ටිරාන් අලස් යනු කවරෙක්ද යන්න ඔහුගේ ඉතිහාසය තුළින්ම පෙන්වා ඇත. මේ නිසාම බැසිල් රාජපක්ෂ සජින් වාස් ගුණවර්ධන වැන්නවුන් සමග සමතැන් ගන්නට හෝ ඊට ඉහළින් සිටින්නට ටිරාන් අලස්ට තිබෙන හැකියාව අප පිළිගත යුතුය.
හිටපු ජනාධිපතිවරයාගේ 2005.11.28 විධානය යටතේ පිහිටුවා පසුව ගැසට් කරනු ලැබූ රාඩා ආයතනයේ මුල්ම සහ එකම සභාපතිවරයා හා ප‍්‍රධාන විධායක නිලධාරියා වූයේ ටිරාන් අලස්ය. එහි අධ්‍යක්ෂ මණ්ඩලය නියෝජනය කළේ සාලිය වික‍්‍රමසූරිය, බී. අබේවර්ධන, තිලක් අමුණුගම හා ශාන්ති ප‍්‍රනාන්දුය. මොවුහු සියල්ලෝ එකල මහින්ද රාජපක්ෂ සුරතල්ලූය. සාලිය වික‍්‍රමසූරිය රාඩාහි ප‍්‍රධාන සහ මුල්ම මෙහෙයුම් නිලධාරියා වුණත් ඔහුට වරාය අධිකාරියේ සභාපති ධුරය දුන් පසු එම තනතුරට පත්වූයේ ශාන්ති ප‍්‍රනාන්දුය. ඇයද වෙන කවුරුත් නොව හිටපු ජනාධිපති මහින්ද රාජපක්ෂගේ විශේෂ උපදේශකවරයකු ලෙස කටයුතු කළ සිරිමල් ප‍්‍රනාන්දුගේ බිරිඳය. ඉන්පසු ඔවුන් නිර්මාණය කරන කොන්ත‍්‍රාත් සමාගම්ද මේ සඳහාම ඇරඹු ව්‍යාජ ආයතන තුනක් බව අපි ගියවර ලිපියෙන් කීවෙමු.
මේ පිළිබඳව එකල සන්ඬේ ලීඩර් පුවත්පතද ලොකු හෙළිදරවුවක් කළේය. ඔවුන් මේ සමාගම් ගොඩනැගුවේ රජයේ මුදල් නිසි ක‍්‍රමයට අරගෙන පසුව සාක්කුවේ දාගන්නය. ඒ අරමුණ තුළ කොටි සංවිධානයට කොකා පෙන්වීම රාජපක්ෂවරුන්ගේ නොතිබුණු ටිරාන් අලස්ගේ පමණක් තිබුණු සැඟවුණු අරමුණක් වන්නට බැරි නැත. ඒ අරමුණ පැහැදිලි වන්නේ සමහර චෙක්පත් කොටි සංවිධානයට නොයැවීම තුළය. කෙසේ හෝ දැන් කොටි සංවිධානයට මුදල් දීමේ කතාවද ඒ මුවාවෙන් ටිරාන් අලස්ලා තමන්ගේ සාක්කුවට රජයේ මුදල් දමාගත් හැටිද අධිකරණයේදී අසාගන්නට පුළුවන්ය. ඒ දුෂණ විරෝධී පෙරමුණ පොලිස් මුලස්ථානයට කළ පැමිණිල්ල අනුව දැන් කොළඹ මහාධිකරණයේ විභාග වන නඩුව හරහාය.
නඩු කටයුත්ත ඉදිරියට යනවිට පසුගියදා අධිකරණයේදී හරි අපූරු දෙයක් හෙළිදරව් විණි. ඒ 2015 පෙබරවාරි 25වැනි දින පොලිස් මූලස්ථානයට මෙම පැමිණිල්ල කරනු ලැබූ, දුෂණ විරෝධී පෙරමුණේ එවක කැඳවුම්කාර මණ්ඩලය නියෝජනය කළ, පසුව එහි උපදේශක තනතුරද සභාපති තනතුරද දැරූ පුද්ගලයන් දෙදෙනෙකු සහ හිමිනමක් තමන් මෙම පැමිණිල්ලට සම්බන්ධ නැති බවට සහ මේ පැමිණිල්ල පිළිබඳව තමන් නොදන්නා බවට විත්ති පාර්ශ්වයේ නීතිවේදීන්ට දිවුරුම් ප‍්‍රකාශ ලබා දී ඇති බවය.
මේ තුන්දෙනා අන් කවුරුත් නොව, එම පෙරමුණේ හිටපු සභාපතිවරයෙකු වන උලපනේ සුමංගල හිමි, මෛත‍්‍රී ගුණරත්න සහ රජිත් කීර්ති තෙන්නකෝන් ය. මෙම තිදෙනාම වෙනුවෙන් අනිද්දා පුවත්පත කැෆේ සංවිධානයේ විධායක අධ්‍යක්ෂවරයා වන රජිත් කීර්ති තෙන්නකෝන්ගෙන් කරුණු විමසූ අතර, ඔහු ප‍්‍රකාශ කළේ මෙම පැමිණිල්ලට තම පිරිසේ දායකත්වයක් නැති බවය. මේ පැමිණිල්ල හුදෙක් ජාතික හෙළ උරුමයේ නිශාන්ත වර්ණසිංහගේ බවය. එහිදී එවක මේ පිළිබඳව මාධ්‍ය හමු තබමින් අදහස් දැක්වූවේ බොරුවටදැයි අප ඇසූ විට, ඔහු පැවසුවේ තමන් මාධ්‍ය හමුවලදී මේ පිළිබඳව ඍජුව අදහස් නොදැක්වුවත් මාධ්‍යවේදීන්ගේ ප‍්‍රශ්න කිරීම් හමුවේ සමහර විට රාඩා ආයතනය ගැන කරුණු පවසන්නට ඇති බවය.
