ශ්‍රීලනිපයයි, පොහොට්ටුවයි එකතු කරන්න බෑ

රජික කොඩිතුවක්කු
ශ්‍රී ලංකා නිදහස් පක්ෂය

ඔබේ පසුබිම හා ඔබේ විරෝධතාවයෙහි පසුබිම පැහැදිළි කළොත්..
මම අදත් ශ්‍රීලනිපයේ කැස්බෑව ආසන සංවිධායකවරයා විදියට වැඩ කරනවා. මම ජනාධිපති මෛත්‍රීපාල සිරිසේන මැතිතුමාගේ සම්බන්ධීකරණ ලේකම්වරයෙක් විදියට කටයුතු කළා. මාසයකට විතර කලින් මම ඒ තනතුරෙන් ඉල්ලා අස්වුණා. මෛත්‍රීපාල සිරිසේන මහතාගේ නිවසේදී 2014 දෙසැම්බර්වල මැතිවරණ ව්‍යාපාරයේදී කවුරුත් හිටියේ නැහැ. මම ඒ කාලයේ පටන් එතුමා ළඟ හිටපු කෙනෙක්. මහින්ද රාජපක්ෂ උච්චස්ථානයේ හිටපු කාලයේ අපි මෛත්‍රී ජනාධිපතිතුමා ගාවට ගියා. ඒ මෛත්‍රීපාල සිරිසේන මහතා ශ්‍රී ලංකා නිදහස් පක්ෂය හා රට ආරක්ෂා කිරීම සඳහා මෛත්‍රී පාලනයක් පිළිබඳ සංකල්පයක් ඉදිරිපත් කළ නිසා. ඒ වුණාට ඔක්තෝබර් 26 වැනිදා පටන් එතුමා වැඩ කරපු ආකාරය ගැන එකඟවෙන්න බැහැ. එතුමාට මම ඒ බව පෞද්ගලිකවම කීවා. අන්තිමට මම ප්‍රසිද්ධ ප්‍රකාශයක් කරලා ඉල්ලා අස්වුණා. අපට ඕනෑ ශ්‍රී ලංකා පොදුජන පෙරමුණේ ශාඛා සමිතියක් බවට ශ්‍රීලනිපය පත්කිරීම නවත්වන්නයි. ශ්‍රීලනිප ආසන සංවිධායකවරුන් 21 දෙනෙක් පමණ මේ වෙද්දි ඉදිරියට ඇවිත් කතාකරලා තියෙනවා. අපි චන්ද්‍රිකා බණ්ඩාරණායක මැතිනියට ලිපියක් බාරදුන්නා. ඒකෙන් අපි කියන්නෙ මේ වැඬේ කරන්න එපා කියලයි. අපි විශ්වාස කරනවා ජනාධිපතිතුමා අපි විශ්වාස කරන මාර්ගය පිළි ගනීවි කියලා. අපි හිතනවා අපේ පටන්ගැන්ම සාර්ථකයි කියලා. පක්ෂය ඇතුළේ මේක සාකච්ඡා වෙලා තියෙනවා.

