අමිත් වීරසිංහට ඇප ලැබුණේ පසුගිය ඔක්තෝම්බර් 29 දාය. අමිත් වීරසිංහ හා ඩෑන් ප‍්‍රියසාද් මාධ්‍ය ඉදිරියට පැමිණ විරයන් මෙන් කියා තිබුණේ ඔවුන් දෙදෙනා අපරාධ පරීක්ෂණ දෙපාර්තමේන්තුව නොමඟ යැවූ බවයි. ඔවුන්ගේ දකින්නට තිබුණු සැහැල්ලූ‍ව විසින් කියාපාන්නේ ඔවුන් කවුදැයි අපි සියලූ‍දෙනා දැන සිටියද, ඔවුන්ව ස්පර්ශ කරන්නට නීතියට හැකියාවක් නැති බවය. ඩෑන් කිහිපවතාවක්ම අත්අඩංගුවට ගැනුණු අයෙකි. අමිත්ද අත්අඩංගුවට ලක්ව තිබේ. එහෙත් ඔවුන් කාලයක් තිස්සේ ලංකාව තුළ සිදුකරමින් සිටින ව්‍යාපෘතිය ඉදිරියට යනු ඇත.
ජනාධිපතිවරයා සහ හිටපු ජනාධිපතිවරයා විසින් ව්‍යවස්ථා විරෝධී කුමන්ත‍්‍රණ සිදුකරන අන්දමේ රටක් බවට ලංකාව පත්ව ඇත්තේ දැන්ය. දැන් ලංකාව ජාත්‍යන්තරයට ගොස් ඇත්තේ එවන් කුමන්ත‍්‍රණ නිසාය. එහෙත් පසුගිය වසර කිහිපය තුළ ලංකාව කිහිපවතාවක්ම ජාත්‍යන්තරයට ගොස් තිබුණේ මුස්ලිම් විරෝධී බෞද්ධ අන්තවාදීන්ගේ පහරදීම් නිසාය. එවැනි අන්තවාදී සංවිධාන පිළිබඳව ඔත්තු සැපයීම වෙනුවෙන් පොලීසිය එම සංවිධානවල සිටි නාමල් කුමාර නමැත්තෙක්ව ඔත්තු බලන්නෙක් ලෙස තෝරාගෙන තිබුණි. දැන් ඒ නාමල් කුමාර නමැත්තා අන්තවාදී ක‍්‍රියා පිළිබඳව තොරතුරු හෙළිකර, අන්තවාදී ක‍්‍රියා පසුපස සිටින්නේ කවුදැයි සොයාගැනීම වෙනුවට කිසිදු සාක්ෂියක් නැති ඝාතන කුමන්ත‍්‍රණයක් පිළිබඳව මාධ්‍ය ඉදිරියේ කරුණු කියමින් සිටියි.
තමන් සමග එකට සිට තමන්ව පාවාදීම ගැන අමිත්ලා නාමල්ව විවේචනය කර ඇත. ඒ විවේචනයට පිළිතුරු ලෙස අමිත් විරසිංහගේ එක් දුරකථන ඇමතුමක් මාධ්‍ය ඉදිරියේ නාමල් විසින් වාදනය කර පෙන්වා ඇත. ඒ දුරකථන ඇමතුමෙන් අමිත් වීරසිංහ විසින් නාමල්ට යෝජනා කරන්නේ ලංකාවේ ඇති මුස්ලිම් පල්ලිවල බෝම්බ ආදී නිතිවිරෝධී ආයුධ ඇතැයි කියමින් එකවර 119 වෙත දුරකථන ඇමතුම් විවිධ ප‍්‍රදේශවලින් ලබාදිමේ සැලැස්මක් පිළිබඳවයි. මෙය නාමල් හිනාවෙමින් ඉදිරිපත් කළද, ඒ පිළිබඳව කිසිවෙකුට ගණනක් නැතිවුවද ඒ යෝජනා කරන සැලැස්ම අතිශය භයානක එකක් බව අමුතුවෙන් කිව යුතු නැත. අමිත්ලා සැලසුම් කොට නිර්නාමිකව ඇමතුම් ලබාදුන් පසුව මුස්ලිම් පල්ලි පිළිබඳව සමාජගත වෙන්නේ භයානක චිත‍්‍රයකි. ඒ චිත‍්‍රය අමිත් වීරසිංහලා ශ‍්‍රි ලාංකික මුස්ලිම්වරුන් වෙත ආලේප කරන වර්ණය තවත් දරුණු තත්වයට පත් කරන්නකි. එය මුස්ලිම්වරුන්ට කරන පහරදීම් සාධාරණීකරණය කරන්නකි.
