පාර්ලිමේන්තු මන්ත්‍රී ආශුබෝධ මාරසිංහ
ඉදිරියේදී ජනාධිපතිවරයා සමඟ ගණුදෙනු කරන්නට පුලු‍වන් වේවිද?
අපි විශ්වාස කරනවා රටේ වර්තමාන දේශපාලන තත්ත්වය ජනාධිපතිවරයා හරියාකාරව තේරුම් ගනීවි කියලා. මොකද ජනාධිපතිවරයාගේ පැත්තෙන් ගත්තාම එතුමා මේ කාලයේදී දැනුවත්ව හෝ නොදැනුවත්ව මහින්ද රාජපක්ෂ මහතාගේ කුමන්ත්‍රණයට අහු වුණා. එතුමා ඒක කළේ දැනුවත්වද නොදැනුවත්වද කියන එක මනින්න වෙන්නේ එතුමාගේ හෘදය සාක්ෂියෙන්. කොහොම වුණත් හෘදය සාක්ෂිය මනින්න තවමත් ක්‍රමයක් හොයාගෙන නැහැ. එතුමා කෙසේ හෝ මහින්ද රාජපක්ෂගේ කුමන්ත්‍රණයට අහුවුණානේ. මහින්ද රාජපක්ෂ කියන්නේ මේ රටේ පහළ වූ බලලෝභීම දේශපාලනඥයෙක්. සාමාන්‍යයෙන් කිසිම රටක ව්‍යවස්ථානුකූලව ජනාධිපතිවරයෙක් දෙවතාවකට වඩා පත්වෙන්න බැරි ව්‍යවස්ථාවක් තියෙනකොට නැවත නැවතත් බලයේ රැඳී ඉන්න කල්පනා කරන්නෙ නැහැ. ඒකෙන්ම මේ කෑදරකම පැහැදිලියි. ඒ නිසා අපි විශ්වාස කරන්නේ මේ තියෙන කුමන්ත්‍රණ නිර්මාණය කරන්නේ මහින්ද රාජපක්ෂ විසින් බව. බලන්න මන්ත්‍රීගේ ඉඳන්, විපක්ෂනායක ධුරයට ආ හැටි. මහින්ද රාජපක්ෂ මහතාට පාර්ලිමේන්තු මන්ත්‍රීධුරයත් අහිමි වුණොත් ප්‍රාදේශීය සභාවකට යන්න හෝ උත්සාහ කරයි. ඔහු ඉපදුණේත් පාර්ලිමේන්තුවේලු. හොල්මන් සංකල්පය ඇත්තක් නම් මහින්ද රාජපක්ෂ මියගියොත් හොල්මනක් වෙලා හරි පාර්ලිමේන්තුවේ ඉඳියි. දැන් අපි දන්නවා රටට හෙණ ගැහුවත් කමක් නැති බව කියලා තමන්ගෙ පුතා පරිණත වෙන තෙක් දේශපාලනයේ නායකයෙක් විදියට රැඳී ඉන්න මහින්ද රාජපක්ෂට ඕනෑ වෙලා තියෙනවා. ඇත්තටම ලංකාවට තියෙන ලොකුම දේශපාලන පිළිලය තමයි මහින්ද රාජපක්ෂ කියන්නේ. මෛත්‍රීපාල සිරිසේන ජනාධිපතිතුමාට මහින්ද රාජපක්ෂගෙන් ගැලවෙන්නට පුළුවන් වුණොත් ප්‍රශ්න ඔක්කෝම විසඳේවි.
එහෙත් මෛත්‍රීපාල සිරිසේන ජනාධිපතිවරයා අගමැති රනිල් වික්‍රමසිංහ දිවුරුම් දුන් අවස්ථාවේ කළ කතාවෙන් හා කැබිනට් මණ්ඩලය පත්කිරීම ගැන කරලා තියෙන ප්‍රකාශවලින් පෙනෙ න්නේ ඔහු වෙනස් වී නොමැති බව නේද?
