ගෝඨාභය රාජපක්ෂගේ පියා සහ මව වෙනුවෙන් රජයේ මුදල් වැයකොට ස්මාරකයක් තැනවීමේ සිදුවීම පිළිබඳව මේ දිනවල විශේෂ ත‍්‍රිපුද්ගල මහාධිකරණයේ විභාග වෙයි. එම අධිකරණ කටයුත්තට බාධා වෙන අයුරින් ගෝඨාභය රාජපක්ෂ ආරක්ෂා කරන අන්දමේ මාධ්‍ය වාර්තාද, ප‍්‍රකාශද පසුගිය කාලයේ බොහෝ විය. ගෝඨා හිරේ දමන දේශපාලන මෙහෙයුමක් ලෙස එම අධිකරණ කටයුත්ත අර්ථකථනය කරන්නෝ වෙති.
ගෝඨාභය රාජපක්ෂගේ ආරක්ෂාවට කියැවෙන සරල කාරණය මෙබඳුය. ගෝඨාභය රාජපක්ෂ මහතා සභාපතිත්වය දරන ඞී.ඒ. රාජපක්ෂ අනුස්මරණ පදනම නම් ආයතනයක් විසින් ඉඩම් ගොඩකිරීමේ හා සංවර්ධනය කිරීමේ සංස්ථාවට කොන්ත‍්‍රාත්තුවක් බාරදී ඇත. ඒ ස්මාරකයක් තැනීමටය. එම සංස්ථාව කොන්ත‍්‍රාත්තුව අවසන් කර ඇත. දැන් ගෝඨාභය රාජපක්ෂ මහතා ඒ කොන්ත‍්‍රාත්තුවට අදාල මුදල් ගෙවා ඇත. ගනුදෙනුව අවසන්ය
කොන්ත‍්‍රාත්තුව භාරදීම
මුලින්ම ලෙහාගත යුතු කාරණයකි. ඞී.ඒ. රාජපක්ෂ අනුස්මරණ අධ්‍යාපනික, සංස්කෘතික හා සමාජ සේවා පදනම නමින් හැඳින්වෙන, මෙම ස්මාරකය තැනූ පදනමෙහි සභාපතිවරයා ගෝඨාභය රාජපක්ෂය. උපසභාපති මහින්ද රාජපක්ෂය. ඞී.ඒ. රාජපක්ෂ සැමරීමේ උණක් ඇති මිනිසුන් තොග ගානට නැති බව පැහැදිලි කාරණයකි.
අනෙක් පැත්තෙන් ඉදිකිරීම කර ඇත්තේ ඉඩම් ගොඩකිරීමේ සහ සංවර්ධනය කිරීමේ සංස්ථාව විසින්ය. එය ගෝඨාභය රාජපක්ෂ ලේකම් ධුරය දැරූ ආරක්ෂක හා නාගරික සංවර්ධන අමාත්‍යාංශය යටතේ තිබුණු ආයතනයකි.මේ ඉදිකිරීම සම්බන්ධයෙන් කිසිදු ලිඛිත ගිවිසුමක් නැත. පිළිගත හැකි ලිඛිත අදහස් හුවමාරුවක් සිදුකරගෙන නැත. ඒ කියන විදියට කොන්ත‍්‍රාත්තු බාරදීමක් සිදුව ඇත්නම් මුලින්ම ඉදිරිපත් කළ යුත්තේ එම කොන්ත‍්‍රාත්තුව ඉඩම් ගොඩකිරීම් සංස්ථාවට බාරදුන්නේ කෙසේද යන්න පිළිබඳවය. දැනට ඇති ලිඛිත සාක්ෂි අනුව කොන්ත‍්‍රාත්තුව ඇරඹෙන්නේ ඉඩම් ගොඩකිරීමේ හා සංවර්ධනය කිරීමේ සංස්ථාවට පිටින් වන පදනමකින් ලැබෙන කොන්ත‍්‍රාත් ගිවිසුමකින් නොවේ. සංස්ථාවට ඉහළින් සිටින අමාත්‍යාංශ ලේකම් ගෝඨාභය රාජපක්ෂගේ උපදෙස් මත එම සංස්ථාවේ අධ්‍යක්ෂ මණ්ඩලය විසින් ගත් තීන්දුවක් මතය. සරලවම කිවහොත් ගෝඨාභය රාජපක්ෂ නම් රාජ්‍ය නිලධාරියා විසින්, තමන් යටතේ ඇති රාජ්‍ය ආයතනයකට තමන්ගේ තාත්තා සහ අම්මා සිහිකරන ස්මාරකයක් තනන්නැයි උපදෙස් දී ඇත.
