අඩි 4 දශම 5ක පුංචි මිනිසෙක් තුන්වැනි වතාවටත් ජයගත් සම්මානය ලබාගන්නට 2018 වසරේ පැවැත්වූ එමී සම්මාන උළෙලේදී වේදිකාවට නැඟුණා. ලංකාව වැනි රටවල නිට්ටෑවන් යැයි පුංචි මිනිස්සුන්ව හඳුන්වන යුගයෙක ඔහු රංගනය වෙනුවෙන් සම්මාන ගන්නට වේදිකාවට ගොඩවීම අපූරුයි.
ඔහු වෙනුවෙන්ම නොඋස් ආධාරකයක මයික්‍රොෆෝනයක් රඳවා තිබුණා. බොහොම සැහැල්ලුවෙන් සම්මානය ගැන කතාකළ ඔහු තමන් රඟපෑ රූපවාහිනී මාලා නාටකය නිර්මාණය කළ අයට ස්තූති කළේ තමන්ට පාරේ බැස යා නොහැකි තත්වයක් ඇති කළාටයි.
ඔහු ගේම් ඔෆ් ත්‍රෝන්ස් නමැති, ලොව බිහිවූ ජනප්‍රියම මාලා නාටකයේ ටිරියන් ලැනිස්ටර්ගේ චරිතය රඟපෑ රංගන ශිල්පී පීටර් හේඩන් ඩින්ක්ලේජ්. ඔහු ලොව ධනවත්ම රංගන ශිල්පියෙක්. ඉහළම මිලක් අයකරන රංගන ශිල්පියෙක්. විශිෂ්ඨතම රංගන ශිල්පියෙක්.
වසර ගණනාවකට පෙර පීටර් ඩින්ක්ලේජ් නම් තරුණ වෘත්තිමය රංගන ශිල්පියා හිටියේ තමන්ගේ විශේෂ ශරීර තත්වයට ගැලපෙන චරිත නොමැති වීමේ අභියෝගයට මුහුණදෙමින්. ඔහුගේ සිරුරට ගැලපෙන චරිත නැති නිසා ඔහුට නිර්මාණ ලැබුණේ නැහැ. එහෙත් අද ලොව දැවැන්තම රූපවාහිනී හා සිනමා තිරපිටපත්වල ඔහුගේ තත්වයටම ගැලපෙන පරිදි ඔහු වෙනුවෙන් චරිත ලියැවෙනවා.
ඔහු එතැන සිට මෙතැනට ආවේ ගේම් ඔෆ් ත්‍රෝන්ස් කතා මාලාවට පිංසිද්ධ වෙන්නට නොවෙයි. පිංසිද්ධ වෙනවානම් විය යුත්තේ ඔහුගේම හැකියාවට හා ධෛර්යයටයි. ගේම් ඔෆ් ත්‍රෝන්ස් මාලා නාටකයේ කොටස් මාලා හතක් 2010 සිට මේ දක්වා එච්.බී.ඕ. නාලිකාවෙන් වාර්ෂිකව විකාශය වුණා. විකාශය නොවුණේ 2018 අවුරුද්දේ පමණයි. තිරගත වුණු කොටස් මාලා හතේදීම ඔහු හොඳම රංගනය වෙනුවෙන් ග්‍රැමී සම්මානයට නිර්දේශ වුණා. ඒ අවස්ථා හතෙන් තුනකදීම ඔහු සම්මානය ලබාගත්තා. අනෙක් සිව් වතාවේදීම සම්මානය හිමිවිය යුත්තේ ඔහුට බව ලියූ විචාරකයන් සිටිනවා.
ලොව ජනප්‍රියම කතා මාලාව වන ගේම් ඔෆ් ත්‍රෝන්ස් කතා මාලාවේ සම්පූර්ණ සාරය කැටි කරගත් චරිතය ටිරියන් ලැනිස්ටර් බව පැහැදිළියි. ප්‍රබලයන් පිරුණු සමාජයක, මහා යුද්ධය මාලාවකට මුහුණදෙමින් අවසානය දක්වා ආ අඩුපාඩු සහිත මිනිසුන්ගේ කතාවක් ලෙස ගේම් ඔෆ් ත්‍රෝන්ස් විටෙක කියවාගත හැකියි. අවජාතකයා යැයි සමාජ ගර්හාවට නිතර ලක්වූ ජොන් ස්නෝ හමුවේ වතාවක් ටිරියන් ලැනිස්ටර් මෙසේ කියනවා.
