ත්‍රස්තවාදය මාසයකින් නිමා කළ ජනාධිපතිවරයා ලෙස හඳුන්වාගනිමින් මීළඟ ජනාධිපතිවරණයට ඉදිරිපත් වීමටත්, හැකි ඉක්මනින් ජනාධිපතිවරණය කැඳවීමටත් ජනාධිපති මෛත්‍රීපාල සිරිසේන සැලසුම් කරන බව ජනාධිපතිවරයාට සමීප ආරංචි මාර්ගවලින් වාර්තා වෙයි.
අපරාධ පරීක්ෂණ දෙපාර්තමේන්තුව හා ත්‍රස්ත විමර්ශන කොට්ඨාසය ජාතික තවුහිද් ජමාත් සංවිධානයට සම්බන්ධ 73 දෙනෙකු අත්අඩංගුවට ගෙන ඇති නිසාත්, එහි ප්‍රධාන සැකකරුවන් හා ඔවුන්ගේ දේපළ ආදිය පිළිබඳව තොරතුරු හෙළිදරව් කරගෙන ඇති නිසාත්, එම කල්ලිය පිළිබඳ පරීක්ෂණ කෙටි කාලයක් තුළ සාර්ථකව අවසාන වනු ඇතැයි පරීක්ෂණ අංශවල ප්‍රධානීන් දැනුම් දී තිබේ. ඒ අනුව එම මෙහෙයුම්වල තොරතුරු මාධ්‍යවලින් ප්‍රසිද්ධ කිරීමෙන් පසුව ජනාධිපතිවරණයක් කැඳවීම සඳහා පසුබිම නිර්මාණය වනු ඇතැයි අනුමාන කරන බව එම ආරංචිමාර්ග පවසයි.
ජනාධිපති මෛත්‍රීපාල සිරිසේන අප්‍රේල් මාසය අවසානයේදී ජනාධිපතිවරණයක් කැඳවීමට මුලින් සැලසුම් කර තිබී ඇති බවත්, අප්‍රේල් 23 වැනිදා ඒ සඳහා සුදුසු දිනය ලෙස නැකැත්කරුවන්ගෙන්ද උපදෙස් ලබාගෙන තිබෙන බවත් එම ආරංචි මාර්ග පවසයි. අප්‍රේල් මාසයේදී තිරුපති යෑමට ජනාධිපතිවරයා සැලසුම් කර තිබී ඇත්තේද ඒ අනුවය. අප්‍රේල් 21 ත්‍රස්ත ප්‍රහාරය එල්ලවීමෙන් පසුව එම සැලසුම් ව්‍යර්ථ වී ඇත.
ජනාධිපතිවරයාට සමීප මාධ්‍යවේදීන්, ජනාධිපති මාධ්‍ය අංශයේ සේවය කළ පුද්ගලයන් හා ජනාධිපති කාර්යාලයට සම්බන්ධ පුද්ගලයන් සිංහල අවුරුදු නිවාඩුවෙන් පසු විශේෂ පෙරළියක් බලාපොරොත්තු වන ලෙස දන්වමින් පුවත් පළ කර තිබුණේ එම ජනාධිපතිවරණ සැලසුම පිළිබඳව ඉඟි කරමින් බව එම ආරංචිමාර්ග පැවසීය. ජනාධිපති ලේකම් කාර්යාලයට සමීප පුද්ගලයෙකුද විශේෂ පෙරළියක් බලාපොරොත්තු වන ලෙස සමාජ මාධ්‍යවල පළ කර තිබුණේ ඒ පිළිබඳව බව වැඩිදුරටත් පැවසීය.
කෙසේ වෙතත් මේ පිළිබඳව අදහස් දැක්වූ ඒකාබද්ධ විපක්ෂයේ ප්‍රබල මන්ත්‍රීවරයෙකු පැවසුවේ, ඒකාබද්ධ විපක්ෂයටද ජනාධිපතිවරණයකදී සහාය ලබාදෙන ලෙස ජනාධිපතිවරයාගෙන් වක්‍රාකාර ඉල්ලීම් ලැබී තිබුණු බවයි. ජනාධිපතිවරණය තවත් මාසයකින් පමණ කැඳවනු ඇතැයි තම කණ්ඩායමටද දැනගන්නට ලැබී තිබෙන බව ඔහු කීය. ඒ නිසාම මේ වෙද්දී ඒකාබද්ධ විපක්ෂයේ මන්ත්‍රීවරුන් ජනාධිපතිවරයා ඉලක්ක කොට විවේචන කරන්නට පටන්ගෙන ඇති බව ඔහු කීය. ■
