ජනාධිපති මෛත්රීපාල සිරිසේන හා ගෝඨාභය රාජපක්ෂ ඝාතනය කිරීම සඳහා කුමන්ත්රණයක් සිදුවූ බවට නාමල් කුමාර නමැත්තකු කරන හෙළිදරව් කිරීම් පදනමක් නැති අමූලික බොරු බව මේ වන විට තහවුරු වී තිබේ. 2018 ඔක්තෝබර් 26 වැනිදා අගමැති රනිල් වික්රමසිංහ ධුරයෙන් ඉවත්කොට ඔහුගේ ආණ්ඩුව බලයෙන් පහකිරීම සඳහා ජනාධිපති මෛත්රීපාල සිරිසේන පියවර ගත්තේද නාමල් කුමාරගේ මේ බොරුව පදනම් කරගනිමිනි. එක්සත් ජාතික පක්ෂ ආණ්ඩුව තමා ඝාතනය කරන්නට කුමන්ත්රණය කළ බවට ඒ අවස්ථාවේදී ජනාධිපති සිරිසේන චෝදනා කළේය.
2018 සැප්තැම්බර් 12 වැනිදා සිය පළමු මාධ්ය සාකච්ඡාව තබා ඝාතන කුමන්ත්රණයක් ගැන කියූ අවස්ථාවේ සිට ගතවුණු මාස හතරකට ආසන්න කාලය තුළ, ජනාධිපති සිරිසේන හෝ ගෝඨාභය රාජපක්ෂ ඝාතනය කරන්නට කුමන්ත්රණයක් සිදුවුණු බවට කිසිම තොරතුරක් සොයාගැනීමට අපරාධ පරීක්ෂණ දෙපාර්තමේන්තුවේ නිලධාරීන්ට නොහැකි වී තිබේ.
එම ඝාතන කිරීම සඳහා ජංගම දූරකථනයෙන් නියෝජ්ය පොලිස්පති නාලක සිල්වා සමග තමා කුමන්ත්රණය කළ බවට නාමල් කුමාර මාධ්ය සාකච්ඡාවලදී කරුණු ඉදිරිපත් කළත්, එවැනි පටිගත කළ සංවාදයක් නාමල් කුමාර විසින් අපරාධ පරීක්ෂණ දෙපාර්තමේන්තුවට කිසි දිනෙක ඉදිරිපත් කළේ ද නැත. තමාගේ ජංගම දූරකථනයේ ඇති සමහර සංවාද මකා දැමූ බවට නාමල් කුමාර කියූ නිසා, ඔහුගේ එම දූරකථනය තම භාරයට ගෙන අපරාධ පරීක්ෂණ දෙපාර්තමේන්තුවේ නිලධාරීන් විසින් හොංකොංහි ඬේටා ටෙක්නොලොජි නම් විශේෂඥ ආයතනයට ඉදිරිපත් කරන ලදි. එම ආයතනය පැයක පමණ කෙටි කාලයක් තුළ මකා දැමීයැයි කියන සංවාද 531ක් යළි පුනරුත්පාදනය කර දී තිබුණු අතර, ලංකාවට පැමිණි පසු දෙපාර්තමේන්තුවේ නිලධාරීහු කිහිප දෙනෙක්ම එම සංවාද ගැන විමර්ශනයට යොදවන ලදහ.
එහෙත්, 531ක් වූ ඒ කිසිම දූරකථන සංවාදයකදී ජනාධිපති සිරිසේන හෝ ගෝඨාභය රාජපක්ෂ ඝාතනයට කුමන්ත්රණය කිරීමක් ගැන කිසිම තොරතුරක් හෙළි වී නැත. ඒ වෙනුවට පොලිස් විශේෂ කාර්ය බලකායේ අණදෙන නිලධාරි නියෝජ්ය පොලිස්පති එම් ආර් ලතීෆ් ඝාතනය කිරීමේ කුමන්ත්රණයකට අදාළ දෙබස් එම සංවාදවලින් හෙළිදරව් වී තිබේ.
නියෝජ්ය පොලිස්පති නාලක සිල්වා මේ වන විට රිමාන්ඞ් බන්ධනාගාරගත කොට සිටින අතර, ඔහු එසේ සිටින්නේද ජනාධිපති ඝාතන කුමන්ත්රණයක් නිසාවෙන් නොවේ. වෙනත් ඉහළ පොලිස් නිලධාරියකු ඝාතනය කිරීමට නාමල් කුමාර සමග ඔහු කුමන්ත්රණය කළ බවට දූරකථන සංවාදවලින් හෙළිදරව්වුණු නිසාය.
මේ වන විට නාමල් කුමාර, ගුවන් හමුදාවෙන් හා යුද හමුදාවෙන් නීති විරෝධීව පැනගිය අයකු බවටද, එම හමුදාවලට ඔහු බැඳී ඇත්තේ ව්යාජ අධ්යාපනික සහතික ඉදිරිපත් කරමින් බවටද හෙළිකර ගැනීමට අපරාධ පරීක්ෂණ දෙපාර්තමේන්තුව සමත්වී තිබේ.
මේ පිළිබඳ විස්තරාත්මක ලිපියක් අද පත්රයේ 3වැනි පිටුවේ පළවෙයි.■
අරුණ ජයවර්ධන
