වඩාත්ම හොඳ අස්වීමයි
සරත් ඉද්දමල්ගොඩ පියතුමා
මේ තත්ත්වය මෛත්‍රීපාල සිරිසේන ජනාධිපතිවරයා තනියෙන් ඇතිකළ එකක් නෙවෙයි. හිටපු ජනාධිපති මහින්ද රාජපක්ෂ එක්ක එකතුවෙලා ඇතිකළ එකක්. දෙදෙනාටම තම තමන්ගේ න්‍යාය පත්‍ර තිබෙනවා. ජනතා අපෙක්ෂාවන් ඉටුකිරීම එම න්‍යාය පත්‍රයේ නැහැ. තනිකරම තමන්ගේ අනාගතය, තමන්ගේ පවුලේ වුවමනාවන් තමයි තියෙන්නේ.
මෛත්‍රීපාල සිරිසේන ජනාධිපති ඡන්දය ඉල්ලු‍වේ යහපාලනයක් සඳහා. දූෂණ හොරකම ආදිය නතර කරන්න. අවුරුදු තුනහමාරක් පුරා ඒ කිසිවක් සිදු වූයේ නැහැ. දුන් පොරොන්දු නිසා දෙමළ ජනතාව විශාල වශයෙන් ඡන්දය දුන්නේ මෙතුමාට. නමුත් දෙමළ ජනතාවට දුන් පොරොන්දු ඉටු කළේ නැහැ. සෝභිත හාමුදුරුවන්ට දුන් පොරොන්දුව ඉටුකලේ නැහැ. නමුත්, මේ රටේ යමපාලනයක් ඇතිකළ හා තමන්ව හා තම පවුල අඩි 6ක් යට වලලන්ට කුමන්ත්‍රණ කලාවූ බව පවසමින් ඡන්දය ඉල්ලමින් ජනාධිපති වූ සිරිසේන තමන්ව විනාශ කිරීම සැලසුම් කළ එම පුද්ගලයාවම අක්‍රමවත් ක්‍රමයකින් අගමැතිකම දුන්නා.
අවසානයේදී, සිරිසේන ජනාධිපතිතුමාට තමන් විසින් පවරා ගත් වගකීම ඉටු කිරීම් ශක්තිය නැති බවයි පේන්නේ. එතුමා දැන් නපුරු බලවේගයන්ට යටත් වී අවසන්. එම නිසා වඩාත්ම හොඳ දේ ඔහු ඉල්ලා අස්වීමයි. එහෙත් මේ තත්ත්වයෙන් පස්සෙ මේ දෙගොල්ලන්ගෙන් කවුරු බලය තහවුරු කරගත්තත් බහුතර ජනතාවට සෙතක් ඇතිවන්නේ නෑ.■
අතිශයින්ම ඒකාධිපතියි
කෞශල්‍යා ප්‍රනාන්දු
වත්මන් ජනාධිපතිවරයාගේ මේ හැසිරිම මම දැඩිව හෙළා දකිනවා. මේක බහුතර ලාංකිකයන් පිරිසක් එක් අරමුක් වෙනුවෙන් වැඩ කරලා, මෛත්‍රීපාල සිරිසේන කෙරෙහි විශ්වාසය තබමින් ගෙන ආ පාලන ක්‍රමයක්. ඔහු කළේ සම්පුර්ණයෙන්ම අපිව රවට්ටපු එක. මේ ජනාධිපතිවරයාගේ ක්‍රියා කලාපය අතිශයින්ම ඒකාධිපතියි. ඔහු විධායක බලතල ඉතාම නරක විධියට පාවිච්චි කරපු පුද්ගලයෙක් බවට පත්වෙලා. ඡන්දයකින් පස්සේ ඔහු කැමති පුද්ගලයාව මේ රටේ අගමැතිවරයා විදියට පත් කර ගත්තානම් කිසි ප්‍රශ්නයක් නැහැ. ඒ පත් කරගන්න පුද්ගලයා මහින්ද රාජපක්ෂ වුනත් රනිල් වික්‍රමසිංහ වුනත් ඒක අපිට ප්‍රශ්නයක් නැහැ. කිසිදු දේශපාලන නායකයෙක්ව විශ්වාස කරන්න බැරි තත්ත්වයකට අපි පත්වෙලා ඉන්නේ. මේ ක්‍රියාවෙන් යම් කිසි පාර්ශවයක් මේ වන විට අර්බුදයට පත්වෙලා නම් ඉන්නේ ඒ අර්බුදයට පත්වීම පිළිබඳව වග කියන්න ඕනත් ඒ පාර්ශ්වයම තමයි. රනිල් වික්‍රමසිංහ පවා මේ අර්බුදයට වගකියන්න ඕන. ඔහු අනෙක් පාර්ශවයන් හුරතල් කරමින් සිටියා. කිසිදු ක්‍රියා මාර්ගයක් ගන්නේ නැතිව. මහ ජනතාව වන අපි තමයි ශාරිරිකව මානසිකව පීඩා විදින්නේ. වතුර යටින් ගින්දර ගෙන ගිය අය ඒ ගින්දරට දැවී ගිහින්.■
මානසික අබලතාවක්ද?
