුව රට නැවත ආරක්ෂිත තැනකට ගමනක් යමින් තිබුණි. එහෙත් ලංකාවේ ජනප‍්‍රිය දහරාවේ විද්‍යුත් මාධ්‍ය ඒ ගොඩනැගෙමින් තිබෙන ආරක්ෂිත වටපිටාව මත අනාරක්ෂාවේ ගොරහැඩි වර්ණ තැවරුවෝ ය. මේ වනවිට ලංකාව නම් රටට ආණ්ඩුවක් නැතිබව ඔප්පු කරමින් ඒ මාධ්‍ය මෙහෙයුම සාර්ථකවිය. මිනිස් සිත් තුළ මෝදුවෙමින් තිබුණ සැකය බිය දෙගුණ තෙගුණ වී රට අනාරක්ෂිත තැනකට තල්ලූවිය. නොයේක් කටකතා අසුරුසැනින් ලංකාවම වෙළාගති. දෙමාපියන් තම දුවාදරුවන් ආණ්ඩුව කෙතෙක් ඉල්ලීම් කළත් පාසල් වෙත එව්වේ නැත. ඒ මේ නිර්මාණය වූ සැකය සහ බිය නිසාය. මේ තත්ත්වය තුළ පොලිස් මූලස්ථානයෙන් ඉගිල්ලූණ ලිපියක් අනතුරු ඇෙ`ගව්වේ මැයි 13 වෙනිදා කොළඹ ප‍්‍රදේශ 5කට මරාගෙන මැරෙන බෝම්බ ප‍්‍රහාරයක් එල්ලවීමේ අනතුරක් ඇති බවය. මෙම තොරතුර ප‍්‍රංශ තානාපති කාර්්‍යාලයෙන් පොලීසියට ලැබුණු තොරතුරක් බවද දැනගන්නට ඇත. කෙසේ හෝ ඇත්ත නැත්ත මේ ප‍්‍රහාරය පිළිබඳ අනතුරු ඇඟවීම නිසා සිංහල ජනතාව මත රෝපණය වූ අර බය සහ අවිශ්වාසය තවතවත් ඉහළ ගියේය. එහි ප‍්‍රථිපලය කුමක්ද?.. එහි ප‍්‍රථිපලය අනාගතයේ රට භාර ගන්නයැයි කෙල හලමින් බලාසිටින දේශපාලකයින් බොරඳියේ මාළු බෑමය.
හලාවත සිද්ධිය
මෙලෙස මිනිසුන් මැයි 13 වැනි දින පිළිබඳව අනියත බියකින් පසුවෙන විට හලාවත ප‍්‍රදේශය තුළ කටකතා සුළඟක් හමාගෙන ගියේ තව දවසක් ගතවූ තැන හලාවත සිංහල මිනිස්සුන්ට අ`ඩන්නට සිදුවෙන බව හලාවත කෝටිපති මුස්ලිම් ව්‍යාපාරිකයෙකුගේ පුතෙක් සිය ෆෙස්බුක් පිටුව හරහා පවසා ඇති බවය. මෙම තොරතුර සමග ක‍්‍රියාත්මකවූ ප‍්‍රදේශයේ සිංහල ජනතාව එය හලාවත පොලීසියට පැමිණිලි කර ඇත. එහෙත් මෙය සුළු සිද්ධියක් යැයි කියමින් පොලීසිය එම පිරිස පිටත් කර ඇත. ඒ සමග නොසන්සුන් වූ පිරිස එම ප‍්‍රකාශය සිය ෆේස්බුක් පිටුව හරහා පළකලා යැයි කියන හස්මර් හමීඞ් නම් මුස්ලිම් ජාතිකයා සොයා ගොස් ඔහුට ප‍්‍රහාරයක් එල්ල කර ඇත. එහිදී එම පිරිස නිව් හස්මාර් නම් වෙළඳසැළටද ප‍්‍රහාරයක් එල්ල කර ඇත. ඉන්පසුව හලාවත ප‍්‍රදේශයට පොලිස් ඇඳිරිනීතිය පැනවුණ අතර පොලීසිය තත්ත්වය පාලනය කළේය. මෙම පාලනය කිරීමෙන් පසුව ආරංචි වුණේ හස්මර් හමීඞ් ඉංග‍්‍රීසි භාෂාවෙන් ලියා තිබුණ වැකිය වැරදියට තේරුම් ගැනීම නිසා මෙම කලබලය ඇතිවී ඇති බවය. එහිදී හස්මර් හමීඞ් සිය ෆෙස්බුක් ගිනුමේ කමෙන්ටුවක් ලෙස ලියා ඇත්තේ don’t laugh more 1 day a you will cry කියාය. කොමාවක් කරපු ඇබැද්දියක්!!
