රේඛා නිලුක්ෂි හේරත්
ඇතිවී තිබෙන දේශපාලන අර්බුදය හමුවේ ශ්‍රී ලංකාව කෙරෙහි ජාත්‍යන්තර ප්‍රජා‍වේ දැඩි අවධානය යොමුවී ඇති අතර ශ්‍රී ලංකාව තුළ ඇතිවූ අර්බුදය නීතියට අනුව හා සාමකාමීව විසඳාගන්න ලෙසට දැනුම් දී ඇත.
ඊට අමතරව ආර්ථික සම්බාධක වැනි අනතුරු ඇඟවීම්ද ශ්‍රී ලංකාවට එරෙහිව ඉදිරියේදී ක්‍රියාත්මක විය හැකි බව ප්‍රකාශ කර ඇත. තවද ශ්‍රී ලංකාව තුළ දේශපාලන නොසන්සුන්තාවයක් පවතින බැවින් එහි සංචාරයට නොයන ලෙසද සිය රටවල්වල පුරවැසියන්ට දැනුම්දීම් සිදුකර ඇත.
ඒ අනුව යුරෝපය , ඇමරිකා එක්සත් ජනපදය ,කැනඩාව , ඕස්ට්‍රේලියාව සහ ඉන්දියාව වැනි රටවල් නිවේදන නිකුත් කරමින් ජනාධිපති මෛත්‍රීපාල සිරිසේන ව්‍යවස්ථාවට ගරු කරමින් පාර්ලිමේන්තුවේ කඩිනමින් රැස් කරන ලෙස දැනුම් දී ඇත.
එක්සත් ජාතින්ගේ සංවිධානය විසින් පසුගිය ඔක්තෝම්බර් 28 වන දින සහ 31 වන දින කඩිනමින් පාර්ලිමේන්තුව කැදවන ලෙසට නිවේදන දෙකක් නිකුත් කරමින් ජනාධිපතිවරයාට ප්‍රකාශ කර ඇත. යුරෝපා සංගමයයේ තානාපතිවරයා වන තුංග් ලයි මර්ගු මහතා විසින් අනතුරු හඟවා ඇත්තේ ජී එස් පී ප්ලස් සහනය මෙම දේශපාලනික පසුබිම මත ශ්‍රි ලංකාවට අහිමි වීමට ඉඩ ඇති බවය. වැඩිදුරටත් ඔහු පවසා ඇත්තේ 2010 වර්ෂයේද මානව හිමිකම් කඩකීරිම නිසා ශ්‍රී ලංකාවට ජී.එස්.පී ප්ලස් සහනය අහිමි වූ බවය.
තවද පසුගිය සතියෙහි සංචාරකයන්ට සංචාරය කිරීම සඳහා ලෝකයේ සුදුසුම රටවල් ලැයිස්තුවේ අංක එක ලෙස ශ්‍රි ලංකාව නම් කළ ද ලෝන්ලි ප්ලෑන්ට් සඟරාව විසින් නිවේදනයක් නිකුත් කරමින් සංචාරකයන්ට පවසා ඇත්තේ ශ්‍රි ලංකාවේ පවතින දේශපාලන තත්වය මත එහි සංචාරය කිරිම අවදානම් බවත් එසේ සංචාරය කරන්නේ නම් එරට පුවත් පිලිබඳව අවධානයෙන් සිටින බවටත්‍ ය.
මෙරට සංචාරක හෝටල් ආරංචිමාර්ග ප්‍රකාශ කරන්නේ ඉදිරියේදී ආරම්භ වීමට නියමිත සංචාරක සමය සඳහා වෙන් කරන ලද බොහෝ හෝටල් කාමර මේ වනවිට විදේශීය සංචාරකයන් විසින් අවලංගු කරමින් පවතින බවයි.
