එජාප සංවත්සරයේදී අගමැති රනිල් වික‍්‍රමසිංහ කියලා තිබු ණා 2030දී ඊළඟ පරම්පරාවට පක්ෂය බාරදෙන බව. රනිල් වික‍්‍රමසිංහ මහතා 2030 තෙක් ඉන්න උත්සාහ කිරීම ගැන එජාප සාමාජිකයෙක් විදියට ඔබේ අදහස මොකක්ද?
එතුමා කිව්වේ නැහැ 2030 වෙනතුරු අගමැතිවරයා විදියට ඉන්නවා කියලා. එතුමාගේ ප‍්‍රකාශයේ අදහස එතුමාගෙන්ම තමයි අහන්න වෙන්නේ. එහෙත් මම දන්න විදියට එතුමා පක්ෂයේ ඉන්න තරුණයන්ට වගකීම් පවරලා තියෙනවා. අත්දැකීම් තියෙන හොඳ තරුණ පෙළක් අපට ඉන්නවා. අපි අනෙකුත් පක්ෂ එක්ක සංසන්දනය කරලා මේක කතාකරන්න එපැයි. දැන් අනෙක් පැත්තේ නායකත්වයට යන්න නම් රාජපක්ෂ කියන නම තියෙන්න එපැයි. එජාපයේ එහෙම නැහැ. දැන් සේනානායකලා ඉන්නවා, විජේවර්ධනලා ඉන්නවා, හෂීම්ලා ඉන්නවා, පේ‍්‍රමදාසලා ඉන්නවා, රහුමාන්ලා ඉන්නවා, පෙරේරාලා ඉන්නවා. ජාතිභේද පවා නැතිව සමඅවස්ථා දීලා තියෙනවා. රාජපක්ෂලා බලයේ ඉන්නකොට හැම තැනටම රාජපක්ෂලා දැම්මා. කතරගම දේවාලේ බස්නායක, එයාලයින් එකේ, රග්බිවල, නාවික හමුදාවේ වගේ හැම තැනකම රාජපක්ෂලා ඉන්නවා. දැන් එජාපයේ නායකත්වය තමන්ව විවේචනය කරන්න ඉඩදීලා තියෙනවා. මම ඒක යහපත් දෙයක් විදියට දකිනවා.
ඒත් පක්ෂය ඇතුළේ නායකත්වය පිළිබඳ ඇතිවෙන සංවාද දිගින් දිගටම යටපත්වෙනවා.
පක්ෂ ප‍්‍රතිසංවිධානය කරද්දී පොරොන්දු වුණා පක්ෂයේ ප‍්‍රතිසංස්කරණ ගැන. ඒ කටයුතු වෙන අයට බාරදුන්නා. ඒවා දිහා බලද්දී පක්ෂයේ සුපිරි ප‍්‍රජාතන්ත‍්‍රවාදයක් තියෙනවා. මම එතුමා ඉදිරියේ නැගිටලා එතුමාට විරුද්ධව අදහස් දක්වපු අවස්ථා තියෙනවා. අපට පුළුවන් වුණා පක්ෂය ඇතුළේ හිටපු උපනායකලා වෙනස් කරන්න. අධිකරණ ඇමති වෙනස් කරන්න පුළුවන් වුණා. රවී කරුණානායක වගේ බලවතෙක් පක්ෂය ඇතුළේ කෑගහලා පසුපෙළට ගෙනියන්න පුළුවන් වුණා. මේක සුපිරි ප‍්‍රජාතන්ත‍්‍රවාදයක්. මහින්ද රාජපක්ෂලා ෆයිල් හැංගුවා. කතාකරන අයට ගහන්න ආවා මිසක් පියවර ගත්තේ නැහැ. එජාපයේ එහෙම නැහැ. පහුගිය කාලයේත් කෘත්‍යාධිකාරී මණ්ඩලයේදී ඇහුවා රවී කරුණානායක උපනායක තනතුරේ ඉන්නවාට කෘත්‍යාධිකාරී මණ්ඩලය කැමතිද කියලා. මමත් තව නායකයෙකුත් නැඟිට්ටා. සමහර ජ්‍යෙෂ්ඨ ඇමතිවරු නැගිට්ටෙ නැහැ. මට ඇස් ගැහුවා එපා කියලා. මම කිව්වා ඔයා මට ඇස් ගහන්නෙපා ඔයත් නැගිටින්න කියලා. මගෙන් ඇහුවා හේතුව මොකක්ද කියලා. මම කිව්වා මට පෞද්ගලික වෛරයක් නැහැ. හැබැයි පර්පෙචුවල් ටේරෂරීස් සමාගම එක්ක එතුමාට සම්බන්ධයක් තිබෙන බවට සාක්ෂි හෙළිවෙලා තියෙන නිසා පරීක්ෂණ අවසන් වන තෙක් එතුමා තනතුරු නොදරා ඉවත් වෙන්න කියලා.
