ශ්‍රේෂ්ඨාධිකරණයේ සහ අභියාචනාධිකරණයේ පුරප්පාඩු වී තිබුණු විනිසුරු ධුර සඳහා ජනාධිපති මෛත‍්‍රීපාල සිරිසේන යෝජනා කළ විනිසුරුවරුන්ගේ නම් ප‍්‍රතික්‍ෂෙප කර වෙනත් විනිසුරුවරුන් පත්කිරීමට ආණ්ඩුක‍්‍රම ව්‍යවස්ථා සභාව 25 වැනි බ‍්‍රහස්පතින්දා තීරණය කළේය.
ශ්‍රේෂ්ඨාධිකරණ විනිසුරු ධුරය සඳහා ජනාධිපති සිරිසේන විසින් යෝජනා කරන ලද දීපාලි විජේසුන්දර අභියාචනාධිකරණ විනිසුරුවරියගේ නම හා ගාමිණී අමරසේකර අභියාචනාධිකරණ විනිසුරුවරයාගේ නම ව්‍යවස්ථා සභාව විසින් ප‍්‍රතික්‍ෂෙප කරනු ලැබ ඒ වෙනුවට වෙනත් නම් එවන ලෙස ජනාධිපතිවරයාට දැනුම් දී තිබුණි. ඒ අනුව, අභියාචනාධිකරණ විනිසුරු එස් තුරෙයිරාජා හා කේ කුමුදුනී වික‍්‍රමසිංහ යන දෙදෙනාගේ නම් නැවතත් ජනාධිපති විසින් යෝජනා කර යවනු ලැබිණ. එයින් කේ කුමුදුනී වික‍්‍රමසිංහ මහත්මිය ශ්‍රේෂ්ඨාධිකරණ විනිසුරුවරියක ලෙස පත්කිරීමට ආණ්ඩුක‍්‍රම ව්‍යවස්ථා සභාවේ අනුමැතිය ලැබී ඇත.
අභියාචනාධිකරණ විනිසුරු ධුරයක් සඳහා ජනාධිපතිවරයා විසින් යෝජනා කර යවන ලද කුසලා වීරවර්ධන මහාධිකරණ විනිසුරුවරියගේ නමද ආණ්ඩුක‍්‍රම ව්‍යවස්ථා සභාව විසින් ප‍්‍රතික්‍ෂේප කරනු ලැබිණ. ඒ වෙනුවට අවසානයේ සභාව විසින් අනුමත කරන ලද්දේ මහාධිකරණ විනිසුරු ප‍්‍රියන්ත ප‍්‍රනාන්දුගේ නමය.
දීපාලි විජ්සුන්දර මහත්මිය, ජෙනරාල් සරත් ෆොන්සේකාට එරෙහිව පවරා තිබුණු සුදු කොඩි නඩුව විභාග කර, ඔහු වරදකරු බවට පත්කළ ත‍්‍රිපුද්ගල මහාධිකරණ විනිසුරු මඬුල්ලේ සභාපතිනිය හැටියට කටයුතු කළාය. කුසලා වීරවර්ධන විනිසුරුවරිය, සරත් නන්ද සිල්වා අගවිනිසුරු ධුරය හෙබවූ කාලයේ ඔහු රට වටා පවත්වාගෙන ගිය බෝධි පූජා පිංකම්වලදී කැපවී වැඩකළ, සරත් නන්ද සිල්වා මහතාගේ ළඟම හිතවතියක ලෙස ප‍්‍රකටව සිටි විනිසුරුවරියකි.
ආණ්ඩුක‍්‍රම ව්‍යවස්ථාව අනුව ශ්‍රේෂ්ඨාධිකරණ හා අභියාචනාධිකරණ විනිසුරු ධුර සඳහා ජනාධිපතිවරයා නම් යෝජනා කරන අතර, ආණ්ඩුක‍්‍රම ව්‍යවස්ථා සභාව එම නම් අනුමත කළහොත්, ජනාධිපතිවරයා විසින් එම විනිසුරු ධුරවලට ඔවුහු පත්කෙරෙති.
කතානායක කරු ජයසූරියගේ ප‍්‍රධානත්වයෙන් ආණ්ඩුක‍්‍රම ව්‍යවස්ථා සභාව 25වැනිදා සවස 2.30ට පාර්ලිමේන්තු පරිශ‍්‍රයේදී රැස්විය.
අරුණ ජයවර්ධන
