ශ්‍රේෂ්ඨාධිකරණයට ඇති බලය ජනතාවට අවබෝධ වී ඇත. සරලවම කීවොත් ශ්‍රේෂ්ඨාධිකරණය යනු විධායක ජනාධිපතිවරයා කියන දෙයක් අනුමත කරන ආයතනයක් නොවන බව ජනතාව තේරුම් ගෙන ඇත. ලියුම්කරු ශ්‍රේෂ්ඨාධිකරණයේ තීන්දුව ආ මොහොතේ සිටියේ ගරාජයකය. එහි සිටි සේවකයන් සියලූ‍දෙනා සිටියේ පුදුමයෙනි. ශ්‍රේෂ්ඨාධිකරණයට එවැනි තීන්දුවකුත් දිය හැකිදැයි පුදුමයෙනි. පසුගිය වසරක පමණ කාලය ඇතුළත ජනාධිපතිවරයාගේ ධුර කාලය වසර 5ක් පමණක් බව ප‍්‍රකාශ කිරීමත්, ජනාධිපතිවරයාට පාර්ලිමේන්තුව විසුරුවාහැරීමට බලය ඇතිද යන්න පිළිබඳව ගැටලූ‍වක් ඇතැයි පිළිගනිමින් ඒ පිළිබඳව විභාග කිරීමට හා තාවකාලිකව ජනාධිපතිවරයාගේ ගැසට් නිවේදනය අවලංගු කරමින් ජනාධිපතිවරයාගේ සැලසුම් සියල්ල අඩපණ කිරීමත් ශ්‍රේෂ්ඨාධිකරණය ව්‍යවස්ථාව මත පදනම්ව දුන් ගෞරවනීය තීන්දු දෙකක් විය. ඒ නිසාම ශ්‍රේෂ්ඨාධිකරණය පිළිබඳව සරත් එන්. සිල්වා, මොහාන් පීරිස් යුගවල තිබුණු අවිශ්වාසය පහව ගොස්, ශ්‍රේෂ්ඨාධිකරණයේ ශ්‍රේෂ්ඨ බව පිළිබඳව ජනතාවගේ පැහැදීමක් ඇතිව තිබේ. එවැනි පසුබිමක ශ්‍රේෂ්ඨාධිකරණයට එක්විය යුතු භෞතික පහසුකමක් පිළිබඳව සටහන් කර තැබීමට ලියුම්කරු කල්පනා කළේය.
ශ්‍රේෂ්ඨාධිකරණ පරිශ‍්‍රයේ පස්වැනි මහලේ තිබුණු අධිකරණ කාමරයේදී ජනාධිපතිවරයාගේ ව්‍යවස්ථා විරෝධී පාර්ලිමේන්තුව විසිරවීමේ ගැසට් පත‍්‍රය සම්බන්ධයෙන් ඉදිරිපත් වූ මූලික අයිතිවාසිකම් පෙත්සම් සැලකිල්ලට ගැනුණි. ශ්‍රේෂ්ඨාධිකරණය පිළිබඳව සියලූ‍ම දෙනාගේ දෑස් යොමුවිය. අධිකරණ භූමියට පිටින් දැවැන්ත ජනකායක් විය. එමෙන්ම අධිකරණ කාමරයට ඇතුළුවී මේ විශේෂ අවස්ථාව දැකගැනීමේ වුවමනාවද බොහෝ දෙනෙකුට තිබුණි. ලියුම්කරුද අධිකරණ කාමරයට ඇතුළුවුණේ මේ ඓතිහාසික අවස්ථාව වාර්තා කරනු පිණිසය.
