ගෝඨාභය රාජපක්ෂ ආරක්ෂක අමාත්යාංශ ලේකම්වරයාව සිටි අවධියේ ත්රිවිධ හමුදා සහ පොලිස් සාමාජිකයන්ට හඳුන්වාදුන් ණය ක්රමයට සම්බන්ධ රක්ෂණයේ සිදුවී ඇති අක්රමිකතා පිළිබඳව අනිද්දා පුවත්පතෙන් සිදුකළ හෙළිදරව්වක් සම්බන්ධයෙන් පරීක්ෂණයක් සිදුකරන ලෙස ජනාධිපති මෛත්රීපාල සිරිසේන මහතා ආරක්ෂක අමාත්යාංශ ලේකම්වරයාට දැනුම් දී ඇත.
‘ජනපතිට ලිට්මස් පරීක්ෂාවක්, රණවිරුවන් ගසා කෑ රණවිරුවන්ට දඬුවම් දෙමුද?’ යන සිරස්තලය යටතේ අනිද්ද හෙළිදරව්ව පළවී තිබුණි. එම ලිපියෙහි ඇති කරුණු සම්බන්ධයෙන් ඔක්තෝම්බර් 17 දින පාර්ලිමේන්තුවේ පැවති ආරක්ෂක අමාත්යාංශ අධීක්ෂණ කමිටු රැස්වීමේදී පාර්ලිමේන්තු මන්ත්රී දයාසිරි ජයසේකර මහතා පෙන්වාදීමෙන් පසුව ජනාධිපතිවරයා විසින් මෙම දැනුම්දීම කර ඇත. ආරක්ෂක අමාත්යවරයා ලෙස එම රැස්වීමට ජනාධිපති මෛත්රීපාල සිරිසේනද සහභාගී වී ඇත.
රණවිරු පෞද්ගලික ණය යෝජනා ක්රමය නමින් රුපියල් ලක්ෂ 15 දක්වා ණය ලබාගත හැකි ණය යෝජනා ක්රමයක් ගෝඨාභය රාජපක්ෂ අමාත්යාංශ ලේකම් ධූරය දැරූ රාජ්ය ආරක්ෂක හා නාගරික සංවර්ධන අමාත්යාංශය විසින් ආරම්භ කර තිබුණි. එම ණය මුදල රක්ෂණය කළ යුතු බව පවසමින් රක්ෂණ ක්රමයක් හඳුන්වා දී ඇත. සාමාන්යයෙන් ණය මුදලක් වෙනුවෙන් ලබාදෙන එක් වාරිකයක් පමණක් ගෙවිය යුතු ණය රක්ෂණයක් වෙනුවට වසර 15 ක ජීවිත රක්ෂණයක් එම ක්රමය හරහා හඳුන්වා දී තිබුණි. ඒ හරහා ණය මුදල ලබාගන්නා කෙනෙකුට විශාල මුදලක් රක්ෂණය වෙනුවෙන් ගෙවන්නට සිදුවී තිබේ. ශ්රී ලංකා රක්ෂණ සංස්ථාව වෙනුවට පෞද්ගලික රක්ෂණ සමාගමක් හරහා රක්ෂණය ලබාදී තිබුණු අතර එම රක්ෂණය වෙනුවෙන් ලැබිය යුතු කොමිස් මුදල රුපියල් මිලියන 1000කට ආසන්න විය හැකි බවත්, එම කොමිස් මුදලට සිදුවූයේ කුමක්දැහි පරීක්ෂණයක් සිදුකළ යුතු බවත් එම ලිපියෙන් ජනාධිපතිවරයාට යෝජනා කර තිබුණි.