පක්ෂය ඇතුළේ ප‍්‍රතිසංස්කරණ වැඩපිළිවෙළ දැන් නැවතිලාද?
මම දන්නේ නැහැ. මම අගමැතිතුමාගෙන් ඉල්ලීමක් කළා මාවත් ඒ කමිටුවට පත්කරන්න කියලා. මාව පත්කළේ නැහැ. මම යන ක‍්‍රමය ටිකක් දරුණු වැඩි ඇති. මම නිසා අපහසුතාවට පත්වෙනවා ඇති. පක්ෂයේ ඉහළ නායකයන්ගෙන් මට ඒ විරෝධය එල්ලවෙලා තියෙනවා. අකැමැත්ත ප‍්‍රකාශ කරලා තියෙනවා. ඒත් මට තේරෙන විදියට මම වැඩකරන විදිය ගැන ජනතාව කැමතියි. ඒ නිසා මම ඒ වැඩපිළිවෙළ නවත්වන්නේ නැහැ. සැප්තැම්බර් 13 වැනිදා මම අල්ලස් කොමිසමට යන්න ඉන්නවා. පර්පෙචුවල් ටේරෂරීස් සමාගමෙන් මුදල් ගත්ත රවී කරුණානායක, දයාසිරි ජයසේකර සහ සුජීව සේනසිංහ යන අයට විරුද්ධව මම පැමිණිල්ලක් දැම්මා. මේක ප‍්‍රථම වතාවට වෙනවා ඇත්තේ. ආණ්ඩු පක්ෂයේ නියෝජ්‍ය ඇමතිවරයෙක් කැබිනට් ඇමතිවරු දෙන්නෙක්ට සහ රාජ්‍ය ඇමතිවරයෙක්ට විරුද්ධව පැමිණිල්ලක් දැම්මා. ඒ නිසා ලංකාවෙ දේශපාලනයට සාපේක්ෂව මට මේක සුපිරි ප‍්‍රජාතන්ත‍්‍රවාදයක්.
