අරුණ ජයවර්ධන
වසර දහයකට පෙර, තරුණ ශිෂ්‍යයන් ඇතුළු එකොළොස් දෙනකු කප්පම් ලබාගැනීම සඳහා පැහැරගෙන ගොස් ඝාතනය කොට මළසිරුරු මුහුදට දැමීමේ අපරාධයට සම්බන්ධ සැකකරුවන්ට එරෙහිව මහාධිකරණය ඉදිරියේ අධිචෝදනා ගොනුකිරීමට නීතිපතිවරයා තීරණය කොට තිබේ. බොහෝ විට ඒ නඩුව, එක් මහාධිකරණ විනිසුරුවරයකු හමුවේ වෙනුවට, ත්‍රිපුද්ගල මහාධිකරණ විනිසුරු මඬුල්ලක් හමුවේ විභාගයට ගනු ඇත. නීතිපතිවරයා ඒ සඳහා ඉල්ලීම කළ පසු අගවිනිසුරුවරයා, එම ත්‍රිපුද්ගල මහාධිකරණ විනිසුරු මඬුල්ල ඉදිරියේදී නම් කිරීමට නියමිතය.
මේ අපරාධයේ එක් සැකකරුවකු වන හිටපු නාවික හමුදාපති අද්මිරාල් වසන්ත කරන්නාගොඩ, තමා අත්අඩංගුවට ගන්නට යන්නේ යැ’යි දැනගන්නට ලැබී තිබෙන බැවින්, එය වළක්වන නියෝගයක් නිකුත් කරන්නැ’යි ශ්‍රේෂ්ඨාධිකරණය ඉදිරියේ පෙත්සමක් ගොනුකොට තිබේ. ඒ පෙබරවාරි 22වැනි සිකුරාදාය. ඊට පෙර දින, එනම් පෙබරවාරි 21 වැනිදා, ප්‍රකාශයක් ලබාදීම සඳහා අපරාධ පරීක්‍ෂණ දෙපාර්තමේන්තුවට එන්නැ’යි ඔහුට දන්වා තිබිණ. එදින අත්අඩංගුවට ගනීවියැ’යි බියෙන් ඔහු රහස් පොලිසියට ගියේ නැත. ඒ වෙනුවට පසුවදා ශ්‍රේෂ්ඨාධිකරණය ඉදිරියේ මූලික අයිතිවාසිකම් පෙත්සමක් ගොනු කළේය. එදාම, කොළඹ මහේස්ත්‍රාත් අධිකරණයේ මේ අපරාධය පිළිබඳව කෙරෙන විමර්ශනයට වාර්තාවක් ඉදිරිපත් කළ රහස් පොලිසියේ පොලිස් පරීක්‍ෂක නිශාන්ත සිල්වා, මේ අපරාධයේ එක් සැකකරුවකු හැටියට විශ්‍රාමික නාවික හමුදාපති වසන්ත කුමාර ජයදේව කරන්නාගොඩ නම් කළේය. ඒ, මනුෂ්‍ය ඝාතන කිරීම සඳහා කුමන්ත්‍රණය, එම ඝාතනවලට ආධාර අනුබල දීම, අපරාධයක තොරතුරු වසං කිරීම හා අපරාධයක් ගැන අසත්‍ය තොරතුරු පොලිසියට ලබාදීම යන චෝදනා යටතේය.
කරන්නාගොඩ ශ්‍රේෂ්ඨාධිකරණයට ඉදිරිපත් කළ සිය පෙත්සමෙන්, එකී අපරාධයට තමා සම්බන්ධයක් නැති බව කියා තිබේ. එහෙත්, මේ වන විට ඔහු යටතේ සිටි නාවික නිලධාරීන් 13ක්ද මේ අපරාධය සම්බන්ධයෙන් අත්අඩංගුවට පත්වී හෝ චෝදනා ලබා හෝ සිටිති. පෙබරවාරි 28 වැනිදා කරන්නාගොඩගේ අයිතිවාසිකම් පෙත්සම විමසූ අවස්ථාවේ, කරන්නාගොඩ අත්අඩංගුවට නොගන්නේයැ’යි පොරොන්දුවක් දිය හැකිදැ’යි විනිසුරුවරුන් විමසූ විට, අතිරේක සොලිසිටර් ජෙනරාල් විරාජ් දයාරත්න කීවේ එවැනි පොරොන්දුවක් විය නොහැකි බවයි. පෙත්සම පිළිබඳ යළි විමසීම මාර්තු 7 වැනිදාට යොදා තිබේ. කෙසේ වෙතත් කාලයක් නාවික හමුදාවේ සර්වබලධාරී නායකයා හැටියට සිටි කරන්නාගොඩ මේ දවස්වල සිටින්නේ ඉන්නා තැන හොයාගන්නට බැරි වන ලෙස හැංගිලාය.
