එක්සත් ජාතික පක්‍ෂය හා ශ්‍රී ලංකා පොදුජන පෙරමුණ යන පක්ෂ දෙකම තමාට ඉදිරි ජනාධිපතිවරණයේදී අපේක්ෂකත්වය ලබා නොදීම ගැන කනස්සල්ලට පත්ව සිටින ජනාධිපති මෛත්‍රීපාල සිරිසේන, ඒ තත්ත්වයට උපක්‍රමිකව මුහුණ දීමේ අටියෙන් නියමිත කාලයට පෙර, ජනාධිපතිවරණයක් කැඳවීමේ සූදානමකින් පසුවන බව ජනාධිපති කාර්යාලයට සමීප ආරංචි මාර්ගවලින් වාර්තා වෙයි.
ඉකුත් ජනවාරි 9 වැනිදායින් පසුව, කැමති අවස්ථාවක ජනාධිපතිවරණයක් කැඳවීමේ බලය ආණ්ඩුක්‍රම ව්‍යවස්ථාවෙන් ජනාධිපතිවරයාට ලැබී ඇත. එහෙත්, එසේ කැඳවිය හැක්කේ ධුරයේ සිටින ජනාධිපතිවරයාම එම ජනාධිපතිවරණයට ඉදිරිපත් වන්නේ නම් පමණි.
නියමිත කාලයට පෙර ජනාධිපතිවරණයක් කැඳවූ විට, මෛත්‍රීපාල සිරිසේන මහතාම අපේක්‍ෂකයා හැටියට ඉදිරිපත් වුවහොත්, වෙනත් අපේක්‍ෂකයකු ශ්‍රී ලංකා පොදුජන පෙරමුණෙන් ඉදිරිපත් කර ජයග්‍රහණය කිරීම අසීරු වන බව ජනාධිපතිවරයාගේ අදහස වී ඇතැ’යි වාර්තා වෙයි. එසේ වන්නේ ශ්‍රී ලංකා නිදහස් පක්‍ෂයේ සහ පොදු ජන පෙරමුණේ ඡන්ද වෙන් වෙන් අපේක්‍ෂකයන්ට ලැබීම නිසාය. එනිසා, ඡන්ද කැඩී කිසිවකුට ජය ගැනීම අසීරුවීම වළක්වා ගන්නට පොදුජන පෙරමුණට ඇති එකම තෝරාගැනීම වනු ඇත්තේ තමාට සහාය දීම
පමණක් බවද ජනාධිපතිවරයාගේ අදහස වී ඇත. ඒ අතර ජනාධිපතිවරයාගේ ජනාධිපතිවරණ සූදානම ගැන අදහස් දැක්වූ ශ්‍රී ලංකා නිදහස් පක්‍ෂයේ ප්‍රබල හිටපු ඇමතිවරයකු අනිද්දා වෙත කීවේ, කුමන තත්ත්වයක් යටතේ වුවද ඊළඟ ජනාධිපතිවරණයට තරග කිරීමේ දැඩි අධිෂ්ඨානයෙන් මෛත්‍රීපාල සිරිසේන මහතා පසුවන බවය.
මේ අතර ශ්‍රීලනිපය සහ පොදුජන පෙරමුණ අතර සන්ධානයක් ගොඩනැඟීම පිළිබඳව ජනාධිපති මෛත්‍රීපාල සිරිසේනගේ නිවසේ විශේෂ සාකච්ඡාවක් පවත්වා ඇති බවත් නව සන්ධානය පිළිබඳව සාකච්ඡා කිරීම සඳහා එහිදී කමිටුවක් පත් කරගත් බවත් ඒකාබද්ධ විපක්ෂයේ පක්ෂ නායකයෙක් අනිද්දාට පැවසීය.
පෙබරවාරි 6 වැනිදා ජනාධිපති මෛත්‍රීපාල මහතාගේ පැජට් පාරේ නිවසේදී එම සාකච්ඡාව පවත්වා තිබේ. නව සන්ධානය ඇති කරගැනීමට අදාළ කොන්දේසි පිළිබඳව පසුව සාකච්ඡා කිරීමට එහිදී එකඟ වී ඇත. නව සන්ධානයක් ඇති කරගැනීම පිළිබඳව පොදුජන පෙරමුණ විසින් දැනටමත් පත් කර තිබෙන ඩලස් අලහපෙරුම කමිටුවට ශ්‍රීලනිපයේ නියෝජිතයන් පත් කිරීමට එහිදී එකඟ වී ඇත. ඒ අනුව දයාසිරි ජයසේකර මන්ත්‍රීවරයා එම කමිටුවට පත් කර තිබේ.
මේ වනවිට ශ්‍රී ලංකා පොදුජන පෙරමුණට ප්‍රමුඛතාව ලැබෙන අන්දමේ සන්ධානයක් සඳහා ආකෘතියක් ඩලස් අලහප්පෙරුම කමිටුව සකස් කර තිබුණද, එම ආකෘතිය නොසලකා අලුතෙන්ම සාකච්ඡා පවත්වන්නට එකඟ වී ඇත.
මීළඟ ජනාධිපතිවරණ අපේක්ෂකත්වය ලබා දිය යුත්තේ කාටදැයි ජනාධිපති මෛත්‍රීපාල සිරිසේන හා මහින්ද රාජපක්ෂ විසින් තීරණය කළ යුතු බවද එහිදී එකඟ වී ඇත.
කෙසේ වෙතත් ශ්‍රී ලංකා පොදුජන පෙරමුණේ බැසිල් රාජපක්ෂ එම සාකච්ඡාවට සහභාගි වී නැත. ඔහු පොදුජන පෙරමුණට වැඩි බලයක් සහ ප්‍රමුඛතාවක් නොලැබෙන ආකාරයේ සන්ධානයකට විරෝධයක් දක්වන බව වාර්තා වෙයි.
මෛත්‍රීපාල සිරිසේන, මහින්ද රාජපක්ෂ, මහාචාර්ය ජීඑල් පීරිස්, ඩලස් අලහප්පෙරුම, වාසුදේව නානායක්කාර, දයාසිරි ජයසේකර, ඒ.එල්.එම්. අතාවුල්ලා, ඩග්ලස් දේවානන්දා ඇතුළු පිරිසක් එම සාකච්ඡාවට සහභාගි වී තිබේ.
අරුණ ජයවර්ධන /තරිඳු උඩුවරගෙදර