කොහොම වුණත් පක්ෂයේ අභ්‍යන්තර කටයුතුවලට මම එච්චර සම්බන්ධ වෙන්නේ නැහැ. මම පක්ෂය කොන්දේසි විරහිතව ආරක්ෂා කරන කෙනෙක් නෙවෙයි. මම කොන්දේසි විරහිතව ජනතාව වෙනුවෙන් පෙනීඉන්නවා. මම හිතනවා ජනතාව ආරක්ෂා කළොත් ජනතාව පක්ෂය සහ මා වෙත ඒවි කියලා. මහින්ද රාජපක්ෂලා කළේ කොන්දේසි විරහිතව හිතවතුන් වෙනුවෙන් පෙනීසිටීම. තමන්ගෙ සමීපතමයන්ව කෝටිපතියන් කරන එකනෙ ඔවුන් කළේ. අපරාධකරුවන්ව ආරක්ෂා කිරීම කළේ. ඒකෙන් පාවෙන ඡුන්ද සියල්ල රාජපක්ෂලා අහිමි කරගත්තා. ජනතාව වෙනුවෙන් පෙනීසිටින පක්ෂයකට පාවෙන ඡුන්ද ලැබෙනවා. මානව අයිතීන්, කතාකිරීමේ අයිතිය, භාෂණ නිදහස වගේ පක්ෂයේ යහපත් ලක්ෂණ මා හරහා නියෝජනය වෙනවා. හැබැයි ඒ නිසා මම බොහෝවිට පක්ෂයේ මතයට වඩා වෙනස් මතයක ඉන්නවා. ඇවන්ගාඞ් සිද්ධියේදී පක්ෂය ඉන්නේ එක් මතයක. මම ඉන්නේ වෙන මතයක. බැඳුම්කරයේදී අපේ පක්ෂය හිටියේ වෙන මතයක. මම හිටියේ වෙන මතයක. ඩිෆෙන්ඩර් ප‍්‍රශ්නයක් වුණාම යාලූ‍කම් පැත්තක තියලා මම හිටියේ පක්ෂයට වඩා වෙනස් මතයක. ඉතින් මාව කොන්වුණා, මම ටීම්වර්ක් එකක හිටියේ නැහැ කියලා. එහෙම කතාකරද්දී මාවත් බ්ලොක් වෙනවා. මටත් සීමා වැටෙනවා. මන්ත‍්‍රීවරුන්ගේ පඩි වැඩිකරද්දී මම විරුද්ධ වුණා. මොකද ජනතාව වෙනුවෙන් කතාකරලා මට ලොකු පඩි ගන්න බැහැ. ඉතින් විශේෂ දීමනා අවශ්‍ය නැති බව කියලා මම ලියුම් යවනවා. එතකොට අනෙක් නායකයන් කියනවා ඔයා මේක ගන්නම ඕනෑ කියලා.
පක්ෂයේ අයත් ඔබේ ක‍්‍රියාකාරකම්වලට කැමති නැහැ නේද?
කට්ටිය බනිනවා චිත‍්‍රපටි වීරයා වෙන්න හදනවා කියලා. ඒත් ජනතාව කියන්නේ මම පක්ෂයේ ඉන්නකොට පක්ෂය ගැන ආදරයක් ඇතිවෙනවා කියලා. මට පක්ෂයේ විශාලම ෆේස්බුක් අඩවිය තියෙනවා. මට ලක්ෂ හතක් ඉන්නවා. අගමැතිවරයාට ඉන්නෙ ලක්ෂ හතරක් පමණ. තවත් ජනප‍්‍රියම චරිතවලට ඉන්නේත් අඩු ගණනක්. මම හිතන්නේ එහෙම වෙන්නේ මම කෙළින් කතාකළ නිසා කියලා.
කොහොම වුණත් ඔබේ ප‍්‍රශ්නයට ගියොත්, මේක නිසා පක්ෂයේ තනතුරු ලැබීමේදී, පක්ෂයේ පොදු තීරණ ගැනීමේදී මම කොන්වෙනවා. ඒ නිසානේ ගම්පහින් වැඩිම අරගත්ත මගේ නියෝජ්‍ය ඇමතිකමත් එපා වාහෙට හොදි බෙදන්නා වගේ ලැබුණේ. මුලින් දුන්නේ නෑ. පස්සෙ හරි අමාරුවෙන් වගේ මට දුන්නා. අගමැතිවරයාගේ ෆේවරිට්ලාට වගේ සැලකීමක් මට නැහැ. දැන් අගමැතිවරයාගේ ෆේවරිට්ලාට ලැබෙන ඇමතිධුර සහ මට ලැබුණු ඇමතිධුර අතර වෙනස බලන්න. කලාකාරයෙක් විදියට මෙයා ඉන්න ඕනෑ, හැබැයි එයා එතැන ඉන්න ඕනෑ, එතැනින් එහාට එන්න බැහැ කියල හිතනවා ඇති.