ඔක්තෝබර් 26 වැනිදා අපි පත් කරගත්ත ජනාධිපතිවරයා සංකල්පීය වශයෙන් මියගිය බව අපි විශ්වාස කරනවා. දැන් මහින්ද රාජපක්ෂ විසින් බිහිකරපු ක්ලෝන් එකක් තමයි තියෙන්නේ. වචන සහ ක්‍රියාමාර්ග සියල්ලේම ඉන්නේ මහින්ද රාජපක්ෂ. ඉතින්, මෛත්‍රීපාල සිරිසේන මහතා ගැන අනුකම්පාවක් තමයි අපට තියෙන්නේ. දැන් තත්වය පිළිබඳව ජනාධිපතිතුමා සත්‍යය අවබෝධ කරගන්න තුරු අපි බලාගෙන ඉන්නවා. දැනටමත් අධිකරණය තීන්දුවක් දීලා තියෙනවා. මෙතැනින් පස්සේවත් ඔහු අධිකරණයට අවනත වේවි කියලා අපි හිතනවා. ඔහු ව්‍යවස්ථාවට පිටින් නැවත කටයුතු කළොත් අධිකරණයට යන්න සිද්ධ වෙනවා. අපට තියෙන එකම ලියැවිල්ල තමයි ව්‍යවස්ථාව. අපි ඕනෑම තැනක වැඩක් කරද්දී තියෙනවා වැඩ කරන්නට පිළිවෙළක්. මාධ්‍යවේදියෙක්ට නම් ආචාරධර්ම පද්ධතියක්. වෛද්‍යවරුන්ටත් තියෙනවා ආචාරධර්ම පද්ධතියක්. කවුරුන් හෝ ඒ ආචාරධර්ම පද්ධතිය කඩකිරීම බරපතළ වැරැද්දක්. රටක් යන්නේ ව්‍යවස්ථාවට අනුව. ඒකට පිටින් වැඩ කරද්දී සටන් කරන්න වෙනවා. ඉදිරියටත් ජනාධිපතිවරයා ව්‍යවස්ථාව පිළිනොගෙන කටයුතු කළොත් ශ්‍රේෂ්ඨාධිකරණයේ පිහිට පතන්නට සිද්ධවෙනවා.
ජනාධිපතිවරයාට ගැළපෙන ආකාරයට එක්සත් ජාතික පක්ෂ යට ආර්ථික ප්‍රතිපත්ති වෙනස් කරගන්න සිද්ධවේවි නේද?
අපේ ආර්ථික ප්‍රතිපත්ති ගැන බිල්ලෙක් මවන්නේත් මහින්ද රාජපක්ෂ නඩය විසින් තමයි. අපේ ආර්ථික ප්‍රතිපත්තිය රටට අහිතකර කියන්නේ මහින්දලා. සිංහල බෞද්ධයන්ට අපේ ආර්ථික ප්‍රතිපත්තිය හොඳ නෑ වගේ කතා තමයි කියන්නේ. මේවා හිතලු. අද ලෝකය විශ්ව ගම්මානයක්. ලෝකය එක්කයි අපි යන්න ඕනෑ. ලෝකයට ගැලපෙන ආර්ථික ප්‍රතිපත්ති අනුගමනය නොකළොත් අපි පස්සට යනවා. සමාජ වෙළෙඳපොළ ආර්ථිකයක් තමයි අපි පිළිගන්නේ. එතකොට අපි නිදහස් අධ්‍යාපනය හා නිදහස් සෞඛ්‍ය සේවය ආරක්ෂා කරනවා. එහෙත් ලෝකය එක්ක තරග කරන තරගකාරීත්වයක් සහිත වෙළෙඳපොළ ආර්ථිකයක් ඇති කළ යුතුයි. ඒ ගැනයි අපි හිතන්නේ. දැනුම් ආර්ථිකයක් අපි විශ්වාස කරනවා. ඒ ගමන අපි ඉදිරියට යනවා.
ඒ කියන්නේ ආර්ථික ප්‍රතිපත්තිය වෙනස් කරගන්නට අදහසක් නොමැති බවද?
