අලුත්ගම දර්ගා නගරයට සිංහල බෞද්ධ අන්තවාදීන් පහරදීමට මොහොතකට පෙර ‘මුසල්මානුවන්ට අබ සරණ’ පැතූ කුප්‍රකට දේශනයකින් අන්තවාදීන්ට ජීවය පෙවූ ගලගොඩඅත්තේ ඥාණසාර හිමියන් මේ වෙද්දී වීර අනාවැකිකරුවෙකුගේ චරිතයට පණපොවා සිටින්නේය. අප්‍රේල් 29 වැනිදා හෝමාගම උසාවියට පැමිණි ඥාණසාර හිමි මාධ්‍ය ඉදිරියේ ඉතා නිවුණු ස්වරයෙන් වෙසක් පෝදා තවත් ප්‍රහාරයක් එල්ලවිය හැකි බව කීහ.
මීට පෙර ඥාණසාර හිමිගේ ක්‍රියාවලට සමාජ මාධ්‍යවල විරෝධය පළකළ අය ඥාණසාර හිමිගෙන් සමාව ඉල්ලන ආකාරයත් දක්නට ලැබිණ.
ඥාණසාර හිමියන් 2012 පමණ කාලයේ සිට ලාංකේය මුස්ලිම් ප්‍රජාවට එරෙහිව අන්තවාදී අදහස් පළ කරමින් සිංහල අන්තවාදය ශක්තිමත් කිරීමේ කටයුත්තට භූමියේ නායකත්වය දුන්නේය. අබ්දුල් රාසික් නම් මවුලවිවරයා ප්‍රමුඛ සිලෝන් තවුහිද් ජමාත් සංවිධානය එයට ප්‍රතිවිරුද්ධව ඉස්ලාම් අන්තවාදී මත පතුරුවමින් ඉස්ලාම් අන්තවාදී දේශපාලනයට නායකත්වය දුන්නේය. ඥාණසාරලාගේ ක්‍රියාකාරකම්වලින් තවුහිද් ජමාත් මතවාද සාධාරණීකරණය විය. අද ඉස්ලාම් අන්තවාදීන්ගේ ප්‍රහාරයකින් ඥාණසාර හිමියන් ඇතුළු කණ්ඩායමේ මතවාද සාධාරණීකරණය වී තිබේ.
වසර ගණනාවක් තිස්සේ එදා ප්‍රචණ්ඩ ලෙස ඉස්ලාම් අන්තවාදයට සරු පස හැදූ ඥාණසාර හිමි අද කතාකරන්නේ ඉතා නිවුණු ලෙසය. අනුකම්පාව දිනාගන්නා ආකාරයටය. අද ප්‍රධාන ධාරාවේ මාධ්‍ය, මාධ්‍යවේදීන්, විචාරකයන් ඇතුළු බොහෝ අය ඥාණසාර හිමිගේ සරණ ගොස් තිබේ.
හිරු ටීවී රූපවාහිනී නාලිකාවේ ප්‍රවෘත්ති අධ්‍යක්ෂ සුදේව හෙට්ටිආරච්චිද ‘ඥාණසාර හිමියන් කීවේ ඇත්ත’ යැයි සලකුණ වැඩසටහනකදී තදින් අවධාරණය කළේය. ඒ අනුව හිරු ප්‍රවෘත්ති අංශය මේ තීරණාත්මක මොහොතේදී ඉස්ලාම් ත්‍රස්තවාදයට එරෙහිව සිංහල බෞද්ධ අන්තවාදය සමඟ හිටගන්නා බව පෙන්වා ඇත. මේ වෙද්දී ඥාණසාර හිමි වසර හතරකට පෙර කළ අනාවැකිය යන මාතෘකාවෙන් හිරු ප්‍රවෘත්ති යූටියුබ් නාලිකාවෙන් ඥාණසාර හිමිගේ සම්මුඛ සාකච්ඡාවක් යළි ප්‍රසිද්ධ කර ඇත.
ඒ බොහෝ අය සඟවන්නට උත්සාහ කරන්නේ ඥාණසාර හිමියන් සිරගත වුණේ ඇයිද කියාය. 29 වැනිදා ඥාණසාර හිමියන් හෝමාගම උසාවියට ආවේ ඇයිද කියාය. එහිමියන් අද දඬුවම් ලබන්නේ සාපරාධී බිය වැද්දීම ගැන චෝදනා ඔප්පු වීම නිසාය. ඇත්තෙන්ම ඥාණසාර හිමි අධිකරණය ඉදිරියේ වරද පිළිගෙන තිබුණි.
