පොලිස් කොමිෂන් සභාව විසින් පොලිස් ස්ථානාධිපති ධුරයක් ලබා නොදෙන ලෙස නිර්දේශ කර තිබියදී කතරගම පොලිස් ස්ථානාධිපති ලෙස කටයුතු කළ ප‍්‍රධාන පොලිස් පරීක්ෂක එස්.කේ. උපාලි මහතා පූගොඩ පොලිස් ස්ථානයේ ස්ථානාධිපතිවරයා ලෙස පත්කර යවා ඇත්තේ අමාත්‍ය රංජිත් මද්දුමබණ්ඩාරගේ උපදෙස් මතයැයි පොලිස් කොමිෂන් සාමාජිකයෙක් නිර්නාමිකව අදහස් දක්වමින් කීය.
ඔක්තෝම්බර් 09 වැනිදා පොලිස්පතිවරයාගේ ලිඛිත නියෝගයක් මත සිදුකර තිබෙන එම පත්වීම අත්හිටුවන ලෙස ඔක්තෝම්බර් 11 වැනිදා පොලිස් කොමිෂම විසින් දන්වා තිබුණි. පොලිස් කොමිෂන් සභාවේ එම තීරණය නොසලකා ඔක්තෝම්බර් 16 වැනිදා පොලිස් කොමිෂම් වෙත නීතිය හා සාමය පිළිබඳ අමාත්‍යාංශයේ ලේකම්වරයා දන්වා ඇත්තේ එස්.කේ. උපාලිව පූගොඩ පොලිස් ස්ථානයේ සේවයෙහි යොදවන ලෙසය.
මීට පෙර ඔක්තෝබර් 05 වැනිදා පොලිස් කොමිෂන් සභාව විසින් එම ප‍්‍රධාන පොලිස් පරීක්ෂකවරයා කතරගම පොලිස් ස්ථානාධිපති ධුරයෙන් ඉවත්කොට සාමාන්‍ය රාජකාරියෙහි යොදවන ලෙස පොලිස්පතිවරයා වෙත නියෝග කර තිබුණි. ඔහුට එරෙහිව ඇති චෝදනා කිහිපයක් පිළිබඳව විමර්ශන කරන තෙක් පොලිස් ස්ථානාධිපති ධුරයෙන් ඉවත් කරන ලෙස නියෝගයේ දක්වා තිබේ.
ප‍්‍රධාන පොලිස් පරීක්ෂක එස්.කේ. උපාලි රතුපස්වල පොලිස් ස්ථානාධිපතිවරයා ලෙස මීට පෙර කටයුතු කර ඇත. 2013දී රතුපස්වල වෙඩි තැබීම සිදුවූ කාලයේදී ඔහු පොලිස් ස්ථානාධිපතිවරයා ලෙස කටයුතු කළ අතර රතුපස්වල කර්මාන්තශාලාවට එරෙහිව උද්ඝෝෂණය කළ අයට එරෙහිව ව්‍යාජ චෝදනා මත නඩු පැවරීම පිළිබඳව ඔහුට චෝදනා එල්ල වී තිබුණි. පොදු දේපළවලට හානි කළ බව කියමින් උද්ඝෝෂකයන්ට එරෙහිව පවරා තිබුණු එම නඩු පසුව පොලීසිය විසින්ම ඉවත් කර තිබුණි.
එස්.කේ. උපාලි මහතා කතරගම පොලිස් ස්ථානාධිපති වශයෙන් සේවය කළ කාලසීමාවේදී කතරගම ප‍්‍රදේශවාසීන් අවස්ථා දෙකකදී කතරගම පොලීසියට එරෙහිව උද්ඝෝෂණ පවත්වා තිබුණි.
