ජනාධිපති මයිත‍්‍රීපාල සිරිසේන මහතාගේ සිය ධූර කාලය අහවර වීමට ඇත්තේ තවත් අවුරුද්දකට මඳක් වැඩි කාලයක් පමණි. මෙම අවසාන කාලයට අවතීරණ වීමේදී ඔහු රටට විහිළු සපයන පුද්ගලයෙක් වීම අවාසනාවන්ත තත්ත්වයකි. දැන් දැන් ඔහු රටට සපයන විහිළු රටට දරාගන්නට බැරි තරම් ය. රාජපක්ෂ රෙජීමය පරදවා ඔහු අදාළ ධූරයට ජනතාව විසින් පත්කරන්නේ රටේ අනාගතය සරු කිරීමටය. රට නවීන රටක් කිරීමටය. රටේ ප්රජාතන්ත්රවාදය දියුනු කිරීමටය. එහෙත් මේ සියල්ල පසෙක තබා ඔහු ශ‍්‍රී ලංකා නිදහස් පක්ෂය ආරක්ෂා කර ගැනීමට රාජපක්ෂ කඳවුර සමග සටන්වදිනු හැර කළ අන් යමක් නැති තරම් ය. එම තත්ත්වය තුළ දැන් රට තිබෙන්නේ විශාල අවුලකය. එම අවුල තවත් අවුල් ජාලාවක් කරන තීන්දු තීරණ ගනිමින්ද කතා පවත්වමින්ද ජනාධිපතිවරයා සිටින්නේ නීරෝ ලීලාවෙන් ය.
පසුගිය 16 වැනිදා පැවති කැබිනට් රැු ස්වීමේදී කොළඹ වරායේ නැගෙනහිර පර්‍යන්තය ඉන්දියාවට බදු දීම සඳහා යෝජනාවක් පැමිණිවිට විශාල ගාලගෝට්ටියක් සමගින් අදාළ යෝජනාවට තමන් විරුද්ධ බව ජනාධිපතිවරයා පවසා ඇත. එහිදී ඔහු එජාපයේ සංවර්ධන ක‍්‍රියාදාමයන් විවේචනය කරමින් පවසා ඇත්තේ රට ආපස්සට එනම් මහින්ද යුගයට රැුගෙන යෑම හොඳ බවය. අනෙක් පැත්තෙන් ඔහු පවසා ඇත්තෙ ඉන්දියාවේ රෝ සංවිධානයට තමන්ව ඝාතනය කිරීම සඳහා උවමනාවක් ඇති බවය. මෙම ප‍්‍රවෘත්තිය ඉන්දියාවේ ද හිංදු වෙබ් අඩවියද වාර්තා කර තිබූ අතර මෙරට පුවත්පත් ද එය පසුගිය 17 වැනිදා වාර්තා කර තිබුණි. මෙවැනි ප‍්‍රකාශ සහ හැසිරීම් ජනාධිපතිවරයෙකුට තරම්දැයි ඔහුම නැවත සිතා බැලිය යුතුය. ජනාධිපති ඝාතන කුමන්ත‍්‍රණයක් පිළිබඳව පසුගියදා වාර්තා වූ අතර මේ වනවිට ඒ පිළිබඳව රහස් පොලිස් විමර්ෂණයක්ද සිදුවෙමින් පවතියි. ජනාධිපතිවරයාට තිබුණේ මේ පරීක්ෂණ නිසිලෙස සිද්ධ වෙනවාදැයි විපරම්කර බලා ඒ පිළිබඳව කටයුතු කරන්නට ය. අදාළ පොලිස් ලොක්කන් පිළිබඳව ඍජු තීන්දු තිරණ ගැනීමය. එහෙත් ඒ කිසිදෙයක් සිද්ධවූ බවක් පෙනෙන්නට නැත.
