අග්‍රාමාත්‍ය කාර්යාලයේ වැය ශීර්ෂය කපා හැරීම සඳහා එක්සත් ජාතික පෙරමුණ බාර දී ඇති මුදල් යෝජනාව සම්මත කිරීමෙන් පසු තවදුරටත් ජනාධිපති මෛත්‍රීපාල සිරිසේන විසින් පාර්ලිමේන්තුවේ බහුතරය ඇති කණ්ඩායමට බලය ලබාදීමට කටයුතු නොකළහොත් ජනතාව කොළඹට ගෙන්වා ජනාධිපති කාර්යාලය වැටලීමට එක්සත් ජාතික පෙරමුණ තීරණය කර ඇත.
එක්සත් ජාතික පෙරමුණේ ඉදිරි ක්‍රියාමාර්ග පිළිබඳව ‘අනිද්දා’ කළ විමසීමකදී පාර්ලිමේන්තු මන්ත්‍රීවරුන් වන මුජිබුර් රහුමාන් හා මහාචාර්ය ආශු මාරසිංහ ඒ බව තහවුරු කළෝය.
තම පක්ෂය අග්‍රාමාත්‍ය කාර්යාලයේ වැය ශීර්ෂය කපා හැරීම පිළිබඳව බාරදුන් යෝජනාව නොවැම්බර් 29 දින ඡන්ද විමසීමට භාජනය කිරීමට නියමිත බවත් එහිදී එම යෝජනාව ජය ගැනීමෙන් පසු තවදුරටත් හිතුවක්කාරී ලෙස ජනාධිපතිවරයා පාර්ලිමේන්තුවේ බහුතරය ඇති කණ්ඩායමට ආණ්ඩුව පවත්වාගෙන යෑමට ඉඩ නොදී කටයුතු කළහොත් ජනාධිපතිවරයා සිටින අවස්ථාවක ජනාධිපති ලේකම් කාර්යාලය වැටලීමට සූදානම් බවද මුජිබුර් රහුමාන් හා ආශු මාරසිංහ ප්‍රකාශ කළහ.
එමෙන්ම ජනාධිපති ලේකම් කාර්යාලය වැටලීමට සමාන්තරව දුම්රිය, වරාය, ඛනිජ තෙල් වැනි බලපෑම් සහගත ක්ෂේත්‍රවල වැඩ වර්ජන කැඳවීමට තීරණය කර ඇතැයිද ඔවුහු ප්‍රකාශ කළහ.
නොවැම්බර් 29 දිනට අදාල පාර්ලිමේන්තුවේ න්‍යාය පත්‍රය මේ වනවිට එහි වෙබ් අඩවියේ ප්‍රදර්ශනය කර ඇති අතර විශ්වාස භංගය සම්මත වී ඇති හෙයින් නොවැම්බර් 15 දින සිට ජනරජයේ අරමුදල්වලින් කිසිදු වියදමක් අනුමත කිරීමට අග්‍රාමාත්‍ය ලේකම්වරයාට කිසිදු බලයක් නොමැති බවට වූ එම යෝජනාව එහි සඳහන් වෙයි.
අග්‍රාමාත්‍ය කාර්යාලයේ වැය ශීර්ෂය කපා හැරීමට අමතරව, නීති විරෝධී අමාත්‍යවරුන් හා ඔවුන්ගේ කාර්ය මණ්ඩලවල වැය ශීර්ෂ කපා හැරීමටද එක්සත් ජාතික පක්ෂය පාර්ලිමේන්තුවට යෝජනා බාර දී ඇති අතර එම යෝජනා නොවැම්බර් 29 වැනිදායින් පසු එළැඹෙන පාර්ලිමේන්තු රැස්වීම් දිනලදී විවාදයට ගෙන ඡන්ද විමසීමට නියමිතය.
පාර්ලිමේන්තුව තුළ නීති විරෝධී අග්‍රාමාත්‍යවරයා ඇතුළු කැබිනට් මණ්ඩලයට එරෙහිව සම්මත වූ විශ්වාසභංග යෝජනාව හේතුවෙන් තවදුරටත් ආණ්ඩුවක් නොමැති තත්වය තුළ ඔවුන් එම ධුරවල කටයුතු කිරීම වැළැක්වීම සඳහා නියෝගයක් ලබාගැනීමට අභියාචනාධිකරණයට පෙත්සමක් ඉදිරිපත් කිරීමටද එක්සත් ජාතික පෙරමුණ තීරණය කර ඇතැයි එම මන්ත්‍රීවරු දෙපළ වැඩිදුරටත් ප්‍රකාශ කළෝය.
මේ වනවිට විශ්වාස භංගය සම්මත කරගත් දිනය වන නොවැම්බර් 14 වැනිදා සිට පාර්ලිමේන්තුව අවසන් වරට රැස්වූ නොවැම්බර් 19 වැනිදා දක්වා පාර්ලිමේන්තුවේ පැවති විවාදවලට අදාල හැන්සාඞ් වාර්තා ප්‍රසිද්ධ කොට තිබෙන අතර එම හැන්සාඞ් වාර්තා අතරින් නොවැම්බර් 14 වැනිදා සහ නොවැම්බර් 16 වැනිදා හැන්සාඞ් වාර්තාවල මහින්ද රාජපක්ෂ ඇතුළු කණ්ඩායම කෙරෙහි පාර්ලිමේන්තුවේ විශ්වාසයක් නැතැයි, විශ්වාස භංගයක් සම්මත වූ බව සඳහන්ව ඇත. කථානායකවරයා විසින් විශ්වාස භංගය සම්මතයි, යනුවෙන් ඉංග්‍රීසි භාෂාවෙන් ප්‍රකාශ කළ බව එම දින දෙකටම අදාළ හැන්සාඞ් වාර්තාවල සඳහන් වෙයි.
