ආචාර්ය ඩබ්ලිව්.ඒ. විජේවර්ධන
යහපාලන ආණ්ඩුව බලයට පත්ව ඉදිරිපත් කළ හදිසි අයවැයෙන් පසුව 2016 හා 2017 වර්ෂ දෙක සඳහාම රවී කරුණානායක මුදල් ඇමතිවරයා ඉදිරිපත් කළ අයවැය පිළිබඳව ආර්ථික විශේෂඥයන් සිය කණස්සල්ල පළ කර තිබුණි. ඒ වෙද්දීත් ඉතා භයානක අඩියක තිබුණු රටේ ආර්ථිකය පිළිබඳව දීර්ඝකාලීන සැලසුම් ඒ අයවැය ප්රකාශවල නොතිබුණු බව ආර්ථික විශේෂඥයන්ගේ මතය වී තිබුණි.
උදාහරණයක් ලෙස රවී කරුණානායක ඇමතිවරයා ඉදිරිපත් කළ අයවැයවලදී දෑස් කන් පියාගෙන රජයට සම්පූර්ණ පාඩුවක් වන අන්දමට සහන ලබාදීම්, වැටුප් වැඩිකිරීම්, බදු අඩු කිරීම් ආදි පියවර දකින්නට ලැබුණි. එම සහන ලබාදීමට නම් සාමාන්ය ජනතාව තව තවත් ණය උගුල්වල සිර කරන්නට සිදුවෙන බව එම අයවැයවලදී සැලකිල්ලට ගෙන තිබුණේ නැත. එම අයවැය යෝජනා හුදු ජනප්රිය අයවැය යෝජනා පමණක් විය. ඒ පිළිබඳව වගකීම ගත යුත්තේ රවී කරුණානායක ඇමතිවරයා පමණක් නොවේ. අගමැති රනිල් වික්රමසිංහ ඇතුළුව අයවැය සම්බන්ධයෙන් තීරණ ගත් සියලූ නායකයන් වගකිව යුතුය.
ඒ වෙද්දී ශ්රී ලංකාව ණය උගුලක සිරවී සිටි නිසා ජනප්රිය නොවන තීන්දු රැුසක් ආණ්ඩුව ගත යුතුව තිබුණි. එහෙත් ඒ වෙනුවට රාජපක්ෂ ආණ්ඩුව ගිය අඩිපාරේම යමින් ආණ්ඩුව ජනප්රිය තීන්දු ගෙන තිබුණි. ඒ අයවැය දෙකම ඉදිරිපත් කළේ මැතිවරණ ජයගෙන ජයග්රාහී හැඟීමෙන් සිටි කාලසීමාවදීය. එවැනි තත්ත්වයක ජනප්රිය නොවන තීන්දු ගත යුතුව තිබුණි. එහෙත් ඒ වෙනුවට රටේ ආර්ථිකය තවත් අසීරු තත්වයකට ඇද දැමීමට එජාපය ප්රමුඛ ආණ්ඩුව මුල් අර්ධයේදී කටයුතු කළේය.
ඉන්පසුව දූෂණ වංචා චෝදනා රැුසක් එල්ලවූ රවී කරුණානායක ඇමතිවරයා ඉල්ලා අස්විය. මුදල් ඇමතිවරයා ලෙස ආර්ථික විශේෂඥයෙකු නොවන මංගල සමරවීර ඇමතිවරයා පත්විය. රාජ්ය ඇමතිවරයා ලෙස ඉරාන් වික්රමරත්න පත්විය. ඔවුහු දෙදෙනාම 2018 වර්ෂය වෙනුවෙන් ඉදිරිපත් කළ තමන්ගේ පළමු අයවැය නිර්මාණශීලී ලෙස සකස්කරන්නට සමත්වූහ. ඒ අනුව ඔවුන් අයවැයේ ‘හෙඞ්ලයින්’ එක ලෙස ඉදිරිපත් කළ ව්යාපෘතිය වුණේ ‘එන්ටප්රයිස් ශ්රී ලංකා’ වැඩසටහනය. එය ඔවුන්ට දේශපාලන වේදිකාවලදී ඉහළින්ම තොරොම්බල් කළ හැකි විය. එමෙන්ම එය හුදු සහනයක් නොව, ආයෝජනයක්ද විය. ඒ අයවැය අතිවිශිෂ්ට අයවැයක් ලෙස නම් කළේ නැතත්, විනයක් සහිත අයවැයක් ලෙස ආර්ථික විශේෂඥයන් පෙන්වාදී තිබුණි. එක් අතෙකින් එය නිර්මාණශීලී අයවැයක් විය.
