අපි ශබ්ද දූෂණය ගැන එතරම් වද වෙන ජාතියක් නොවෙමු. එනිසා කොළඹ නගරයේ කලර් ලයිට් එකේ රතු ලයිට් එකට නවතාගෙන සිටින වාහනවල බොහෝ රියැදුරන් (බොහෝවිට පුද්ගලික බස් රියැදුරන්) හෝන් එක උඩ හිඳගෙන යන්නේ ඉස්සරහ වාහනය ඉක්මණින් එළවා දමන්නට ය. උසාවි ඉදිරිපිටද හෝන් තදින් නාද කරන්නට රියැදුරෝ පසුබට නොවෙති. මේ කන් බිහිරිකරවන මිහිරි නාද පරිසරයට මෙලෙස නිදහස් කරන අපි ඉන් නොනැවතී ගෙදර ගොස් අසල්වාසියන්ටද හිරිහැරයක් වන ලෙස කැසට් රෙකෝඩර පණ ගන්වමු.
දැන් එය තවදුරටත් ඉදිරියට ගොස් අහිංසාව ශාන්තිය පැතිරවීමට ගොඩනැගුණු පන්සලද පිරිත් ශබ්දය පරිසරයට මුසුකරන්නේ මිනිසුන්ගේ කන් පැලීමේ ඒකායන අරමුණෙන් ය.
මේ ලියුම්කරු කාලයක් හෝමාගම ප්රසිද්ධ පන්සලක් අසල නවාතැනක සිටියේ ය. ඒ පන්සල උදේ 5 කණිසමේ සිට පිරිත්වලින් අපේ කන් පසාරු කරන්නේ අනේ මේ පන්සල කුඩුකරන්නට ඇත්නම් යන ප්රකෝපකාරී හැඟීම උදෑසනම අප සිත් තුළ පතුරවමින් ය. එනිසා දැන් පන්සල් මහා හඬින් යකඩ කටින් උදෑසනම බණ දේශනා කර අප සිත් වෛරයෙන් දූෂණය කරමින් තිබෙන්නේ ය. දර්ගා වැනි නගරයකට ගිය විට මුස්ලිම් පල්ලි තුළින්ද නැගෙන්නේ මෙවැනි ඝෝෂාවන් ය. දකුණු පළාතේ ගාල්ලට කිට්ටු ගම් පියසිවල සැදැහැවත් බෞද්ධයෝද බණට පිරිතට හැම මඟුලකටම ගෙදරට ස්පීකර් වඩම්මති. ඉන්පසු ඒවා ගස් බැඳ මිනිසුන්ගේ කන් පලති. මේ ස්පීකර් ගස් බැඳිල්ලට පොලීසියෙන් අවසර ගෙනදැයි මේ නිවැසියන්ගෙන් ඇසූ විට ඔවුන්ගේ උත්තරය එහෙම අවසරයක් බණකට පිරිතකට අවැසි නැති බවය. මේ අප අසල්වැසියාගේ අයිතිය වළපල්ලට යවන එක විදිහක් ය. මේ ටික මෙහෙම ලියන්නට සිතුණේ මුහුණු පොතේ සරන විට දැක්ක එක ප්රවෘත්තියක් නිසා ය.
මේ ප්රවෘත්තිය එන්නේ අකුරැුස්සේ මැර පන්සල් බිමකින් ය. මේ පන්සල මුහුණු පොත කියන විදිහට පෝරතොට ගල්කැටියගොඩ ශ්රී බෝධිරුක්ඛාරාමයයි. මේ පන්සලද අප මුලින් කී ලෙස යකඩ කටින් ඝෝෂාකාරී සහ කරදරකාරී ලෙස පිරිත් ශබ්දය වාතලයට මුසුකරන්නේ කාලයක සිට කිසිදු හිරිකිතකින් තොරවමය. මේ යකඩ කට උදේ 5සිට 7 පමණ වන තුරු කෑගසයි. ඊට පසු හවස 4ට නැවත සංගායනාව ආරම්භ වෙන බව දැනගන්නට ලැබෙන්නේ ය. කන් පැළෙන මේ සද්දය ගැන බොහෝ බෞද්ධ පින්වතුන් නිහඬව සිටින්නේ, තම පුතා දුව විභාගයට පාඩම් කරනකොට දත් මිටිකමින් ඉවසීම ප්රගුණ කරන්නේ පන්සල් සතු අසීමිත බලය නිසාය. අකුරැුස්සේ මේ පන්සලට ද රටේ අනික් පන්සල්වට මෙන්ම මේ නිසා විරෝධයක් එන්නේ නැත. එහෙත් ටික කලකින් පන්සලට එන ගමේ තරුණ ව්යාපරිකයෙකු වන රසංග බුද්ධික මේ පන්සලේ නායක හාමුදුරුවන් ලෙස සඳහන් පුඤ්ඤසාර හිමියන්ට කියන්නේ උදේට සහ සවසට ක්රියාත්මක පන්සලේ යකඩ කටේ වොලියුම් එක ටිකක් අඩුකරන්න පුළුවන්ද හාමුදුරුවනේ කියාය.
