ව්‍යාපාරිකයෙකු විසින් ගෙන්වන ලද රෙදි තොගයක් රුපියල් මිලියන 2030ක මුදලකට පාසල් නිල ඇඳුම් සඳහා ලබාගැනීමට අධ්‍යාපන අමාත්‍ය අකිල විරාජ් කාරියවසම් හා කර්මාන්ත අමාත්‍ය රිෂාඞ් බදුයුදීන් විසින් ඒකාබද්ධ ඉදිරිපත් කර ඇති කැබිනට් පත‍්‍රිකාව තුළ විශාල වංචාවක් ඇතැයි ලංකා ගුරු සංගමය ජනාධිපතිවරයාට ලිපියක් යවමින් සඳහන් කරයි.
පාසල් නිල ඇඳුම් සඳහා රෙදි ලබාදීම වෙනුවට වවුචර් ලබාදීමේ ප‍්‍රතිපත්තිමය තීරණයක් ගෙන ඒ අනුව වවුචර් ලබාදෙමින් තිබියදී මීට වසර කිහිපයකට පෙර ව්‍යාපාරිකයෙකු විසින් ගෙන්වන ලද මෙම රෙදි තොගය මිලදී ගැනීමේ අරමුණ සැක සහිත බවද ලංකා ගුරු සංගමය පෙන්වා දෙයි.
මෙම ඒකාබද්ධ කැබිනට් පත‍්‍රිකාව 2018.09.19 දිනැතිව 2018/55 අංකයෙන් ඉදිරිපත් කර ඇති බවත් එහි සළුසල විසින් ආනයනය කරන රෙදි තොගයක් වශයෙන් එම රෙදි තොගය සඳහන් කර ඇතත් සළුසල ආයතනය දැනට වසාදමා ඇති ආයතනයක් බවත් ලංකා ගුරු සංගමය සිය ලිපියේ සඳහන් කරයි.
2016 වර්ෂයේදී ළමුන් සඳහා වවුචර් ලබාදුන් අවස්ථාවේදී ව්‍යාපාරිකයෙකු විසින් සළුසල නමින් රෙදි ගෙන්වා වවුචර් සඳහා එම රෙදි ලබාදීමට උත්සාහ ගත් බවත්, ඒ සම්බන්ධයෙන් පැමිණිලි කිරීමෙන් පසු එම ජාවාරම නතරවූ බවත්, මේ මිලදී ගන්නට සැරසෙන්නේ එම රෙදි තොගය බවත් ලංකා ගුරු සංගමයේ ලේකම් ජෝශප් ස්ටාලින් අවධාරණය කරයි.
ඔහු පෙන්වා දෙන්නේ කොළඹ වරායේ හා පෞද්ගලික ගබඩාවල වසර කිහිපයක් තිස්සේ ඇති එම රෙදි භාවිත කිරීමට සුදුසු තත්ත්වයේ පැවතිය නොහැකි බවයි.
ලංකා ගුරු සංගමය ජනාධිපතිවරයාගෙන් ඉල්ලා ඇත්තේ මහා පරිමාණ මෙම දූෂිත ක‍්‍රියාව නතර කර ඒ සම්බන්ධයෙන් පූර්ණ පරීක්ෂණයක් සිදුකරන ලෙසය.
ඉදුවර බණ්ඩාර