‘ඔයා කවුද කියලා අමතක කරන්න එපා. ලෝකෙ අනෙක් අය අමතක කරන්නෙ නෑ. ඒක පලිහක් වගේ පැළඳගන්න. එහෙම වුණොත් කවදාවත් ඔයාට රිද්දන්න ඒක පාවිච්චි කරන්න බෑ.‘ ටිරියන්ගේ එම ප්‍රකාශය මෙන්ම ඔහු කතා මාලාවේදී කියූ කියමන් බොහොමයක් නූතන සමාජයේ ආදර්ශපාඨ ලෙස එදිනෙදා පාවිච්චි වෙනවා. ඔහුගේ චරිතය එතරම්ම ප්‍රබලයි.
පීටර් ඩින්ක්ලේජ්ගේ මුල් කාලීන රංගන දිවිය එතරම් සුවදායක එකක් වී තිබුණේ නැහැ. 1991 දී බෙනිංටන් විද්‍යාලයෙන් රංගනය පිළිබඳ උපාධියක් ලැබීමෙන් පසුව නිව්යෝක් නගරයට පැමිණ නාට්‍ය සමාගමක් නිර්මාණය කර තිබුණේ ඉයන් බෙල් නම් සිය මිතුරාත් සමඟ. එහෙත් ටික කාලයකින්ම ඒ නාට්‍ය සමාගම අසාර්ථක වුණාලු. ගොඩනැඟිල්ලට කුලී ගෙවීම තමා නිවෙසකට කුලී ගෙවන්නටත් නොහැකි තත්වයකට ඔහු ඇදවැටී තිබුණා. ඉන්පසුව රැකියාවක් නැතිව ඔහු දිගු කාලයක් ගත කර තිබුණා. අවසානයේදී ඔහුට දත්ත ඇතුලත් කරන්නෙක් ලෙස රැකියාවක් ලැබී තිබුණා. ඒ රැකියාව කරමින් වසර හයක් ගතකළ ඔහු එක්වරම ඒ රැකියාව අත්හැර වෘත්තිමය රංගන ශිල්පියෙකු වීමේ අවදානම් සහගත තීරණයක් ගෙන තිබුණා.
තමන් රංගනය පිළිබඳ උපාධිය ලැබූ බෙනිංටන් විද්‍යාලයේ උත්සවයකට සහභාගී වෙමින් ඔහු ඒ අතීත කතාව ගැන කතාකර තිබුණා.
‘එදා මට නොතිබුණේ මුදල්. බැංකු ගිණුමක්. කෙඩිට් කාර්ඞ් එකක් සහ. අපාර්ට්මන්ට් එකක්. මට තිබුණේ දිනෙන් දින වැඩිවෙන ණය හා බඩගින්න විතරයි.
මම දත් බුරුසු හා මේස් එක්ක මගේ මල්ලට ජීවිතය පැක් කරගත්තා. ඊට පස්සේ මම යාලුවන්ගේ නිවෙස්වල කවිච්චිවල නිදාගන්න පටන්ගත්තා. මම මාස පහක් තිස්සේ පියානෝ කඩයක පියානෝවල දූවිලි පිහදැම්මා. මම විවිධාකාර රැකියා කළා. ටික කාලයක් රැකියා නැතිවත් හිටියා. ටික කාලෙකින් මට යන්තමින් අපාර්ට්මන්ට් එකක් ගන්න පුලුවන්කම ලැබුණා. ඒත් මා එක්ක හිටපු කාමර සගයා නොකියාම අතුරුදන් වුණා. ආයෙත් කවිච්චි ගමන ආයෙත් පටන්ගත්තා. අවුරුදු දෙකකට පස්සේ යන්තම් මට ජොබ් එකක් ලැබුණා. දත්ත ඇතුලත් කරන්නෙක් විදියට. මම එතැන අවුරුදු හයක් තිස්සේ රැකියාව කළා. අවුරුදු 23 ඉඳන් 29 වෙනතුරු. ඉන්පසුව තමයි මට ස්ථාවර නවාතැනක යම් ජීවිතයක් ගොඩනඟාගන්න ලැබුණේ. එතැන මම හොඳට හිටියා. වැඩකරපු අය මට හරි කැමතියි. මම නිතර විහිළුතහළු කළා. කෑවා, බිව්වා.