මහාචාර්ය රත්නසිරි අරංගල
එක් අතකින් සිරිසේන මහතා වැනි දේශපාලන දෘෂ්ටියක් හෝ දේශපාලන පරිණතභාවයක් හෝ නැති කෙනෙකුගෙන් මීට වැඩි යමක් අපේක්ෂා කිරීමත් මෝඩ කමක්. එතුමා පොදු අරමුණක් සඳහා තල්ලූ කර දැමුණා විනා ඒ සඳහා දීර්ඝ කාලීන සූදානමක් හා කැපවීමක් පෙන්නුම් කළ දේශපාලනඥයෙක් නො වෙයි. මට මෙහි දී සිහිපත් වෙන්නේ ළමයකු බේරා ගැනීමට ගඟට තල්ලූ කර දැමුණු මනුස්සයා පිළිබඳ කතාව. ඒ මනුස්සයාට ළමයා බේරා ගන්න හැකි වුණේ ගොඩ සිටි පිරිස විසින් ගඟට තල්ලූ කර දැමීම නිසා ළමයා ළඟට ඔහු වැටුණු බැවිනුයි. ගොඩ සිටි අයගේ උදව්වෙන් ළමයා බේරා ගත් පසු ව ‘ඒ වෙලාවෙ ඔබට සිතුණේ කුමක් ද’ කියා ඇසූ අයට ඔහුගේ පිළිතුර වූයේ ‘තල්ලූ කරපු එකා දැක්ක නම් ඒ වෙලාවෙ මං ඌගෙ …..ට ….වා’ කියා යි. දැන් සිරිසේන මහතා කර තිබෙන්නේ ඔහු 2015 ප්‍රජාතන්ත්‍රවාදය ජයග්‍රහණය කිරීම සඳහා තල්ලූ කර ගෙන ආ බලවේගවලට පහර දීමක් බව කිව යුතු යි. ඔහුගේ කැපී පෙනුණු එක ම ලක්ෂණය වූයේ අසීමාන්තික බල ලෝභය පමණයි. ඒ අතින් ඔහු රාජපක්ෂවරුන් පවා පරාද කිරීමෙහි සමත් වුණා. ආණ්ඩුක්‍රම ව්‍යවස්ථාවේ 38 (2) වගන්තියේ දැක්වෙන පරිදි ජනාධිපතිවරයාට ඔහුගේ ධුරයේ කාර්ය ඉටු කිරීමට නොහැකි වන අන්දමේ මානසික අබලතාවක් ඇද්දැයි යන සැකයත් කෙනෙකුට ඇති විය හැකි යි. දැන් අපට තවත් සෝභිත හිමි නමක් බලාපොරොත්තු වෙන්න බැහැ. ඒ වෙනුවට බුද්ධරක්ඛිතලා, සෝමාරාමලා, බාබුලා බිහි වී රට බිහිසුණු තත්ත්වයකට පත් කරාවි.■
ජරමරවල නිර්මාතෘ ඔහු
ආචාර්ය හරිනි අමරසුරිය
වත්මන් ජනාධිපතිවරයා මුලින්ම දැන ගන්න ඕන ඔහුව අපි පත් කලේ පුද්ගලයෙකු විධියට ඔහුගේ විශේෂත්වයක් නිසා නොවන බව. 2015 දි අපි යම් කිසි ප්‍රතිපත්තිමය එකඟතාවයක් සමග තමයි අපි ඔහුව ඉදිරිපත් කළේ. පත්වුණාම කරන්න ඕන යම් යම් කාරණා මත එකඟත්වයකින් තමයි ඔහු පත් වුණේ. දැන් ඔහුට නිදහසට කරුණු ලෙස හේතු ගොඩක් කියන්න පුළුවන්. ඔහුට කියන්න පුළුවන් එක්සත් ජාතික පක්ෂයේ වැරදි නිසා තමන් මේ තත්වයට පත්වුණා කියලා. නමුත් ඔහු බලයට පත් වුනේ පොදු ගිවිසුමක් එක්ක. එයාට ඒ ගිවිසුමට මෙහෙම පිටුපාන්න බැහැ. මේ සිදුවීමෙන් පස්සේ ඔහු ඉවරයි. දේශපාලනය ඉවරයි. ඔහුට කිසිම දෙයක් සාධාරණීකරණය කරන්න බැහැ. ඔහු කළේ ඔහුව පත් කරපු