පි‍්‍රයදර්ශනී ආරියරත්න
තම දරුවා පාසලට ඇතුල් කරගැනීම පිළිබඳව කථාකර ගැනීමට මහනුවර ප‍්‍රධාන පෙළේ පාසලක විදුහල්පතිවරයා මුණගැසුණු මා දන්නා අයෙකුගෙන් එකී විදුහල්පතිවරයා කොපමණ මුදලක් පාසලට පරිත්‍යාග කළ හැකිදැයි අසා ඇත. එයට පිළිතුරු ලෙස ඔහු රුපියල් ලක්ෂයක් පමණ දිය හැකි බව පවසා ඇත. එවිට උපහාසාත්මක ස්වරයෙන් විදුහල්පතිවරයා ඔහුට කියාඇත්තේ ඔය ගාණට ළමයි ගත්තොත් ඒ ඉස්කෝලෙ ළඟ ඉඳන් දළදා මාලිගාවත් පහුවන ලෙස පෝලිම තිබිය හැකි බවයි. දැන් ඔහු කොළඹ සුපිරි පාසලකය.
එක් එක් පාසල්වලට ගෙවිය යුතු මුදලින් මැනිය හැකි පගා තීරණය වන්නේ පාසලට ඇති ඉල්ලූ‍ම අනුවය. එහෙත් සමහර අවස්ථාවල විමර්ශන නිලධාරීන්, පොලිස් නිලධාරීන් යනාදින්ගේ ගනු ලබන පගාව වන්නේ, දුෂණ වංචා හා දරුවන්ට එරෙහිව කෙරෙන ක‍්‍රෑරකම් යනාදියට එරෙහිව නීතිය ඉටුකිරීම වලක්වා ගැනීමය. එසේම වැරදි හෙළිදරව් වීම වළක්වා ගැනීමටත් තමා හා තම පාසලේ කටයුතු ප‍්‍රචාරණය කර ඉල්ලූ‍ම වැඩි කරවා ගන්නටත් ජනමාධ්‍යවේදීන්ගේ දරුවන් ඇතුළත් කර ගනිති. ඒවා මුදලින් මැනිය නොහැකි පගාවන්ය.
රැුකියාවල නියුතු දෙමාපියන් වැඩිදෙනෙකු සිටින හොරණ ජනප‍්‍රිය පාසලක විදුහල්පතිවරයෙකු පසුගිය අගෝස්තූ 1වැනි බදාදා උදය වරුවේ දෙමාපිය රැුස්වීමක් පැවැත්වෙන බවත් එයට නාවොත් තම දරුවා පාසලින් අස්කර ගැනීමට සිදුවනු ඇති බවත් ලිපියකින් දන්වා ඇත. බදාදා රජයේ කාර්යාලවල මහජන දිනයයි. දරුවා අස්කර ගන්නටයැයි තර්ජනය කර ඇති නිසා කෙසේ හෝ රැුස්වීමට යාම සඳහා වරුවක් හෝ මුළු දිනයම නිවාඩු දැමිය යුතුය.
දෙමාපිය රැුස්වීම්වල උඩු අරමුණ දරැුවාගේ ප‍්‍රගතිය ගැන කථාකිරීම වුවද යටි අරමුණු වෙනත් ඒවාය. මුදල් එකතු කිරීම, දෙමාපියන් බියගැන්වීම, පාසලේ කෙරෙන බලධාරීන්ට සෘජු හා වක‍්‍ර ප‍්‍රතිලාභ ලැබෙන ක‍්‍රියා සාධාරණීකරණය, තම පෞද්ගලික විශ්වාස හා මතවාදයන් සමාජගත කිරීම වැනි අවශ්‍යතාද එවැනි යටි අරමුණු අතරය. දරුවා පාසලට ඇතුළත් කළ පසු පාසල් බලධාරීහු දරුවා ඉත්තා කරගෙන දෙමාපියන් කනබොන, අඳිනපළඳින, සිතනපතන ආකාරය පවා පාලනය කරති.
රජයේ සුපිරි හා ජනප‍්‍රිය පාසල් යනු රජයේ මුදල් විශාල ප‍්‍රතිශතයකින් හා නීත්‍යනුකූල පරිත්‍යාගවලින් නඩත්තු කෙරෙන විදුහල්පති ඇතුළු සුළු පිරිසකගේ මාෆියාවක් සේ පවත්වාගෙන යනු ලබන ආයතනයැ’යි කීවොත් බොහෝ දෙනා මා හා එකඟවනු ඇත.