මාව ආසනයෙන් ආසනේට නිතර මාරු කරන්නේ. කටානෙන් රත්නපුරට, රත්නපුරෙන් බලංගොඩට, බලංගොඩෙන් දිවුලපිටියට. එතැන පස් ව්‍යාපාරිකයො පක්ෂ විපක්ෂ භේදයකින් තොරව එළෙව්වානෙ. දැන් මම ගම්පහ දිස්ත‍්‍රික් සංවිධායක. සහෝදර දේශපාලනඥයන් මට බනනවා. ඔන්න නළුවා එනවා, සිංදු කියලා ඡුන්ද ගන්නවා කියලා. දැන් පක්ෂ නායකයාට මං ගැන පැමිණිලි යනවා වගේ ඉස්කෝලෙ යන කාලෙ ප‍්‍රින්සිපල්ටත් හැමදාම පැමිණිලි ගියා. මං ඇණයක් වෙන්න ඇති.
නැවත අගමැතිවරයාගේ 2030 කතාව පැත්තට ආවොත්. ලංකාවෙ දේශපාලනඥයන්ගෙ වයස බලද්දී ආර්. සම්බන්ධන්, රනිල් වික‍්‍රමසිංහ, මහින්ද රාජපක්ෂ, මෛත‍්‍රීපාල සිරිසේන, දිනේෂ් ගුණවර්ධන වැනි නායකයන් වියපත් නායකයන්. ඊළඟ පරම්පරාවට මේ මොහොතේදී රට බාරකරන්න ඕනෑ බව හිතන්නේ නැද්ද?
මම ඔබේ තර්කය එක්ක එකඟයි. ඒත් මම මෙහෙම කාරණයක් මතු කරන්නම්. මහතීර් මොහොමඞ්ගෙ වයස බැලූ‍වොත්, ලී ක්වාන් යූ සහ කැස්ත්‍රෝ දේශපාලනය අත්හරිද්දී වයස බැලූ‍වොත් ඔවුන් වියපත් වෙන තුරු දේශපාලනය කළා. මම හිතන්නේ දේශපාලනඥයෙකුගේ වයස නෙවෙයි වැදගත් කාරණය. ඔහුගේ මතවාද, ඔහුගේ දැනුම, ඔහුගේ ස්ථාවරය, කාර්යක්ෂමභාවය වගේ කාරණා තමයි වැදගත් වෙන්නේ. එක ස්ථාවරයක නැති, සවුත්තු දේශපාලනඥයෙක් නම් මොනතරම් වයස ගියත් වැඩක් නැහැ. ඔබ කී ලැයිස්තුවේ ඉන්න අයගෙන් මහින්ද රාජපක්ෂ වගේ දේශපාලනඥයෙක් නොසන්ඩාල වැඩ පටන්ගත්තේ අවුරුදු විසි ගණන්වල ඉඳලා කියලා සාක්ෂි තියෙනවා. ඔහු එදා ඉඳන් අද වෙනතුරු කීවරක් ස්ථාවර මාරුකරලා තියෙනවාද? ඉතින් මහින්ද රාජපක්ෂගේ ප‍්‍රශ්නය වයස නෙවෙයි. ඔබ කීව ලැයිස්තුවේම ඉන්න තවත් දේශපාලනඥයන් ඉන්නවා තමන්ගේ ස්ථාවරය මාරු නොකරපු. ඔවුන් වියපත් වුණත් නාමල් රාජපක්ෂලා වගේ තරුණයන්ට වඩා රටේ නායකත්වයට ගැළපෙනවා. මර්වින් සිල්වා, එස්බී දිසානායක වැනි දේශපාලනඥයන්ගේ පුතුන් තාත්තලාටත් වඩා සවුත්තුයි. ඔවුන්ට වඩා වියපත් තාත්තලා හොඳයිනේ. නාමල් රාජපක්ෂ වගේ පුතෙක් ඉඳිද්දී මහින්දට වෙන හතුරෝ ඕනෑ නැහැ.
