‘ ඕස්ටේ‍්‍රලියාවේදි හසුවූ ශ‍්‍රී ලාංකික ත‍්‍රස්තවාදියා අමාත්‍ය ෆයිසර් මුස්තාෆාගේ ඥාතියෙක්.’ මේ කතාව අඩු වැඩි වශයෙන් පසුගිය සතියේදී මාධ්‍ය විසින් වාර්තා කර තිබුණේ මෙලෙසය. ඒ කතාව ගැන කියන්නට පෙර වෙනත් කතා බොහොමයක් අතරින් එකක් කිව යුතුය.
ඒ අහ්මද් මුහම්මද් නමැති අමෙරිකානු පාසල් සිසුවෙකුගේ කතාවයි. අහ්මද් විසින් නිවසේදී ඔරලෝසුවක් තනා ඇත. එම ඔරලෝසුව පාසලට ගෙනගොස් ඇත්තේ මිතුරන්ගේත් ගුරුවරුන්ගේත් පැසසුම් ලැබීමේ අටියෙන් විය යුතුය. එහෙත් ඔහුගේ ඔරලෝසුව දුටු විගස කලබල වූ පාසලේ සිසුන් සහ ගුරුවරුන් විසින් පොලීසිය කැඳවා ඔහු බියපත් කොට ප‍්‍රශ්න කර ඇත. ඉන්පසුව ඔහු මාංචු දමා පොලීසියට ගෙනගොස් ඇත.
අහ්මද් මුහම්මද් ඔරලෝසුව පෙන්වූ විගස එය බෝම්බයක්යැයි සැක කරන්නට සියල්ලන් පෙළැඹී තිබුණේ ඇයි? ඔහු ඔරලෝසුව පිටට ගනිද්දී ඔහු අපූරු හැකියාවක් ඇති සිසුවෙකු ලෙස නොදකින්නට සැබෑ හේතුව කුමක්ද? ‘වොෂින්ටන් පෝස්ට්’ මාධ්‍ය ආයතනය විසින් සිදුකරන ලද සමීක්ෂණයකින් පසුව මේ ප‍්‍රශ්නයට පිළිතුරු සොයා ඇත. එම සමීක්ෂණයෙන් පසුව වොෂින්ටන් පෝස්ට් සටහන් කරන්නේ අමෙරිකානු නිලධාරීන් මුස්ලිම් ජාතිකයන් සම්පූර්ණ මනුෂ්‍යයෙකු ලෙස නොදකින බවය. අර්ධ මනුෂ්‍යත්වයක් සමඟ සැකමුසු ඇසකින් ඇමෙරිකානුවන් මුස්ලිම් ජාතිකයන් දකින බවය.
අමෙරිකාව, ප‍්‍රංශය, ඔස්ටේ‍්‍රලියාව වැනි විවිධ කලාපවල ඇති රටවල් කිහිපයකම මුස්ලිම් ජාතිකයන් වැරදි චෝදනා මත අත්අඩංගුවට ගැනීමේ සිදුවීම් රැුසක් වාර්තා වී තිබේ. ඉන්දියාවේත් එවැනි සිදුවීම් බොහෝවිට වාර්තා වී තිබේ. මේ සැකමුසු බැල්ම ‘ඉස්ලමෝෆෝබියා’ යන නමෙන් ලෝකය පුරා හඳුන්වයි.
කමීර් නිසාම්දීන්
කමීර් නිසාම්දීන් නම් ශ‍්‍රී ලාංකික ශිෂ්‍යයා අගෝස්තු 31 වැනිදා ඕස්ටේ‍්‍රලියාවේදී අත්අඩංගුවට ගැනීමේ සිදුවීම ගැන සාකච්ඡුා කරන්නට සිදුවෙන්නේ එවැනි පසුබිමකය.
ඔස්ටේ‍්‍රලියාවේ නිව් සවුත් වේල්ස්හි විශ්වවිද්‍යාලයක පශ්චාත් උපාධි ශිෂ්‍යයෙකු ලෙස නිසාම්දීන් කටයුතු කරයි. ශිෂ්‍ය වීසාවලින් ඕස්ටේ‍්‍රලියාවට ගොස් සිටින නිසාම්දීන් පාසල් අධ්‍යාපනය ශ‍්‍රී ලංකාවේදී ලැබූ අයෙකි.
ඔහුව අත්අඩංගුවට ගෙන ඇත්තේ විශ්වවිද්‍යාලයෙන්ම ලබාදී තිබුණු ඔත්තුවක් මතය. ඔත්තුව දී තිබුණේ ඕස්ටේ‍්‍රලියාවේ වැදගත් ස්ථාන පිළිබඳ තොරතුරු රැුගත් සටහන් පොතක් ළඟ තබාගෙන සිටින බව කියමින්ය.