ජනතාව පාවා දීමක්. විශ්වාසභංගය පිළිබඳවත් ඔහු ප්‍රකාශ කරලා තිබ්බේ ඔහුගේ උපදෙස් අනුව ක්‍රියාත්මක නොවුණ නිසා ඒ විශ්වාසභංගය පිළිගන්න බැහැ කියලා. ඊටපස්සේ කියනවා තමන්ගේ උපදෙස් අනුව කළබල නොකර සිටීම ගැන පාර්ලිමේන්තුවට ස්තූතියි කියලා. මේවා හරිම බොළඳ කතා. මේක විහිළුවක්. මේ සියලු ජරමරවල නිර්මාතෘ ඔහු. දැන් ඔහු එසේ කිසිම දෙයක් සිදු කලේ නැහැ වගේ හැසිරෙන්නේ.■
පිස්සෙක්ට ගියොත් වෙන
දේරවී සිරිවර්ධන
රවී සිරිවර්ධනමෙතැන හරිම උත්ප්‍රාසයක් තියෙනවා. මෛත්‍රීපාල සිරිසේන මැතිතුමා එන්නේම රටට මඟහැරුණු යහපාලන දේශපාලන සංස්කෘතියක් ඇති කරන්න. දේශපාලනය ගැන නව කතිකාවක් සහ ශිෂ්ඨ සම්පන්න දේශපාලන සංස්කෘතියක ප්‍රධාන භූමිකාව රඟන්නයි ජනතාව මෙයාව පත් කළේ. ජනතාව බලවත් ලෙස අපේක්ෂා කළා ඔහු දේශපාලනය වෙනස් කරයි කියලා. එහෙත් අපි එතෙක් මෙතෙක් ලංකාවේ අශිෂ්ඨයි කියලා විශ්වාස කළ දේශපාලන නායකයන්වත් අභිබවා මේ යහපාලන නායකයා රටේ මූලික නීතිය ඇතුලු සියල්ල උඩුයටිකුරු කළා. මේක මේ සමාජයට බරපතළ ලෙස වැරදුණු තැනක්. අද ලංකාවේ සමාජය ජාතික හා ජාත්‍යන්තර වශයෙන් අත්විඳින අවුල්වල මූලික වගඋත්තරකරුවා ජනාධිපතිවරයා. ඔහු තමයි මේ අවුල නිර්මාණය කළේ. අපි සමහර නායකයන්ව ඒකාධිපතියන් කියලා පරාජය කළා. ඒ නායකයන් පවා ව්‍යවස්ථාවට මහ දවාලේ අත තබන්නට පොඩි හෝ බියක් දැක්වුවා. මේක මහ දවාලේ ව්‍යවස්ථාවට අත තැබීමක්. විධායක ජනාධිපති ක්‍රමයේ භයානකකම ඔප්පු වුණා. පිස්සෙක් අතට විධායක බලය ගියොත් වෙන දේ පැහැදිළියි. ඒක ඔප්පු වුණා. ■
බරපතළකම තේරෙනවාද
සමනලී ෆොන්සෙකා
අපි කලාකාරයෝ විදියට කිසිම දෙයක් බලාපොරොත්තු නොවී 2015 ජනාධිපතිවරණයේදී වැඩ කළේ. ඒ සියල්ල ජනාධිපතිවරයා විසින් පාවා දීම ඉතාම කණගාටුදායක විදියට රටට බලපාලා තියෙනවා. අපි මෛත්‍රීපාල සිරිසේන මහත්මයාව බලයට ගේනකොට ඔහු නිර්මල දේශපාලනයක් කරයි කියලා බලාපොරොත්තු වුනේ නැහැ. නමුත් අපි බලාපොරොත්තු වුනා යම් කිසි වෙනසක් පොදු ජනතාවගේ බලපෑම මත කරයි කියලා. ඒ වෙනකොට තිබ්බ මහින්ද රාජපක්ෂ සංස්කෘතිය අපිට බිඳ දාන්න පුළුවන් වෙයි කියන හැගීමක් අපිට තිබුණා. නමුත් මේ වෙලාවේ මෛත්‍රීපාල සිරිසේන කියන්නේ මහින්ද රාජපක්ෂට වඩා දරුණු පුද්ගලයෙක් බවට පත්වුන කෙනෙක්.
