යාපනයේ චුන්නාක්කම් ප්රදේශයේදී 2016 ඔක්තෝම්බර් 20 වැනිදා රාත්රියේ පොලීසිය විසින් සිදුකරන ලද වෙඩිතැබීමකින් මරණයට පත්වූ විශ්වවිද්යාල සිසුන් දෙදෙනාගෙන් එක් අයෙකු වූ විජයකුමාර් සුලක්ෂන් මියගොස් ඇත්තේ ඔහුගේ පපුව ප්රදේශයට වෙඩි වැදීමෙන් බව ඒ පිළිබඳව සිදුකරන ලද පශ්චාත් මරණ පරීක්ෂණයේදී තහවුරු වී ඇත.
එදින විජයකුමාර් සුලක්ෂන් සමඟ යතුරුපැදියේ ගමන්කළ අනෙක් සිසුවා වූ නඩරාජා කජන් මියගොස් ඇත්තේ පපුව ප්රදේශයට කරනු ලැබූ පහරදීම් හේතුවෙන් බව ඔහු පිළිබඳව සිදුකළ පශ්චාත් මරණ පරීක්ෂණයෙන්ද තහවුරු වී ඇත.
මෙම මරණ පරීක්ෂණ වෛද්ය යූ මයෝරදන් විසින් 2010 සැප්තැම්බර් 21 වැනිදා සිදුකර ඇත.
මෙම සිසුන් දෙදෙනා පොලිස් අණ නොතකා යතුරුපැදිය ධාවනය කිරීමේදී පොලීසිය විසින් වෙඩිතැබූ බවත් එම අවස්ථාවේදී ඔවුන් අධික ලෙස බීමතින් සිටි බවත් සිද්ධිය වූ අවස්ථාවේදී පොලීසිය විසින් මාධ්ය වෙත කරුණු වාර්තා කරනු ලැබීය.
එසේ වුවද මරණ පරීක්ෂණ වාර්තාවෙහි සඳහන් වෙන්නේ මෙම සිසුන් දෙදෙනා බීමත්ව සිට නොමැති බවයි. නඩරාජා සුලක්ෂන්ගේ ආමාශයේ ආහාර ග්රෑම් 750ක් තිබී ඇතත් මත්පැන් දක්නට නොලැබුණු බව මරණ වාර්තාවෙහි සඳහන්ය. නඩරාජා කජන් සිසුවාගේද ආමාශයෙහි මත්පැන් තිබී නොමැත.
නඩරාජා සුලක්ෂන් සිසුවා ඩයලොග් ආයතනය හරහා සෙලින්කෝ ආයතනයෙහි රක්ෂණාවරණයක් ලබාගෙන තිබුණු අතර එම රක්ෂණ මුදල් ලබා නොදුන්නේද සිසුවා බීමත්ව සිටි බව පොලීසිය විසින් ප්රකාශ කර තිබුණු නිසාය.
තොරතුරු දැනගැනීමේ අයිතිය යටතේ ශ්රී ලංකා තරුණ ජනමාධ්යවේදීන්ගේ සංගමයේ හිටපු ලේකම් තරිඳු ජයවර්ධන විසින් ශ්රී ලංකා මානව හිමිකම් කොමිෂන් සභාවෙන් කළ ඉල්ලීමකට අනුව එම මරණ පරීක්ෂණ වාර්තා ලැබී ඇත.