කුලියාපිටියෙන් ඇවිලූණු ගින්න
මේ අතර පසුගිය 12 වෙනි ඉරිදා දින සවස කුලියාපිටිය පැත්තේ ප‍්‍රදේශ කිහිපයක ස්පීකරයක් බැඳගත්ත වාහනයක් නිවේදනයක් මිනිසුන්ට නිකුත් කර ඇත. එයත් පසුදා පිළිබඳව අනතුරු ඇඟවීමක් ය. මිනිසුන්ට කල්පනාවෙන් ප‍්‍රවේශමෙන් සිටින ලෙස එහිදී ආයාචනය කර ඇත. මෙම නිවේදනය සමග නොයේකුත් කටකතා සුළං ප‍්‍රවාහ ප‍්‍රදේශයේ දසත සැරිසරන්නට වැඩි කාලයක් ගියේ නැත. එම නොසන්සුන්තාවය සමග ප‍්‍රදේශයේ ජනතාව නීතිය අතට ගෙන කටයුතු කරන්නට විය. අවුරුදු 17ත් 40ත් අතර වයස්වල පුද්ගලයින් යතුරුපැදිවල නැගී මුස්ලිම් ජනතාව ඉලක්ක කරගනිමින් ප‍්‍රහාර මාළාවක් මේ සමග ප‍්‍රදේශයේ දියත් කර ඇත. මේ සමග කුලියාපිටිය, යගම්වෙළ, බිංගිරිය ආදී ප‍්‍රදේශවලට මෙම සහාසික ප‍්‍රහාර මාළාව උඩු දුවන්නට, පිළිලයක් සේ ව්‍යාප්ත වන්නට වැඩි වේලාවක් ගියේ නැත. පසුගිය මැයි 13 වෙනිදා මුස්ලිම් ජනතාව ඉලක්ක කරගනිමින් කුලියාපිටිය, බිංගිරිය, හෙට්ටිපොළි, පඬුවස්නුවර, වරකාපොළ, මිනුවන්ගොඩ ආදී ප‍්‍රදේශවල පැතිර ගිය භීෂණයයේ ඇරඹුම එලෙසය. නුවර, දිගන වැනි ප‍්‍රදේශවල පසුගිය වර්ෂයේ සිදුවූ ජාතිවාදී ආගම්වාදී භීෂණයට වඩා මෙවර භීෂණය විශාල ප‍්‍රදේශයක පැතිරුණු විශාල විනාශයක් කළ භීෂණයක් බව කිව යුතුය.