මෛත්‍රීපාල සිරිසේන ජනාධිපති තනතුර බාරගැනීමෙන් පසුව තමයි ශ්‍රීලනිප සභාපතිකම බාරගත්තේ…
ඔව්. ජනාධිපතිතුමා පක්ෂය බාරගත් වෙලාවේ සිහිපත් කළා මහින්ද රාජපක්ෂ හිටපු ජනාධිපතිතුමා රටට වගේම පක්ෂයටත් කරපු විනාශය. හැම තැනම රාජපක්ෂවරු ඉන්දෙව්වා. මෛත්‍රීපාල සිරිසේන පැහැදිලිවම කිව්වා ගෝඨාභය රාජපක්ෂ ඊළඟ පාර්ලිමේන්තු මැතිවරණයේදී හැම දිස්ත්‍රික්කයකින්ම එක හමුදා නිලධාරියා ගානේ පාර්ලිමේන්තුවට ගේන්න හිටියා කියලා. ඒ වෙද්දී බැසිල් රාජපක්ෂත් මහා අධිරාජ්‍යයක් ගොඩනඟාගෙන හිටියා. ජාතික සංවිධායක කියලා තනතුරක් හදාගෙන බැසිල් රාජපක්ෂ විශාල බලයක් පාවිච්චි කළා. නාමල් රාජපක්ෂලා නිල් බලකාය කියලා පක්ෂයේ තරුණ සංවිධානයට පිටින් තරුණ සංවිධානයක් හදාගත්තා. නාමල්ගේ පක්කලි වැඩ කරපු අය තමයි නිල් බලකායේ හිටියේ. පක්ෂයේ මහලේකම්වරයාට කරන්න දෙයක් නැති තත්ත්වයක් ඇතිවෙලා තිබුණා.
ඉතින්, ජනාධිපතිතුමා 2014 නොවැම්බර් මාසයේ රට බේරාගන්න එළියට ආ බව කියන්න පුළුවන්. ඒත් ඒ ක්‍රියාව රට වෙනුවෙන් විතරක් නෙවෙයි, පක්ෂය වෙනුවෙනුත් ගත්ත තීන්දුවක්. එතුමා රට වගේම පක්ෂයත් බාරගත්තා. ඒ ගමනේදී අපි මෛත්‍රී ජනාධිපතිතුමා වෙනුවෙන් පෙනීහිටියා. අපි කිසි විදියකට නැවත හිතුවේ නැහැ මහින්ද රාජපක්ෂ කියන පුද්ගලයා කරපු කප්පරක් වැරදි කියලා බලය ගත්ත මෛත්‍රීපාල සිරිසේන ජනාධිපතිතුමා, මෙහෙම කරයි කියලා. යුද්ධය ඉවර කරලා මහා සංවර්ධනයක් කළ බව කී මහින්ද රාජපක්ෂ පරාජය කරලා, ජනතාව මෛත්‍රී ජනාධිපතිතුමාට බලය දෙන්න හේතුවුණ කාරණා තමයි වංචාව, දූෂණය, හොරකම හා අපරාධ. ඒ කිසිවක් අධිකරණයකදී වැරදි බවට ඔප්පු වුණේ නැහැ. අද මහින්ද රාජපක්ෂලා පෙන්වන්න යනවා තමන්ට තියෙන චෝදනා සියල්ල බොරු බව. මහින්ද රාජපක්ෂ කියන්නෙ පුද්ගලයෙක් නෙවෙයි. සමාජ පන්තියක්, විශාල බලවේගයක්. ඒකට එරෙහිව අපි එදා පෙනී හිටියා. කිසි සාධාරණ හේතුවක් නැතිව නැවත මහින්ද එක්ක එකතුවෙන්නෙ කොහොමද. අඩුම තරමේ මහින්ද රාජපක්ෂ පුනරුත්ථාපනය වුණ බවවත් පෙනුණේ නැහැ. ඔක්තෝබර් 26 වැනිදා මහින්ද රාජපක්ෂට අවස්ථාවක් ලැබුණු ගමන් තනතුරුවලට පත්කරගත්තේ පෙර සිටිය හොරුම තමයි. ඒ තක්කඩියන්වම තමයි. කලින් නවත්වපු දේවල් නැවත පටන්ගත්ත බවයි එදා පෙනුණේ. ඒකට කිසිසේත්ම එකඟවෙන්න අපට බැහැ. අපි ඒක ජනාධිපතිතුමාට කිව්වා. අපි වෙනම ගමනක් යමු කියලා යෝජනා කළා.

දැන් ශ්‍රීලනිපය හා ශ්‍රී ලංකා පොදුජන පෙරමුණ ශක්තිමත් සන්ධානයක් ගොඩනඟන්න බලාපොරොගත්තු වෙනවා නේද?
ජනාධිපතිතුමාව විශ්වාස කරලා ගමේ ඡන්දය ඉල්ලපු මිනිස්සු ඉන්නවා. අපේ ගම්වල නියෝජිතයෝ ඡන්ද ඉල්ලු‍වේ පොදුජන පෙරමුණේ ගමේ අපේක්ෂකයන්ට එරෙහිව නෙවෙයි. කෙළින්ම මහින්ද රාජපක්ෂට එරෙහිව. උදාහරණයක් විදියට කැස්බෑවෙන් ශ්‍රීලනිපය වෙනුවෙන් ඡන්දය ඉල්ලු‍වේ සුදත් කියලා තරුණයෙක්. ඔහු දක්ෂයෙක්. ඔහුව පරාජය කරලා පොදුජන පෙරමුණෙන් ජයග්‍රහණය කරපු කෙනාට කසිප්පු නඩු 42ක් තියෙනවා. මිනිස්සු ඒ මනුස්සයාට ඡන්දය දුන්නේ මහින්ද රාජපක්ෂට ඡන්දය දෙනවා කියලා හිතාගෙන. ඉතින්, එදා ගමේ ශ්‍රීලනිපය වෙනුවෙන් ඡන්දය ඉල්ලපු අයට දැන් මෙතැනට යන්න බැහැ. පහළ මට්ටමේ කට්ටිය එකතුවෙන්නෙ නැහැ. ඒකට හේතුවක් තියෙනවා. පොදුජන පෙරමුණේ අය කැමති නැහැ තමන්ට වඩා හොඳ දැක්මක් තියෙන නායකයන් ගමේ සම තැන ගන්නවාට. ඒ නිසා උඩින් මොනවා කළත්, බිම් මට්ටමේ එකතු කරන්න අමාරුයි. ශ්‍රීලනිපයයි පොහොට්ටුවයි කිසිම විදියකට එකතු කරන්න බැහැ.