තවත් මෙවැනිම විහිළුවක් පසුගිය 16 වැනිදා ජනාධිපතිවරයා විසින් කරනු ලැබීය. එනම් තෙඹුවනදී යකා නටනු ලැබූ පොලිස් සැරයන් සනත් ගුණවර්ධන සහ පවුලේ පිරිස ජනාධිපති ලේකම් කාර්යාලයට ගෙන්වා රුපියල් ලක්ෂ 10ක මුදලක් පරිත්‍යාග කිරීමය. දැඩි දුෂ්කරතා මැද ජීවත්වෙන මෙම පොලිස් නිළධාරියාට මුදල් ආධාරයක් කලාට මේ ලියුම්කරු විරුද්ධ නොවන අතර මෙම මුදල් ප‍්‍රදානය රටට දෙන ආදර්ශය සැලකීමේදී එය බෙහෙවින් ගැටලූ‍කාරීය. එම ක‍්‍රියාව රටක ජනාධිපතිවරයෙකුට තරම් නොවන බව මේ ලියුම්කරුගේ හැඟීමය. නීතිවිරෝධි ලෙස වැලි ප‍්‍රවාහනය කරනු ලැබූ ලොරිය නිදහස් කිරීම වැරැුද්දක් වෙන්නේ කෙළෙසද තුවක්කුව අත දරාගෙන මේකියන පොලිස් නිළධාරියා නැටූ නාඩගමද නීති විරෝධිය. එම නීති විරෝධි කාර්යයට ලැබෙන තෑග්ග ලක්ෂ 10ක් නම් එය බරපතල තත්ත්වයකි. පොලිස් ලොක්කන් නිසා මෙන්ම තමන් රාජකාරි කිරීමේදී සිදුවූ යම් යම් සිද්ධි නිසා දුෂ්කරතාවයට පත් වූ සහ ඒ නිසා තමන්ගේ සහ පවුලේ සාමූහික ජීවිතය පවා විශාල ඛේදවාචකයන් වලට ගොදුරුවූ පොලිස් නිලධාරීන් එකට සීයක් සොයා ගැනීම අසීරු නැත. එවැනි තත්ත්වයක් තුළ ජනාධිපතුවරයාගේ මේ ක‍්‍රියාකලාපය විහිළුවක් වෙනවා ය. පොදුවේ පොලිස් ලොක්කන් නිසා පොලිස් පොඞ්ඩන්ට විඳින්නට සිදුවී තිබෙන ගැහැට පිළිබඳව පොදුවේ සොයාබලන සහ ඒවාට පිළියම් යෝජනා කරන තැනකට ජනාධිපතිවරයා ගියේනම් එය රටක් වටින, ඉදිරිය බලා කළ වැඩක් වන්නට තිබුණි. අනෙක් පැත්තෙන් තෙඹුවන පොලිස් ලොක්කා පිළිබඳව පොලිස් නීතිය සහ ආයතනික නීතිය ඍජුව ක‍්‍රියාත්මක කරන තැනකට අවශ්‍ය මගපෙන්වීම ජනාධිපතිවරයා විසින් කලානම් එය මීට වඩා බුද්ධිමත් තීරණයක් වන්නට තිබුණි.
අනෙක් පැත්තෙන් මෙවැනි විහිළු සමාජයට සපයමින් ජනාධිපතිවරයා නැවත රාජපක්ෂවරුන් සමග සමගි සන්ධානයකට සැරසෙන බවක්ද ඒ පිළිබඳව වූ අභිලාශ‍යන් පෙන්වන බවක්ද පෙනෙන්නට තිබෙන්නේය. සභාග ආණ්ඩු පිළිබඳව වූ යෝජනා වුවත් එන්නේ එම තත්ත්වය තුළය. අනෙක් පැත්තෙන් තමන්ගේ මූලිකත්වයෙන් දියත්වූ සංවර්ධන කාර්යන් හෝ අනෙකුත් ආණ්ඩුවේ කටයුතු හෝ හොඳ නෑ කියමින් දැන් දැන් විවේචනය කිරීම රාජපක්ෂවරුන් සමග එකතුවීමේම අභිලාෂය හැර අන් යමක් නොවෙන බව කිව යුතුය. සියල්ල පසෙක තබා මහින්ද රාජපක්ෂ කල්ලිය සමග එකතුවීමට වර්තමාන ජනාධිපතිවරයා කටයුතු කරන්නේ නම් එය ජනාධිපතිවරයාගේ ලොකුම විහිළුව වනු නියතය.