මෑතකදී ආරක්ෂක අංශ ප්‍රධානියෙකුට වත්මන් ජනාධිපතිවරයාම මැදිහත් වෙලා ලියුමක් යවලා තිබුණා. ඒ සිද්ධිය ඉතාම බරපතළයි. භයානකයි. මේ හැමදේකම තියෙන බරපතළකම මිනිස්සුන්ට තේරෙනවාද දන්නේ නැහැ. මොකද මේ දේශපාලනයේ අනතුර දැනට තියෙන්නේ වෙනම තලයක නිසා. කෙසේවෙතත් එක්සත් ජාතික පක්ෂ පාර්ශ්වයත් පහුගිය කාලය තිස්සේ තමන්ට ලැබුණු ජනවරම කඩ කරපු බව කියන්නට වෙනවා. ජනාධිපතිවරයාව තනි කරන්නත් ඔවුන් කටයුතු කරන්න ඇති. මම මේක කියන්නේ ජනාධිපතිවරයාගේ පාවාදීම සාධාරණීකරණය කරන්න නෙවෙයි. අනෙක් පාර්ශ්වයත් සුපිරිසිදු නැති බව සිහිපත් කරන්න.■
අන්ධයෝ නෙවෙයි ඉන්නෙ
ජයතිලක කම්මැල්ලවීර
අපේ රට ඉතාම පහත් ගෝත්‍රීක සමාජයක්ය කියන අදහස ජාත්‍යන්තර වශයෙන් නැවත වරක් සන්නිවේදනය වෙලා තියෙනවා. අපි පහුගිය අවුරුදු තුනහමාරක කාලයක් යම් ප්‍රමාණයකට එයින් මිදිලා හිටියා. යළිත් වරක් ඒ මිදීමට මුල්වූ පුද්ගලයා විසින්ම, නැවත වරක් ගෝත්‍රීක සමාජය කරා රට මෙහෙයමින් තිබෙනවා. මම කල්පනා කරන විදියට ඔහුට ඉතාම පහසුවෙන් උසාවි තීන්දුවෙන් පස්සේ රැස්වෙන පාර්ලිමේන්තුවට ඇවිත් තමන් පත්කරපු ආණ්ඩුවට විශ්වාසය තියෙනවාද නැද්ද කියන කාරණය විමසා බලන්නට අවශ්‍ය වාතාවරණය සකසා දෙන්න තිබුණා. ඒක ඔහු විසින් කළයුතුව තිබුණු දෙයක්. ඔහු ඒක සම්පූර්ණයෙන්ම පැහැරහැරියා. ඒ වෙනුවට තමන් වෙනුවෙන් පෙනීහිටපු වාචාල පිරිස්වලට නොයෙක් දේවල් රටට කියන්නට අවස්ථාව හැදුවා. පාර්ලිමේන්තුව මදාවියන්ගේ රජදහනක් බවට පත්වෙන්න ඉඩ හැරියා. මම කල්පනා කරන්නෙ මේක කුමන්ත්‍රණයක් කියලයි. තමන් ළඟ සිටි එජනිස මහලේකම්වරයා ලවා තමන්ටම ලියුමක් ලියවාගෙන, එකපාරම මහින්ද රාජපක්ෂව අගමැති ලෙස පත්කරනවා. ඊට පස්සෙ ඒක ප්‍රජාතන්ත්‍රවාදයයැයි පිළිගන්න කියලා ඔහුම බල කරනවා. එහෙත් මේ රටේ අන්ධයෝ නෙවෙයි ඉන්නෙ. යම් පිරිසක් ජාතිවාදයෙන් අන්ධ කරලා තියෙනවා. ඒත් අන්ධ නොවූ විශාල පිරිසක් මේ සමාජයේ ඉන්නවා. ඔවුන්ට මේවා විශ්වාස කරන්න බැහැ. අවුල ඇතිකරපු කෙනාටම තමයි අවුල ලිහීමේ වගකීම සහ පුලු‍වන්කම් තියෙන්නෙ. ඔහු තවමත් ඒක කරන්නේ නැහැ.■
දේශද්‍රෝහී ලෙස කටයුතු කළා
මහින්ද ප්‍රසාද් මස්ඉඔුල
