වත්මන් ආණ්ඩුව නියෝජනය කරන දේශපාලන පක්ෂ අතර එකඟතාවයක් ඇති කරගනිමින් නව සන්ධානයක් සැලසුම් කිරීමේ වගකීම දෙමළ ප්‍රගතිශිලී පෙරමුණේ නායක මනෝ ගනේෂන් සහ එජාප සභාපති මලික් සමරවික්‍රම වෙත භාර දී ඇතැයි වාර්තා වෙයි.
අගෝස්තු 23 වැනිදා එක්සත් ජාතික පක්ෂය, දෙමළ ප්‍රගතිශිලි පෙරමුණ, ශ්‍රී ලංකා මුස්ලිම් කොංග්‍රසය, සමස්ථ ලංකා මුස්ලිම් කොංග්‍රසය ඇතුළු පසුගිය මැතිවරණවලදී එක්සත් ජාතික පක්ෂය සමඟ එක්ව තරඟවැදුණු පක්ෂ කිහිපයක් අතර අරලියගහ මන්දියේ පැවැති සාකච්ඡාවකදී ඒ පිළිබඳව එකඟතාවයකට පැමිණ ඇත.
එක්සත් ජාතික පක්ෂය යන පක්ෂ නාමය සහ අලියා ලකුණ යටතේ මැතිවරණවලදී ඉදිරිපත් වීම වෙනුවට පුළුල් සන්ධානයක් ලෙස ගිවිසුමකින් සන්ධානගතව මැතිවරණවලට ඉදිරිපත් වීම වඩා සුදුසුයැයි එම සාකච්ඡාවේදී පක්ෂ අතර එකඟතාවයක් ඇතිව තිබේ.
දැනට එක්සත් ජාතික පක්ෂය සමඟ එකට කටයුතු නොකරන ශ්‍රී ලංකා නිදහස් පක්ෂයද එම සන්ධානයට එකතු කරගත යුතු බවත්, ඒ නිසා අලුතෙන් ගොඩනඟන සන්ධානයට එක්සත් ජාතික පෙරමුණ යන නාමය වෙනුවට ශ්‍රීලනිපයටද එක්විය හැකි අන්දමේ නාමයක් යොදාගත යුතු බවත් එහිදී ඇතිව තිබුණු එකඟතාවයකි.
අනිද්දා සමඟ අදහස් දක්වමින් එම සාකච්ඡාවට සහභාගී වූ පක්ෂ නායකයෙකු ප්‍රකාශ කළේ ශ්‍රීලනිපයද නොනිල වශයෙන් එවැනි සන්ධානයකට එක්වීමට කැමැත්ත පළ කර ඇති බවයි.
එක්සත් ජාතික පක්ෂයේ පාක්ෂිකයන් විසින් මීළඟ ජනාධිපතිවරණයකදී එජාප අපේක්ෂකයෙකු ඉදිරිපත් විය යුතු බවට දැඩි මතයක සිටින බව ඉහත කී සාකච්ඡාවේදී සැලකිල්ලට ගෙන ඇතැයි එම ප්‍රකාශකයා කීය. ඒ නිසා නව සන්ධානයේ ජනාධිපති අපේක්ෂකයා ලෙස එජාප සාමාජිකයෙක්ව තෝරාගත හැකි බවත් අගමැති ධූරය ශ්‍රීලනිපයට ලබාදිය හැකි බවත් එම සාකච්ඡාවේදී සැලකිල්ලට ගත් බව වැඩිදුරටත් ඔහු පෙන්වාදුන්නේය.
