ඉඳුවර බංඩාර
හිටපු ජනාධිපති මහින්ද රාජපක්‍ෂගේ මස්සිනා වූ (ශිරන්ති රාජපක්‍ෂගේ සොහොයුරා) නිශාන්ත වික‍්‍රමසිංහ ප‍්‍රධානත්වය දැරූ සමයේ ශී‍්‍ර ලංකන් ගුවන් සමාගමේ සිදුවූවායැයි කියනු ලබන ඇදහිය නොහැකි ගනුදෙනු මේ දිනවල මාධ්‍ය ඔස්සේ වාර්තා වෙමින් තිබේ. ඒ ශී‍්‍ර ලංකන් – මිහින් ලංකා ජනාධිපති කොමිසමේ සාක්ෂිවලදී හෙළිදරව් වන කරුණුය.
එහිදී හෙළිදරව් වී ඇති එක් කරුණක් වී ඇත්තේ 2011 සිට 2018 දක්වා කාලය තුළ කුමා ස්ටිකර්ස් පුද්ගලික සමාගමට සහ විහඟ මාකටිං ඇන්ඞ් ඇඞ්වටයිසිං සර්විසස් පුද්ගලික සමාගම්වලට රුපියල් මිලියන 415කට අධික මුදලක් ගෙවා ඇති බවය. ඒ එම සමාගම් විසින් ශී‍්‍ර ලංකන් සමාගමට ලබාදුන් ප‍්‍රචාරක සේවා වෙනුවෙන්ය.
මේ මුළු මුදල මහින්ද රාජපක්‍ෂගේ පාලන කාලයේදී වසරින් වසර වැඩිවී ඇති ආකාරයද මහින්ද රාජපක්‍ෂ බලයෙන් පහවීමෙන් පසු වසරෙන් වසර අඩු වී ඇති ආකාරයද හරි අපූරුය.
2011/2012 වසරේදී එම සමාගම් දෙකට ගෙවා ඇති මුදල දල වශයෙන් රුපියල් මිලියන 17කි.
2012/2013 වර්ෂය සඳහා එම මුදල රුපියල් මිලියන 76කි.
2013 /2014 වර්ෂය සඳහා රුපියල් මිලියන 77කි.
2014 /2015 වර්ෂය සඳහා රුපියල් මිලියන 140කි.
එම උපරිමයෙන් පසු හෙවත් මහින්ද රාජපක්‍ෂ සිහසුනෙන් බැසයෑමෙන් පසු එනම් 2015/2016 වර්ෂයේදී එම මුදල රුපියල් මිලියන 50 දක්වා අඩු වී ඇත.
එය 2016/2017 වර්ෂයේදී රුපියල් මිලියන 25 දක්වාත්, 2017/2018 වර්ෂයේදී රුපියල් මිලියන 2 දක්වාත් අඩු වී ඇත.
එමෙන්ම එම කොමිසමේදී තවදුරටත් හෙළිවී ඇත්තේ ඉහත කී කුමා ස්ටිකර්ස් සමාගම හා විහඟ ඇඞ්වටයිසිං සර්විසස් පුද්ගලික සමාගම යන සමාගම් දෙක පිය පුතු නමට ලියාපදිංචි සමාගම් දෙකක් බවය. එහිදී කුමා ස්ටිකර්ස් හිමිකරු සිදුකර ඇත්තේ ඔහු ලබාගන්නා ශී‍්‍ර ලංකන් සමාගමේ ප‍්‍රචාරක වැඩ සිය පුතුගේ සමාගමට ගිවිසුමක් මගින් පැවරීමය.
ටෙන්ඩර් පටිපාටියෙන් තොරව ශී‍්‍ර ලංකන් සමාගමේ අධ්‍යක්‍ෂ මණ්ලයේ අනුමැතියෙන් හා අනුග‍්‍රහයෙන් මේ ආකාරයට ඇණවුම් ලැබූ කුමා ස්ටිකර්ස් යනු කවුද?
ඒ, ජය ගනීවිදෝ යන සැකය උපරිමයෙන් තිබූ 2005 ජනාධිපතිවරණයේදී ආධාරයට කිසිවකුත් නොසිටි මහින්ද රාජපක්‍ෂට නොමිලේ බාහිර දැන්වීම් පුවරු ප‍්‍රචාරයන් ලබාදුන් පුද්ගලයාය. ඒ පුණ්‍යකර්මයේ ආනිශංසය වශයෙන් ඉන්පසු රාජපක්‍ෂ පාලන යුගයේදී කාට තහනම් වුවත් රටේ ඕනෑම තැනක දැන්වීම් පුවරු දැමීමේ හැකියාව ඔහුට ලැබුණි. විශේෂයෙන්ම මාර්ග සංවර්ධන අධිකාරියට අයත් අධිවේගී මාර්ග ඇතුළු සියලූ මහාමාර්ගවල තනි ඒකාධිකාරි බලය තිබුණේ ඔහුටය. වෙනත් දැන්වීම් ආයතනවලට නොලැබෙන ඉඩකඩ ඔහු වෙනුවෙන් විවර වී තිබුණි. ගෝඨාභය රාජපක්‍ෂගේ පාලනය යටතේ පැවති නාගරික සංවර්ධන අධිකාරිය සතු ඉඩම් හා දේපල සම්බන්ධයෙන්ද එසේම විය.
එම රාජපක්‍ෂ සම්බන්ධය පෙනෙනා ආකාරයට ප‍්‍රදර්ශනය වූයේ පසුගිය 2015 ජනාධිපතිවරණ ප‍්‍රචාරක සමයේය. කොළඹ නගරය හා ඒ අවට පමණක් එම සමයේ මහින්ද රාජපක්‍ෂගේ රුව රැුගත් දැන්වීම් පුවරු හා කටවුට් ලක්‍ෂ ගණනක් කුමා ස්ටිකස් විසින් ප‍්‍රදර්ශනය කරනු ලැබීය. රට වශයෙන් ගත් කල එම ප‍්‍රමාණය අතිවිශාලය. මැතිවරණ නීතිය අනුව එම පුවරු සියල්ල නීති විරෝධි ඒවාය. අනෙක් පැත්තෙන් එම ප‍්‍රචාරයන්ට අදාළව පළාත් පාලන ආයතනවලට හා අනෙකුත් රාජ්‍ය ආයතනවලට ගෙවිය යුතු ගාස්තු ගෙව්වේද නැත.
මහින්ද රාජපක්‍ෂගේ මේ නීතිවිරෝධි ප‍්‍රචාරක සෙල්ලමට එරෙහිව එසමෙහි ශී‍්‍ර ලංකා නීතිඥ සංගමය වෙනුවෙන් එහි සාමාජීකයන් පිරිසක් අභියාචනා අධිකරණයට පෙත්සමක් ගොනුකරනු ලැබූ අතර කැෆේ සංවිධානයද මැතිවරණ කොමසාරිස්වරයාට පැමිණිල්ලක් ඉදිරිපත් කළේය.
මහින්ද රාජපක්‍ෂගේ මස්සිනා වන නිශාන්ත වික‍්‍රමසිංහගෙන් සැලකුම් ලබා ඇත්තේ එහෙව් කුමා ස්ටිකර්ස්ය.