පසුව සල්ලි ගෙවන්නට හිතාගෙන කොන්ත‍්‍රාත් බාරදීමක් නොව, මෙය රාජ්‍ය නිලධාරියෙකු විසින් සම්පත් අවභාවිත කිරීමක් බවට තවත් සාක්ෂි ඇත. 2014 වර්ෂයට අදාල ඉඩම් ගොඩකිරීමේ සංස්ථාවේ මූල්‍ය ප‍්‍රකාශනයෙහි විවිධ ව්‍යාපෘති යටතේ ‘මැදමුලන වීරකැටිය ව්‍යාපෘතිය’ නම් වූ ව්‍යාපෘතියකට ගිය වියදම සංස්ථාවේ වියදමක් ලෙස සඳහන් කර ඇත. ඉඩම් ගොඩකිරීමේ සංස්ථාව කොන්ත‍්‍රාත්කරුවෙකු ලෙස මුදල් ලැබීමේ බලාපොරොත්තුවෙන් ව්‍යාපෘතිය සිදුකළා නම් එය මූල්‍ය ප‍්‍රකාශනයෙහි ‘වත්කමක්’ ලෙස සටහන් කළ යුතුව තිබුණි.
සංස්ථාව රුපියල් 33,944,741ක මූලික ඇස්තමේන්තුවක් ව්‍යාපෘතිය සඳහා සකස් කර තිබුණි. එහෙත් ඒ ඇස්තමේන්තුව කොන්ත‍්‍රාත්තුව බාරදුන්නායැයි කියන පදනම වෙත ඉදිරිපත් කර තිබුණේ නැත. කොන්ත‍්‍රාත් බාරදීමේදී සාමාන්‍ය ක‍්‍රමවේදය නම් ඇස්තමේන්තු, සැලසුම් මුදල් වියදම් කරන පුද්ගලයාට ඉදිරිපත් කිරීමය. ‘වැඬේ කරන්න, යන ඕනෑම වියදමක් ගෙවන්නම්’ යැයි කියනා ව්‍යාපෘති බාරදෙන සිරිතක් කොහේවත් ඇත්තේ නැත. තමා බාරදුන්නායැයි කියන කොන්ත‍්‍රාත්තුවට කිසිදා මුදල් ගෙවීමේ වුවමනාවක් නැති කෙනෙකු නම් එසේ කොන්ත‍්‍රාත්තුවක් බාරදීමේ ඉඩක් ඇත.
සංස්ථාව බාහිර පාර්ශ්වයකින් කොන්ත‍්‍රාත් සිදු කරගන්න නම් සාමාන්‍යයෙන් 20%ක පූර්ව අත්තිකාරමක් ලැබීම සිදුවෙයි. එහෙත් මේ ව්‍යාපෘතියේදී එවැනි අත්තිකාරමක්ද ලබා නොතිබුණි. මේ ස්මාරකය විවෘත කර තිබුණේ 2014 නොවැම්බර් 06 වැනිදාය. එය සිදුකළේ මේ කියන ඞී.ඒ. රාජපක්ෂ අනුස්මරණ පදනමේ උපසභාපති වන හිටපු ජනාධිපති මහින්ද රාජපක්ෂ විසින්ය. ව්‍යාපෘතිය අවසන් කොට පදනමේ උපසභාපති විසින්ම විවෘත කළත් ඒවාට සල්ලි ගෙවීමට ඒ කාලයේ වුවමනාවක් තිබුණේත් නැත.
