ගජබා රේජිමේන්තු අධිපති මේජර් ජෙනරාල් ශවේන්ද්‍ර සිල්වාගේ අදහසක්, අනුව කොළඹ ෂැංග්‍රිලා හෝටලයේ පැවැත්වෙන රාත්‍රි සාදයක් හේතුවෙන් එම දෙපාර්තමේන්තුවේ නිලධාරීන් දැඩි අපහසුතාවකට පත්වී ඇතැයි වාර්තාවේ.
එම රාත්‍රි සාදය නොවැම්බර් 20 දින පැවැත්වීමට නියමිතව තිබූ අතර ඒ සඳහා ගජබා රෙජිමේන්තුවේ ලු‍තිනන් කර්නල් නිලය ඇතුළු ඊට ඉහළ නිලධාරීන් සිය බිරිය සමග යුවළක් ලෙස සහභාගි වීම අනිවාර්ය කර තිබේ. එසේ අනිවාර්ය කර ඇති නිලධාරීන්ගේ ටිකට්පතක මිල රුපියල් 17000ක් වන අතර යුවළ සඳහා ටිකට්පත් දෙකක් මිලදී ගත යුතුය.
ඊට අමතරව එම රාත්‍රි සාදය සඳහා ගජබා රෙජිමේන්තුවට අයත් බලඇණියක් රුපියල් ලක්ෂ 5ක මුදලක් ලබාදිය යුතු අතර රෙජිමේන්තුව යටතේ බලඇණි 22ක් පවතී.
තවද එකී බලඇණියකින් ලු‍තිනන් කර්නල් නිලයට පහළින් ඇති නිලධාරීන් 5 දෙනෙකුද අනිවාර්යෙන් රාත්‍රි සාදය සඳහා සහභාගි විය යුතු අතර එම නිලධාරීන් සඳහා ටිකට්පතක මිල රුපියල් 15,000කි.
එම රාත්‍රි සාදයේ අමුත්තන් සංඛ්‍යාව 600ක් වශයෙන් ගණන් බලා ඇති අතර ගජබා රෙජිමේන්තුව නියෝජනය කළ හිටපු නිලධාරීන්ටද ඒ සඳහා ආරාධනා කර ඇත. ආරක්ෂක අමාත්‍යාංශයේ හිටපු ලේකම්වරයෙකු වූ ගෝඨාභය රාජපක්‍ෂද ගජබා රෙජිමේන්තු නිලධාරියෙකු වශයෙන් ඊට සහභාගි වන බව පැවසේ.
මේ පිළිබඳව යුද හමුදා මාධ්‍ය ප්‍රකාශක බි්‍රගේඩියර් සුමිත් අතපත්තුගෙන් ‘අනිද්දා’ කළ විමසීමේදී ඔහු ප්‍රකාශ කළේ එම රාත්‍රි සාදය පිළිබඳව හමුදාව දැනුවත් බවත් එහෙත් එය ශ්‍රී ලංකා යුද හමුදාව විසින් සංවිධානය කරන එකක් නොවන බවත්ය.
වත්මන් යුද හමුදාපති මහේෂ් සේනානායක ඔහුට ලබාදී ඇති සේවා දිගුවට පෙර යුද හමුදාපතිධුරයෙන් ඉවත් කළහොත් හමුදාපති ධුරය සඳහා ශවේන්ද්‍ර සිල්වාද සුදුස්සෙකු වශයෙන් සැලකෙන අතර ගෝඨාභය රාජපක්‍ෂට හිතවත් නිලධාරීන් අතරින් මේ වන විට යුද හමුදාවේ ඉතිරි වී සිටින්නේ ඔහු පමණය.
මේ වනවිට ශවේන්ද්‍ර සිල්වා පොළොන්නරු දිස්ත්‍රික්කයේ පැරණි දේශපාලනඥයෙකුගේ දියණියක හා විවාහ වී සිටින අතර ඇය සමග ජනාධිපතිවරයා මුණගැසීම සඳහා කිහිප වතාවක් ගොස් ඇති බවද වාර්තාවේ.
ලසන්ත රුහුණගේ / රේඛා නිලු‍ක්ෂි හේරත්
