2017 මැයි 1 දින මෙන් ම 2018 දෙසැම්බර් 17 දින ගෝල්ෆෙස් පිට්ටනියේ දී වැදගත් දේශපාලන රැස්වීම් දෙකක් පැවැත්විණි. පළමු වැන්න රාජපක්ෂ කඳවුරේ මැයි දින රැලිය වූ අතර දෙවැන්න එක්සත් ජාතික පක්ෂය විසින් සංවිධානය කරන ලද්දකි. දෙසැම්බර් 17 පැවැති රැළියෙන් පසුව ඒ සම්බන්ධයෙන් සමාජ මාධ්‍ය තුළ ප්‍රචාරය කර තිබුණේ ඊට සහභාගී වූ විශාල ජනකාය මගින් නියෝජනය වූයේ ”එජාපයට ආදරය කරන” අයගේ ශක්තිය බවයි. මීට පරස්පර ලෙස 2017 මැයි 1වෙනි දා ගෝල්ෆෙස් පිට්ටනියට පැමිණි ජනකාය එම රැළිය සංවිධානය කරනු ලැබූ දේශපාලන කඳවුරේ ප්‍රචාරකයින් විසින් හඳුන්වනු ලැබූයේ ”රට වෙනුවෙන් පැමිණි” ජනකායක් ලෙසිනි. දෙවන රැළිය ට සහභාගී වූවාට වඩා දෙගුණයක පමණ ජනකායක් පළමු රැළියට සහභාගී වූ බව මෙහි දී මතක තබා ගැනීම වැදගත් ය. එයින් අදහස් කරන්නේ එජාපයට (පක්ෂයකට) ආදරය කරන ජනකායට වඩා වැඩි පිරිසක් රටට ආදරය කිරීමට ඉදිරිපත් වන බව ද?
කෙසේ වෙතත් මේ දේශපාලන කාව්‍යොක්තීන් පසුපස ඉතා වැදගත් දේශපාලන යථාර්ථයක් ගැබ් වී ඇත. එනම් රාජපක්ෂ කඳවුර දේශපාලන පක්ෂයක් පිළිබඳ අනන්‍යතාවයෙන් ඔබ්බට ගියා වූ දේශපාලන ආමන්ත්‍රණයක් ගොඩ නංවා ගැනීමට සමත් වී ඇති අතර එක්සත් ජාතික පක්ෂයට සම්පූර්ණයෙන් ම එසේ කිරීමට නොහැකි වී ඇති බවයි. මේ දිනවල මහින්ද රාජපක්ෂ මහතා අයත්වන දේශපාලන පක්ෂය වන්නේ ශ්‍රී ලංකා නිදහස් පක්ෂය ද, එසේත් නැතහොත් ශ්‍රී ලංකා පොදුජන පෙරමුණ ද යන්න පිළිබඳ ව පවත්නා අවුල් සහගතභාවය මේ සම්බන්ධයෙන් ඉතාම වැදගත් වේ. ඇත්ත වශයෙන්ම මහින්ද රාජපක්ෂ මහතාට ආකර්ෂණය වන ජනයාට ඔහු කිනම් පක්ෂයකට අයත්වනවා ද යන්න වැදගත්කමක් ඇත්තේ ම නැත. එයින් අදහස් වන්නේ මහින්ද රාජපක්ෂ මෙන්ම ඔහු සංකේතාත්මක නායකත්වය දරන දේශපාලන කඳවුර දේශපාලන පක්ෂ රාමුව ඉක්මවා ගිය දේශපාලන ආමන්ත්‍රණයක් සඳහා හැකියාව අත්පත් කරගෙන තිබේ ය යන්නයි. ”රට ට ආදරය කිරීම” නැතහොත් ”රට රැ කීම” මෙම දේශපාලන ආමන්ත්‍රණය හකුළා දක්වන වචන යි. ”මහින්දගේ නමින් පොල්ලෙල්ලක් ඡන්දයට දැම්මත් දිනනවා” යැයි වරක් උදය ගම්මන්පිල ප්‍රකාශ කළේ මේ සත්‍යය හකුළුවා දක්වනු පිණිස ය.
