උපදෙස් කඩලා
පාස්කු ඉරිදා ත්‍රස්ත ප්‍රහාරයෙන් පසු ආරක්ෂක අංශවලින් කරන වැටලීම්වලදී වීඩියෝ කැමරා රැගත් මාධ්‍යවේදීන් රැගෙන නොයන ලෙස පොලිස් හා හමුදා වැටලීම් කණ්ඩායම්වලට උපදෙස් දී ඇතත් එය ක්‍රියාත්මක නොවන බව වාර්තා වෙයි. අනිද්දා සමඟ අදහස් දැක්වූ පොලිස් මාධ්‍ය ප්‍රකාශක රුවන් ගුණසේකර හා යුද හමුදා මාධ්‍ය ප්‍රකාශක බි්‍රගේඩියර් සුමිත් අතපත්තු ප්‍රකාශ කළේ මාධ්‍යවේදීන් රැගෙන නොයන ලෙස පැහැදිලි උපදෙස් ලබා දී ඇති නමුත් එම උපදෙස් නොතකා කටයුතු කළ අවස්ථා ඇති බවයි.
පොලිස් මාධ්‍ය ප්‍රකාශක රුවන් ගුණසේකර පැහැදිලි කළේ මෙලෙස මාධ්‍යවේදී කණ්ඩායම් රැගෙන ගොස් වීඩියෝ කිරීම පැති කිහිපයකින් ගැටලු මතු කරන බවය. වැටලීම් වීඩියෝ කිරීම නිසා එම සැකකරුවන් අධිකරණයට ඉදිරිපත් කිරීමේදී පැමිණිලි පාර්ශ්වයට බාධාවක් වන බවත්, පැමිණිලි පාර්ශ්වයට එරෙහිව එම වීඩියෝ පාවිච්චි කළ හැකි බවත් ඔහු කීය. ඊට අමතරව මෙම වැටලීම්වලදී අත්අඩංගුවට ගන්නා සියලු පුද්ගලයන් අපරාධ සැකකරුවන් පමණක් වන නිසා, ඔවුන්ගේ පෞද්ගලිකත්වයටද වීඩියෝ කිරීමෙන් ගැටලු ඇතිවන බව ඔහු කීය. උදාහරණයක් ලෙස එක් වැටලීමකදී අත්අඩංගුවට ගත් සැකකරුවන් දෙදෙනෙකු යට ඇඳුමෙන් පමණක් නිවසේ සිට ඇති බව ඔහු පෙන්වාදුන්නේය.
යුද හමුදා මාධ්‍ය ප්‍රකාශක සුමිත් අතපත්තු පැවසුවේ තමා දැනුවත්ව හමුදා වැටලීම් කණ්ඩායම් මාධ්‍යවේදීන් රැගෙන ගොස් නැති බවත්, මාධ්‍යවේදීන් වැටලීම් ගැන ආරංචි වීමෙන් පසුව එම ස්ථානවලට පැමිණ වාර්තා කිරීම සිදුවී ඇති බවත්ය. එහෙත්, අප්‍රේල් 30 වැනිදා හිරු ටීවී ප්‍රාදේශීය මාධ්‍යවේදී වසන්ත චන්ද්‍රපාල යුද හමුදා ට්‍රක් රථයක නැගී වීඩියෝ කරමින්, යුද හමුදා සෙබලුන් කණ්ඩායමක් සමඟ වැටලීමේ මෙහෙයුම්වලට යන අයුරුද වාර්තා කර ඇතැයි අප පෙන්වාදීමෙන් පසුව බි්‍රගේඩියර්වරයා ප්‍රකාශ කළේ එවැනි සිදුවීම් කිහිපයක් තිබිය හැකි නමුත්, හමුදාව දැඩිව එසේ නොකරන ලෙස උපදෙස් දී ඇති බවය. ■