මෙවැනි පාසල්වල විදුහල්පතිලා සෑහෙන පිරිසක්, පෙර පැවති ව්‍යුහ කමිටු හරහා එකල ආණ්ඩු පක්ෂයේ දේශපාලකයන්ගේ නිර්දේශ ලැබ පත්වීම් ලද දේශපාලන ගැත්තෝය. ජාතික පාසල්වල විදුහල්පතිවරුන් හා අධ්‍යාපන බලධාරීන් අතරද දේශපාලන ක‍්‍රමවේද හරහා එකල උසස්වීම් ලද අය බොහෝය. එනිසා පාසල් හරහා විවිධ අයුරින් සිසුන්ටත් දෙමාපියන්ටත් සම්පේ‍්‍රෂණය වන්නේ විදුහල්පතිලා ගුරුකොටගත් මතවාදයන්ය. එනිසා රාජපක්ෂ ආණ්ඩුව මාරුවුවද ඔවුන්ගේ මතවාදය විශේෂයෙන් සිංහල ජාතික මතු පරම්පරාව වෙත සම්පේ‍්‍රෂණය කීරීම දුෂිත හා ඒකාධිපති මොඩලයේ පාසල් තුළින් සිදුවේ.
පාසල් මාෆියාවට විදුහල්පති හා තම සහචරයන් දේශපාලකයන්, අධ්‍යාපන කෙෂේත‍්‍රයේ සමහර උසස් නිලධාරීන්, ආදිශිෂ්‍ය සංගම් හා පාසල් සංවර්ධන සමිති යනාදිය ඇතුළත්ය. මේ නිසා දුෂිත විදුහල්පතිවරුන් නොකළ හැක්කක් නොමැති මාෆියා නායකයන් බවට පත්ව ඇත. සාමාන්‍ය තත්වය එසේ වුවත් සමහර අවස්ථාවල අසාධාරණයට පත් දෙමාපියන් හා ගුරුවරුන්ගේ ප‍්‍රබල මැදිහත්වීම මත එවැනි විදුහල්පතිවරුනට එරෙහිව නීතිමය හා විනයානුකූල පියවර ගෙන ඇත. ජනමාධ්‍ය හරහා සමහරුන් හෙළිදරව් කර ඇත. එහෙත් එය පවා නතර කරගැනීමට තරම් මෙම විදුහල්පතිලා දක්ෂය. ප‍්‍රධාන පෙළේ සුපිරි පාසල්, විශේෂයෙන් කොළඹ ඇති ඒවායේ වෙමින් තිබූ යම්යම් විමර්ශන කටයුතු විමර්ශන නිලධාරීන්ගේ දරුවන් පාසලට ඇතුළත් කරගෙන යට ගසාගත් අවස්ථා ඇත. පොලිසිය සම්න්ධයෙන්ද මෙම කරුණ අදාලය.
ඉතා දරුණු ලෙස දේශපාලකයන් ප‍්‍රශ්න කරන ජනමාධ්‍යවේදියෙකුගේ දරුවකු කොළඹ ප‍්‍රධාන පෙළේ බාලිකාවකට ඇතුල් කරවාගෙන ඇති අතර ඉන්පසුව එකී විදුහල්පතිනියගේ අවක‍්‍රියා එම මාධ්‍ය ආයතනය විසින් වාර්තා කරන්නේම නැත. මෙතෙක් බොහෝ අය දැනසිටියේ ජනමාධ්‍ය දේශපාලකයන්ට උවමනා විධියට හැසිරෙන බව පමණක් වුවද දැන් විදුහල්පතිලාට වුවමනා අයුරින්ද හැසිරෙයි. එසේම තම පාසල් ප‍්‍රචාරණය කරවා ගැනීම අරමුණු කරගෙන ජනමාධ්‍යවේදීන්ගේ දරුවන් ඇතුළත් කර ගත් අවස්ථා පිළිබඳවත් ස්වාධීන මාධ්‍යවේදීන්ට බියේ ඔවුන්ගේ ළමුන්ව ඇතුළත් කර නොගත් අවස්ථා පිළිබඳවත් උදාහරණ ඇත.
