රාජපක්ෂලා කියන අන්දමට ඔවුන් බලෙන්ම ආණ්ඩුව ගෙන තිබුණේ ජනතාවට සහන සැපයීමටය. ජීවන වියදම අඩු කිරීමටය. සරලවම කිවහොත් ආර්ථිකය ගොඩදැමීමටය. ආර්ථිකය ගොඩදැමීමට රාජපක්ෂලා කැපවී ඇති තරම 2018 නොවැම්බර් මාසයට අදාළ පාරිභෝගික මිල දර්ශනය හා උද්ධමනය පිළිබඳ දත්තවලින් අවබෝධ කරගත හැකිය. ජනලේඛන හා සංඛ්යාලේඛන දෙපාර්තමේන්තුව විසින් නොවැම්බර් මාසයට අදාළ දත්ත පසුගියදා ඉදිරිපත් කර තිබුණි.
ඒ අනුව පාරිභෝගික මිල දර්ශනයෙහි අත්යාවශ්ය භාණ්ඩවල මිල 2018 ඔක්තෝබර් මාසයට වඩා 2018 නොවැම්බර් මාසයේදී 2.2% කින් වැඩිවී ඇත. රුපියල්වලින් ගතහොත් අත්යාවශ්ය ආහාර මල්ලෙහි භාණ්ඩවල මිල රුපියල් 891 කින් වැඩිවී ඇත. ඉන් රුපියල් 877ක්ම වැඩිවී ඇත්තේ ආහාර ද්රව්ය වෙනුවෙනි.
2018 ඔක්තෝබර් මාසයේදී 0.1% ක්ව තිබුණු වාර්ෂික උද්ධමනය 2018 නොවැම්බර් මාසයේදී 1% ක් දක්වා 0.9% කින් වැඩි වී ඇත. එය ඔක්තෝබර් මාසයේදී තිබුණු උද්ධමනය 90%ක වැඩිවීමකි. ඔක්තෝබර් මාසය වනතෙක් උද්ධමනය ක්රමයෙන් අඩු වෙමින් පැවතුණේය.
ආහාර හා ආහාර නොවන වශයෙන් ගතහොත් ආහාර සඳහා උද්ධමනය ඔක්තෝබර් මාසයේ -6.6% ක්ව තිබී ඇත. එය නොවැම්බර් වෙද්දී -3.9% ක් දක්වා වැඩි වී ඇත. ආහාර නොවන ක්ෂේත්රයෙහි උද්ධමනය ඔක්තෝබර් මාසයේදී 5.8%ක් විය. නොවැම්බර් මාසයේදී එය 5.2% දක්වා අඩු වී ඇත.
සරලවම කිවහොත් උද්ධමනය යනු භාණ්ඩ හා සේවා සියල්ල සමස්ථයක් ලෙස ගෙන ඒවායේ මිල අඛණ්ඩව ඉහළයෑමේ ප්රතිශතයයි. හැම මොහොතකම භාණ්ඩ හා සේවාවල මිල ඉහළ යන අතර, එය සිදුවන වේගය මනින්නේ උද්ධමනයෙනි. උද්ධමනය වැඩිවීම ජීවන වියදම වැඩි විම සංකේතවත් කරයි. උද්ධමනය වැඩි වෙන්නේ භාණ්ඩ හා සේවාවල මිල ඉහළ යෑමේ වේගය වැඩි වෙන මොහොතකය.
උද්ධමනය පහළ යෑම යනු දළ වශයෙන් ගත් කළ බඩු මිල පහළ යෑම ලෙස සැලකිය හැකිය. උද්ධමනය යන්නෙහි සැබෑ තේරුම බඩු මිල පහළ යෑම නොවුණද දළ වශයෙන් එය එලෙස සැලකිය හැකිය. උද්ධමනය රටේ ආර්ථිකයේ යහපත් බව පෙන්වන එක් ප්රධාන සාධකයකි.
යහපාලන ආණ්ඩුව එක් ආර්ථික ප්රතිපත්තියක ක්රියාත්මක වීමේ දැඩි අපහසුවෙන් පෙළුණු ආණ්ඩුවකි. ජනාධිපතිවරයා සහ කැබිනට් මණ්ඩලය අතර ආර්ථික ප්රතිපත්තිය පිළිබඳව බරපතළ ගැටුමක් තිබුණි. එසේ වුව යහපාලන ආණ්ඩුව අයවැය පරතරය 5% ට අඩු තත්ත්වයේ තබාගැනීමට සමත් විය. එය යහපත් තත්ත්වයකි. රාජ්ය ආදායම දළ දේශීය නිෂ්පාදිතයෙන් 15% ක් පමණ දක්වා ගෙනැවිත් තිබුණි. එයද සාපේක්ෂව යහපත් තත්ත්වයකි. අප කියන්නට උත්සාහ කරන්නේ යහපාලන ආණ්ඩුව විසින් ආර්ථිකය ගොඩ දැමූ බව නොවේ. ලංකාවේ ආර්ථිකය නම් රෝගි යාව සුව කරන්නට තරම් දේවල් යහපාලන ආණ්ඩුව කර තිබුණේ නැත. එහෙත් පැහැදිළිවම ලෙඩා තව තවත් නරක තත්ත්වයට යා නොදී, උද්ධමනය ක්රමයෙන් අඩු කරගැනීමට යහපාලන ආණ්ඩුව 2018 ඔක්තෝබර් දක්වා සමත් වී තිබුණි.
රාජපක්ෂලා ආණ්ඩුව ගත්තේ එවැනි පසුබිමකය. 2004 සිට 2014 දක්වා රාජපක්ෂලා ළඟ නොතිබුණු විජ්ජාවක් පෙන්වා ආර්ථිකය ගොඩගනිමින්, ජනතාවගේ ජීවන වියදම් පහළ දැමීමට රාජපක්ෂලා පොරොන්දු වී තිබුණි. කෙසේ වෙතත් රාජපක්ෂලා බලහත්කාරයෙන් ආණ්ඩුව ගෙනගිය නොවැම්බර් මාසයට අදාළ ඒ සංඛ්යාලේඛනවලින් පෙනෙන්නේ රාජපක්ෂලා විසින් ජීවන වියදම වැඩි කර ඇතිවා මිස අඩු කර නැති බවයි. සරලව කීවොත් රාජපක්ෂලා විසින් උද්ධමනය හා ජීවන වියදම වැඩි කර ඇත.■
■ අනුරංග ජයසිංහ