එකතුවට බාධා මොනවාද?
මේ වෙද්දී බැසිල් රාජපක්ෂලාගෙන් ගම් මට්ටමට එක පණිවුඩයක් යනවා. ඉහළ මට්ටමට වෙන පණිවුඩයක් යනවා. ඔහුගේ පළාත් සභා නියෝජිතයන්ගේ සංගමයේ හිටියා රත්නපුර දිස්ත්‍රික්කයේ කංචන කියලා පළාත් සභා මන්ත්‍රීවරයෙක්. ඔහු ඇතුළු පළාත් සභා නියෝජිතයන් පිරිසක් ඇවිත් බැසිල් රාජපක්ෂට සංදේශයක් බාරදුන්නා පොහොට්ටුවේ අයට හැර වෙනත් අයට නාමයෝජනා දෙන්න එපා කියලා. උදේනි අතුකෝරළ ඇතුළු පොහොට්ටුවේ පළාත් පාලන නියෝජිතයනුත් එහෙම සංදේශයක් දෙනවා. ඔය කණ්ඩායම බැසිල්ගේ ළඟම හිතවතුන්. ඔවුන් නොදැන නෙවෙයි මේවා වෙන්නේ. බැසිල්ම නිර්මාණය කරනවා මෛත්‍රීට අපේක්ෂකත්වය දෙන්න බැහැ කියලා මතවාදයක්. අද ගමේ ඉන්න ස්ථාවර ශ්‍රීලනිප පාක්ෂිකයන්වත් පොහොට්ටුවට අන්තර්ග්‍රහණය කරගන්න දැන් අවස්ථාවක් හදලා දීලා තියෙනවා.

මහින්ද සමරසිංහ ඇතුළු නායකයනුත් කියා තිබෙන වා, ඔවුන්ට පොදුජන පෙරමුණ සමඟ එක්වීම අසීරු කටයු ත්තක් බව…
අපේ මතවාදය සත්‍ය බව ඔවුන් දැන් පිළිගන්නවා. ඔවුන් ඒක කියන්න ටිකක් පරක්කු වුණා. ප්‍රශ්නය එයාලාගේ තැනට ආවාට පස්සෙ තමයි දැන් එයාලා කතාකරන්නෙ. ජනාධිපතිතුමා වෙනුවෙන් ඇමතිකම් ගත්ත 21 දෙනාටම නැවත පාර්ලිමේන්තුවට ඡන්දයෙන් එන්න ලැබෙන්නේ නැහැ. ඔවුන් අසරණ වෙලා ඉන්නේ. ඔවුන් හරිම නිහඬයි. මේ නිහඬතාවය මහා පිපිරීමකට කලින් තියෙන නිහඬතාවය. කොයිවෙලේ හරි ඕක පුපුරනවා. එතකොට අත තියලා නවත්වන්න බැරිවේවි. තව ඉදිරියට මේ අයත් යම් යම් පියවර ගනීවි. අපි මේ උත්සාහ කරන්නෙ ශ්‍රීලනිපය කඩන්නවත්, අලු‍ත් පක්ෂයක් හදන්නවත් නෙවෙයි. පක්ෂය නිවැරදි මධ්‍යස්ථ තැන තියාගන්න.

ජනාධිපති මෛත්‍රීපාල සිරිසේන ළඟ හිටපු කෙනෙ ක් විදියට, ජනාධිපතිවරයා ගත්ත තීන්දුවලට වැරදි උපදේශකයන්ගේ උපදෙස් හේතුවුණ බවට චෝදනාවක් තියෙනවා. ජනාධිපතිවරයා ළඟ වැඩකළ කෙනෙක් විදියට ඒ ගැන හිතන්නේ මොකක්ද?
මේක එතුමා පුද්ගලිකව ගත්ත තීන්දුවක්. මේක රට ගැන හිතලා ගත්ත තීන්දුවක් කියලා කවුරු හරි කියනවානම් ඒක බොරුවක්. එතුමා ජනාධිපතිවරණ අපේක්ෂකත්වය බලාපොරොත්තු වෙනවා. ජනාධිපතිතුමා කාගෙවත් උපදෙස් අහන්නෙ නෑ. ඔහු, තමන්ම හදාගත්ත සීමා ඇතුළේ ඉඳලා තීරණ අරගෙන, ඒවා ක්‍රියාත්මක කරන කෙනෙක්. ජනාධිපති තනතුර ලැබීමට පෙර, දේශපාලනඥයෙක් විදියට හොඳ ක්‍රමවේදයක් වෙන්න ඇති. ඒත් විධායක ජනාධිපති තනතුරට ආවාම එහෙම හැසිරෙන්න බැහැ. වඩා පුළුල් වගකීමක් තියෙනවා. ඇසූ පිරූ තැන් තියෙන අයගෙ න් උපදෙස් ගන්න ඕනෑ, ඒත් ජනාධිපතිතුමා එහෙම කළේ නැහැ.