එක්සත් ජාතික පක්ෂය ද මෙවැනි පක්ෂ රාමුව ඉක්මවා ගිය දේශපාලන කතිකාවක කොටස්කරුවෙක් වී සිටී. එම දේශපාලන කතිකාව වන්නේ මීට පෙර ද මා සාකච්ඡා කර ඇති ආකාරයට ”ප්‍රජාතන්ත්‍රවාදය රැකීම” යන්න යි. කෙසේ වෙතත් එජාපය ට ”ප්‍රජාතන්ත්‍රවාදය රැ කීම” නියෝජනය කිරීමට ඇති හැකියාවට වඩා ගුණාත්මක වෙනසක් මහින්ද රාජපක්ෂ ප්‍රමුඛ රාජපක්ෂ කඳවුරට ”රට රැකීම” පිළිබඳ කතිකාව නියෝජනය කිරීම සඳහා තිබේ. පසු ගිය දිනවල මෛත්‍රීපාල සිරිසේනගේ ඔක්තෝබර් 26 ක්‍රියාවට විරුද්ධව වීදි බට ”සිවිල් සමාජය” ලෙස තමුන්ව ම හඳුන්වාගන්නා පිරිස් අත තිබූ සටන් පාඨ පුවරුවක සඳහන් වී තිබුණේ ”මේ රනිල් රැකීම සඳහා නොවේ” යන්න යි. ඒ සටන් පාඨය නිර්මාණය කළ අයගේ අභිප්‍රාය වන්නට ඇත්තේ සිය මැදිහත් වීමට රනිල් වික්‍රමසිංහ අගමැති ධුරයෙන් පහකිරීමට විරුද්ධ වනවාට වඩා පුළුල් අරමුණක් ඇති බව අවධාරණය කිරීම විය හැක. එසේ වුව ද එයින් තවත් ද්විතීයික පණිවිඩයක් ද නිකුත්වන බවට තර්ක කිරීමට පුළුවන. එනම් රනිල් වික්‍රමසිංහ සහ ”ප්‍රජාතන්ත්‍රවාදය රැකීම” යන සංඝඨක දෙක අතර පරතරයක් පවත්නා බවයි.
මෙවැනි පරතරයක් මහින්ද රාජපක්ෂ හා ”රට රැකීම” යන සංඝඨක දෙක අතර ඇත්තේ නැත. වෙනත් ආකාරයකින් කියනවා නම් ”මේ මහින්ද රාජපක්ෂ රැ කීම සඳහා නොවේ” වැනි සටන් පාඨයක් රාජපක්ෂ කඳවුර තුළින් ඉදිරිපත් වීම කිසිසේත් ම සිතා ගැනීමට නොහැක්කකි. එයින් අදහස් වන්නේ මහින්ද රාජපක්ෂ මුළුමනින් ම ”රට රැකීම” යන සටන් පාඨයත් සමඟ අනන්‍යකරණය වී ඇති බවයි. ඒ දෙක අතර කිසිදු පරතරයක් ඇත්තේ නැත.
මේ වෙනස වෙනත් ආකාරයකට කියන්නේ නම් එක්සත් ජාතික පක්ෂයේ හා ”ප්‍රජාතන්ත්‍රවාදය රැකීම” සඳහා වූ උද්ඝෝෂණයන් අතර වෙනසක් සහ පරතරයක් ඇත. ඔක්තෝබර 26 ක්‍රියාවට දින කීපයකට පසු කොල්ලු‍පිටියේ දී පැවැත්වුණු විරෝධතාව ”ප්‍රජාතන්ත්‍රවාදය රැකීම” පිළිබඳ ”පුළුල් පෙරමුණ” විසින් සංවිධානය කර තිබුණ කි. ”මේ රනිල් රැ කීම සඳහා නොවේ” යන ඉහත සඳහන් කළ පුවරුව ප්‍රදර්ශනය කෙරුණේ එහි දී ය. නමුත් දෙසැම්බර් 17 ගෝල්ෆෙස් රැළිය පැවැතුනේ එජාප රැළියක් ලෙසිනි. මෙවැනි පරතරයක් හෝ වෙනසක් රාජපක්ෂ කඳවුර තුළ දැන් දක්නට ඇත්තේ නැත. රාජපක්ෂ කඳවුරේ දේශපාලනයට අදාළව පක්ෂ අනන්‍යතාව යනු මුළුමනින් ම අහෝසි වී ගිය අනන්‍යතාවකි.■
නිර්මාල් රංජිත් දේවසිරි
