යාපනය අන්තර්ජාතික සිනමා උළෙල ඔක්තෝම්බර් 04 සිට 08 වැනිදා දක්වා යාපනයේදී පැවැත්වෙයි. මෙවර එම සිනමා උළෙල පැවැත්වෙන්නේ හතරවැනි වරටය. යාපනය පුස්තකාලය, යාපනය මැජෙස්ටික් සිනමා ශාලාව සහ යාපනය විශ්වවිද්‍යාලයෙහි පැවැත්වෙන එම සිනමා උළෙලට ලොවපුරා රටවල් 30 කින් පැමිණෙන චිත‍්‍රපටි 80ක් පමණ යාපනය අන්තර්ජාතික සිනමා උළලේදී දැකබලාගත හැකිය. චිත‍්‍රපටි පහක් සඳහා සම්මාන ලබාදීමට නියමිතය. චිත‍්‍රපටි උළෙලේදී සම්මාන පහක් ලබාදීමට නියමිත අතර කෙටි චිත‍්‍රපටි, ජනප‍්‍රියම චිත‍්‍රපටි එහිදී තෝරාගැනීමට බලාපොරොත්තු වෙයි. මේ සටහන යාපනය චිත‍්‍රපටි උළෙලේදී තිරගත වෙන විශේෂ චිත‍්‍රපටි කිහිපයක් පිළිබඳවය.
ලෑන්ඞ්ෆිල් හාමනි
චිත‍්‍රපටි උළෙලේදී තිරගත කිරීමට නියමිත ලෑන්ඞ්ෆිල් හාමනි චිත‍්‍රපටිය පැරගුවේහි අගනගරයේ තිබෙන දැවැන්ත කුණුකන්දකට සම්බන්ධ වාර්තා චිත‍්‍රපටියකි. පැරගුවේ සහ ඇ.එ.ජ. නිෂ්පාදනයක් වන එම චිත‍්‍රපටිය 2015 දී නිර්මාණය කරන ලද්දකි.
කුණුකන්දකට පැමිණෙන අපද්‍රව්‍ය පාවිච්චි කොට ෆායිවෝ චාවේස් නම් ගුරුවරයාගේ මෙහෙයවීමෙන් සංගීත භාණ්ඩ නිර්මාණය නිර්මාණය කොට සංගීත කණ්ඩායමක් නිර්මාණය කළ කණ්ඩායමක් පිළිබඳව එම වාර්තා චිත‍්‍රපටිය නිර්මාණය කර ඇත. මෙම සංගීත කණ්ඩායම ලොව පුරා ජනප‍්‍රියත්වයට පත්විය. කුණුකන්දක සිට සංගීත ලෝකය ජයගැනීම පිළිබඳ අපූරු කතාවක් චිත‍්‍රපටියෙහි එයි. ලෝකය අපට කුණු එවද්දී, අපි ඔවුන්ට සංගීතය යවනවා. ෆායිවෝ චාවේස්ගේ ප‍්‍රකට කියමනකි. ලෑන්ඞ්ෆිල් හාමනි චිත‍්‍රපටිය අන්තර්ජාතික වශයෙන් සම්මාන රැසක් දිනාගෙන ඇත.
සාජි එන්. කරුන්ගේ චිත‍්‍රපටි
සාජි එන්. කරුන් මලයාලම් සිනමාවේ අතිශය ගෞරවණීය චිත‍්‍රපටි අධ්‍යක්ෂවරයෙකි. ඔහු කැනස් සම්මානයක්, ඉන්දීය ජාතික සම්මාන හතක් සහ තවත් අන්තර්ජාතික සම්මාන රැුසක් දිනාගෙන තිබේ. මෙවර යාපනය අන්තර්ජාතික චිත‍්‍රපටි උළෙලට සාජි එන්. කරුන් සහභාගී වෙයි.
ඔහුගේ ප‍්‍රථම චිත‍්‍රපටිය වන පිරවි චිත‍්‍රපටිය කැනස් සම්මාන උළෙලේ කැමරා දෝර් සම්මානය දිනාගන්නට සමත් විය. ඊට අමතරව පිරවි චිත‍්‍රපටිය ඉන්දියාවේ ජාතික සම්මාන උළෙලේ හොඳම අධ්‍යක්ෂවරයා සඳහා සම්මානයත් ලෝකානෝ චිත‍්‍රපටි උළෙලේ විශේෂ සම්මානයකුත් දිනාගැනීමට සමත් විය. මෙවර යාපනය චිත‍්‍රපටි උළෙලේදී පිරවි චිත‍්‍රපටිය තිරගත වෙයි.
සාජි විසින් අධ්‍යක්ෂණය කළ වනප‍්‍රාස්තම් නම් 1999 වසරේ නිර්මාණය කළ මලයාලම් චිත‍්‍රපටියද තිරගත වෙයි. එම චිත‍්‍රපටියේ මෝහන්ලාල් ප‍්‍රධාන චරිතය රඟදක්වයි. එම චිත‍්‍රපටිය ඉන්දීය ජාතික සම්මාන උළෙලේදී වසරේ හොඳම ඉන්දීය චිත‍්‍රපටිය ලෙස සම්මාන ලැබීය. 1994 නිර්මාණය කළ ස්වාහම් චිත‍්‍රපටියද යාපනය චිත‍්‍රපටි උළෙලේදී තිරගත වෙයි. ස්වාහම් චිත‍්‍රපටිය කැනස් චිත‍්‍රපටි උළෙලේ පාම් දෝර් සම්මානයට යෝජනා වූ චිත‍්‍රපටියකි. ඊට අමතරව සාජිගේ කුට්ටි ස්රාන්ක් චිත‍්‍රපටිය තිරගත වෙයි. 2010 තිරගත වූ එම චිත‍්‍රපටියෙහි ප‍්‍රධාන චරිතය මම්මූති විසින් රඟදක්වයි. එම චිත‍්‍රපටියද ඉන්දීය ජාතික සිනමා සම්මාන උළෙලේදී වසරේ හොඳම චිත‍්‍රපටිය ලෙස සම්මාන ලැබීය.