ඊළඟ ජනාධිපතිවරණයේදී කරන දේ ගැන සියලූ‍දෙනා කතාකරනවා. ඔබටත් ඒ ගැන යෝජනා තිබෙනවාද?
මම හිතන්නේ ඒකට උත්තර දෙන්න දැන්ම වේලාසන වැඩියි. අපට අවුරුදු පහක කාලයක් දීලා තියෙනවා. ඒ කාලයේදී හොරු ඇල්ලීම, සංවර්ධනය, රටේ සෞඛ්‍යය, අධ්‍යාපනය දියුණු කිරීම ගැන හිතන්න ඕනෑ. මේ වසර දෙකේ වේගයෙන් ගමන් කිරීමයි වැදගත් වෙන්නේ.
මේ වෙද්දී ඔබ අධිකරණයේ නඩුවකට මුහුණදෙමින් සිටිනවා. ඥානසාර හිමි, එස්බී දිසානායක වගේ ඔබත් අධිකරණයට අපහාස කරලා දඬුවම් ලබනු ඇතැයි ඇතැම් අය කියනවා.
මට තිබෙන චෝදනාවත් එස්බී දිසානායකට තිබෙන චෝදනාවත්, ඥානසාර හිමිට තිබෙන චෝදනාවත් එකක් නෙවෙයි. අධිකරණයට අපහාස කිරීම කියන කාරණාව තුනටම අදාල බව ඇත්ත. ඒත් ඉහත කී දෙන්නා හිරේ ගිය පමණින්ම මාව හිරේ දාන්න ඉඩ හැදෙන්නේ නැහැ. මාව හිරේ දැමීම හෝ නොදැමීම මගේ නඩුවෙ සන්දර්භය ඇතුළේ අධිකරණය තීරණය කළ යුතු දෙයක්. කොහොම වුණත් මගේ අරමුණ වුණේ අධිකරණයේ ගෞරවය ආරක්ෂා කිරීම. මම කිව්වෙ නැහැ අධිකරණයේ ඉන්න හැමෝම දුෂිතයි කියලා. මගේ අදහස් ප‍්‍රකාශ කිරීමේ අයිතිය අනුව මම කීවෙ අධිකරණයේ යුක්තිය ඉටුවන ආකාරය පීඩිතයන්ට සහ ධනවතුන්ට දෙවිදියක් කියලා. ඒත් ඥානසාර හිමි වින්දිත කාන්තාවක්ට අධිකරණ භූමියේදී බැනවැදිලා, විනිසුරුවරයාට අභියෝග කරනවා. සුද්දාගේ නීතිය ගණන් නොගන්නා බව කියනවා. එස්බී දිසානායක මහතා බලූ තීන්දුව පිළිගන්නේ නැහැ කියලා කියනවා.
