මේ වන විට විවිධ අධිකරණ ඉදිරියේ විභාගවෙමින් පවතින ඝාතන හා අතුරුදහන් කිරීම් සම්බන්ධ නඩුවලට අදාළව, එම අධිකරණවලට අවශ්‍ය වී තිබෙන ත‍‍්‍රිවිධ හමුදාවල අභ්‍යන්තර තොරතුරු ලබා නොදෙන්නැයි ජනාධිපති මෛත‍‍්‍රීපාල සිරිසේන අණ කොට තිබෙන බව අනිද්දා වෙත වාර්තා වෙයි.
ජනාධිපතිවරයා මෙලෙස අවධාරණය කර තිබෙන්නේ, අගෝස්තු 28වැනිදා සවස් වරුවේ ඔහුගේ පැජට් පාරේ නිවසේ පැවැති සාකච්ඡාවකදී බවද වැඩිදුරටත් වාර්තා වෙයි.
ජනාධිපතිවරයාගේ ප‍‍්‍රධානත්වයෙන් පැවති එම සාකච්ඡාවට ආරක්‍ෂක අමාත්‍යාංශයේ ලේකම් කපිල වෛද්‍යරත්න, නීතිය හා සාමය අමාත්‍යාංශයේ ලේකම්, ආරක්‍ෂක මාණ්ඩලික ප‍‍්‍රධානි රවි විජේගුණරත්න, ත‍‍්‍රිවිධ හමුදාපතිවරුන්, රාජ්‍ය බුද්ධි ඒකකයේ ප‍‍්‍රධානී, යුද හමුදා බුද්ධි අංශයේ ප‍‍්‍රධානී සමග පොලිස්පතිවරයා, අපරාධ පරීක්‍ෂණ දෙපාර්තමේන්තුවේ ප‍‍්‍රධානී, පොලිස් මූල්‍ය අපරාධ කොට්ඨාසයේ ප‍‍්‍රධානී හා පොලිස් විශේෂ කාර්ය බලකායේ ප‍‍්‍රධානී ඇතුළු නිලධාරීන් පිරිසක් ද සහභාගි වී තිබේ.
ලසන්ත වික‍්‍රමතුංග ඝාතනය, ප‍‍්‍රගීත් එක්නැලිගොඩ අතුරුදහන් කරවීම, කීත් නොයාර් පැහැරගෙන යෑම, උපාලි තෙන්නකෝන්ට පහරදීම හා එකොළොස් දෙනකු පැහැරගෙන ගොස් අතුරුදහන් කරවීම වැනි පසුගිය පාලන කාලය තුළ හමුදා සාමාජිකයන්ගේ සහභාගිත්වයෙන් සිදුවී ඇතැයි කියන අපරාධ සම්බන්ධයෙන් පරීක්‍ෂණ පවත්වන පොලිසියට, එම විමර්ශන ඉදිරියට ගෙනයෑමට හමුදාවේ යම් යම් අභ්‍යන්තර තොරතුරු අවශ්‍ය වී තිබිණි. මේ සම්බන්ධයෙන් ඒ ඒ අධිකරණවලට දැනුම්දුන් විට, එම තොරතුරු ලබාදෙන ලෙස එම හමුදාපතිවරුන්ට අධිකරණ නියෝග දී තිබුණද විවිධ හේතු දක්වමින් මේ වන තෙක් ඒවා ලබාදී නැත. මේ තත්ත්වය යටතේ අපරාධ පරීක්‍ෂණ දෙපාර්තමේන්තුව අදාළ තොරතුරු ලබාදෙන ලෙස ඉල්ලා මීට පෙර හමුදාපතිවරුන්ට ද ලිපි යවා තිබේ.
මීට සති දෙකකට පෙර නැවතත් එම ඉල්ලීම පොලිසිය විසින් ආරක්‍ෂක අමාත්‍යාංශයේ ලේකම් කපිල වෛද්‍යරත්නගෙන්ද කරන ලදි. අගෝස්තු 28වැනිදා ජනාධිපතිවරයා සමග සාකච්ඡුාවක් කැඳවනු ලබන්නේ එම ඉල්ලීමට ප‍‍්‍රතිචාර ලෙසින්ය.
එහිදී, ආරක්‍ෂක අමාත්‍යාංශයේ ලේකම්වරයා පවසා ඇත්තේ, පොලිසිය විසින් තමාගෙන් කරුණු 34ක් යටතේ තොරතුරු ඉල්ලා ඇති බවත්, ඒ තොරතුරු ලබාදීම ජාතික ආරක්‍ෂාවට හානියක් විය හැකි බවත්ය. එහිදී පොලිස්පතිවරයා ඇමතූ ජනාධිපතිවරයා, හමුදා නිලධාරීන් අත්අඩංගුවේ සිටීම හා සැකකරුවන් ලෙස සිටීම ගැන සිය අප‍‍්‍රසාදය පොලිස්පතිවරයා වෙත පළකර ඇති අතර, අත්අඩංගුවට ගැනෙන ඒ සමහරු මාස ගණනක් හිර කර තබාගෙන සිටින බවත්, ඔවුන් අත්අඩංගුවට ගෙන ඇත්තේ කිසිදු සාක්‍ෂියක් නැතිව බවත්, සමහරුන්ගෙන් කටඋත්තරයක්වත් සටහන් කොටගෙන නැති බවත් ප‍‍්‍රකාශ කර තිබේ.
ඊට ප‍‍්‍රතිචාර දැක්වූ පොලිස්පති පූජිත් ගුණවර්ධන කියා ඇත්තේ, මේ තොරතුරු ඉල්ලා ඇත්තේ අධිකරණවල නියෝග මත බවත්, අත්අඩංගුවට ගත් සෑම පුද්ගලයන්ගෙන්ම කටඋත්තර සටහන් කරගෙන ඇති බවත්, සමහරුන්ගෙන් කීපවරක් කටඋත්තර සටහන් කරගෙන ඇති බවත්ය. එසේම කිසිවකුත් නිකරුණේ අත්අඩංගුවට ගෙන නැති බවත්, අත්අඩංගුවට ගෙන තිබෙන්නේ ඔවුන් අපරාධවලට සම්බන්ධ බවට සෑහීමට පත්විය හැකි තොරතුරු ලැබී ඇති නිසා බවත් පොලිස්පතිවරයා ප‍‍්‍රකාශ කොට තිබේ.
කෙසේ වෙතත් අවසානයේ ජනාධිපතිවරයා හමුදාවල නායකයන්ට නියම කර ඇත්තේ කිසිම තොරතුරක් ලබා නොදෙන ලෙසය.
මේ අවස්ථාවේ විශේෂත්වය වන්නේ, මේ වන විට එවැනි අපරාධ සම්බන්ධයෙන් යම් යම් චෝදනා ලබා සිටින ආරක්‍ෂක මාණ්ඩලික ප‍‍්‍රධානි හා යුද හමුදා බුද්ධි අංශයේ ප‍‍්‍රධානියාද ඉදිරියේ ජනාධිපතිවරයා මේ ප‍‍්‍රකාශය කිරීමයි.
අරුණ ජයවර්ධන
