ශ්‍රී ලංකා පොදුජන පෙරමුණේ ජනාධිපතිවරණ අපේක්ෂකයා ලෙස ගෝඨාභය රාජපක්ෂ ඉදිරිපත් කිරීම සඳහා මහින්ද රාජපක්ෂ තීරණය කර ඇතැයි එම පක්ෂයේ ප්‍රබලයෙක් අනිද්දා වෙත ප්‍රකාශ කළේය.
ගෝඨාභය රාජපක්ෂ මීළඟ ජනාධිපති අපේක්ෂකයා ලෙස තරගවැදීමේ තීරණය පසුගිය 2018 වර්ෂය අවසන් වනවිටද රාජපක්ෂ පවුල තීරණය කර තිබුණ බව කී එම ප්‍රකාශකයා තවදුරටත් පැවසුවේ එලඹෙන අගෝස්තු මාසය වනවිට පක්ෂයේ මෙම තීරණය නිල වශයෙන් රටට ඉදිරිපත් කරන බවය.
මාර්තු 13 වෙනිදා බත්තරමුල්ල නෙළුම් මාවතේ පොදුජන පෙරමුණේ පක්ෂ කාර්යාලයේ පැවති මාධ්‍ය හමුවකදී ද බැසිල් රාජපක්ෂ ප්‍රකාශ කර තිබුණේ තම පක්ෂයේ මීළඟ ජනාධිපතිවරණ අපේක්ෂකයා රාජපක්ෂවරයෙකු වන බවය. ඔහු වැඩිදුරටත් ප්‍රකාශ කළේ ඔහු කවුරුන්ද යන තීරණය මේ වනවිටද අරගෙන තිබෙන බවය.
අනිද්දා වෙත අදහස් දක්වමින් ඉහත ප්‍රකාශකයා පැවසුවේ වාසුදේව නානායක්කාර, කුමාර වෙල්ගම ආදින්ට ගෝඨාභය අපේක්ෂකයා වීම පිළිබඳව තිබුණු ප්‍රශ්න ඔවුන් මුහුණට මුහුණ මුණගැසී සාකච්ඡාකර මේ වනවිට විසඳාගෙන ඇති බවය. ඔහු වැඩිදුරත් පැවසුවේ ගෝඨාභය රාජපක්ෂ තරගයට එන්නේ නම් ඔහුට ජනාධිපති සිරිසේනගේ සහාය ලබාගැනීම සඳහා විමල් වීරවංශ පෙරමුණ ගෙන සාකච්ඡා කරන බවය. එහිදී උපජනාධිපති තනතුරක් ඇතිකිරීම, ජාතික ලැයිස්තු මන්ත්‍රී ධුර සිරිසේන පාර්ශ්වයට ලබාදීම ආදි කරුණු මූලික කරගෙන සාකච්ඡා පවත්වන බවය. ■
අපේක්ෂකයා ගෝඨා මහින්ද තීරණය කරලා
- Advertisement -