තමා අත්අඩංගුවට ගනීවි යැයි බියෙන් ශ්‍රේෂ්ඨාධිකරණය ඉදිරියේ දනින් වැටී සිටින වසන්ත කරන්නාගොඩ, පෙර කී 11 දෙනා ඝාතනය කරන්නට පෙර ඒ ගැන හොඳින් දැනසිටි බවට රහස් පොලිසිය නිශ්චිත කරුණු සොයාගෙන තිබේ. ඒ බව දැනගත් මොහොතේම ඊට එරෙහිව ඔහු පියවර ගත්තේ නම්, අද රජිව් නාගනාදන්ලාගේ, ප්‍රදීප් ජෙගනාදන්ලාගේ අම්මලාට ජීවිත කාලය පුරා හූල්ල හූල්ලා ඉන්නට සිදුවන්නේ නැත.
කෙසේ වෙතත්, මහේස්ත්‍රාත් අධිකරණය ඉදිරියේ ගොනුවී ඇති තොරතුරු අනුව, වසන්ත කරන්නා ගොඩ, මේ 11 දෙනා ඝාතනය කිරීමට දැනුවත්වම ඉඩ හැරීමෙන්, හවුල්වී තිබේ. ඒ ගැන කොරතුරු රහස් පොලිසිය හමුවේ හෙළිවී ඇත්තේ, වර්තමාන නාවික හමුදාවේ මාණ්ඩලික ප්‍රධානී රියර් අද්මිරාල් ජේජේ රණසිංහ, කරන්නාගොඩගේ හමුදා ලේකම් රියර් අද්මිරාල් ශේමාල් ප්‍රනාන්දු, හිටපු නාවික හමුදාපති අද්මිරාල් ට්‍රැවිස් සින්නයියා, නාවික බුද්ධි අංශයේ හිටපු අධ්‍යක්‍ෂ අද්මිරාල් ආනන්ද ගුරුගේ ආදින් රහස් පොලිසියට දුන් ප්‍රකාශවලිනි.
හිටපු නාවික හමුදාපති ට්‍රැවිස් සින්නයියා ප්‍රකාශ කර ඇත්තේ, එවකට තමා ත්‍රිකුණාමල නාවික කඳවුරද ඇතුළත් නැගෙනහිර නාවික විධානය භාරව සිටි බවත්, ත්‍රිකුණාමල කඳවුරේ ගන්සයිට් නමැති භූගත ස්ථානයේ පුද්ගලයන් සිරකර සිටි බවත්ය. එහෙත්, මේ රඳවා ගැනීම් සම්බන්ධයෙන් කිසිවක් කිරීම, ගන්සයිට් වෙත යන එන වාහන පරීක්‍ෂා කිරීම, වසන්ත කරන්නාගොඩ විසින් තමාට තහනම් කර තිබුණු බවත්ය. ඔහු තවදුරටත් කියා ඇත්තේ, හිටපු නාවික හමුදා ප්‍රකාශක ඩීකේපී දසනායකට හා ත්‍රිකුණාමල කඳවුරේ අණදෙන නිලධාරී සුමිත් රණසිංහට පමණක් එකී ගන්සයිට් ප්‍රදේශය පාලනය වසන්ත කරන්නා ගොඩ විසින් ඔහුගේ ඍජු පරීක්‍ෂාව යටතේ පවරනු ලැබ තිබුණු බවත්ය.
කොමදෝරු විජය බණ්ඩාර රහස් පොලිසියට ප්‍රකාශ කර ඇත්තේ, ගන්සයිට් පතොරම් ගබඩාවේ තරුණ ශිෂ්‍යයන් 5 දෙනකු රඳවා සිටින බව තමා දැනගත් බවත්, ඒ බව 2009 මැයි 10 වැනිදා තමා කරන්නාගොඩට දැනුම් දුන් බවත්ය. ශ්‍රේෂ්ඨාධිකරණයට ගොනුකළ තමාගේ පෙත්සමෙන් කරන්නා ගොඩද මේ කාරණය පිළිගෙන තිබේ. එනම්, මැයි 10වැනිදා මේ රඳවා තබා ගැනීම ගැන තමා දැනසිටි බවයි. තමාගේ පෙත්සමේදී කරන්නාගොඩ කියන්නේ, ‘තමාගේ පෞද්ගලික ආරක්‍ෂක නිලධාරී ලෙෆ්ටිනන්ට් කමාන්ඩර් සම්පත් මුණසිංහ විසින් තරුණයන් කිහිපදෙනකු පැහැරගනු ලැබ ත්‍රිකුණාමලයේ නාවික කඳවුරේ රඳවාගෙන සිටින බවට චෝදනා සහිත දැනුම්දීමක් 2009 මැයි 10වැනිදා තමාට ලැබුණු බව’යි. තමාට ඒ බව කීවේ කවුදැ’යි කරන්නා ගොඩ සිය පෙත්සමෙන් කියන්නේ නැත. එහෙත්, සම්පත් මුණසිංහ එම අපරාධය සම්බන්ධයෙන් වගකිව යුතු බව තමාට දැනුම්දුන්නේ යැයිද ඔහු පෙත්සමෙන් කියයි. තමා ප්‍රදේශයේ අණදෙන නිලධාරියාගෙන් (සුමිත් රණසිංහ) විමසු විට, එවැනි රඳවාගත් පිරිසක් නැති බව ඔහු කීවේයැයිද කරන්නාගොඩ පෙත්සමේ සඳහන් කොට තිබේ.
