ඒකාබද්ධ විපක්‍ෂය හා ඔවුන්ගේ අනු ගාමිකයන් කොළඹ දී පැවැත්වූ ජන බල විරෝධතාව සිතූ තරම් සාර්ථක නොවීම වෙන ම කතාවකි.
එහෙත්, ඔවුන්ට කරදරයක් නැතිව කොළඹට අවුත්, කරදරයක් නැතිව කොළඹ මහාමාර්ග අවහිර කරමින්, කරදරයක් නැතිව උද්ඝෝෂණය කර, කරදරයක් නැතිව මහමග වාඩි ලා ගෙන, රැුයක් පහන් කොට නිරුපද්‍රැතව පසුදා ගෙදර යන්නට පුළුවන් තරම් නිදහස් අවකාශයක් රට තුළ ගොඩ නැගී තිබීම පිළිබඳව අප සතුටු විය යුතු ය. එය මේ රටේ ප‍්‍රජාතන්ත‍්‍රවාදී මිනිසුන් බලාපොරොත්තු වූ තත්ත්වයකි.
පරණ ආණ්ඩුව කාලයේ නම්, මෙලෙස මහමග රාත‍්‍රී වාඩි ලා සිටීම මරණය කැඳවා ගැනිමකි. එක්කෝ අතුරුදහන් විය හැකි නිසා ය. නැතිනම් හතර පැත්තෙන් පොලූ අතැති ව කඩා පනින මැරයන්ගේ ප‍්‍රහාරයකට ලක් විය හැකි නිසා ය.
මෙදා ජන බලයට කොළඹට ආ පිරිස කඩාකප්පල්කාරී ක‍්‍රියාවල යෙදෙනු ඇතැ’යි පූර්වානුමාන කරන්නට තරම් සාධාරණ කිසි ම දෙයක් තිබුණේ නැත. හිටපු ජනාධිපති මහින්ද රාජපක්‍ෂගේ සිට ඒ පෙරමුණේ සිටියෝ මහමග සාමකාමී උද්ඝෝෂණවල ඕනෑ තරම් යෙදී මනා පළපුරුද්දක් ලත් ජ්‍යෙෂ්ඨ දේශපාලනඥයෝ පිරිසකි. කඩාකප්පල්කාරී ක‍්‍රියාවල යෙදීම නිසා ඇති විය හැකි නීතිමය හා දේශපාලනික විපාකයන් ගැන හොඳින් දන්නා ඒ පිරිස, තම අනුගාමිකයන් වුවමනාවෙන් ම එවැනි ක‍්‍රියාවලට පොළඹවනු ඇතැ’යි සිතන්නට ද සාධාරණ ඉඩක් නොතිබිණි. මේ නිසා, සාමකාමී ව කොළඹට ඇවිත්, සාමකාමී ව විරෝධය පා, සාමකාමී ව ඔවුන් විසිර යනු ඇතැ’යි සිතන්නට හොඳටම ඉඩකඩ තිබිණි.
එහෙත්, අපේ පොලිසියට අමුතු නුවණක් පහළවී තිබුණේ ය. ඒ, මේ උද්ඝෝෂකයන් පිරිස, කොළඹට කඩා පැන අවහිර කොට, ආණ්ඩු බලය පැහැර ගනීවි ය කියා ය. ඒකාබද්ධ විපක්‍ෂය මේ උද්ඝෝෂණය පවත්වන්නේ කොළඹ කොතැනදැ’යි අවසන් මොහොත වන තුරුත් නොදැන සිටි පොලිසිය ඇතුළු ඔත්තු අංශවලට, මෙවැනි කඩාකප්පල්කාරී ක‍්‍රියා කරන්නට යන බවට හදිසියේ දැනුම් තේරුම් ඇති වුණේ කොහොම ද යන්න ප‍්‍රශ්නයකි. මේ හේතුවෙන්, එවැනි ක‍්‍රියා විය හැකි බවට අධිකරණයට වාර්තා කොට, කොළඹ අවට ඒ ඒ පොලිස් වසම්වල උද්ඝෝෂණ පැවැත්විය නොහැකි වන සේ තහනම් නියෝග ගැනීමේ ලජ්ජාසහගත වෑයමක පොලිසිය යෙදුණේ ය.
පසුගිය ආණ්ඩු කාලයේ නම්, මෙවැනි ඉල්ලීමක් පොලිසිය කළ විට, හැරෙන තැපෑලෙන් ම ඒ තහනම් නියෝගය නිකුත් කරන්නට සැදී පැහැදී සිටි අධිකරණයක් රටේ තිබුණේ ය. එහෙත්, ඒ ආණ්ඩුවේ ම අන්තිම කාලයේ, පොලිසිය තහනම් නියෝග ඉල්ලන්නට ආ විට, නොදී සිටි සමහර මහේස්ත‍්‍රාත්වරුන් ද සිටි බව ගෞරවයෙන් සඳහන් කළ යුතු ය.
ඒ යහපත් සම්ප‍්‍රදාය ඉදිරියට ගෙන එමින්, මෙදා පොලිසිය කළ ඉල්ලීම් සියල්ල ම ඉවත දමන්නට මහේස්ත‍්‍රාත් අධිකරණ කටයුතු කිරීම වනාහි විශිෂ්ට පැවැත්මකි. එය මහජනතාවගේ රැුස්වීමේ, අදහස් පළ කිරීමේ හා දේශපාලන නිදහසට ගරු කිරීමකි.
පසුගිය කාලයේ පොලිසිය කළේ මේ නීතිමය අවකාශය අවභාවිත කිරීමකි. අහවල් දේ ගැන තොරතුරු ඇතැ’යි කියන විට, පොලිසිය ඉල්ලන නියෝගය දෙනවා මිස, ඒ ගැන දිගින් දිගට හාරා අවුස්සන සම්ප‍්‍රදායක් පෙර අධිකරණවල තිබුණේ නැත. මේ නිසා, ‘කඩාකප්පල්කාරී ක‍්‍රියා, මහජන සාමයට බාධා’ වැනි පොලිසිය විසින් ම ගොතන ලද, ඔවුන් පමණක් ම දන්නා අර්ථ නිරූපණ සහිත වචන මෙහිදී අවභාවිත කෙරිණි.
ප‍්‍රශ්නය ඇත්තේ, අදත් පොලිසිය මෙවැනි තහනම් නියෝග ගන්නට කළ උත්සාහය ගැන ය.
ඒ හරහා පොලිසියත් පොලිස්පතිවරයාත් පෙන්නුම් කර ඇත්තේ, ඔවුන් තවමත් සිතන්නේ රාජපක්‍ෂ පන්නයේ මනසකින් බව ය. ජනවාරි 8 වැනිදා දේශපාලන වෙනස කළේ මේ රාජපක්‍ෂ චින්තනයට එරෙහිව ය. අපේ පොලිසිය තවමත් ඒ පරපීඩක චින්තනයෙන් මිදී නැති නම්, වහා ඒ සඳහා පියවර ගැනීම ඔවුන් බාර ව සිටින දේශපාලන අධිකාරින්ගේ වගකීමකි.x
