මෛත්‍රීපාල සිරිසේන මහතා නැවත ජනාධිපතිවරණයට ඉදිරිපත් කිරීම වෙනුවෙන් ගොඩනගන්නට යෝජිත ශ්‍රී ලංකා නිදහස් පක්ෂ, පොදුජන පෙරමුණ සන්ධානය මෙම ජනවාරි මස අවසන් වන විට ස්ථිර වශයෙන්ම ගොඩනගන බව ශ්‍රීලනිපයේ සිට පොදුජන පෙරමුණට එකතුවූ ශ්‍රීලනිප ප්‍රබලයෙක් අනිද්දා වෙත ප්‍රකාශ කළේය.
ජනාධිපති මෛත්‍රීපාල සිරිසේන මෙම සන්ධානය ගොඩනැගීම පිළිබඳව උද්‍යෝග යෙන් කටයුතු කරන බව ප්‍රකාශ කළ ඒ මහතා, මෙම සන්ධානය ගොඩනැගීමේ කටයුතු ඉක්මන් කර එය ජනවාරි අවසන් වනවිට එළිදැක්වීමට කටයුතු කරන්න යැයි උපදෙස් ලබා දී ඇති බවද කීවේය.
ශ්‍රීලනිපය ඇතුළත චන්ද්‍රිකා බණ්ඩාරනායකගේ වර්තමාන ක්‍රියාකාරීත්වය නිසා යෝජිත සන්ධානය ගොඩනැගීම ව්‍යර්ථ වී ශ්‍රීලනිපයේ කොටසක් එජාපෙ වෙත එක්වීමට පවතින සූදානම පිළිබඳව විමසූ විට ඒ මහතා ප්‍රකාශ කළේ, චන්ද්‍රිකා බණ්ඩාරනායක මැතිනියට එවැනි විශාල කණ්ඩායමක් නොමැති බවය. සුළු පිරිසක් අමාත්‍ය තනතුරු සඳහා එජාපෙ දෙසට ගමන් කරන්නට සුදානමින් සිටියත් පක්ෂ මාරුකරන පුද්ගලයන්ට අමාත්‍ය ධුර ලබා නොදෙන්නට ජනාධිපතිවරයා තීරණය කිරීම නිසා එම පිරිස නැවත ශ්‍රීලනීපය දෙසට හැරී ඇති බව ඒ මහතා වැඩිදුරටත් පැවසීය.
මෙම තත්ත්වය තුළ එළඹෙන මාර්තු පමණ වන විට ජනාධිපති සිරිසේන ජනාධිපතිවරණයක් පැවැත්වීම සඳහා නාමයෝජනා කැඳවීමට බොහෝ දුරට ඉඩ ඇතැයිද ඔහු ප්‍රකාශ කළේය.■
මෛත්‍රීට පොහොට්ටුවෙන් කොළ එළි
- Advertisement -