මුදල් ගෙවීම
ගෝඨාභය රාජපක්ෂලාගේ පැත්තෙන් කියන මුදල් ගෙවීම සිදුවුණේ ඉන් පසුවය. මේ ආණ්ඩුව පත්වීමෙන් පසු මේ ස්මාරකය පිළිබඳ පරීක්ෂණ සිදුකරන බවට වාර්තා පළවීමෙන් පසුව, 2015 අගෝස්තු 04 වැනිදා එම ව්‍යාපෘතියට අදාල ගෙවීම් කිරීම සඳහා බිල්පත් ඉදිරිපත් කරන ලෙස රාජපක්ෂලාගේ පදනම විසින් සංස්ථාවෙන් ලිඛිතව ඉල්ලා සිට ඇත. ඒ වෙද්දීත් සංස්ථාවෙන් ලිඛිතව පදනමට දන්වා තිබුණේ බිල්පත් ඉදිරිපත් කරන තෙක් රුපියල් මිලියන 25ක් ගෙවන ලෙසය.
රුපියල් මිලියන 25ක මුදල් නාඳුනන පුද්ගලයෙකු විසින් ඉඩම් ගොඩකිරීමේ සංස්ථාවේ බැංකු ගිණුමට බැර කර තිබුණි. ඒ රාජපක්ෂලාගේ පදනම වෙනුවෙන්ය. ඉන් වසර දෙකකට පසුව 2017 ජුලි 20 වැනිදා පදනම විසින් තවත් රුපියල් 8,944,741ක් ගෙවා ඇත. කොටස් දෙකකට ගෙවූ ඒ මුදල හරහා ව්‍යාපෘතියෙහි මුල් ඇස්තමේන්තුවෙහි තිබුණු මුදල ගෙවා අවසන් කර තිබුණි. එහෙත් සම්පූර්ණ ව්‍යාපෘතිය සඳහා වැයවී තිබුණු සම්පූර්ණ මුදල රුපියල් 81,313,374 කි. ඒ බව 2016දී ඉදිරිපත් කළ විශේෂ විගණකාධිපති වාර්තාවකද සඳහන් කර ඇත. ඒ ගෙවීමත් රාජපක්ෂලාට පැහැර හැරිය නොහැකිය.
මීට අමතරව රාජ්‍ය පරිපාලන නීතිරිති උල්ලංඝනය කිරීම් රැසක් මේ ව්‍යාපෘතියෙහි ඇත. ටෙන්ඩර් නැතිව කොන්ත‍්‍රාත් භාරදීම් සිදුකර ඇත. ව්‍යාපෘතිය ඉදිකිරීම නාවික හමුදාවට බාර දී තිබුණේ කිසිදු ප‍්‍රසම්පාදන ක‍්‍රියාවලියකින් තොරවය. ගෝඨාභය රාජපක්ෂලාට අනුව නාවික හමුදාවේ ඉන්නේ රණවිරුවෝය. රණවිරුවන් මේසන් බාස්ලා බවට පත්කොට ගෝඨාභය රාජපක්ෂ තමන්ගේ පියාත්, මවත් වෙනුවෙන් විශාල ප‍්‍රමාණයේ ස්මාරකයක් තනාගැනීම කුමන දේශපේ‍්‍රමයට ගැළපෙන්නේදැයි අපි නොදන්නෙමු.
2016 විගණකාධිපති වාර්තාවෙහිද සඳහන් වෙන්නේ මෙය රාජ්‍ය දේපළ අවභාවිතයක් බවත්, මෙයට සම්බන්ධ වූ රාජ්‍ය නිලධාරීන් සම්බන්ධයෙන් නීතිමය පියවර ගත යුතු බවත්ය. අධිකරණය ඉදිරියේ මේ නඩුව විභාග වෙන්නේ ඒ අනුවය.
අනුරංග ජයසිංහ