පොදුජන පෙරමුණ සමග එක්වෙන්නේ නැතිනම්, ශ්‍රීලනිප යෙන් ඔබලා බලාපොරොත්තු වෙන්නෙ මොනවාද?
එතුමා යම් මතවාදයක් වෙනුවෙන් එළියට බැස්සානේ. ඒ මතවාදය ජයග්‍රහණය කරවීම කියන්නෙ මැතිවරණ ජයග්‍රහණයක් නෙවෙයි. අද ලක්ෂ 16ක් හිටියාට ටිකෙන් ටික ඒ මතවාදයට ඉදිරියට යන්න පුළුවන්. අද උදේට එකක් කියලා, හෙට තවත් දෙයක් කියන නායකයෙක්ට ඉස්සරහට යන්න බැහැ. එහෙම වචන මාරු කරද්දී නායකයන් ගැන විශ්වාසය ජනතාවට නැති වෙනවා. නායකයෙක් තමන් ගත්ත තීන්දු වෙනුවෙන් පෙනී ඉන්න ඕනෑ. එහෙම වුණොත් තමයි කල්ගත වෙලා හරි දිනන්න පුළුවන් වෙන්නේ. මෛත්‍රීපාල සිරිසේන ජනාධිපතිතුමාට මීළඟ ජනාධිපතිවරණයේදී අපේක්ෂකත්වය දුන්නත්, පොදුජන පෙරමුණ ඡන්දයේදී උදව් කරන්නේ නැහැ. ගම් මට්ටමෙන් පොහොට්ටුවේ අය මෛත්‍රීට වැඩ කරන්නෙ නැහැ. මහින්දට ලේසිම දේ තමයි මෛත්‍රීට අපේක්ෂකත්වය දීලා පරාජය කරවන එක්ක. ඉන්පස්සෙ එජාපයෙ රනිල් එක්ක තමන්ගෙ ජාමෙ බේරගන්න එක මහින්ද රාජපක්ෂට වාසියි. රනිල් වික්‍රමසිංහ කියන්නෙ මහින්දගෙ යාළුවා. රනිල් දින්නත්, මහින්දට ආරක්ෂා වෙන්න පුළුවන්.
ඊළඟ මැතිවරණයේදී රටේ ජනතාව බලවේග දෙකකට බෙදෙනවා. රනිල් වික්‍රමසිංහ එක පාර්ශ්වයක නායකත්වයේ ඉඳීවි. ඔහු සාර්ථක නායකයෙක් නෙවෙයි. ඒත් රට බෙදෙන්නේ රනිල්, මහින්ද, මෛත්‍රී කියලා නෙවෙයි. මහින්ද රාජපක්ෂ හා ඊට එරෙහි පිළ කියලා. මහින්දට එරෙහි පිළ හරිම පුළුල්. විවිධ ජනවර්ගවල අය, විවිධ ලිංගික අනන්‍යතා තියෙන අය, දුප්පත් අය, පෝසත් අය එතැනට එකතුවෙනවා. රාජපක්ෂ කියන නමටත් බය විශාල පිරිසක් ඉන්නවා. ඔවුන් රාජපක්ෂලාට එරෙහිව එකතුවේවි. ඒකෙදී ශ්‍රීලනිපය ඉන්නෙ කොතැනද කියන එකයි ප්‍රශ්නය. අපි කියන්නෙ රාජපක්ෂලාගේ මතයට එරෙහිව හිට ගනිමු කියලයි. දැන් තියෙන තත්ත්වයේ හැටියට මොන තීන්දුව ගත්තත් ශ්‍රීලනිපයට අසීරු කාලයක් පහු කරන්න සිදුවේවි. ඒත් ඒ කාලය පොහොට්ටුව ඇතුළේ හිටියොත් වළපල්ලට යන්නයි වෙන්නෙ.
අපට ඕනෑ ශ්‍රීලනිපය හරි මඟට ගන්න. ඒක කරගන්න බැරිවුණොත්, ඊළඟ මැතිවරණය තීරණාත්මකයි. රාජපක්ෂවරුන්ට එරෙහි පිලේ හිටග න්න අපට සිද්ධවෙනවා.■