එස්බී දිසානායක මහතා පහුගිය සතියක රූපවාහිනී වැඩසටහනකදී කියනවා අවධානය යොමුකරන්න වටින කතාවක්. එස්බී දිසානායක මහතාගේ තීන්දුව ලබාදෙද්දී හිටපු අගවිනිසුරු සරත් එන් සිල්වා දුරකථන ඇමතුමක් දීලා කිව්වාලූ එස්බී ඔයා වරද පිිළිගන්න කියලා. ‘අත්හිටුවූ හිරදඬුවමක් දෙන්නේ, වරද පිළිගන්න’ කිව්වාලූ. අපි හැමෝම දන්නා විදියට එස්බී දිසානායක ඇමතිවරයා වරද පිළිගත්තා. රූපවාහිනී වැඩසටහනේදී එස්බී ඇමතිවරයා කී කතාව ඇත්ත නම් විනිසුරුවරයා දුරකථනයෙන් විත්තිකරුවාට කතාකරලා දෙන්න සූදානම් වෙන නඩු තීන්දුව ගැන කියලා. කොහොම වුණත් එස්බී ඇමතිවරයාව රවට්ටලා වරද පිළිගන්නට එකඟ කරවාගෙන පස්සෙ ඔහුට වෙනස් දඬුවමක් දීලා. ලංකාවේ අධිකරණයේ මහා ගැටලූ‍වක් ඒ සිදුවීමෙන්ම පේනවා. කොහොම වුණත් මම කියන්න ඕනෑ මගේ නඩුවයි ඉහත කී නඩු දෙකයි එකක් නෙවෙයි දෙකක්. මගේ නඩුවට ලැබෙන තීන්දුව කුමක් වුණත්, මම කී කතාවේ වැදගත්කම වෙනස් වෙන්නේ නැහැ. ඒ වගේම මම කිසිදා වරදක් කළ බව පිළිගන්නේත් නැහැ. මොකද මම වරදක් කරලා නැහැ. මගේ අරමුණ යහපත්.
බිමල් රත්නායක පාර්ලිමේන්තු මන්ත‍්‍රීවරයා පාර්ලිමේන්තුවේදී අහපු ප‍්‍රශ්නයකට පිළිතුරු ලෙස කියනවා එෆ්සීඅයිඞී එකෙන් නීතිපති දෙපාර්තමේන්තුවෙන් කරුණු විමසන්න යවපු පරීක්ෂණ වාර්තා අතරින් 50කට වැඩි ප‍්‍රමාණයක් තවම උපදෙස් නොලැබී නීතිපති දෙප ාර්තමේන්තුවේ තියෙනවා. මේවා සම්බන්ධයෙන් නඩු පවරා නැහැ. හොරු ඇල්ලීම ගැන කතාකළ ඔබේ අදහස මොකක්ද?
මේ නඩු ඉක්මනට ගන්න ඕනෑ. ඇත්තටම ජොන්ස්ටන් ප‍්‍රනාන්දුගේ නඩුව අහන කුරුණෑගල විනිසුරුවරිය තමයි හොඳම වැඬේ කළේ. නඩුව ඉක්මනට ගන්නවා. ඒ නඩුව ඉවර වෙනතෙක් සැකකරුවන් රිමාන්ඞ් බන්ධනාගාරයේ තබනවා. මම හැමදාම කියන විදියට නීතිපති දෙපාර්තමේන්තුව, අධිකරණය වගේ ආයතන අතේ තමයි මේ වැඬේ තියෙන්නේ. ඒවා ස්වාධීන ආයතන. ඒවා පාලනය කරන්න බැහැ. සාක්ෂි තියෙද්දී සැකකරුවන්ට එක පාරම ඇප ලැබෙනවා නම්, නඩු පවරන්න පුළුවන්කම තිබියදී නඩු පවරන්නේ නැතිනම් නීතිය ඉටුවෙන්නේ නැහැ. ඔය තරම් පරීක්ෂණ කරලා නීතිපති දෙපාර්තමේන්තුවට යවා තිබෙනවා නම් දැන් වැඬේ තියෙන්නේ නීති ක්ෂේත‍්‍රය අතේ. නීති ක්ෂේත‍්‍රය කාර්යක්ෂම නම් මේ දුෂණ වංචා සහ අපරාධ ගැන යුක්තිය ඉටුවේවි.