කරන්නාගොඩ ඊළඟට පෙත්සමෙන් කියන්නේ, එදිනම, එනම් මැයි 10 වැනිදාම, මේ ගැන පරීක්‍ෂණයක් කරන්නැයි තමා නාවික බුද්ධි අධ්‍යක්‍ෂවරයාට නියම කළ බවයි. එහෙත්, නාවික බුද්ධි අධ්‍යක්‍ෂ ආනන්ද ගුරුගේ රහස් පොලිසියට ප්‍රකාශ කර ඇත්තේ. තමාට එවැනි නියමයක් ලැබුණේ, මැයි 26 වැනිදා බවයි. එනම්, කරන්නාගොඩ ඒ බව දැනගෙන දින 16කට පසුවය.
ගුරුගේ රහස් පොලිසියට කියා ඇති පරිදි, නියමය ලැබු වහාම නාවික බුද්ධි අංශය ඒ ගැන පරීක්‍ෂණයක් කර, පිරිස පැහැරගෙනවිත් ඇත්තේ සම්පත් මුණසිංහගේ කාමරයේ සගයා වන ලෙෆ්ටිනන්ට් කමාන්ඩර් චන්දන ප්‍රසාද් හෙට්ටිආරච්චි විසින් බව වහාම කරන්නාගොඩට දැනුම් දී තිබේ. පිරිස පැහැරගෙන කොළඹ චෛත්‍ය පාරේ කඳවුරේ රඳවාසිටීම ආදිය ගැන සම්පූර්ණ තොරතුරු තමා විසින් 2009, මැයි 27වැනිදා වසන්ත කරන්නාගොඩට දැනුම්දුන් බවද ගුරුගේ පොලිසියට කියා ඇත.
සම්පත් මුණසිංහ රහස් පොලිසියට ප්‍රකාශ කරඇත්තේ, ඩීකේපී දසනායක විසින් කරන්නාගොඩ හමුවේ කරන දෛනික සිදුවීම් සමාලෝචන රැස්වීමේදී හෙට්ටිආරච්චිගේ කණ්ඩායම දෙහිවලදී පුද්ගලයන් 5 දෙනකු අත්අඩංගුවට ගත් බවට දන්වා ඇති බවයි.
මේ සියලු තොරතුරු දැනගෙනත්, කරන්නාගොඩ නිති විරෝධීව රඳවා ඉන්නා 11 දෙනා සම්බන්ධයෙන් කිසිම පියවරක් ගන්නේ නැත. ඔහු පොලිසියට මුල් වරට සම්පත් මුණසිංහ ගැන පැමිණිල්ලක් කරන්නේ 2009 මැයි 28 වැනිදාය. ඒ ද, පිරිසක් රඳවාගෙන ඉන්නවායැ’යි කියා නොවේ. සම්පත් මුණසිංහ එල්ටීටීඊය සමග සම්බන්ධකම් පවත්වන බවට සැකයි කියමිනි. එවකට නියෝජ්‍ය පොලිස්පති අනුර සේනානායක වෙත යවන තම ලිඛිත පැමිණිල්ලේ කිසිම තැනක, මීට දින 18කට පෙර තමාට දැනගන්නට ලැබුණු කිසිම දෙයක්, එනම්, පැහැරගැනීම්, ඝාතන පිළිබඳ සැකයන්, වින්දිතයන් ගැන වචනයක්වත් ලියා නැත. ඒ ඇයි? වසන්ත කරන්නාගොඩ, අධිකරණය ඉදිරියට පැමිණ පිළිතුරු දිය යුතු ප්‍රශ්නය නම් එයයි.
අනෙක් අතට, අපරාධ තොරතුරු ලැබුණු වහාම ඔහු ක්‍රියාත්මක වී නම්, ඝාතනය වුණු මිනිස්සු තවමත් ජීවතුන් අතරය.■