බිංගිරියේ සහාසිකත්වය
මෙම ප‍්‍රහාර මාලාව මුලින්ම ඇරඹී ඇත්තේ යතුරුපැදි සේනාවකින් පැමිණි පිරිසකගෙන් ය. එම ප‍්‍රදේශවාසීන් කියන්නේ හාර පන්සීයක බයිසිකල් පෝලිමක් මෙම ප‍්‍රහාර සඳහා පෙරමුණ ගත් බවය. ඒ සහාසිකයින් අතර බොහෝ දෙනෙක් හිරිමල් තරුණයන් ය. තවත් සමහරුන් කියන්නේ මේ බයිසිකල්කරුවන් ප‍්‍රදේශයේ අයවලූන් නොවන බවය. බොහෝ යතුරුපැදි සේනාවල ඉදිරියෙන් බෞද්ධ භික්ෂූන්ද ධර්මය ප‍්‍රචාරය කරමින් වැඩ ඇති බව සමහර සී. සී. ටී. වී දර්ශන කියාපායි. ඒ අනුව පෙනෙන්නේ මුස්ලිම් අන්තවාදය පරාජය කිරීම සඳහා සිංහල අන්තවාදීන් පෙරමුණ ගත් බවය.
මෙම ප‍්‍රහාරකයෝ බිංගිරිය මුස්ලිම් පල්ලියට ප‍්‍රහාරයක් එල්ලකරනවිට එම සහාසිකයින් කණ්ඩායමෙන් 6 දෙනෙකු බිංගිරියට පොලීසිය විසින් අත්අඩංගුවට ගෙන ඇත. පසුව එම සැකකරුවන් හෙට්ටිපොළ පොලීසියට ගෙනගිය බව දැනගන්නට ලැබේ. එහිදී විශාල පිරිසක් පැමිණ හෙට්ටිපොළ පොලීසිය වටලා අත්අඩංගුවට ගත් පිරිස නිදහස් කරන්න යැයි ඉල්ලා ඇත. ඒ සමගම එම සැකකරුවන් නැවත බිංගිරිය පොලීසියට රැුගෙන ගොස් ඇති අතර එහිදී එම සැකකරුවන් බිංගිරිය පොලීසිය මුදාහරින්නට කටයුතු කර ඇත. මෙම මුදාහැරීම සඳහා එක්සත් ජනතා නිදහස් සන්ධානයේ පාර්ලිමේන්තු මන්ත්රී දයාසිරි ජයසේකර පොලීසියට බලපෑම් කර ඇති බව ප‍්‍රකාශ වේ. කෙසේ වුවත් අනිද්දා වෙත අදහස් දක්වමින් දයාසිරි ජයසේකර මන්ත‍්‍රීවරයා එම චෝදනාව ප‍්‍රතික්ෂේප කර ඇත.
කතාව මෙසේ වුණත් යකා කළු බව බැලූබැල්මට පෙනෙන්නේය. මෙම ජාතිවාදී ගිනිදැල් මෙලෙස බුරබුරා නගිනවිට දයාසිරි ජයසේකරද, ජනාධිපති සිරිසේන ඝාතන කුමන්ත‍්‍රණයේ හෙළිදරව්කරුවා වන නාමල් කුමාරද මෙම ප‍්‍රදේශයේ සැරිසරා ඇත. ජනාධිපති සිරිසේන චීන සංචාරයක නිරතවී සිටින නිසා ජනාධිපතිගේ ගෝලයා නාමල් කුමාර මුස්ලිම් ජනතාවග් ආරක්ෂාවට මෙලෙස සංචාරය කලාදැයි අපි දන්නේ නැත. සිය ෆෙස්බුක් ගිණුමට වීඩියෝ පටයක් මුදාහරින නාමල් කුමාර කියා සිටින්නේ මෙම ගැටුම ආරම්භ වන්නට මොහොතකට කලින් තමන්ට හිටපු අමාත්‍ය දයාසිරි ජයසේකර පඬුවස්නුවර ප‍්‍රදේශයේදී මුණගැසුණු බවය. එහිදී ඔහු තමන්ට පරිභව කරමින් තමන්ගේ දේශපාලන බලප‍්‍රදේශයෙන් පිටව යන්නැයි තර්ජනය කළ බවය. ඒ අනුව තමන් එම ස්ථානයෙන් පැමිණ සුළු මොහොතකින් මුස්ලිම් ජනතාවට ප‍්‍රහාරයක් එල්ලවන බව තමන්ට ආරංචි වූ බවය. තමන් එම ස්ථානයේ සිටියේනම් මෙම ගැටුම වළක්වා ගන්නට කටයුතු කරන බව කියන ඔහු නොකියා කියන්නේ තමන්ව එම ස්ථානයෙන් පළවා හැර දයාසිරි ජයසේකර මෙම සහාසික ප‍්‍රහාරයට නායකත්වය ලබාදුන් බවය. මෙලෙස හෙළිඳරව්වන කතා ගොන්න කියන්නේ මෙම සාහාසික භීෂණය පිටුපස ක‍්‍රියාත්මක වූ දේශපාලනයයි.