ඒවා කෙසේ වුවද අමිත් වීරසිංහලා පිළිබඳව වැඩි විස්තර නාමල් විසින් හෙළිකර නැත. ඉදිරියේ හෙළි කරනු ඇතැයි විශ්වාස කළ නොහැකිය. නාමල්ලා හෙළිකළ යුත්තේ අමිත් විරසිංහලා පසුපස ඇති දේශපාලන හස්තයයි. දේශපාලන සහයෝගයක් සහ මුදල් නැතිව අමිත් විරසිංහලාට පැවතීමේ හැකියාවක් නැති බව පැහැදිළි කාරණයකි.
ඩෑන් ප‍්‍රියසාද්
පසුගිය කාලය තුළ ඩෑන් ප‍්‍රියසාද් නමැත්තාගේ ෆෙස්බුක් මිතුරු ජාලය වේගයෙන් වර්ධනය වී ඇතිවා පමණක් නොව දහස් ගණනකින් ඔහුගේ අදහස් හුවමාරු කරන්නන්ද සමාජ මාධ්‍ය තුළ බිහිවී ඇත. ෆෙස්බුක්හි වෛරී අදහස් පාලනය කිරීම සඳහා කණ්ඩායමක් යොදවා ඇති බව කීවත් ඩෑන්ලාගේ අදහස් එයින් පාලනය වෙන්නේ නැත.
2017 වර්ෂයේ අගෝස්තු 09 වැනිදා රාත‍්‍රියේ ඩෑන්ලා වැල්ලම්පිටියේ එක්තරා නිවසකට ඇතුළු වී තර්ජනය කර තිබුණේ ඒ නිවසේ සකස් කරන කිරි වර්ගයක් ලබාදෙමින් සිංහල ජාතිය වඳ කරන්නට නිවැසියන් සැලසුම් කරන බව කියමිනි. නිවසේ වෙසෙන්නන්ට නිවස ගිනි තියන බව තර්ජනය කරන්නට මේ කණ්ඩායම පෙළඹී තිබුණි. ඩෑන්ව අත්අඩංගුවට ගත්තද ඇප ලැබුණි.
රොහින්ග්‍යා සරණාගතයින් පිරිසක් රඳවා සිටි ගල්කිස්ස ප‍්‍රදේශයේ නිවසක් ඉදිරිපිට කලබලකාරි තත්වයක් ඇති කිරිම සම්බන්ධයෙන් ඩ‍්‍රෑන් ප‍්‍රියසාද් ඇතුළු පිරිසක් අත්හඩංගුවට පත් විය. පසුව ඔහුව රක්ෂිත බන්ධනාගාර ගත කල අතර එම අවස්ථාවේදි ඔහුගේ මව උසාවිය ඉදිරියේ පවසා සිටියේ ඩෑන් ප‍්‍රියසාද් කුඩා කළ සිටම මානසික රෝගයකින් පෙලූ‍න බවයි. ඩෑන් මානසික වෛද්‍යවරයෙකු හමු වී ප‍්‍රතිකාර ලබා ගත් බවත් ඔහුගේ මව උසාවියේදී පැවසීය. ඩෑන් ප‍්‍රියසාද් මේ වනවිට භාවිත කරමින් සිටින ඖෂධ පවා ඔහුගේ මව විසින් උසාවියට ඉදිරිපත් කරන ලදි. ඔහුගේ රෝගී තත්ත්වය හා මවගේ තත්ත්වය සලකා බලා ඇප ලබා දෙන මෙන් ඔහු වෙනුවෙන් පෙනී සිටි නීතීඥවරුන් ඉල්ලා තිබුණු අතර 2016 දෙසැම්බර් 02 දින ඔහුට ඇප ලැබී තිබුණි. ටික කාලයක් නිහඬව සිටි ඩෑන් දැන් එළියට පැමිණ ඇත.
අමිත් වීරසිංහ
මහසෝන් බලකාය 2016 ජුනි මස 26 වන දින මහනුවර බෝගම්බර බෝධිමළුව විහාරයේ දි ආරම්භ කරනු ලැබු සංවිධානයකි. මෙම සංවිධානයේ නිර්මාතෘ සහ සභාපති ලෙස නම් කර ඇත්තේ විධාන පතිරණගේ අමිත් ජීවන් වීරසිංහය. අපිරිසක් විසින් ශ‍්‍රි පාද උඩමළුවට බුදු පිලිමයක් තැන්පත් කිරීම කටයුතු කිරිම , මුස්ලිම් කඩ හිමියන් සිංහල බෞද්ධයන් හට වඳ බෙහෙත් ලබා දෙනවා යැයි ප‍්‍රචාර යැවීම , මුස්ලිම් රෙදි කඩ වර්ජනය කරන්න යැයි දිවයින පුරා පෝස්ටර් ගැසීම සමාජ මාධ්‍ය හරහා බොරු ප‍්‍රචාර යැවීම , කාන්තාවන්ගේ තිසරපට වල මුස්ලිම් ව්‍යාපාරිකයන් වඳ පෙහෙත් තැන්පත් කරන බව ප‍්‍රචාරය කිරීම එම සංවිධානය විසින් සිදුකර තිබුණි. මුස්ලිම් විරෝධී පහරදීම්වලට පසුබිම් වී තිබුණේ එම ව්‍යාජ ප‍්‍රචාරයන් හා අදහස් දැක්වීම්ය. අද වුව යූ ටියුබ්, ෆේස්බුක් වැනි වෙබ් අඩවිවල අමිත්ලා කළ ව්‍යාජ තොරතුරු හුවමාරු වෙමින් පවතියි.