ඕස්ටේ‍්‍රලියානු මාධ්‍ය වාර්තා කර තිබුණේ නිසාම්දීන් සතුව තිබුණු සටහන් පොතෙහි තිබුණු කරුණු අනුව ඔහු සිඞ්නි ඔපෙරා නිවස, ප‍්‍රධාන දුම්රිය ස්ථාන කිහිපයක් හා පොලිස් ස්ථාන කිහිපයක් ඇතුළත් ඕස්ටේ‍්‍රලියාවේ සිඞ්නි නුවර වැදගත් ස්ථාන කිහිපයක තොරතුරු සහ මැල්කම් ටර්න්බුල් හිටපු අගමැතිවරයා, ජුලී බිෂොප්, බොන්වින් බිෂොප් ඇතුළු පිරිසකට ප‍්‍රහාර එල්ලකිරීම සඳහා සැලසුම් සටහන් කර තිබුණු බවයි. ‘ලෝන් වුල්ෆ්’ පන්නයේ අයි.එස්. ආභාසය ලැබූ ප‍්‍රහාරයක් එල්ලකිරීමේ සූදානමකින් නිසාම්දීන් සිටි බවට සැක මතුවන බවට මේ සිදුවීම පිළිබඳව පරීක්ෂණ කරන අංශ විසින් පැවසූ බව වැඩිදුරටත් විදෙස් මාධ්‍ය වාර්තා කර තිබුණි. ලංකාවේ මාධ්‍ය විසින් ඒ සිදුවීමට තවත් ලූ‍ණු ඇඹුල් එකතු කරමින් නිසාම්දීන් ත‍්‍රස්තවාදියෙකු බවට නිගමනයකටත් පැමිණ තිබුණි.
මේ වෙද්දි කමීර් නිසාම්දීන්ගේ පෞද්ගලික තොරතුරු, ඡුායාරූප ඇතුළු තොරතුරු බටහිර මාධ්‍ය සහ ශී‍්‍ර ලාංකික මාධ්‍ය හරහා ප‍්‍රසිද්ධ කර හමාරය. එහෙත් සටහන ලියැවෙන මොහොත වන තෙක්ම නිසාම්දීන්ට නිසියාකාර චෝදනා ගොනු කිරීමක්වත් සිදු කර තිබුණේ නැත.
ඕස්ටේ‍්‍රලියානු පොලීසිය විසින් කමීර් අත්අඩංගුවට ගැනීම සිදුවන්නේ සැකයක් නිසා බව පැහැදිලි කාරණයකි. එහෙත් ඒ සැකය තවමත් ඔප්පු වී නැති නිසා නීතිය ඉදිරියේ තවමත් කමීර් වරදකරුවෙක් නොවේ. එහෙත් ඕස්ටේ‍්‍රලියානු සහ ශ‍්‍රී ලාංකික මාධ්‍ය විසින් දැනටමත් ඔහු සැකකරුවෙකු කර හමාරය. එතැනිනුත් නොනැවතී ඔහුගේ සමීප ඥාතියෙකු වන ෆයිසර් මුස්තාෆා අමාත්‍යවරයාත් ත‍්‍රස්තවාදියෙකු කරන්නට සමාජ මාධ්‍ය සහ මාධ්‍යවේදින් පෙළැඹී හමාරය. ලෝක මාධ්‍ය සහ ශ‍්‍රි ලාංකික මාධ්‍ය විසින් නිසාම්දීන්ගේ පෞද්ගලික තොරතුරු හෙළි කිරීමෙන් නොනැවතී ෆයිසර් මුස්තාෆා සහ නිසාම්දීන් එක්ව අයි.එස්. ත‍්‍රස්තවාදීන්ට සහාය දක්වන බවට ප‍්‍රවාදයක්ද ගොඩනංවා හමාරය. ජාතික දේශපාලන ප‍්‍රවාහයේ සිටින ෆයිසර් මුස්තාෆා අමාත්‍යවරයා මුස්ලිම් ජාතිකයෙකු වීම නිසාම ත‍්‍රස්තවාදියෙකු බවට පත්ව ඇත.
සහෝදරයාගේ සටහන
කමීර් මොහොමඞ්ගේ සහෝදරයාගේ සටහනට ඇතැම් මාධ්‍ය විසින් ආවරණයක් ලබා දී තිබුණි. එහි සංක්ෂිප්තව සඳහන්ව තිබුණේ මෙසේය.
‘මාධ්‍ය විසින් ඉදිරියට දමන දේවල් පිළිගන්න එපා. ඒවා මගේ සහෝදරයාගේ විශ්වාසයන්ගෙන් සම්පූර්ණ ප‍්‍රතිවිරුද්ධ පැත්ත තමයි වාර්තා කරලා තියෙන්නේ. වසර හයක් තිස්සේ ඔහු විවෘත මිනිසෙක් කළ නගරයකට ඒ වගේ නින්දිත, වෛරී අපරාධයක් කරන්න කිසිම හේතුවක් තිබුණේ නැහැ.