ලංකාවේ මේ මොහොතේ තියෙන දේශපාලන තත්ත්වයට සම්පුර්ණයෙන්ම වග කිවයුතු වෙන්නේ වර්තමාන ජනාධිපතිවරයායි. මේ ජනාධිපතිවරයාත් මීට පෙර ලංකාවේ සිටි සියලු ජනාධිපතිවරුත් ලංකාවට අවශ්‍ය දේශපාලන චින්තනයක් ගොඩනගපු නායකයෝ නෙවෙයි. එහෙත් වෙන නායකයන්ට වඩා විශ්වාසයක් අපි වත්මන් ජනාධිපතිවරයා කෙරෙහි තැබුවා. ඒකට හේතුව තමයි වත්මන් ජනාධිපතිවරයා පත්වෙන්නේ ජනතාවගේ මූලිකත්වයෙන් වූ නිසා. මම හිතනවා අනෙක් සියළු ජනාධිපතිවරුන්ට වඩා අන්ත විදියට දේශද්‍රෝහී විදියට ඔහු කටයුතු කළා. මේ මොහොතේ පවතින දේශපාලන පටලැවිල්ලට ඔහු වගකියන්න ඕන. ජන බලයකින් ඇවිල්ලා ඒ ජන බලය ප්‍රතික්‍ෂේප කරමින් එයට සම්පූර්ණයෙන්ම පයින් ගහපු එකම ජනාධිපතිවරයා ඔහු කියලායි මම හිතන්නේ.■
විශාල අපුලක් තියෙනවා
ආචාර්ය අතුල විතානවසම්
ජනාධිපතිවරයා කටයුතු කරන්නේ ව්‍යවස්ථාවෙන් අපේක්ෂිත ආකාරයට නෙවෙයි. 19 වැනි ව්‍යවස්ථා සංශෝධනය අනුව ජනාධිපතිවරයාගෙන් අපේක්ෂා කරන්නේ ස්වාධීන, මධ්‍යස්ථ පුද්ගලයෙකුගේ භූමිකාව. ඒක පැහැදිළිවම පෙනෙන අවස්ථා තියෙනවා. උදාහරණයක් ලෙස නිදහස් හා සාධාරණ මැතිවරණයක් පැවැත්වීමට ඔහු කටයුතු කළ යුතුයි. ආණ්ඩුක්‍රම ව්‍යවස්ථාව ආරක්ෂා කළ යුතුයි කියලා. ඔහු පක්ෂයකට ගැති වෙන්න බැහැ. ජනාධිපතිවරයා මේක තේරුම් අරන් තියෙන බව පේන්නෙ නැහැ. ඔහු පක්ෂයේ වුවමනාවට තමන්ගේ වගකීමට පිටින් කටයුතු කරන බව පේනවා. ආණ්ඩුක්‍රම ව්‍යවස්ථාව උල්ලංඝණය කරනවා. අමු අමුවේම ශ්‍රී ලංකා නිදහස් පක්ෂයේ සාමාන්‍ය පාක්ෂිකයෙක් විදියට හැසිරීම රටකට ගැලපෙන්නෙ නැහැ. ඔහු පාක්ෂිකත්වයෙන් මිදෙන්න ඕනෑ. එළියට ඇවිල්ලා බැලු‍වොත් ගොඩක් දේවල් පෙනෙයි. ඒවා පේන්නෙ නැත්තේ පක්ෂය ඇතුළේ ඉන්න නිසා. අද ඔහු ගැන විශාල අපුලක් ජනතාවට තියෙනවා.■
ග්‍රාම්‍ය මානසිකත්වයක්
කථිකාචාර්ය ප්‍රියංකර රත්නායක
යම් යම් දේශපාලන නායකයෝ පක්ෂ දේශපාලන අරමුණු එක්ක අනෙක් අයට වැරැද්දක් වෙන විදියේ දේශපාලන තීන්දු ගත්ත වෙලාවල් තියෙනවා . රටේ ප්‍රධාන පුරවැසියා මේ රටේ සිටින බුද්ධීමත්ම පුද්ගලයා විය යුතුයි. එහෙත් මේ වෙද්දී ඉතාම අදූරදර්ශීම තීන්දු අරගෙන තියෙන්නෙ ජනාධිපතිවරයා. ජනාධිපතිවරයා සමස්ථ දේශපාලන තත්ත්වය