ශ‍්‍රී ලංකා පොදුජන පෙරමුණේ කොන්දේසි යටතේ පොදුජන පෙරමුණ හා ශ‍්‍රීලනිපය අතර සන්ධානයක් ඇතිවුණොත් ශ‍්‍රීලනිප මන්ත්රී කණ්ඩායමක් ජාතික ආණ්ඩු යෝජනාවට පාර්ලිමේන්තුවදී සහාය පළ කිරීමට බලාපොරොත්තු වන බව ශ‍්‍රීලනිප ඇමතිවරයෙකු අනිද්දා සමඟ කීය.
මෛත‍්‍රීපාල සිරිසේන ජනාධිපතිවරයාගේ සමීපතමයන් ලෙස යහපාලන ආණ්ඩුව සමයේදී කටයුතු කළ මන්ත්රීවරුන් පිරිසක් මෙලෙස ආණ්ඩුවට සහාය පළ කිරීමට බලාපොරොත්තු වන බව එම මන්ත‍්‍රීවරයා කීය.
නව සන්ධානයක් සඳහා පොදුජන පෙරමුණ කොන්දේසි ලෙස ඉදිරිපත් කර ඇත්තේ ශ‍්‍රී ලංකා පොදුජන පෙරමුණට බහුතර බලයක් ලැබෙන ලෙස සන්ධානය ඇතිකරගත යුතු බවයි. ඒ අනුව සන්ධානයේ විධායක සභාවේ 51%ක බලයක්, සන්ධානයේ සභාපතිධූරය හා ලේකම්ධූරය ශ‍්‍රී ලංකා පොදුජන පෙරමුණට ලබාදිය යුතු බව ඔවුන් යෝජනා කර තිබේ.
මේ වනවිට පාර්ලිමේන්තුවට ඉදිරිපත් කර තිබෙන ජාතික ආණ්ඩුවක් පිළිබඳ යෝජනාව විවාදයට ගැනීමට දිනයක් නියම කර නොමැත. එක්සත් ජාතික පක්ෂයට මෙම යෝජනාව පාර්ලිමේන්තුවේදී සම්මත කරගැනීමට අවශ්‍ය තරම් මන්ත්රීවරුන් පිරිසක් නොමැති වීම එයට හේතු වී තිබේ. ආණ්ඩුවට බහුතරය පවත්වාගෙන යෑමට සහාය පළ කරන බව කියා ඇති දෙමළ ජාතික සන්ධානයද ප‍්‍රකාශ කර ඇත්තේ ජාතික ආණ්ඩු යෝජනාවක් ඉදිරිපත් කළහොත් එයට එරෙහිව ඡුන්දය ප‍්‍රකාශ කරන බවයි. පෙබරවාරි 07 දින එම ජාතික ආණ්ඩු යෝජනාව පාර්ලිමේන්තුවේ විවාදයට ගන්නා බව එක්සත් ජාතික පෙරමුණ ප‍්‍රකාශයට පත් කළ අතර පසුව එය පෙබරවාරි 20 වන දින විවාදයට ගන්නා බව පවසනු ලැබීය. එහෙත් එදිනද එම යෝජනාව විවාදයට ගත්තේ නැත.
අනුරංග ජයසිංහ