දීපා මෙහ්තාගේ
anatomy of violence
ලෝකප‍්‍රසිද්ධ ඉන්දු – කැනේඩියානු චිත‍්‍රපටි අධ්‍යක්ෂවරියක් වන දීපා මෙහ්තා විසින් 2016 දී නිර්මාණය කළ ඇනටොමි ඔෆ් වයලන්ස් චිත‍්‍රපටියද මෙවර තිරගත වෙයි. ලිංගික අපරාධ සහ එයට සමාජය පසුබිම් වන ආකාරය තේමා කරගත් චිත‍්‍රපටියකි.
ශ‍්‍රී ලාංකික දෙමළ චිත‍්‍රපටි
මදි සුදා නම් වූ දෙමළ නවක ශ‍්‍රී ලාංකික දෙමළ චිත‍්‍රපටි අධ්‍යක්ෂවරයා විසින් නිර්මාණය කළ උම්මාන්ඩි දෙමළ චිත‍්‍රපටියද මෙවර තිරගත වෙයි. මෙය යුද්ධයෙන් පසුව උතුරේදී නිර්මාණය වූ මුල්ම චිත‍්‍රපටි අතරින් එකකි. යාපනයේ තරුණ සිනමාකරුවන් එක්ව නිෂ්පාදකයෙකු නොමැතිව ස්වාධීන නිෂ්පාදනයක් ලෙස මෙම චිත‍්‍රපටිය නිර්මාණය කර ඇත.
ප‍්‍රංශයේ ජීවත්වන ශ‍්‍රී ලාංකික දෙමළ චිත‍්‍රපටි අධ්‍යක්ෂවරයෙකු වන දේවා අජන්තන්ගේිඑන්නයි’ චිත‍්‍රපටියද මෙවර තිරගත වෙයි.
වසර හතළිහකට පසු ශ‍්‍රී ලාංකික සිනමාහල්වල ප‍්‍රදර්ශනය කළ දෙමළ ජාතික අධ්‍යක්ෂවරයෙකු විසින් අධ්‍යක්ෂණය කරන ලද දෙමළ චිත‍්‍රපටියක් වූ කෝමාලි කිංග්ස් චිත‍්‍රපටියද මෙවර යාපනය අන්තර්ජාතික සිනමා උළෙලේදී නරඹන්නට අවස්ථාව ලැබෙයි. මෙවර චිත‍්‍රපටි උළෙලේදී මේ වෙද්දී වේගයෙන් වර්ධනය වන ශ‍්‍රී ලාංකික දෙමළ සිනමාව පිළිබඳව විශේෂ අවධානයක් යොමු කර ඇත. ඒ අනුව ශ‍්‍රී ලාංකික දෙමළ චිත‍්‍රපටි, වාර්තා චිත‍්‍රපටි සහ කෙටි චිත‍්‍රපටිවලට විශේෂ ඉඩකඩක් මෙවර ලබාදී තිබේ.
සිංහල චිත‍්‍රපටි
එම චිත‍්‍රපටිවලට අමතරව චින්තන ධර්මදාස විසින් අධයක්ෂණය කළ ඇවිලෙනසුළුයි චිත‍්‍රපටිය, මාලක දේවප‍්‍රිය විසින් අධ්‍යක්ෂණය කළ බහුචිතවාදියා චිත‍්‍රපටිය, නුවන් ජයතිලක අධ්‍යක්ෂණය කළ සුළඟ අපව රැුගෙන යාවි චිත‍්‍රපටියද යාපනය අන්තර්ජාතික චිත‍්‍රපටි උළෙලේදී දැකගත හැකිය. ඊට අමතරව අශෝක හඳගම, විමුක්ති ජයසුන්දර සහ ප‍්‍රසන්න විතානගේ අධ්‍යක්ෂණය කළ තුන්දෙනෙක් චිත‍්‍රපටියද සිනමා උළෙලට එක්වෙයි.
කෙටි චිත‍්‍රපට හා සංවාද
කෙටි චිත‍්‍රපටි විශාල සංඛ්‍යාවක් චිත‍්‍රපටි උළෙලට එකතුවීමට නියමිතය. ඒ අතර ශ‍්‍රී ලාංකික දෙමළ සහ සිංහල භාෂාවෙන් කටයුතු කරන අධ්‍යක්ෂවරුන්ගේ චිත‍්‍රපටිද එක්වෙයි. ලංකා බණ්ඩාරණායක, වතීෂ් වරුවන්, මදි සුදා ඇතුළු දේශිය සිනමාකරුවන්ගේ කෙටි චිත‍්‍රපටි නැරඹිය හැකිය. ඒවාට අමතරව සිනමා උළෙලේදී සංවාද සහ කෙටි චිත‍්‍රපටිද නරඹන්නට අවස්ථාව ලැබෙයි.
අනුරංග ජයසිංහ