බැලූ බැල්මට සියල්ල හොඳින් සිද්ධවුණත්, මම ඒ රැකියාවට වෛර කළා. ඒත් ඒ රැකියාව නිසා මගේම තැනක් හදාගන්න මට පුලුවන් වුණා. ඒත් මට අවුරුදු 29 දී මම මටම කිව්වා මොන තරම් සිල්ලර පඩියකට වුණත්, ඊළඟට ලැබෙන රංගන වැඬේ බාරගන්නවා කියලා. ඉන්පස්සේ වෘත්තිමය නලුවෙක් වෙනවා කියලා. මට ලැබුණා බොහොම අඩු වැටුපක් ගෙවන වේදිකා නාට්‍යයකට. ඉම්පර්ෆෙක්ට් ලව් තමයි ඒ නාට්‍යයේ නම. ඒ නාට්‍යය 13 මූන්ස් කියන චිත්‍රපටිය විදියට ප්‍රතිනිර්මාණය වුණා. එතැනින් පස්සේ මට තවත් චරිත ලැබුණා. ඒවායේ රඟපෑ හින්දා තවත් චරිත ලැබුණා. ඒ සියල්ල මාව මෙතැනට ගෙනාවා.
අවුරුදු 29 දී දත්ත ඇතුලත් කරන්නෙකුගේ රැකියාව අත්හරිද්දී මම හිටියේ බයවෙලා. ගෙයක් නැතිව අවුරුදු 10කින් පස්සේ අවුරුදු හයක් ජොබ් එකක් කරපු මම හිරවෙලා හිටියේ. සමහර විට මම වෙනසකට බයවෙන්න ඇති.
විශේෂ අවස්ථා එනතුරු බලා ඉන්න එපා. එහෙම අවස්ථා කවදාවත් එන්නේ නැහැ. ඔබව විග්‍රහ කෙරෙන සිදුවීම් දැනටමත් සිද්ධවෙලා ඉවරයි. ඒවා බොහොම ඉක්මනින් පහුවෙනවා. සමහර වෙලාවට ඔබ පීලි පනීවි. ඒත් ඉක්මනින්ම යමක් සිද්ධවේවි. විශ්වාස කරන්න. රිද්මයක් ලැබේවි. අවුරුදු 29ක් දක්වා ඉන්න එපා.
ඔබ සූදානම් කියා ඔවුන් කියනතුරු ඉන්න එපා. ඔබ සූදානම් බව ඔබ කියන්නත් එපා. යන්න. ඔබ සූදානම් බව පෙන්වන්න.‘ ඔහු ඒ කතාවේදී එසේ කියනවා.
ඔහු තම කතාව අවසන් කරද්දී සැමුවෙල් බෙකට්ගේ කියමනක් උපුටනවා.ිඋත්සාහ කර තිබුණත්, අසාර්ථක වී තිබුණත් අදාල නැහැ. ආයෙ උත්සාහ කරන්න. ආයෙ අසාර්ථක වෙන්න. වඩා හොඳින් අසාර්ථක වෙන්න.’
ඔහු මුල්ම කාලයේදී සිනමාවේ ආර්ථික වශයෙන් අසාර්ථක වූ නිර්මාණ ගණනාවක රඟපෑවා. 2003 දී ස්ටේෂන් ඒජන්ට් නම් චිත්‍රපටිය සාර්ථක වෙනතුරුම ඔහු නැවත නැවතත් අසාර්ථකත්වයේ රස බැලුවා. එහෙත් ඔහුගේ රංගන ප්‍රමිතිය මුල් කාලයේ හැම නිර්මාණයකම තැවරී තිබුණා.
එච්.බී.ඕ. නාලිකාව ඇමෙරිකාවේ දැවැන්තම නාලිකාවක්. ඔවුන් ගේම් ඔෆ් ත්‍රෝන්ස් රූපවාහිනී කතා මාලාව පටන්ගනිද්දීම එය දැවැන්ත මුදලක් වෙන්කළ ව්‍යාපෘතියක් ලෙස සැලසුම් කර තිබුණා. එතරම් දැවැන්ත නිර්මාණයක රඟපෑම ඕනෑම ශිල්පියෙකුට ගෞරවයක්. ගේම් ඔෆ් ත්‍රෝන්ස් නිෂ්පාදකයන් එහි චරිතයක් වෙනුවෙන් මුලින්ම එකඟතාවයකට ආ රංගන ශිල්පියා පීටර් ඩින්ක්ලේජ්. එහෙත් ඩින්ක්ලේජ් මුලින්ම ඒ චරිතය ප්‍රතික්ෂේප කර තිබුණා. ඔහු ඒ වෙද්දීත් ගොඩනඟාගෙන සිටි වෘත්තිමය අභිමානය එබඳුයි. ඒ අරුතින් පීටර් ඩින්ක්ලේජ් නම් පුංචි මිනිසා ලෝකයේ ඕනෑම අයෙකුට මහා ආදර්ශයක් බව කිව හැකියි.