තත්ත්වය මෙසේවනවිට පසුගිය 14 වැනිදා මෙම ගැටුම් පිළිබඳව පරීක්ෂා කරන්නට වයඹ පළාතට පොලිස් මූලස්ථානය විශේෂ පොලිස් කණ්ඩායමක් යන අතර ඔවුන් වරකාපොළදී නාමල් කුමාර අත්අඩංගුවට ගෙන ඇත. ඒ ජාතිවාදී ගිනි දැල් ඇවිලූවා යන චෝනාව උඩය. මීට අමතරව නුවර තෙල්දෙණිය ප‍්‍රදේශයේදී මහසෝන් බලකායේ ප‍්‍රධානියා යැයි කියන අමිත්ත වීරසිංහද පොලීසිය අත්අඩංගුවට ගෙන ඇත. ඔහුට තිබෙන්නේද නාමල් කුමාරට තිබෙන චෝදනාමය. මිනුවන්ගොඩ ප‍්‍රදේශයේ ක‍්‍රියාත්මකවූ භීෂණයට ඔහුගේ ගෝලයින් සම්බන්ධ බවටද ඇසි දුටු සාක්ෂි ඇතැයි පැවසේ.
පඬුවස්නුවර විනාශය
නාමල් කුමාර දයාසිරි ජයසේකර ආදීන්ගේ සහභාගීත්වය තිබියදී පඬුවස් නුවර ප‍්‍රදේශයේ ඇවිලී ගිය ගින්න නිවී යනවිට පල්ලි, වෙළඳ ස්ථාන, නිවෙස් ආදී මුස්ලිම්වරුන්ට අයත් බොහෝ දෑ සුණුවී ගිනිගෙන තිබුණි. ඔවුන් මහමගට බැස හමාගිය සුළි කුණාටුව පිළිබඳව වික්ෂිප්තව සිටියෝ ය. ඔවුන් වෙන කුමක් කරන්නද?.. පඬුවස්නුවර සීමාවේ පමණක් ගොඩනැගිලි 50කට වඩා විනාශ වී ඇති බව වාර්තා වෙයි. හෙට්ටිපොළ, හිනිගම, කොටබපිටිය, බණ්ඩාරකොස්වත්ත ආදී පඬුවස්නුවරට යාබද ප‍්‍රදේශවල සිදුවූ විනාශයට බිලිවූ ගොඩනැගිලි සංඛ්‍යාව 250කට ආසන්න බව දැනගන්නට ලැබේ. එක මුස්ලිම් ජාතිකයෙකුගේ මරණයක් පිළිබඳව නිළ වශයෙන් තොරතුරු ලැබෙන අතර නොනිළ තොරතුරු කියන්නේ මුස්ලිම් ජාතිකයින් දෙදෙනෙක් මෙම සහාසික ප‍්‍රහාරය හමුවේ සිය ජීවිතවලින් සමුගෙන ඇති බවය. තවමත් මේ සහාසික ප‍්‍රහාර මාලාව පිළිබඳව නිවැරදි තොරතුරු නැත. එනිසා යමයම් නිගමනවලට බැස ගැනීම එතරම් හොඳ නැත. සමාජ මාධ්‍ය වාරණයක්ද රට තුළ ක‍්‍රියාත්මක වෙමින් තිබෙන්නේය. එයත් අප සැලකිල්ලට ගතයුතුය.
