ශ්‍රී ලංකා යුද හමුදාවේ දෙවැනි තනතුර වන මාණ්ඩලික ප්රධානී තනතුර දරන මේජර් ජෙනරාල් දම්පත් ප‍‍්‍රනාන්දුට ජනාධිපතිවරයා මාස තුනක කාලයකට සේවා දිගුවක් ලබාදීම හේතුවෙන් යුද හමුදාවේ ඉහළ නිලධාරීන් අතර යළි නොසන්සුන් තත්ත්වයක් ඇතිවී ඇතැයි වාර්තාවේ.
මෙම නොසන්සුන් තත්ත්වය ඇතිවී ඇත්තේ එම සේවා දිගුව නිසා යුද හමුදා මාණ්ඩලික ප්රධානී තනතුරට හා යුද හමුදා උපමාණ්ඩලික ප්රධානී තනතුරට පත්වීමට බලාපොරොත්තුවෙන් සිටි මේජර් ජෙනරාල්වරුන්ට එම අවස්ථා ප‍‍්‍රමාද වීම හෝ මඟහැරී යෑම නිසාය.
පසුගිය කාලය පුරාම ති‍‍්‍රවිධ හමුදාව තුළ පවත්වාගෙන ගිය සම්ප‍‍්‍රදාය අනුව යුද හමුදාපති, නාවික හමුදාපති හෝ ගුවන් හමුදාපති තනතුරට පත්වන පුද්ගලයන්ට පමණක් එම ධුරය දැරීම සඳහා සේවා දිගු ලැබෙන අතර අනෙකුත් නිලධාරීන් වයස අවුරුදු පනස්පහ සම්පූර්ණ වීමත් සමග හමුදාපති ධුරයක් නොලැබෙන්නේ නම් විශ‍‍්‍රාම යා යුතුය.
මෑත ඉතිහාසයේ යුද හමුදාපති ධුරය නොදැරූ අයෙකුට සේවා දිගුවක් ලබාදී ඇත්තේ 2009 වර්ෂයේදී වන අතර එවක යාපනය ආඥාපති වශයෙන් කටයුතුකළ මේජර් ජෙනරාල් ජී.ඒ. චන්ද්‍රසිරිට එම සේවා දිගුව ලැබී තිබුණි. එම සේවා දිගුවත් සමග ඉන්පසු ඔහු යුද හමුදා මාණ්ඩලික ප්රධානී තනතුරේ කටයුතු කර ඇත.
වත්මන් යුද හමුදාපති මහේෂ් සේනානායක ජනාධිපතිවරයා ඔහුට ලබාදුන් දෙවන සේවා දිගුව යටතේ කටයුතු කරන අතර ඔහුගේ සේවා දිගුව ලබන වසරේ අගෝස්තු 18 දක්වා බල පැවැත්වේ. යුද හමුදාපතිවරයාට දෙවන වතාවටත් වසරක කාලයක් සඳහා ලබාදුන් සේවා දිගුව නිසා මේජර් ජෙනරාල්වරුන් රාශියකට එම කාලය තුළදී විශ‍‍්‍රාම යෑමට සිදුවී ඇත.
එම තත්ත්වය මත ඇතිවූ මේජර් ජෙනරාල්වරුන්ගේ කලකිරීම මේජර් ජෙනරාල් දම්පත් ප‍‍්‍රනාන්දුගේ සේවා දිගුවත් සමග තවත් උත්සන්න වී ඇතැයි අපගේ හමුදා ආරංචි මාර්ග ප‍‍්‍රකාශ කරයි.