ජනප්‍රිය දේශපාලනයක් කරන්න අපට අදහසක් නැහැ. රටට හෙණ ගැහිලා තියෙන්නේ සුළු පිරිසකගේ ගැලරි දේශපාලනය හින්දා. බොරුව වපුරමින් ඔවුන් කරන දේශපාලනයම කරන්න අපේ කිසි සූදානමක් නැහැ. ඒ නිසා අපි ක්‍රියාත්මක කරන්නේ රටට ගැළපෙන ආර්ථික ප්‍රතිපත්තියක්. අපේ ආර්ථික ප්‍රතිපත්තිය කිසිසේත්ම වෙනස් කරන්නේ නැහැ. ඒ සඳහා කිසිම සාකච්ඡාවක් නැහැ.
එහෙම වුණොත් අනාගතයේදී ප්‍රතිපත්තිමය තීන්දු සම්බන්ධයෙන් එජාපය සහ එජනිසය අතර ලොකු ගැටුමක් ඇතිවේවි නේද? මාධ්‍ය බලයකුත් නැතිව එවැනි මතවාදී ගැටුමකට මුහුණදෙන්න එජාපයට පුළුවන්ද?
අපි මතවාදී අරගලයක ඉන්නවා. ඒත් මාධ්‍ය ගැන ඔබ කී කතාව හරි. ප්‍රධාන ධාරාවේ මාධ්‍ය ගැන විශ්වාසය තැබිය නොහැකියි. එහෙත් සමාජ මාධ්‍ය විසින් ලොකු කාර්යභාරයක් කරනු ඇතැයි අපි විශ්වාස කරනවා. රාජ්‍ය මාධ්‍යවලින් හැර වෙනත් මාධ්‍යවලින් අපි කරන සංවර්ධනයක් ගැනවත් ප්‍රවෘත්තියක් පළ කරයි කියලා අපි හිතන්නේ නැහැ. ඒත් අපි මතවාදී අරගලය සමාජගත කරන්නට විකල්ප ක්‍රම තෝරාග න්නවා. මාධ්‍යවල තත්වය පිළිබඳ කලබල විය යුතු නැහැ. ජනතාව ඔය කට්ටිය කියන හැමදේම පිළිගන්නේ නැහැ. ඒ වගේම අපට විරුද්ධව අදහස් දක්වන සිවිල් සංවිධාන වුණත් රාජපක්ෂලාගේ අල්ලේ නැටවෙන අය. දැන් ජි.එම්.ඕ.ඒ. එක බලන්න. යහපාලන ආණ්ඩුව කාලයේ කෑගැහුව කට්ටිය. පහුගි ය දවස්වල මීක් ගෑවෙ නැහැ. ශ්‍රේෂ්ඨාධිකරණ තීන්දුව ගැන සද්දයක් නැහැ. අපට දැනගන්නට තියෙනවා පාදෙණිය මහත්තයා මහින්ද රාජපක්ෂව මුණගැහුණ බව. එවැනි පසුබිමක රජයේ වෛද්‍ය නිලධාරීන්ගේ සංගමය පිළිගන්නට ජනතාවත් සූදානම් නැහැ. දැන් රාජිත සේනාරත්නව පත් කරන්න එපා කියලා රජයේ වෛද්‍ය නිලධාරින්ගේ සංගමය කියනවානේ. දැන් ඔහුව පත් කරන්න එපායැයි ඉල්ලන්නෙ ඇයි. රජයේ වෛද්‍ය නිලධාරීන්ගේ සංගමයට නටවන්න බැරි හින්දා. තමන්ට ඕනෑ දේවල් කරන්නයි ඔවුන් මේ ඉල්ලිම් කරන්නේ. මේවාට අපි ඉඩ තියන්නේ නැහැ. මේ වෙද්දී ස්වාධීන සිවිල් සංවිධාන බොහොමයක් අපි එක්ක ගමනක් යන්න සූදානමින් ඉන්නවා. මතවාදී අරගලයකදී ඔවුන්ගේ සහයෝගය අපට ලැබේවි.
