අයවැයේදී ආණ්ඩුව පැරදවීම සඳහා කළ සැලසුම් මෛත‍්‍රීපාල සිරිසේන ජනාධිපතිවරයා පිළිබඳව ඒකාබද්ධ විපක්ෂය තුළ ඇති අවිශ්වාසය හා ඔහුගෙන් ඒ පිළිබඳව ස්ථීර පිළිතුරක් නොලැබීම නිසා ඇනහිටින තත්වයකට පත්ව ඇතැයි අනිද්දා සමඟ අදහස් දැක්වූ ඒකාබද්ධ විපක්ෂයේ නායකයෝ කිහිපදෙනෙක් පැවසීය.
අනිද්දා සමඟ අදහස් දැක්වූ 15 දෙනාගේ කණ්ඩායමේ ප‍්‍රබලයෙකු ප‍්‍රකාශ කළේ එජාපයට හිතවත් දුමින්ද දිසානායක සහ මහින්ද අමරවීරගේ වුවමනාවන්වලට අනුකූලව මෛත‍්‍රීපාල සිරිසේන මහතා කටයුතු කරන බවයි. ඒ නිසා 15 කණ්ඩායමේ කිසිවෙකුත් නැවත ඔහු සමග සාකච්ඡා කරන්නට සුදානමක් නැති බවත් ඉතිරි කෙටි කාලය තුළ පාර්ලිමේන්තුවේ ඔළු‍ගෙඩි ගණන වෙනස් කරමින් මහින්ද රාජපක්ෂ මහතා අගමැති කරන්නට සාකච්ඡුා තවදුරටත් නොකරන බවත් පැවසීය. මෙම කණ්ඩායම් දෙක එකතු කිරීම සඳහා පෙරමුණ ගෙන කටයුතු කළ 15 දෙනාගේ කණ්ඩායම ඉදිරියේදී පොදුජන පෙරමුණට එක්වන බවද ඔහු කීය.
මීට පෙර අගමැතිවරයාට එරෙහිව ඉදිරිපත් කළ විශ්වාසභංගයේ ඡන්දය විමසූ අවස්ථාවේදීත් ජනාධිපති මෛත‍්‍රීපාල සිරිසේන එයට සහයෝගය පළකරන බව ප‍්‍රකාශ කර තිබුණත් ඔහු නිසි නායකත්වයක් නොදුන් බව ඒකාබද්ධ විපක්ෂයේ නායකයන්ගේ අදහස යැයි අනිද්දා සමඟ අදහස් දැක්වූ ඒකාබද්ධ විපක්ෂයේ තවත් නායකයෙක් පැවසීය. ඒකාබද්ධ විපක්ෂයේ බැසිල් රාජපක්ෂට සමීප නායකයන්ගේ අදහස වී ඇත්තේද ආණ්ඩුවේ ධුර කාලයෙන් වසරක් පමණක් ඉතිරි වී තිබියදී ආණ්ඩුව බාරගැනීමෙන් ඉදිරි මැතිවරණයකදී ඉහළ ජයග‍්‍රහණයක් ලැබීම සඳහා තිබෙන අවස්ථාව අහිමි වනු ඇති බවයි. ආණ්ඩුව බාරගතහොත් මාස කිහිපයක් තුළ ආර්ථිකයෙන් විශාල ප‍්‍රතිඵල පෙන්විය යුතු බවත්, එසේ කළ නොහැකි නිසා ආණ්ඩුවට ඉදිරියට යෑමට ඉඩ දී මැතිවරණයකින් පසුව ආණ්ඩුවක් නිර්මාණය කළ යුතු බව ඒකාබද්ධ විපක්ෂ කණ්ඩායමේ අදහස වී ඇත. ඒ නිසා අයවැය ඡුන්දයෙන් ආණ්ඩු වෙනසක් සඳහා වූ සාකච්ඡුාවට ඒකාබද්ධ විපක්ෂයේ පාර්ලිමේන්තු මන්ත්රීවරුන් අතරින් වැඩි පිරිසක් ඇකැමැත්ත පළ කර ඇතැයි වාර්තා වෙයි.
