රනිල් වික‍්‍රමසිංහ ආණ්ඩුව වෙනස් කිරීම සඳහා නායකත්වය ගන්නා ලෙස ඉල්ලා සිටීම ට ජනාධිපති මෛත‍්‍රීපාල සිරිසේන මුණගැසෙන්නට වෙලාවක් වෙන් කර දෙන ලෙස තමා දයාසිරි ජයසේකර මන්ත‍්‍රීවරයාගෙන් ඉල්ලා සිටි බව වාසුදේව නානායක්කාර මහතා පවසයි. ජනාධිපතිවරයා එක්සත් ජාතීන්ගේ සංවිධානයේ මහා සභා රැුස්වීම සඳහා පිටත්වීමට පෙරද තමා ජනාධිපතිවරයා මුණගැසෙන්නට වෙලාවක් ඉල්ලා සිටි බවත්, එහෙත් වෙලාවක් වෙන් කර නොදුන් බවත් ඔහු කියයි. ඉදිරි මැතිවරණ තෙක් බලා සිටිය නොහැකි තරම් රටේ ආර්ථිකය කඩාවැටී ඇති නිසා වහාම ආණ්ඩුව අවසන් කළ යුතුයැයි තමා ඒකාබද්ධ විපක්ෂයේ සාමාජිකත්වය දරන පක්ෂ නායකයන්ගේ රැුස්වීමේදී පෙන්වාදුන් බව වාසුදේව නානායක්කාර මහතා කීය. එම යෝජනාවට එම රැස්වීමට සහභාගි වී සිටි කිසිවෙකු විරුද්ධ නොවූ බවත් ඔහු කීවේය.
වත්මන් ආණ්ඩුව ජාතික ආණ්ඩුවක් ලෙස පවත්වාගෙන යෑම සඳහා වසර දෙකක අවබෝධතා ගිවිසුමක් එක්සත් ජනතා නිදහස් සන්ධානය සහ එක්සත් ජාතික පක්ෂය අතර ඇතිකරගෙන තිබුණු බවත්, එම ගිවිසුමෙහි කාලය 2015 සිට 2017 දක්වා පමණක් වූ බවත්, ගිවිසුමෙහි කාලය අවසන්ව ඇති නිසා නව අගමැතිවරයෙකු යටතේ ආණ්ඩුවක් පත් කිරීමේ හැකියාව ජනාධිපතිවරයාට ඇති බවත් නානායක්කාර මහතා පෙන්වා දුන්නේය. එසේ නොමැතිනම් නොවැම්බර් මාසයේ පැවැත්වීමට නියමිත අයවැය ඡන්ද විමසීමේදී වත්මන් ආණ්ඩුව පරාජය කිරීම සඳහා ජනාධිපතිවරයාට නායකත්වය ගත හැකි බවද ඔහු කීවේය.