තරුණයාගේ ඉල්ලීම සමග මේ පාතාලකරණය වූ හිමිනමට දෙලොව රත්වන්නට ඇත. ඒ තමන්ගේ මේ කසාවතේ අසීමිත බලයට මේ තරුණයා නිවී සැනසී අභියෝග කිරීම නිසා ය. මෙම ඉල්ලීමෙන් අනතුරුව පන්සලේ යකඩ කටේ සද්දය තවත් වැඩි වෙන්නේ අමතර කාලයක් ද ඊට ඈඳා ගනිමින් ය. ඒ අර තරුණයාගේ හඬට ගමේ පන්සලේ හාමුදුරුවන්් යකඩ කටිං කන පැලෙන්න දුන්න හැටිය. එයට පසු ඓශ්චර්යමත් ගල් හද්දා වරුෂාවක් මේ තරුණයාගේ ගේ මත පතිතව ගෙදර දොර ජනෙල් බිඳ දමන්නේ පන්සලේ බුදු දහමේ බලය නිසාය. ඒ පසුගි ය 10වැනි දින රාත්රි 12ට පමණය. මේ ඓශ්චර්යය දැක බලා පහන් සිත් උපදවා ගන්නට 119 අංකයට අමතා පොලීසියට කතාකළත් ඔවුන් පැමිණ නැත. ඊට පසු මේ තරුණයා 11 වැනි දින අකුරැස්ස පොලීසියට ගල් වරුෂාව ගැන පහදවා කරුණු කියා පැමිණිල්ලක් දමා ඇත. එයටත් පොලීසියෙන් ප්රතිචාරයක් නැති තැන නැවත 12 වැනි දින නැවත පැමිණිල්ලක් දමා ඇත. ඉන්පසුව 13 වැනි දින මේ හිමිනම සහ තරුණයා පොලීසියට ගෙන්වා පැමිණිල්ල විභාග කරන පොලීසිය පැමිණිලිකරුට පන්සල් නීතියෙන් සරණ ගොස් උපදෙස් ලබා දී ඇත. පොලීසිය මෙහිදී පැමිණිලිකරුට පවසා ඇත්තේ පිරිත් අහගෙන ඉන්න බැරිනම් වෙන ප්රදේශයකට ගොස් පදිංචි වෙන්න කියා ය. භාවනා පන්ති පවත්වන වැරදිකරුවන් රැගෙන බෝධි පූජාවලට යන පොලිස් ලොක්කෙකු සිටින අපේ වර්තමාන සිංහල බෞද්ධ පොලිසියේ පොලිස් පොඞ්ඩෙකු මෙහෙම උපදෙසක් දීම මහා ලොකු කතාවක් වෙන්නට බැරිය.
පාතාලකරණය කරගත් චීවරයක් දරාගත් මේ හිමිනමගේ යකඩ කට ගලවා දමන්නට පොලිසියට නීතියෙන් ප්රතිපාදන නැතිද? අසල්වැසියන්ට කරදරයක් හිරිහැරයක් වන සේ ශබ්ද විකාශන යන්ත්ර භාවිත කිරීම නීතියෙන් තහනම් ය. එය දණ්ඩ නීති සංග්රහය යටතේ දඬුවම් දිය හැකි වරදක් ය. ඒ එය එම සංග්රහයේ 261 වගන්තිය යටතේ මහජන කරදරයක් වන බැවින්ය. අනෙක් පැත්තෙන් පුද්ගලයෙකුට තමන් කැමති තැනක නිදහසේ ජීවත්වීමට හිමිවී තිබෙන අයිතියට මෙම පන්සල් කරන අභියෝගය සුළුපටු නැත.
පසුගිය කාලයේ මේ යකඩ කටින් මහා හයියෙන් පිරිත් බෙදාහැරීමට විරුද්ධව අධිකරණය ලබා දුන් තීන්දු පිළිබඳව මේ පොලිස් පොඞ්ඩන් දන්නේ නැතිද? නැතිනම් කසාවත ඉදිරියේ එම තීන්දු සහ නීතිමය ප්රතිපාදන අමතකද? අප පොලිසියෙන් විමසිය යුතුය. එනිසා අවසානයේ පන්සල්වලට පල්ලිවලට කියන්නට වෙන්නේ තමන්ගේ බණ තමන්ට ඇහෙන සේ පමණක් මුමුණ ගන්න කියා ය. එය එසේ නොවේ නම් ජනතාව සංවිධානය වී මේ පන්සල්වලට සහ පල්ලිවලට විරුද්ධව අධිකරණයේ නඩු දැමිය යුතුය.
