ගෝඨාභය රාජපක්ෂ ශ්‍රී ලංකා පොදුජන පෙරමුණේ ජනාධිපති අපේක්ෂකයා බව මහින්ද රාජපක්ෂ තීරණය කිරීමත් සමග රට තුළ උද්ගතවී තිබෙන දේශපාලන තත්ත්වය සැලකිල්ලට ගෙන තමන්ට සිටින ජනප්‍රියම නායකයා වන සජිත් ප්‍රේමදාස ජනපති අපේක්ෂකයා ලෙස නම් කළ යුතුයැ’යි එජාප මන්ත්‍රී කණ්ඩායම අතර සාකච්ඡාවක් ආරම්භවී ඇතැයි වාර්තා වේ.
මේ පිළිබඳව අදහස් දැක්වූ එජාප අමාත්‍යවරයෙකු ප්‍රකාශ කළේ මෙම අවස්ථාව රනිල් වික්‍රමසිංහ මහතාට තිබෙන අවසන් අවස්ථාව වූවත්, පැරදෙන අපේක්ෂකයෙකු ජනාධිපතිවරණයට ඉදිරිපත් කිරීමට තම පක්ෂය සූදානම් නැති බවය. ඒ අනුව පක්ෂයේ බොහෝ දෙනෙකු මෙවර ජනාධිපති අපේක්ෂකයා ලෙස සජිත් ප්‍රේමදාස නම්කරන්න යැයි ඉල්ලමින් සිටින බවද ඔහු ප්‍රකාශ කළේය. අලුතින් උද්ගතවී තිබෙන මෙම තත්ත්වය පිළිබඳව එළැඹෙන සතියේදී සජිත් ප්‍රේමදාස මහතා හමුවී සාකච්ඡා කිරීමට මන්ත්‍රී කණ්ඩායමක් සුදානමින් ඇතැයි ප්‍රකාශ කරන ඒ මහතා, පක්ෂයේ නායකත්වය සමග ජනාධිපති සටන මෙහෙයවන්න අවශ්‍ය සියලු බලය පක්ෂය ඔහුට පවරන්නේ නම් ඔහු ඒ සඳහා සූදානම් බව දැනගන්නට ඇතැයිද කීවේය.
මේ වනවිට තම පක්ෂය ගමින් ගමට යමින් ජනතාව ඒකරාශී කරමින් සිටින බව ප්‍රකාශ කරන ඔහු වැඩිදුරටත් ප්‍රකාශ කළේ රනිල් වික්‍රමසිංහ, සජිත් ප්‍රේමදාස, පාඨලී චම්පික රණවක, රාජිත සේනාරත්න යන නම් පිළිබඳව මේ මොහොතේදී පක්ෂය තුළ සාකච්ඡාවක් ඇතිවී ඇති බවයි. එහෙත් තම පක්ෂයේ ජනප්‍රියම නායකයා වන සජිත් ප්‍රේමදාස කෙරෙහි වැඩි අවධානයක් ගෝඨාභය රාජපක්ෂගේ ආගමනය සමග සිදුවී ඇති බවද ඔහු ප්‍රකාශ කරයි. ■