මෙම තත්ත්වය පිළිබඳව දුෂණ විරෝධී පෙරමුණේ උපදේශක සහ එහි කැඳවුම්කාර මණ්ඩලය වෙනුවෙන් මෙම ¥ෂිත ගනුදෙනුව පිළිබඳව පොලීසියට පැමිණිලි කළ නිශාන්ත වර්ණසිංහ මහතාගෙන් කරුණු විමසූ විට, ඔහු ප‍්‍රකාශ කළේ එවක දුෂණ විරෝධී පෙරමුණේ සිටි මේ අය මෙලෙස බොරු ප‍්‍රකාශ කරන්න හේතුව කුමක්දැයි සොයාගැනීම වැදගත් බවය. වර්තමාන ජනාධිපතිවරයා පත්වූ ආසන්න දිනයකදීම රාජගිරිය සෝලිස් ආයතනයේදී මෙම පෙරමුණේ වැඩකටයුතු ආරම්භ කළ බව කියාසිටින ඔහු, වැඩිදුරටත් ප‍්‍රකාශ කරන්නේ පාඨලී චම්පික රණවක, ශිරාල් ලක්තිලක, මෛත‍්‍රී ගුණරත්න, රවි ජයවර්ධන, නන්ද මුරුත්තෙට්ටුවගම සහ තමන් එහි මුල්ම කැඳවුම්කාර මණ්ඩලය නියෝජනය කළ බවය. ඉන්පසු කැඳවුම්කාර මණ්ඩලයේ සමහර පුද්ගලයන් රජයේ ඉහළ තනතුරුවලට පත්වූ පසු හිස්වූ තනතුරු සඳහා උලපනේ සුමංගල, රජිත් කීර්ති තෙන්නකෝන් වැනි පුද්ගලයන් පැමිණි බවය. ඉන්පසුව දුෂණ විරෝධී පෙරමුණ ලෙස පොලිස් මූලස්ථානයට, රහස් පොලීසියට, එෆ්සීඅයිඞී, දුෂණ සහ වංචා විමර්ශන කොමිසම ආදි ආයතනවලට තම පෙරමුණේ නමින් පැමිණිලි 400ක් පමණ ඉදිරිපත් කරැුති බවය. රාඩා ගනුදෙනුව පිළිබඳ පැමිණිල්ල එහි එක පැමිණිල්ලක් පමණක් බව ප‍්‍රකාශ කරන ඔහු තවදුරටත් කියාසිටියේ මේ දිවුරුම් ප‍්‍රකාශවලින් පැහැදිලි වන්නේ ටිරාන් අලස්ගේ මුදල්වල බලය බවය.
මෙම දිවුරුම් ප‍්‍රකාශ පසුගිය මාසයේ පමණ ලබාගත් ඒවා යැයි සිතිය හැකිය. එලෙස බලන විට මුලින්ම නැගෙන ප‍්‍රශ්නය රජිත් කීර්ති තෙන්නකෝන් ආදින් මෙම දිවුරුම් ප‍්‍රකාශ ලබාදීමට මෙතරම් කාලයක් ගත්තේ ඇයි යන්නයි. මෙම සිද්ධියෙන් පැහැදිලි වන අනෙක් කරුණ වන්නේ මෙම නඩුවෙන් ගොඩ යාමට ටිරාන් අලස් උත්සාහ කරමින් සිටින බවයි. ඔහු කොපමණ ප‍්‍රමාණවලින් ඒ සඳහා ආයෝජනය කළත් මෙම නඩුවේදී ඔහුට විරුද්ධව සාක්ෂි ලබාදෙන්නේ ඔහුම ය. මෙය දෛවයේ සරදමකි. ඔහු මේ කූට ගනුදෙනු පිළිබඳව විටින්විට මාධ්‍යයන්ට කළ ප‍්‍රකාශ මෙම නඩුවේදී වීඩියෝ සාක්ෂි ලෙස ඉදිරිපත් වනු ඇත. එම සාක්ෂිත් මකාදැමිය හැකිද? බැරි බව මතක් කළ යුතුය. රජිත් කීර්ති තෙන්නකෝන් මෙම දිවුරුම් ප‍්‍රකාශ දෙන්නට ප‍්‍රථම කල්පනා කළ යුතුව තිබුණේ මෙම පෙරමුණෙන් තමන්ට ඉවත්වන්නට සිදුවූවේ ඇයි කියා ය. දුෂණ විරෝධී බොහෝ දෙනෙකු ද අන්ත දුෂිතයන් බවට මේ නඩුවම ඉදිරියේදී සාක්ෂි දරනු ඇත.