ගිංතොට ප‍්‍රදේශයේ 2017 නොවැම්බර් 14 වන දින ඇති වු පෞද්ගලික ආරවුලක් මුස්ලිම් සිංහල ආරවුලක් ලෙස වර්ධනය වීමේ ප‍්‍රතිඵලයක් ලෙස නිවාස 74 ක ද, වෙළෙඳසැල් 16 කටද, වාහන 09 කටද හානි වූ අතර ඒ සිදුවීම පසුපස මහසෝන් බලකාය නම් සංවිධානය සිටි බවට සාක්ෂී බොහෝ වෙයි.
තෙල්දෙණියේ පෙබරවාරි 04, 05 දිනවල ඇතිවූ ප‍්‍රහාර පසුපස අමිත් වීරසිංහ සිටින බවට සාක්ෂී සැපයෙන වීඩියෝ පවා සමාජ මාධ්‍යවල හුවමාරු වී තිබුණි. එම පහරදීම්වල සිටි පුද්ගලයන්ට බත්පැකට් ආදී පහසුකම් ලබාදීමට අමිත් වීරසිංහලා සැලසුම් කරන ආකාරය වීඩියෝවල පටිගත වී තිබුණි. අමිත්ලා මේ පසුපස සිටිනවායැයි පැහැදිළිව පෙනී ගියත් පොලීසිය ගත් ක‍්‍රියාමාර්ග කිසිසේත්ම ප‍්‍රමාණවත් නොවේ.
මහනුවර දිගන ප‍්‍රදේශයේ හටගත් කලහකාරී සිද්ධිය සම්බන්ධයෙන් ත‍්‍රස්ත විමර්ශන කොට්ඨාසය මඟින් අමිත් වීරසිංහ ඇතුළු පිරිසක් මාර්තු මස 08 වන දින ජනවාර්ග ික ගැටුම් ඇති කිරිම ඇතුලූ චෝදනා කිහිපයක් යටතේ අත්අඩංගුවට ගෙන තිබුණි. මහ සොහොන් බලකායේ අමිත් වීරසිංහ සහ පොදු ජන පෙරමුණ පක්ෂයේ ප‍්‍රාදේශීය සභා මන්ත්රීවරුන් දෙදෙනෙකුද ඇතුළු සැකකරුවන් 32 දෙනා තවදුරටත් රක්ෂිත බන්ධනාගාරගත කිරීමට තෙල්දෙණිය මහේස්ත‍්‍රාත් අධිකරණය අපේ‍්‍රල් 23 වන දින නියෝග කර තිබුණි. පරීක්ෂණ වෙනුවෙන් අමිත් සිටියේ අත්අඩංගුවේය. එහෙත් ඒ පරීක්ෂණ ඉදිරියට ගොස් තිබුණේ නැත. අවසානයේදි ඔක්තෝම්බර් 26 ආණ්ඩු පෙරළියේ කුමන්ත‍්‍රණය අවසන් වූ වහාම පොලීසියේ කැමැත්ත මත ඔක්තෝම්බර් 28 වැනිදා අමිත් වීරසිංහට ඇප ලැබී තිබුණි. අමිත් වීරසිංහව බේරාගන්නටද උසාවියට ඉදිරිපත් කර තිබුණු තර්කය වුණේ අමිත්ට මානසික රෝගයක් ඇති බවත් ඔහු එයට ප‍්‍රතිකාර ගන්නා බවත්ය. මාස අටක් අත්අඩංගුවේ සිටියත් අමිත්ටද නීතිය අන්ධ විය.
මේ පුහු වීරයන් හෙට අනිද්දා වෙද්දි නැවතත් ක‍්‍රියාත්මක වෙනු ඇත. දේශපාලන ආරංචිමාර්ග කියන්නේ ඉදිරි කාලයේදි රටේ දැවැන්ත අර්බුද ඇති කරමින් බලහත්කාරී පාලනයක් ගෙනයෑමට පසුබිම සලසනු පිණිස නැවතත් ජාතිවාදී කණ්ඩායම් ක‍්‍රියාත්මක වීමට ඉඩ ඇති බවයි. පොලීසියත්, පොලිස්පතිවරයාත් නීතිය ක‍්‍රියාත්මක නොකර අන්ධව ඉදිරියට යනු ඇත.
