Former DIG Nalaka Silva Who Was arrested by the CID over VIP assasination allegations further remanded till 26 March – Reporter ada derana .lk
මේ ‘අද දෙරණ’ එස්එම්එස් නිව්ස් ඇලර්ට්, දැන් දීර්ඝ කාලයක් තිස්සේ කියාගෙන එන මහා බොරුවේ තවත් අවස්ථාවකි. මේ පණිවුඩය ලැබුණේ මාර්තු 19 වැනිදා පෙරවරු 11.59ටය.
මේ එසැණ ප්‍රවෘත්තියේ ඇති බොරුව කුමක්ද? ‘වීඅයිපී’ ඝාතන චෝදනාවක් ගැන හිටපු නියෝජ්‍ය පොලිස්පති නාලක සිල්වා අත්අඩංගුවට ගෙන ඇත්තේයැ’යි කීමයි.
නාලක සිල්වා අත්අඩංගුවට ගෙන ඇත්තේ වීඅයිපී හෙවත් ප්‍රභූ ඝාතන කුමන්ත්‍රණයක් ගැන තිබෙන චෝදනා මත නොවේ. ජ්‍යෙෂ්ඨ පොලිස් අධිකාරි ප්‍රසන්න අල්විස් ඝාතන කුමන්ත්‍රණයක් ගැන චෝදනා මතය. පසුගිය කාලයේ මාධ්‍ය වීරයකු බවට පත්කෙරුණු, අද අන්තවාදීන් සමග අත්වැල් අල්ලාගෙන සිටින, නාමල් කුමාර සීඅයිඩීයට ලබාදුන් සංවාද හඬ සහිත සීඩී පිරික්සීමේදී, නාමල් කුමාර හා නාලක සිල්වා අතර ඇතිවූ සංවාද එළිදරව් විය. සීඅයිඩීය අධිකරණයට දැනුම් දී ඇති ආකාරයට, ඒ සංවාදවලින් ප්‍රසන්න අල්විස් ඝාතන කුමන්ත්‍රණයක් ගැන තහවුරු වන තොරතුරු එළිදරව් වී තිබේ.
මීට සති දෙකකට පෙර, එනම් මාර්තු 6 වැනිදා, මේ නඩුව කොටුව මහේස්ත්‍රාත් අධිකරණයේදී කැඳවූ විට නීතිපති දෙපාර්තමේන්තුවේ නියෝජ්‍ය සොලිසිටර් ජෙනරාල් දිලීප පීරිස් පැහැදිලිවම අධිකරණයට දැනුම් දුන්නේ, ජ්‍යෙෂ්ඨ පොලිස් අධිකාරි ප්‍රසන්න අල්විස් ඝාතන කුමන්ත්‍රණයක් ගැන එම සංවාදවලින් එළිදරව් වන බවයි. ඒ තොරතුරු, ඔහුට හා නාමල් කුමාරට, ප්‍රසන්න අල්විස් මහතා ඝාතනයට කුමන්ත්‍රණය කිරීමේ චෝදනා යටතේ නඩු පැවරීමට ප්‍රමාණවත් වන බවයි. එහෙත්, ඔහු කිසිම අවස්ථාවක මේ කියන ඊනියා ප්‍රභූන්, එනම් ජනාධිපති මෛත්‍රීපාල සිරිසේන හා ගෝඨාභය රාජපක්‍ෂ, ඝාතනයට කුමන්ත්‍රණය කිරීමට නාලක සිල්වා සම්බන්ධයක් තිබෙන බවට වචනයක්වත් අධිකරණයට නොකීවේය. එසේ වුවද, පසුදා සියලු සිංහල පුවත්පත්වල තිබුණේ, ‘ප්‍රභූ ඝාතනය ගැන’ නාලක සිල්වාට එරෙහිව නඩු පැවරීමට තරම් කරුණු ඇතැයි දිලීප පීරිස් මහතා අධිකරණයට කී බවට වූ, පැල කරන ලද බොරුවකි.
නාමල් කුමාරගේ පටිගත සංවාද සිය ගණනක, හරියටම කිව්වොත් 531ක, කිසිම තැනක ජනාධිපති සිරිසේන හෝ ගෝඨාභය රාජපක්‍ෂ ඝාතනයක් ගැන වචනයක්වත් සඳහන් නොවේ. මේ බව සීඅයිඩීය විසින් ජනාධිපතිවරයාටද දන්වනු ලැබ තිබේ. එසේ තිබියදීත් ජනාධිපතිවරයා, ‘ඝාතන කුමන්ත්‍රණය ගැන ඇත්ත නැත්ත සති දෙකකින් සීඅයිඩී වාර්තාවෙන් දැනගත හැකියැ’යි ඇත්තක් නොවන යමක් ප්‍රසිද්ධියේ කීවේය. එහෙත් සති දෙකකින් සීඅයිඩී වාර්තාවක් ආවේත් නැත. වාර්තාවක් ආවත්, සිරිසේන ඝාතන කුමන්ත්‍රණයක් ගැන එහි සඳහන්වන්නට ඉඩක් ද නැත. එවැන්නක් ඇත්තටම නැති නිසාය.
මේ කරුණු කාරණා දැනටමත් කොටුව මහේස්ත්‍රාත් අධිකරණයේ තිබෙන ප්‍රසිද්ධ ලේඛනයක් වන අදාළ නඩු ගොනුව පරීක්‍ෂා කිරීමෙන් ඕනෑම ‘රිපෝටර්’ කෙනකුට දැනගත හැකිය. එසේ තිබියදීත් මේ රිපෝටර්ලා එකම බොරුවක් දිගින් දිගටම වපුරන්නේ ඇයි? ජනාධිපති හා ගෝඨාභය ඝාතන තැතක් තිබුණු බවට සමාජගත කර, එහි දේශපාලන වාසිය තමන්ගේ එකී දේශපාලන හාම්පුතුන්ට අත්කර දීමටද? තමා ඝාතන කුමන්ත්‍රණයක් ගැන බොරු කියමින් අගමැති ඉවත් කළ ජනාධිපති සිරිසේනගේ ඔක්තෝබර් 26 කුමන්ත්‍රණයට සුදුහුණු ගෑමටද?■
■ අරුණ ජයවර්ධන