වෙනස් කරන්නෙ ඔහුගේ පෞද්ගලික හේතු මත. ඔහුව මරන්න කුමන්ත්‍රණය කළා කියලයි ඔහු මේ දේශපාලන වෙනස කරන්නේ. එහෙත් ඔහු ඇත්තටම බලය මාරු කරන්නෙ අවුරුදු කිහිපයකට කලින් තමන්ව මරන්න කුමන්ත්‍රණය කළායැයි ඔහුම කී කෙනෙක්ගේ අතට. ඒ නිසාම ජනාධිපතිවරයාගේ මානසිකත්වය ගැනත් සැකයක් හිතෙනවා. පහුගිය කාලය පුරාවට රටේ බරපතළ ප්‍රශ්නවලදී ඔහු නිවැරදි තීන්දු ගත්තෙ නැහැ. උදාහරණයක් තමයි මහබැංකු බැඳුම්කර වංචාව. ඒ සම්බන්ධයෙන් කොමිෂන් සභාවක් පත් කිරීම නෙවෙයි, නීතිමය ක්‍රියාමාර්ග ගැනීමයි කළ යුතුව තිබුණේ. කොමිෂමක් පත්කළත් අද වෙනතුරු අපි නිවැරදිවම ඒකට වගකිව යුතු අයව දන්නෙ නැහැ. අපි දකින්නෙ ජනාධිපතිවරයා රටේ ආර්ථිකය, දේශපාලනය ගැන හිතන්නේ නැතිව තමන්ගේ පෞද්ගලික හේතු මත රටේ ආර්ථිකය අවදානමකට දැම්ම පළවැනි ජනාධිපතිවරයා. අපි දන්නවා කලින් ජනාධිපතිවරු වැරදි ක්‍රියාමාර්ග ගත්තත්, ඒවා ගත්තෙ යම් දේශපාලන දැක්මක් ඇතිව. මේවා බැලු‍වාම කිසිම දැක්මක් නැති වැඩ. මට ගැහුවොත් මාත් ගහනවා වගේ ග්‍රාම්‍ය මානසිකත්වයකින් තීන්දු ගන්නවා.■
සීට් එකේ වැරැද්ද
කුමාර තිරිමාදුර
මම නම් විශ්වාස කරන දේ තමයි 1970 ඉදන් අද වෙනකම් පත්වුණ ජනාධිපතිවරුන් මේ රටේ ජනතාවව ඇන්දුවා.මේක ඔය සීට් එකේ වැරැද්දක්. අද මෛත්‍රීපාල. හෙට ධම්මාරාම කියලා කෙනෙක් ඉඳගත්තත් ඔයවගේ තමයි ක්‍රියාකරන්නේ. ඒ තරම් බලයක් ඔය සිට් එකට දීලා තියෙනවා. ඒ නිසා මේ සිස්ටම් එකයි, ජනතාවයි වෙනස් කරන්න ඕනෑ. මගේ අදහස තමයි ජනතාව දැන්වත් ඇස් අරින්න වෙනවා. 1996 දී වරෙන්තු නාට්‍යයේ එච්.ඒ. පෙරේරා කියපු දෙබසක් තියෙනවා. ‘පවතින පාලනය ජඩ, මර්ධනකාරී එකක් වුණාම ජනතාව ජීවිත පරදුවට තියලා හරි ඒක පෙරලලා දානවා. ඊට පස්සෙ අලුත් පාලකයෝ ටිකක් ඇවිල්ලා අර හිටපු ඇමතිවරු උන්ගේ නිලධාරියෝ එක්ක කරපු ඝාතන දූෂණවලට හිටපු නිලධාරීන්ව ප්‍රසිද්ධ පිට්ටනිවලට ගෙනැල්ලා එල්ලනකල් අර ජනතාව අක්‍රියව බලන් ඉන්නවා. ඒත් ඒක එහෙම වෙන්නෙ නැහැ. හෙමින් සීරුවේ ටිකෙන් ටික යට ගැහෙනවා. ඇයි ඒ? ජාතිය, පක්ෂ, අදහස් උදහස්වලට වඩා උංගෙ පන්තිය ඝණ නිසා.’ කියලයි ඒ දෙබස තිබුණේ. ■
රේඛා නිලු‍ක්ෂි හේරත් / තරිඳු උඩුවරගෙදර