මෙවර අයවැය ඉදිරිපත් කරද්දීම එය මැතිවරණ ඉලක්ක කරගත් අයවැයක් වීමේ ඉඩකඩක් තිබෙන බව දේශපාලනය ගැන උනන්දුවක් දක්වන පුරවැසියෝ පැහැදිලිවම දැන සිටියෝය. සාමාන්යයෙන් මැතිවරණ ඉලක්ක කරගත් අයවැයකදී මැතිවරණ වේදිකාවල උගුර ලේ රහ වෙනතුරු කෑගසා කියන්නට ගැළපෙන ගැලරි සහන ලබාදිය යුතුය. ඉතින්, මෙවර අයවැයේදී පෙර තිබුණු විනය ආරක්ෂා කරගැනීමට මංගල – ඉරාන් දෙපළ අසමත් වේයැයි අනුමානයන් විය. එවැනි පසුබිමක මෙවර අයවැය යෝජනාවලිය පිළිබඳව ආචාර්ය ඩබ්ලිව්.ඒ. විජේවර්ධනගෙන් කෙටි අදහස් විමසීමක් කළෙමු.
‘මැතිවරණ වර්ෂවල සාමාන්යයෙන් සහන මල්ලක් දෙනවා. ඒ සහන මල්ල දීමෙන් වැළකිලා කලින් ආරම්භ කරලා තිබුණ අයවැය විනය ආරක්ෂා කිරීමේ ක්රියාවලිය මේ අයවැයෙන් තවදුරටත් පවත්වාගෙන ගිහින් තිබෙනවා. ඒ වගේම පරිභෝජනයෙන් සම්පත් ඉවත් කරලා, ඒ වෙනුවට ආයෝජනය සඳහා සම්පත් වැය කරලා තියෙනවා. විශේෂයෙන්ම මානව ප්රාග්ධනය සහ භෞතික ප්රාග්ධනය සඳහා කරන ආයෝජනවලට ඉතිරි කරලා තියෙනවා. ඒ නිසා පැරණි අයවැයවලට වඩා හොඳ මාවතක මුදල් ඇමතිවරයා ගිහින් තියෙනවා. මේ අවුරුද්දේ මැතිවරණ එකක් හෝ දෙකක් පැවැත්වීමට නියමිතයි. එහෙම මොහොතක තමන්ගේ පක්ෂයේ සාමාජිකයන්ගෙන් බලපෑම් එල්ලවෙමින් තිබියදීත් මූල්ය විනය ආරක්ෂා කරගැනීම සඳහා මුදල් ඇමතිවරයා ක්රියා කරලා තියෙනවා. ඒක හොඳ ලක්ෂණයක් විදියට සලකන්න ඕනෑ.
එන්ටප්රයිස් ශ්රී ලංකා කියන එක පරණ ක්රමයටම නෙවෙයි. පක්ෂයක සාමාජිකයන් වෙන්න ඕනෑ නැහැ. ඕනෑම කෙනෙක්ට අලූත් ව්යාපාරයක් සඳහා යෝජනාවක් තියෙනවා නම් එයාට මුදල් ලැබෙනවා. ඒ නිසා එය පාක්ෂිකයන්ට දෙන හුදු සහනයක් නෙවෙයි. ඒ වෙනුවට මේක ආයෝජනයක්. මේකට අනුබද්ධව විශ්වවිද්යාල, පර්යේෂණ ආයතන, අපනයන සංවර්ධන මණ්ඩලය වගේ ආයතන ගණනාවක සහයෝගය ලැබිලා තියෙනවා. ඒක හුදු සහන ලබාදීමක් නෙවෙයි.
එකම එක ගැටලූවක් තියෙනවා. තව මාස අටයි තියෙන්නේ. අයවැය ක්රියාත්මක වෙන්නේ මාස අටක් සඳහා විතරයි. ඒ කාලසීමාව තුළ අපේක්ෂිත ආදායම එකතු කරගන්න එක තමයි අභියෝගය. ඒ ආදායම් එකතු කරගන්න පුළුවන් වුණොත් දැන් තියෙන වියදම් රටාව අනුව අයවැය හිඟය 4.4% මට්ටමක පවත්වාගෙන ගිහිල්ලා පැරණි විනය ඒ විදියටම ඉදිරියට ගෙනයෑමේ හැකියාව තිබෙනවා.
මුල් මාස හතර තුළ ආදායම් රැස්කිරීම ගැන ඉලක්කයක් තිබුණේ නැහැ. ගිය අවුරුද්දේ වියදම් ඉදිරියට ගැනීමක් පමණක් සිදුවෙලා තිබුණා. ඒ නිසා තමයි තවත් මාස අටක් පමණක් තිබෙන බව මම පෙන්වුවේ. ඒ මාස අට ඇතුළත මේ අයවැයට යන්න පුළුවන් වුණොත් ඊළඟට පත්වෙන ආණ්ඩුවට බොහොම හොඳ මූලාරම්භයක් මේකෙන් සැපයෙනවා.’