‘තෝ පලයන්, තොගේ මිනිහා කොටියෙක්, තෝ ගිහින් හිඟා කාපිය‘ යැයි කියමින් 2016 ජනවාරි 25 වැනිදා සන්ධ්‍යා එක්නැළිගොඩට බැණවැදීමේ සිදුවීමට අදාල නඩුවේ තීන්දුවෙන් ඥාණසාර හිමියන්ට දඬුවම් නියම විය. ඒ අනුව සන්ධ්‍යා එක්නැළිගොඩට රුපියල් 50 000ක වන්දියක් ගෙවන ලෙස ඥාණසාර හිමියන්ට නියෝග කර තිබුණි. ඒ වන්දිය අප්‍රේල් 22 වැනිදා හෝමාගම මහේස්ත්‍රාත් අධිකරණයේදී ගෙවීමට නියමිතව තිබුණු අතර අප්‍රේල් 21 ත්‍රස්ත ප්‍රහාරය නිසා අප්‍රේල් 22 වැනිදා ඥාණසාර හිමිව උසාවි ගෙන ආවේ නැත. ඒ අනුව අප්‍රේල් 29 වැනිදා ඥාණසාර හිමියන් උසාවි ගෙන ආවේය. අද වීරත්වයෙන් ගෞරව ලබන ඥාණසාර හිමියන් යුක්තිය සොයන අසරණ හා අහිංසක කාන්තාවක බියට පත්කරමින් බැණවැදී දඬුවම් ලබන අයෙකි.
රුපියල් 50,000ක වන්දිය ගෙවීමේදී ඥාණසාර හිමියන්ද විතාරන්දෙණියේ නන්ද හිමි ඇතුළු ඥාණසාර හිමියන්ගේ ගෝලබාලයන්ද නැවතත් තම පහත් භාවිතාව පෙන්වා තිබුණි. රුපියල් 50,000 ගෙවා තිබුණේ ගුලිකරන ලද රුපියල් 20 හා 50 නෝට්ටු වලින්ය. එම මුදල් පුංචි බෑග් තුනක දමා, මඳක් විශාල ප්ලාස්ටික් බෑගයක තිබී ඇත. ඒ බෑග් ඇතුලේ මුදල් තිබී ඇති අතර 5000 කොළ දෙකක් පමණක් තිබී ඇත.
සන්ධ්‍යා එක්නැළිගොඩ මහත්මිය කීවේ ඒ මුදල් ගුලිකර තිබුණු නිසා තමන් ඒ මුදල් කොළ දිගහරිමින් ගණනය කළානම් එයට වරුවක් ගතවීමට ඉඩ තිබුණු බවය. ඇය අපහසුතාවයට පත්ව සිටියදී හිමිවරුන් කියා ඇත්තේ මේ මුදල් ශ්‍රී ලංකා ජනරජයේ වලංගු මුදල් බවය. පන්සල්වල පිංකැටවල තිබුණු මුදල් බවය.
කෙසේ වෙතත් විනිසුරු උදේශ් රණතුංග එම මුදල් බාරගෙන තිබුණේ නැත. උසාවියට මුදල් බාරදීමේ ක්‍රමවේදයක් ඇති බවත්, පිලිවෙලට සකසා මුදල් ගෙන එන ලෙසත් විනිසුරුවරයා නියෝග කර තිබුණි. ඒ අනුව පැයකට අඩු කාලයක් ඇතුලත නැවත පිළිවෙලට මුදල් රැගෙන ඒමට හිමිවරුන්ට සිදුවී තිබේ.
මේ මුදල් නෝට්ටු ගුලි කර ගෙන ආවේ සන්ධ්‍යා එක්නැළිගොඩ මහත්මියව එයින් හෝ අපහසුතාවයට පත් කිරීමේ පහත් අරමුණකින් බව අමුතුවෙන් කිව යුතු නැත. මේ මලු තුනේ රුපියල් 50 000ක් තිබෙන බව තහවුරු කරගන්නට නම් එහිමිවරුන්ට අනිවාර්යයෙන්ම ඒ මුදල් ගණනය කිරීමට සිදුවේ. පහත් අරමුණු නැතිනම් ඒ මුදල් මුලින් ගණනය කරන අවස්ථාවේ පිළිවෙලට සැකසීමේ හැකියාව තිබුණි.
අනෙක් අතට පන්සල්වලට පැමිණෙන දායකයන් පිං කැටවලට මුදල් දමන්නේ උතුම් ක්‍රියාවලට එම මුදල් යොදවන බව සිතමින් විය යුතුය. අසරණ කාන්තාවන්ව බියවද්දා දඬුවම් ලබන පුද්ගලයන්ගේ වන්දි ගෙවන්නට ඒ මුදල් පාවිච්චි කරනු ඇතැයි පිංකැටයකට මුදල් දමන බෞද්ධයෙක් බලාපොරොත්තු නොවෙනවා විය හැකිය.
ඥාණසාර හිමිට පොදු සමාව ඉල්ලන උදවිය මතක තබාගත යුත්තේ එහිමියන් රටේ අනාගතය දුටු අනාවැකිකරුවෙක් නොවන බවය. සාමයේ නියෝජිතයෙක්ද නොවන බවය. එහිමියන් ඇතුළු දුශ්ශීල හිමිවරුන්ගෙන් බලාපොරොත්තු විය හැක්කේ රට තව තවත් වෛරයෙන් අවුළුවන අන්තවාදී ක්‍රියා හා මෙවැනි පහත් ක්‍රියා පමණක් බවය. ■