එදින මේ අධිකරණ කාමරයට නීතිඥවරුන්, පාර්ලිමේන්තු මන්ත්රීවරුන්, තරුණ නීතිඥවරුන් හා මාධ්‍යවේදීන් රැුසක් පැමිණ තිබුණි. සංඛ්‍යාත්මකව කිව නොහැකි වුණත් සාපේක්ෂව කුඩා කාමරයක් වූ අධිකරණ කාමරයේ ආසන ගණනට වඩා විශාල පිරිසක් මේ අවස්ථාවට පැමිණ සිටියේය. සියලූ‍දෙනා සිටියේ අපහසුවෙනි. සාමාන්‍යයෙන් ආසනයක් නැතිව කිසිම තැනකට නොයන පාර්ලිමේන්තු මන්ත්රීවරුන් පවා සිටගෙන සිටියේය. එකිනෙකා හිරවී අධිකරණ කාමරයේ සිටි අතර එහි වායු සමීකරණ පද්ධතියද කාමරයේ සිටි සියලූ‍දෙනාට ගැළපෙන තත්වයකට නොවීය. නීතිඥවරුන්ගේ කරුණු දැක්වීම් අධිකරණ කාමරයේ සිටි බොහෝදෙනෙකුට පවා හරිහැට ඇසුණේ නැත. ශ්‍රේෂ්ඨාධිකරණයේ එදිනෙදා ක‍්‍රියාවලියට මෙම කාමරය ප‍්‍රමාණවත් නමුත් මෙවැනි විශේෂ වැදගත්කමක් ඇති නඩු අවස්ථාවකට එම කාමරය කිසිසේත් ප‍්‍රමාණවත් නොවීය.
මේ තත්ත්වය පිළිබඳව අප සමඟ කතාකළ ශ්‍රේෂ්ඨාධිකරණයේ නිලධාරීන් ප‍්‍රකාශ කළේ වැඩි ඉඩක් ඇති අධිකරණ කාමරයක අවශ්‍යතාව ශ්‍රේෂ්ඨාධිකරණයට තිබෙන බවයි. එමෙන්ම මෙවැනි අවස්ථාවල නීතිඥයන්ගේ අදහස් දැක්වීම්වලට මයික‍්‍රෆෝන් පාවිච්චි කිරීමේ හැකියාවක් තිබෙන බවද එම නිලධාරීහු පෙන්වාදුන්නෝය. ඒවා ගැන ඉල්ලීම් නැතත් අධිකරණ අමාත්‍යාංශය හරහා එම පහසුකම් සම්පූර්ණ කර නොමැති බව එම නිලධාරීහු කීහ.
ජාතික වැදගත්කමක් ඇති මෙවැනි නඩු විභාගයන් වරින් වර පැමිණෙයි. මෑත කාලයේ පැවති දුමින්ද සිල්වා සම්බන්ධ ශ්‍රේෂ්ඨාධිකරණයේ අභියාචන පෙත්සම විභාගය එවැන්නකි. විශාල පිරිසක් එවැනි අවස්ථාවක් දැකගැනීමට අපේක්ෂා කරයි.
ඇමෙරිකාවේ සහ තවත් බටහිර රටවල් රැුසක් එවැනි විභාගයන් මාධ්‍ය හරහා සජීවීව විකාශණය කරන තැනට දියුණු වී ඇත. ලංකාවට ඒ සියල්ල නැතත් වඩා ඉඩ පහසුකම් ඇති විශේෂ අධිකරණ කාමරයක් හෝ අවශ්‍ය බව පෙනී යයි.
නීතීඥවරුන්ගේ අදහස් සහ ගරු විනිශ්චයකාරවරුන්ගේ අදහස් දැක්වීම් සඳහා මේසවලට සවිකළ මයික‍්‍රෆෝන පහසුකම් හා ගොඩනැඟිල්ලට සම්බන්ධ වූ ස්පීකර් පද්ධතියක් තිබිය යුතුය. ප‍්‍රමාණවත් ආසන පහසුකම් තිබිය යුතුය. මාධ්‍යවේදීන්ට වාර්තා කිරීම පහසු වන අන්දමේ පහසුකම් තිබිය යුතුය. ඒ පහසුකම් ශ්‍රේෂ්ඨාධිකරණයට ලබාදීම විධායකයේ වගකීමකි.