එක කාරණයක් සහතික වෙන්න පුළුවන්. එදා රෝහිත අබේගුණවර්ධන ඇමතිවරයාට විරුද්ධව අල්ලස් කොමිසමේ පැමිණිල්ලක් තියෙද්දී ඔහු නයෙක් ගැහුව බව කියමින් පරීක්ෂණ මඟහැරියා. ඒත් අද ජනාධිපති කාර්ය මණ්ඩල ප‍්‍රධානියාට පවා අල්ලස් කොමිසමෙන් නීතිය ක‍්‍රියාත්මක වෙනවා. ජනාධිපති කොමිෂන් සභා පත්කරලා බැඳුම්කර වංචාව වගේ සිදුවීම් ගැන පරීක්ෂණ කරනවා. රාජපක්ෂ ආණ්ඩුව සමයේත් බැඳුම්කර වංචා ගණනාවක් කරලා තියෙනවා. පර්පෙචුවෙල් ටේරෂරීස් ඒ කාලයේත් ලාභ ලැබුවා. හිටපු මහබැංකු අධිපති අජිත් නිවාඞ් කබ්රාල්ගේ සහෝදරිය පර්පෙචුවෙල් ටේරෂරීස් අධ්‍යක්ෂ මණ්ඩලයේ හිටියා. ඒත් ඒ කාලයේ ක‍්‍රියාත්මක නොවුණ නීතිය අද ක‍්‍රියාත්මක වෙනවා. රනිල් වික‍්‍රමසිංහ අගමැතිවරයාගේ මිතුරුකම නිසා අර්ජුන් මහේන්ද්‍රන්ට ආරක්ෂාව ලැබුණේ නැහැ. අර්ජුන් මහේන්ද්‍රන් අත්අඩංගුවට ගන්න වැඩකටයුතු සූදානම් කළා.
සීඅයිඞීය පරීක්ෂණ ස්වාධීනව කරනවා. ඒත් ආණ්ඩුව වෙනස් වුණාට නීති ක්ෂේත‍්‍රය වෙනස් වෙලා නැහැ. නීතිඥවරු, අධිකරණය, නීතිපති දෙපාර්තමේන්තුව වැනි ආයතන සම්පූර්ණයෙන් වෙනස් වෙලා නැහැ. දුමින්ද සිල්වා පිළිබඳ නඩු තීන්දුව ගන්න. විනිසුරුවරුන් දෙන්නෙක් පැහැදිලිව දුමින්ද සිල්වා වරදකරු කියලා කියද්දී එක් විනිසුරුවරයෙක් නිදොස් කොට නිදහස් කරනවා. සැකකාරයන්ව අත්අඩංගුවට ගන්න එපා කියලා නියෝග ලැබෙනවා.
කොහොම වුණත් හොඳ වැදගත්, යහපත් නීතිපති දෙපාර්තමේන්තුවේ නිලධාරීන්, අධිකරණයේ විනිසුරුවරුන් සහ නීතිඥවරුන් ඉන්න තැන්වලදී පරීක්ෂණ හොඳින් සිදුවෙනවා. ඒ විදියට ඉදිරියට යන නඩුත් තියෙනවා. මේ සමාජය ¥ෂිතයි. මේ ¥ෂිත සමාජයේ පිනුම් ගහපු අය තමයි බොහෝ තැන්වල ඉන්නේ. ඒවා එකවර වෙනස් කරන්න අමාරුයි. මේවා වෙනස් කරන්න තමයි අපිත් කෑගහන්නේ. කොහොම වුණත් ජීවිත පරිත්‍යාගයෙන් පරීක්ෂණ සිදුකොට වැඩකරන උදවියට මම හිස නමා ආචාර කරනවා. සමාජය ඉදිරියට යන්නේ එහෙම අය නිසා. කලකට ඉහතදී බැසිල් රාජපක්ෂ හඞ්සන් මහත්තයා සමඟ ගුවන්විදුලි සාකච්ඡුාවකදී කියනවා ඞීඒ රාජපක්ෂ මහත්තයා මැරුණාම ඔහුගේ දානය කරන්න සල්ලි නොතිබුණු බව. ඉඩම් විකුණලා දානය කරන්න වුණ බව කියනවා. එහෙම හිටපු රාජපක්ෂලා අද ලෝකයේම ධනවත් පවුලක් බවට පත්වෙලා. මේවා සම්බන්ධයෙන් යුක්තිය ඉටු කළ යුතුයි. ඒකට නීති ක්ෂේත‍්‍රයේ සහයෝගය අවශ්‍යයි.
