සමානුපාතික හා කේවල යන මිශ‍්‍ර ඡුන්ද ක‍්‍රමය යටතේ පළාත් සභා මැතිවරණය පැවැත්වීමට අදාළ සීමා නිර්ණය වාර්තාව පාර්ලිමේන්තුවේ සම්මත කිරීම සම්බන්ධයෙන් ආණ්ඩුවේ පක්ෂ අතර එකඟතාවක් නොමැති නිසා එම වාර්තාව සම්මත නොවීමේ තත්වය තුළ පළාත් සභා මැතිවරණය තවදුරටත් කල් යාමේ ලකුණු මතුවී ඇත.
අගෝස්තු 24 වැනිදා පාර්ලිමේන්තුවේදී එම සීමා නිර්ණය වාර්තාව විවාදයට ගෙන සම්මත කිරීමට නියමිත අතර ඒ සම්බන්ධයෙන් පාර්ලිමේන්තුව නියෝජනය කරන පක්ෂ අතර අවසන් සාකච්ඡාව අගෝස්තු 23 වැනිදා සවස පැවැත්වීමට නියමිතව තිබුණි.
එක්සත් ජාතික පක්ෂය ප‍්‍රමුඛ එක්සත් ජාතික පෙරමුණේ පක්ෂ කිහිපයක් සීමා නිර්ණය වාර්තාවට විරුද්ධව ඡුන්දය දෙන බව ප‍්‍රකාශ කර තිබෙන අතර ශ‍්‍රීලනිපය සීමා නිර්ණය වාර්තාවට පක්ෂව ඡන්දය ලබාදෙන බව ප‍්‍රකාශ කර ඇත.
ආසන්න වශයෙන් ඡුන්ද 180ක පමණ ප‍්‍රමාණයක් සීමා නිර්ණය වාර්තාවට විරුද්ධව ලැබෙනු ඇතැයි අනිද්දා කළ විමසීමකදී දැනගන්නට ලැබුණි. සීමා නිර්ණය වාර්තාව සම්මත වීමට පාර්ලිමේන්තුවේ තුනෙන් දෙකක් ඡුන්ද ලබාගත යුතුය.
අනිද්දා සමඟ අදහස් දක්වමින් එක්සත් ජාතික පක්ෂයේ ලේකම් අකිල විරාජ් කාරියවසම් ප‍්‍රකාශ කළේ සීමා නිර්ණය වාර්තාවට විරුද්ධව එක්සත් ජාතික පක්ෂය ඡුන්දය ලබාදෙන බවයි. මේ වනවිට එක්සත් ජාතික පක්ෂයට පාර්ලිමේන්තු මන්ත‍්‍රීධුර 87ක් හිමිව තිබෙන්නේය.
ශ‍්‍රී ලංකා නිදහස් පක්ෂය සීමා නිර්ණය වාර්තාවට පක්ෂව ඡුන්දය ලබාදෙන බව අනිද්දා සමඟ අදහස් දක්වමින් ශ‍්‍රී ලංකා නිදහස් පක්ෂයේ දුමින්ද දිසානායක අමාත්‍යවරයා කීය. ශ‍්‍රී ලංකා නිදහස් පක්ෂයේ මෛත‍්‍රීපාල සිරිසේන මහතාට හිතවත් පාර්ලිමේන්තු මන්ත්රීවරුන් සංඛ්‍යාව 24 කි.
දෙමළ ප‍්‍රගතිශීලි පෙරමුණේ නායක මනෝ ගනේෂන් පැවසුවේ දෙමළ ප‍්‍රගතිශීලී පෙරමුණ නියෝජනය කරන පක්ෂ තුන සීමා නිර්ණය වාර්තාව පරාජය කිරීමට කටයුතු කරන බවය. ඊට අමතරව ශ‍්‍රී ලංකා මුස්ලිම් කොංග‍්‍රසය, ඊළාම් ජනතා ප‍්‍රජාතන්ත‍්‍රවාදී පක්ෂය, රිෂාද් බදියුදීන් මහතාගේ සමස්ත ලංකා මක්කල් කොංග‍්‍රසය යන පක්ෂ සීමා නිර්ණය වාර්තාවට විරුද්ධව ඡුන්දය ලබාදීමට එකඟ වී ඇතැයි මනෝ ගනේෂන් මහතා පැවසීය. එම පක්ෂ කිහිපයට පාර්ලිමේන්තුවේ මන්ත‍්‍රීධුර 20ක් හිමිව තිබේ.
චතුර සේනාරත්න, අර්ජුන රණතුංග සහ රාජිත සේනාරත්න යන එක්සත් ජාතික පෙරමුණේ නියෝජිතයන් තිදෙනාද සීමා නිර්ණය වාර්තාවට විරුද්ධව ඡුන්දය ලබාදෙනු ඇතැයි වාර්තා වෙයි.
ආණ්ඩුවේ එම නියෝජිතයන්ට අමතරව ඒකාබද්ධ විපක්ෂය සීමා නිර්ණය වාර්තාවට විරුද්ධව ඡන්දය ලබාදෙන්නට ඒකමතිකව තීරණය කර ඇතැයි අනිද්දා සමඟ අදහස් දැක්වූ ඒකාබද්ධ විපක්ෂයේ පක්ෂ නායක උදය ගම්මන්පිළ මහතා ප‍්‍රකාශ කළේය. ඒකාබද්ධ විපක්ෂයට හිමිව තිබෙන පාර්ලිමේන්තු මන්ත‍්‍රීධුර සංඛ්‍යාව 70 කි.
ජනතා විමුක්ති පෙරමුණේ පාර්ලිමේන්තු මන්ත්රී බිමල් රත්නායක අනිද්දා සමඟ අදහස් දක්වමින් පැවසුවේ අවසාන මොහොතේ සීමා නිර්ණය වාර්තාව විකෘති නොකළහොත් පක්ෂව ඡන්දය ලබාදෙන බවය. ජවිපෙට පාර්ලිමේන්තු මන්ත්රීවරුන් 7 දෙනෙක් සිටිති.
දෙමළ ජාතික සන්ධානය සතුව පාර්ලිමේන්තු මන්ත‍්‍රීධුර 16ක් තිබෙන අතර දෙමළ ජාතික සන්ධානයේ මතය විමසීම සඳහා එම සන්ධානයේ මන්ත‍්‍රීවරයෙකු සම්බන්ධ කරගැනීමට අනිද්දා ගත් උත්සාහය අසාර්ථක විය.