මිනුවන්ගොඩ ප‍්‍රහාරය
වයඹ පළාත ගිනි ගන්නා විට ඊට යාබද බස්නාහිර පළාතේ ගම්පහ දිස්ත‍්‍රික්කයේ මිනුවන්ගොඩද විශාල සහාසිකත්වයකට භීෂණයකට නතුවී තිබුණි. පඬුවස්නුවර, බිංගිරිය, හෙට්ටිපොළ ආදී ප‍්‍රදේශවල ක‍්‍රියාත්මක වූ භීෂණ කාලය තුළ එහි නාමල් කුමාර, දයාසිරි ජයසේකර වැනි ජනාධිපති සිරිසේනගේ සුරතලූන් සිටියෝ ය. ඔවුන් සිදුවීම සිදුවී අවසන කුමක් කීවත්, ඔවුන් ඒ මොහොතේ එම ප‍්‍රදේශ තුළ සිට ඇත. පඬුවස්නුවර තත්ත්වය එසේවනවිට මිනුවන්ගොඩ තත්ත්වය ඊට ටිකක් වෙනස් විය. මිනුවන්ගොඩ සිදුවීම සිදුවන විට පිවිතුරු හෙළ උරුමයේ නියෝජ්‍ය නායක මධුමාදව අරවින්ද එහි සිට ඇත. මිනුවන්ගොඩ සහාසිකත්වය ආරම්භ වූ හැටි පිළිබඳව විස්තර කියන නගරවාසියෙක් කියන්නේ කටාන ප‍්‍රාදේශිය සභාවට පොහොට්ටු පක්ෂයෙන් තරගකර පැරදුන පුද්ගලයෙක් මිනුවන්ගොඩ ප‍්‍රහාරය ආරම්භ කළ බවය.
‘13 දා හවස 5ට විතර තමයි බයික්වලින් කණ්ඩායමක් ඇවිත් මුලින්ම මිනුවන්ගොඩ කොළඹ පාරේ කොළඹ පැත්තට වෙන්න තියෙන පවුස් කියන හෝටලයට ගැහැව්වේ. ඒ එක්කම පොලීසිය මේකට මැදිහත් වුණානම් මෙච්චර විනාශයක් වෙන්නේ නෑ. දෙවෙනි කණ්ඩායම ආවේ හවස 7ට විතර. දෙවෙනි ප‍්‍රහාරය පටන්ගන්න ටික වෙලාවකට කලින් තමයි මධුමාදව මිනුවන්ගොඩට ආවේ. තව හත්දෙනෙක් විතර මිනිහා එක්ක හිටියා. මිනිහා මිනුවන්ගොඩ ෆුඞ්සිටී එක ළඟ වාහනේ දාලා තමයි ඔය සිද්ධිය පටං ගත්ත තැනට පයින් ගියේ. ඒ ගිහිං ටික වෙලාවකින් මිනිහා ආයිත් ආවා. ඊට සුළු මොහොතකට පස්සේ තමයි දෙවෙනි ප‍්‍රහාරය පටන්ගත්තේ’. මධුමාදවගේ මෙම පැමිණීම
මිනුවන්ගොඩ පාලම පසුකර යතුරුපැදියක යන තරුණියක් විඩියෝ කර ෆෙස්බුක් සමාජ ජාලයට මුදාහැර ඇත. එම විඩියෝව නැරඹුවානම් සුදට සුදේ ශාන්ත ගමනින් යන මධුමාදව දැක පහන් සිත් උපදවා ගත හැකිය!!