ඔහු විවෘත අදහස් ඇති මුස්ලිම් ජාතිකයෙක්. ඔහු පිළිබඳ ඉරිසියාවෙන් සිටින කිසිවෙක් ඔහුව ව්‍යාජ චෝදනාවකට හසු කරලා. ඔහුගේ චරිතයට කෙනෙක් ඉරිසියා කිරීම සාමාන්‍ය දෙයක්. ඔහුව අවංකවම දන්නා අයට ඔහු ගැන නරක දේවල් කියන්න නැහැ. ශී‍්‍ර ලංකාවට සහ වෙනත් රටවලට ඔහු සංචාරය කර ඇති බව මාධ්‍ය වාර්තා කර තිබුණා. ඒ වෙනත් ප‍්‍රදේශ යන යෙදුමෙන් ඔහු සිරියාව හෝ එවැනි රටක් කරා ගොස් ඇතැයි වරදවා වටහා නොගන්නා ලෙස මම ඉල්ලා සිටිනවා. ඔහු ලංකාව, ඕස්ටේ‍්‍රලියාව සහ අමෙරිකාව හැර වෙනත් රටවල සංචාරය කර නැහැ. ඔහුගේ කාමරයෙන් ඉලෙක්ට්‍රොනික උපකරණ හමුවී ඇතැයි මාධ්‍ය විසින් වාර්තා කර තිබුණා. එයත් වරදවා වටහා නොගන්නා ලෙස මම ඉල්ලනවා. ඔහුගේ ජංගම දුරකථනය, ලැප්ටොප් පරිගණකය සහ එක්ස්බොක්ස් ක‍්‍රීඩා යන්ත‍්‍රය හැරුණුකොට වෙනත් ඉලෙක්ට්‍රොනික උපකරණ හමුවී නැහැ. ඔහුට විරුද්ධව පදනම් සහගත චෝදනා නැහැ. ඔහුව අත්අඩංගුවට ගත්තේ වැරදීමකින්. දැන් ඒ වැරැද්ද ආවරණය කරන්නට ඔහු ගැන වැරදි තොරතුරු ප‍්‍රසිද්ධ කරනවා.’
සටහන් පොත
කමීර් නිසාම්ඞීන්ගේ ළඟ තිබී හමුවූ සටහන් පොත ඔහු සතුව තිබුණු සටහන් පොතක් බවත් තොරතුරු වාර්තා වී තිබේ. කෙසේ වුවත් කමීර්ට විරුද්ධව ඇති ප‍්‍රබලම සාක්ෂිය වන ඔහුගේ සටහන් පොතෙහි ඇති කරුණු කමීර් විසින් සටහන් කළ ඒවාද, ඒ සටහන් අනුව කටයුතු කිරීමට කමීර් සූදානම් වුණාද යන්න පිළිබඳව තවමත් නිසි තොරතුරු වාර්තා වී නැත. කෙසේ වෙතත් තොරතුරු තාක්ෂණ අංශයේ ප‍්‍රවීණයෙකු වන කමීර් සැබැවින්ම ත‍්‍රස්තවාදියෙකු නම්, තමන්ගේ සටහන් තබාගැනීමට තාක්ෂණික උපාංගයක් වෙනුවට සටහන් පොතක් පාවිච්චි කිරීම පුදුමයට කාරණයක් බව කිව යුතුය. එසේ වුවත් කමීර් වරදකරුවෙකු ද නිවැරදිකරුවෙකුද යන්න අධිකරණයකදී ඔප්පු විය යුතු කාරණයක් වන නිසා ඕස්ටේ‍්‍රලියාවේ සිදුවීමකට ලංකාවේ සිට සහතික දෙන්නට අපට නොහැකි බවත් සටහන් කර තැබිය යුතුය.
ඒ කෙසේ වෙතත් කමීර් නිසාම්දීන්ට චෝදනා ගොනු කරන්නටත් පෙර ඔහුත්, ඔහුගේ ඥාතී අමාත්‍යවරයාත් අපරාධකරුවන් කිරීම අපූරු සම්ප‍්‍රදායකි. ඒ සම්ප‍්‍රදායට අනුව ‘අධිකරණයෙන් වරදකරුවෙකු යැයි ඔප්පු වන තෙක් පුද්ගලයෙක් නිවැරදිකරුවෙක්ය’ යන යෙදුම ‘ඒ පුද්ගලයා මුස්ලිම් ජාතිකයෙකු නම් අධිකරණය ඉදිරියේදී නිවැරදිකරුවෙකු බව ඔප්පු වෙන තෙක් ඔහු වරදකරුවෙකි’ ලෙස වෙනස් විය යුතුය.
අනුරංග ජයසිංහ