මහින්ද රාජපක්ෂ පාලන සමයේදී සිදුවුණ අපරාධ සම්බන්ධයෙන් පරීක්ෂණ කරමින් හිටියා. හමුදාව අවශ්‍ය තොරතුරු නොදුන්න නිසා පරීක්ෂණ ඉදිරියට කරගෙන යන්න බැරි බව කියනවා. හමුදාවට තොරතුරු නොදෙන ලෙස ජනාධිපතිවරයා උපදෙස් දුන්න බව කියනවා. එක්නැලිගොඩ, නාවික හමුදාවේ කප්පම් කල්ලිය ගැන පරීක්ෂණ මේ වෙද්දී නැවතිලා. මේ අපරාධ ගැන කතාකළ කෙනෙක් විදියට අපරාධකරුවන්ව ආරක්ෂා කිරීම ගැන ඔබේ අදහස මොකක්ද?
ඔබ කියන මතයට අකමැත්තෙන් වුණත් මට එකඟ වෙන්න සිද්ධවෙනවා. මම රණවිරුවන්ට ආචාර කරනවා. ඒත් හමුදාපති මහේෂ් සේනානායක කියන විදියට සැබෑ රණවිරුවා සහ අපරාධකරුවා අතර වෙනස හඳුනගන්න ඕනෑ. හිටපු නායකයන්ගේ වුවමනාවට මාධ්‍යවේදීන්ව ඝාතනය කරන්න, පැහැරගන්නට රණවිරුවන් පාවිච්චි කරලා තියෙනවා. ලසන්ත වික‍්‍රමතුංග මරපු පුද්ගලයන්ට ලසන්ත එක්ක වෛරයක් තිබිලා නැහැ. මිග් යානා ගනුදෙනුවෙන් ලසන්ත මරපු පුද්ගලයන්ට ලාභයක් ලැබිලා නැහැ. රතුපස්වල උද්ඝෝෂණය කළ මිනිස්සු නිසා බි‍්‍රගේඩියර් දේශප‍්‍රියට පාඩුවක් වෙලා නැහැ. දුෂිත රටක යුද්ධයක් තිබුණොත් යුද්ධය ඇතුළෙත් අනිවාර්යයෙන් දුෂණ වෙනවාමයි. යුද්ධයේදී අවිආයුධ වෙළඳාමේ ඉඳන් විවිධ දේවල්වලට ලොකු බලයක් ලැබෙනවා. යුද්ධය මෙහෙයවන පුද්ගලයන් කරන ඕනෑම දෙයක් පිළිගන්න ජනතාව සූදානම් වෙනවා. ඒක වැරදි විදියට පාවිච්චි කරන පාලකයන් ඉන්නවා. ඉතින්, මේ අපරාධ කළ අය රණවිරුවන් නෙවෙයි. ඔවුන් රණවිරුවන් නම් තමන්ට අණදුන්නේ කවුද කියලා ඔවුන් කියයි. සැබෑ විරුවන් මේ අපරාධවලට ගෑවිලා ඉන්නවා නම් ඔවුන්ගෙන් ඉල්ලන්නේ, ඔබට අණ දුන්න කෙනාගේ නම කියන්න. එහෙම නැතිනම් එවැනි අයව ආරක්ෂා කිරීමෙන් ප‍්‍රයෝජනයක් නැහැ. එවැනි අයව ආරක්ෂා නොකර පරීක්ෂණ ඉදිරියට කරගෙන යන්න ඉඩ දිය යුතුයි.