ව්‍යවස්ථාව කඩකිරීමේ වරද ජනාධිපතිවරයා කළ බරපතළ වැරැද්දක්. ඔබ කීවා වගේ වෛද්‍යවරයෙක් විසින් වෛද්‍ය ආචාරධර්ම කඩකිරීමක් වගෙයි. ව්‍යවස්ථාව කඩ කිරීමත් මනුෂ්‍ය ජීවිත සම්බන්ධ බරපතළ වැරැද්දක්. එහෙත් එක්සත් ජාතික පක්ෂය දෝෂාභියෝගයක් ගෙන එන්නේ නැති බව කියනවා නේද? ජනාධිපතිවරයා කරපු වැරැ ද්දෙන් ගැලවෙන්නට අවස්ථාව දෙන්නේ ඇයි?
දෝෂාභියෝගයක් ගෙනැල්ලා මාස හයක් ඒකට රස්තියාදු වීම ඒ තරම් සාර්ථක ක්‍රියාමාර්ගයක් බව අපි විශ්වාස කරන්නෙ නැහැ. ජනාධිපතිවරණයකට තව සුළු කාලයක් තියෙන්නේ. දැන් පහුගිය කුමන්ත්‍රණය නිසාත් රට ආපස්සට ගිය හැටි දැක්කානේ. දෝෂාභියෝගයක් ගෙනාවත් ඇතිවෙන්නේ මෙවැනි තත්වයක්. ඒ ගැන කතාබහ කරන්න, වාද විවාද කරන්න අපි වැය කරන වෙලාව අපරාදේ. අපි දෝෂාභියෝගයකට වඩා කරන්න ඕනෑ, ජනාධිපතිවරයා ව්‍යවස්ථානුකූලව වැඩ කළ යුතු බවට මතයක් හැදීම. ජනාධිපතිවරයා තවදුරටත් ව්‍යවස්ථානුකූලව වැඩ කරන්නේ නැතිනම් ගන්න ක්‍රියාමාර්ග තියෙනවා. ඇත්තටම අපි ලොකු සටනක් කළේ නැති තරම්. අපි හරියට පාරට බැස්සේත් නැහැ. අපි ලෑස්ති වෙලා හිටියේ පාරට බැහැලා, ජනාධිපති කාර්යාලය වැටලීමෙන් හරි මේ ප්‍රශ්ණය විසඳන්නනේ. ඉතින්, ඉදිරියේදීත් ජනාධිපතිවරයා එහෙම කරන්න උත්සාහ කළොත් ඒකට විරුද්ධ වෙනවා.
ඇමෙරිකන් නාවික හමුදාවට ලංකාවේ කඳවුරක් හදන්නට එක්සත් ජාතික පක්ෂය ඉඩ දුන්නාද?
ඒක පට්ටපල් බොරුවක්. වැරදිලාවත් ඒක ඇත්තක් නම් ඒක් ජනාධිපති මෛත්‍රීපාල සිරිසේන මහතාට එරෙහිව එල්ලවෙන බරපතළ චෝදනාවක්. ඔහු ආරක්ෂක අංශ ඒ තරම් දුර්වල කරලා තියෙනවාද. ඔහු ආරක්ෂක ඇමති. ඔහුටත් හොරෙන් ලංකාවේ හමුදා කඳවුරක් හදන්නට වෙන රටක් සමත් වුණා නම් ඒක ජනාධිපතිවරයා කොච්චර දුර්වල පාලකයෙක්ද කියලා තහවුරු වෙන කාරණයක්.
මහින්ද රාජපක්ෂට විපක්ෂ නායක ධුරය ගන්න ඉඩ නො දෙන්නේ ඇයි?
