ශ‍්‍රී ලංකා නීතිඥ සංගමය නීතිඥ වෘත්තිය සම්බන්ධයෙන් ඇති ප‍්‍රධානතම වෘත්තික සංවිධානය වේ. මෙම සංගමයේ දක්නට තිබූ සුවිශේෂ ලක්ෂණය වූයේ නීතිඥයන්ගේ සුභසාධනය සහ වෘත්තීය කටයුතුවලට පරිබාහිරව මෙරටෙහි ජාතික වැදගත්මකින් යුත් බොහෝ කාරණාවලට එම සංගමය මැදිහත්වීමයි. අතීතයේ පටන් විවිධ අවස්ථාවලදී, ජාතික වැදගත්කමකින් යුක්තවූ, එසේ නැත්නම් දේශපාලන වැදගත්කමකින් යුක්ත වූ, සමාජීය වැදගත්කමකින් යුක්ත වූ බෙහෝ සේ කාරණා සම්බන්ධයෙන් නීතිඥ සංගමය සක‍්‍රිය දායකත්වයක් ලබාදුන් අවස්ථා බොහෝය.
දස දහසකට වැඩි සාමාජිකත්වයකින් යුක්ත නීතිඥ සංගමය සභාපතිවරයාගේ ප‍්‍රධානත්වයෙන් යුත් විධායක සභාවකින් සමන්විත වන අතර බා(ර්) කවුන්සිලය නම් වඩාත් පුළුල් නියෝජිත සභාවක් ද පවතී.
ශ‍්‍රී ලංකා නීතිඥ සංගම් ව්‍යවස්ථාවෙහි 9(1) වගන්තියට අනුව, නීතිඥ සංගමයේ සභාපතිවරයාගේ කාර්යභාරය දක්වා ඇත. ඒ අනුව එම වගන්තියෙහි (ඇ) කොටසේ නීතිඥ සංගම් සභාපතිවරයාට සංගමයෙහි විධායක සභාවෙහි අනුමැතියකින් තොරව සංගම් ව්‍යවස්ථාවේ දෙවන වගන්තියෙහි දැක්වෙන කාරණා සම්බන්ධයෙන් තම පුද්ගලික මත ප‍්‍රකාශ කිරීමට නොහැකි බවද දක්වා ඇත. පසුගිය කාලය පුරාවටම ශ‍්‍රී ලංකා නීතිඥ සංගමයේ කටයුතු කරනු ලැබූවේ සභාපතිවරුන් තත්කාලයෙහි පැවති නොයෙකුත් දේශපාලනික කරුණු සම්බන්ධයෙන් විවිධ මැදිහත්වීම් සිදුකරනු ලැබුවේ ව්‍යවස්ථාවේ ස‍දහන් ආකාරයේ අනුමැතියක් ඇතුවය. ශිරාණි බණ්ඩාරනායක මැතිනිය සම්බන්ධයෙන් වූ කාරණාවේදී විධායක සභාවට අමතරව මහ සභා රැුස්වීමක විශේෂ අනුමැතියක් ලබාගෙන කටයුතු කිරීමටද එවකට පැවති නීතිඥ සංගමය කටයුතු කළේය.
පසුගිය 26 වන දින ජනාධිපතිවරයා, රනිල් වික‍්‍රමසිංහ මහතා අග‍්‍රාමාත්‍ය ධුරයෙන් ඉවත්කොට මහින්ද රාජපක්ෂ මහතා අග‍්‍රාමාත්‍ය ධුරයට පත්කළදා සිට සිදුවූ සිද්ධිදාමය සම්බන්ධයෙන් නීතිඥ සංගමයේ සභාපති ජනාධිපති නීතිඥ යූ. ආර්. ද සිල්වා මහතාගේ ක‍්‍රියාකලාපය නීතිඥ සංගමයේ ව්‍යවස්ථාව උල්ලංඝනය කිරීමක් පමණක් නොව එහි සාමාන්‍ය සාමාජිකත්වයේ විශ්වාසය ද පළුදු කිරීමටද හේතුවී ඇත.
විශේෂයෙන්ම යූ. ආර්. ද සිල්වා මහතා විසින් නීතිඥ සංගමයේ විධායක සභාවට ගෙන එනු ලැබූ යෝජනාවක් මත නීතිඥ සංගමයෙහි නිලධාරී මණ්ඩලයට මෙම කාරණය සම්බන්ධයෙන් ප‍්‍රකාශ කිරීමෙන් වැළකී සිටිය යුතු බවට එකඟතාවක් සම්මත කරගන්නා ලදි. ඔහු විසින්ම ගෙන එනු ලැබූ යෝජනාව ඔහුම උල්ලංඝනය කරමින් නීතිඥ සංගමයේ සභාපතිවරයා වශයෙන් මාධ්‍ය ඉදිරියට ගොස් ජනාධිපතිවරයා පාර්ලිමේන්තුව විසුරුවා හැරීමට ගත් තීරණය සාධාරණය කරමින් තම අදහස් දැක්වුවේය. මෙම ක‍්‍රියාවෙහි බරපතළභාවය වන්නේ යූ. ආර්. ද සිල්වා මහතා සභාපතිධුරය අපයෝජනය කරමින් මෙරටෙහි ආණ්ඩුක‍්‍රම ව්‍යවස්ථාව ඔහුට රිසි සේ අර්ථ නිරූපණය කොට සමාජය තුළ දේශපාලනිකව යම් විකෘති මතයක් ස්ථාපිත කිරීමට උත්සාහ දැරීම නිසායි.
නීතීඥ සංගමයෙහි සාමාන්‍ය සාමාජිකත්වය යූ. ආර්. ද සිල්වා මහතා බලයට පැමිණෙන අවස්ථාවේදී ද ඔහුගේ දේශපාලනික පක්ෂග‍්‍රාහී බව සම්බන්ධයෙන් යම් කුකුසක සිටියත් බහුතර විශ්වාසය වූයේ ඔහු තම ධුරයෙහි කටයුතු කරන විට නිර්පාර්ශ්විකව සහ සංගමයෙහි පුරුෂාර්ථයන් තුළ සිට තම රාජකාරි ඉටුකරාවිය යන කාරණයයි. කෙසේ වෙතත් සංගමයෙහි සාමාජිකත්වය ඔහු වෙත තැබූ විශ්වාසය පළුදු කරමින් ඔහු ඍජුව දේශපාලන පක්ෂයක න්‍යාය පත‍්‍රයක් ක‍්‍රියාවට නැංවීම සඳහා කොටස්කරුවකු වී ඇති බව අද ඉතා පැහැදිලිය.
ශ‍්‍රී ලංකාව ප‍්‍රමුඛතම වෘත්තික සංගමය වන ශ‍්‍රී ලංකා නීතිඥ සංගමය අතීතයේ පටන් නඩත්තු කරනු ලැබූ ඍජුභාවය, යුක්තිගරුකභාවය සහ සාධාරණත්වය වෙනුවෙන් පෙනීසිටීම යන සාධනීය කාරණයන් සිල්වා මහතා යටපත් කොට දමා ඇති අතර, ඔහු තමන්ගේ ක‍්‍රියාකලාපය සම්බන්ධයෙන් සංගමයේ සාමාජිකත්වයට වගකිව යුතුය. ඔහුගේ ක‍්‍රියාකලාපය සම්බන්ධයෙන් ප‍්‍රශ්න කිරීමේ වගකීමක් නීතිඥ සංගමයේ සාමාජිකත්වයට ඇත්තේය.