‘මේ දෙවෙනි ප‍්‍රහාරය ආරම්භ කළේ කටාන ප‍්‍රදේශීය සභාවට තරග කරලා පැරදුන පොදුජන පෙරමුණේ අපේක්ෂකයෙක්. මයියා කියලා තමයි මිනිස්සු කියන්නේ. මිනිහා රතුපාට මරුටියකින් කට්ටිය දාගෙන ඇවිත් තමයි වැඬේ පටන් ගත්තේ. මේ මිනුවන්ගොඩ කඩ කැඩුවේ ගිනි තිබ්බේ සේරම කළේ ප‍්‍රසන්න රණතුංගගේ සහ මිනුවන්ගොඩ නගරාධිපති නීල් ජයසේකර කියන පොදුජන පෙරමුණේ ලොක්කන්ගේ ගෝලයෝ ආධාරකාරයෝ. කඩ 100ක් විතර ගිනි අරගෙන පැය එකහමාරක් යනකම් ගම්පහ ඉදලා ගිනි නිවන රථ ආවේ නෑ. ගින්න පැතිරිලා විනාශ වෙලා අලූ වුණාට පස්සෙ තමයි ආවේ. ඒ ආවත් වතුර නෑ. මිනුවන්ගොඩ නගරසභාවේ බවුසරය ඉල්ලූවාම නගරාධිපති දීලා නෑ කැඩිලා කියලා. පස්සේ හමුදාව ඇවිල්ලා ඉල්ලූවට පස්සේ තමයි දීලා තියෙන්නේ. ඔන්න ඔහොම තමයි පොහොට්ටුවේ කට්ටිය මිනුවන්ගොඩ ගිනි තිබ්බේ’. මේ මිනුවන්ගොඩ නගරවැසියා කියන ලෙස මෙම ප‍්‍රහාරය පිටුපස සිට ඇත්තේ පොදුජන පෙරමුණේ ආධාරකරුවන් ය. පොලීසියද මෙම ප‍්‍රහාර වැළැක්වීම සඳහා කිසිදු වෙහෙසක් ගෙන නැත. තත්ත්වය දරුණු වූ පසු පැමිණි විශේෂකාර්්‍යය බලකාය සහ හමුදාව පැමිණ කලහකාරීන්ට ගසා එලවා තත්ත්වය සාමකාමී කරනකම් පොලීසිය උඩබලාගෙන සිට ඇත. මෙම සහාසික ප‍්‍රහාරවලට ගොදුරු වූ ප‍්‍රදේශවල මුසල්මානුවන් දැන් ජිවීත ගතකරමින් ඇත්තේ, සිය ජීවිතය කොයිමොහොතක සිංහලූන් විසින් උදුරා ගනී දෝ යන සැකයෙන් හා බියෙන් විය යුතුය. ස්ලාම් අන්තවාදයට රටේ සිටින සියලූම මුසල්මානුවන් වගකිව යුතු නැති බවද මේ ප‍්‍රහාරයන් පිටුපස සිටින සිංහල ප‍්‍රජාව දැනගත යුතුය.
පසුගිය 13 වෙනිදා වයඹින් ඇරඹී ගම්පහ දක්වා ව්‍යාප්තවූ සහාසික ජාතිවාදී ආගම්වාදී ප‍්‍රහාරයේ කතාව සරළව ඕකය. මෙම ප‍්‍රහාර මාලාවෙන් පසු මේ වනවිට එම ප‍්‍රහාරයට සම්බන්ධ වූ බොහෝ පිරිසක් අත්අඩංගුවට ගෙන හදිස්සි නීතිය යටතේ සහ ෂක්‍ක්‍ඡුඍ පනත යටතේ අධිකරණයට ඉදිරිපත් කර රක්ෂිත බන්ධනාගාරගත කර ඇත. තත්ත්වය සමනය වූවායැයි කීවත් තවමත් සැකය අවිශ්වාසයම සමාජය තුළ රජයමින් තිබෙයි. ආණ්ඩුවද මෙම තත්ත්වය පහකර රට සාමාන්‍ය තත්ත්වයට ගෙන එන්නට වෙහෙසෙන බවක් දකින්නට නැත. x