අපට පෞද්ගලික විරෝධයක් නැහැ. එහෙත් මුළු රටම දැක්කා මහින්ද රාජපක්ෂ පොහොට්ටුවේ සාමාජිකත්වය ගත් බව. ඒ කියන්නේ මහින්ද රාජපක්ෂ ශ්‍රී ලංකා නිදහස් පක්ෂයේ සාමාජිකයෙක් නෙවෙයි. ඒ නිසා පොහොට්ටුවේ සාමාජිකත්වය ගත් අය ස්වාභාවිකවම ශ්‍රී ලංකා නිදහස් පක්ෂයෙන් අයින් වෙන්න ඕනෑ. මේ අය පත්වුණේ එක්සත් ජනතා නිදහස් සන්ධානයෙන්. එතකොට ඔවුන් එජනිසයේ සාමාජික පක්ෂයක සාමාජිකයන් වෙන්න ඕනෑ. පොදුජන පෙරමුණ කියන්නේ එජනිස සාමාජික පක්ෂයක් නොවන නිසා මේ සම්බන්ධයෙන් ප්‍රශ්නයක් තියෙනවා. ඒක නෛතික ප්‍රශ්නයක්. එයාලාගේ පක්ෂවල අභ්‍යන්තර ප්‍රශ්නයක් නෙවෙයි. නීතිය සම්බන්ධ පොදු ප්‍රශ්නයක්. දැන් කවුරුන් හෝ අධිකරණයට ගිහින් මේ ගැන අර්ථනිරූපණයක් ඉල්ලන්න සිද්ධවෙනවා. එහෙම නැත්නම් මහින්ද රාජපක්ෂ මහතා ප්‍රකාශයක් කරන්න ඕනෑ තමන් පොහොට්ටුවේ සාමාජිකයෙක් නොවන බව. එක්කෝ ඔහු කියන්න ඕනෑ මම විහිළුවටයි පොහොට්ටුවේ සාමාජිකත්වය ගත්තෙ කියලා. නැත්නම් කියන්න පුළුවන් පාර්ලිමේන්තුව විසුරුවාහැරපු හින්දයි මම සාමාජිකත්වය ගත්තෙ, දැන් පාර්ලිමේන්තුව විසුරුවාහැරීම නීතිවිරෝධී බව ඔප්පු වූ නිසා පොහොට්ටුවෙන් අයින් වෙලා නැවත ශ්‍රීලනිපයට එන බව. මට පොහොට්ටු සාමාජිකත්වයට වඩා විපක්ෂනායක ධුරයයි පාර්ලිමේන්තු මන්ත්‍රීධුරයයි ලොකු බව කියන්න වෙනවා.
රනිල් වික්‍රමසිංහ අගමැතිවරයාගේ පාර්ලිමේන්තු මන්ත්‍රීධූුරය අහෝසි වෙන්න ඕනෑ බවත් ඔහු රජය සමග ව්‍යාපාර කර තිබෙන බවත් චෝදනා එල්ලවෙනවා නේද?
එතැන චෝදනාවක් නැහැ. ආණ්ඩුව සමග ගනුදෙනු කරන සමාගමක් වන ලේක්හවුස් ප්‍රින්ටර්ස් සමාගමේ කොටස් ඔහුට පරම්පරාවෙන් හිමිවෙලා තියෙනවා. ඒත් ඔහු ඒ සමාගමේ අධ්‍යක්ෂවරයෙක් නෙවෙයි. ඔහුගේ මන්ත්‍රීධුරය අහිමිවෙන්නේ රජය සමග ගිවිසුම්ගත සමාගමක අධ්‍යක්ෂවරයෙක් නම්. නැත්නම් කොටස් මිලදී ගැනීමට මන්ත්‍රීවරුන්ට බාධාවක් නැහැ. අනෙක අපි දන්නා විදියට මේ සමාගමේ කොටස්වලින් රනිල් වික්‍රමසිංහ අගමැතිතුමාට කිසිම ලාභයක්වත් එන්නේ නැහැ. ලේක්හවුස් කියන්නේ රනිල් වික්‍රමසිංහ මහතාට පරම්පරාවෙන් ලැබුණු ව්‍යාපාරයක්. මෙවැනි ව්‍යාපාරවල ආරම්භක පවුලට සංකේතාත්මකව සුළු කොටස් ප්‍රමාණයක් හිමිවෙනවා. ඒ ගැනයි ඔය කතාව යන්නේ.■
