ආණ්ඩුවේ වෙනත් වැඩ බොහොමයක් මෙන් ම මරණ දඩුුවම යළි පනවන්නට ගත් උත්සාහය ද බැරි වැඩක්සේ අවසන් විය හැකි බව සහතික ය.
ජනාධිපතිවරයා, ඇමති මණ්ඩලය හමුවේ මරණ දඩුුවම ක්‍රියාත්මක කරනවායැයි කියූ අවස්ථාවේ පටන්, ඇමති මණ්ඩලයෙන් පටන් ගෙන මරණ දඩුුවම් ප්‍රේමී රැල්ලක් ලංකාව පුරා හමා ගියේ ය. ජනාධිපති කාර්යාලයේ මාධ්‍ය නිලධාරීහු, මරණ දඩුුවම මේ මොහොතේ ක්‍රියාත්මක කළ යුත්තේ ඇයිදැයි සාධාරණය කරමින් සති අග පුවත්පත්වලට ලිපි ලිව්වෝ ය. දේශපාලකයෝ, තමන් පෞද්ගලිකව මරණ දඩුුවමට අකමැති නමුත්, රට ගැන සිතන විට ඊට කැමති නොවී බැරි ය වැනි විකාර දෙඩූහ. මාධ්‍ය, විශේෂයෙන් සිංහල කතා කරන, ලියන මාධ්‍ය, අඩුවක් නැතිව ම මරණ දඩුුවම කරේ තබා ගෙන ගියහ. සතිඅන්ත ජනප්‍රියතම සිංහල පුවත්පත් කර්තෘවරයකුට අනුව එය ඉක්ම යන මේ පැයට අදාළව මෙරට ජනයාට අසන්නට ලැබුණු ශභාරංචියයි. කොයිදේත් තම යැපුම් මාර්ගය බවට පත්කර ගත් රාජ්‍ය නොවන සංවිධානවල ඊනියා මානව හිතවාදීන් මේ මොහොතේ මානව හිමිකම් ධජය අතට ගෙන හිරිකිතයකින් තොරව පෙරට ඒමට ඉඩ තිබේ. ඒ ප්‍රයත්නය ලත් තැන ම ලොප් කර දැමිය යුතු යැයි තවදුරටත් ලියමින් ඔහු තම බුද්ධියේ සීමාව පැහැදිලි ව ලකුණු කර ගත්තේ ය.
ඒ සියල්ලටමත් වඩා, මග්දලේනාට පළමු ගල ගැසිය යුත්තේ කිසිම වරදක් නොකළෙකියි කියූ යේසුස්ගේ ආගමේ ලංකාවේ කාදිනල්වරයා මරණ දඩුුවම උඩ පැනගෙන අනුමත කළේ ය.
මේ තරම් සාතිශය බහුතරයක් ජනවාරි 8වැනිදා වත්, ජනාධිපති සිරිසේන සමග එක පෙළට සිටගන්නට නැත. ඒ තරම් ජන අනුමැතියක් එල්ලීම සඳහා ලැබිණ.
එහෙත්, ශිෂ්ටත්වයේ මූලධර්ම මත, මානව අයිතිවාසිකම්වල හා මානව ගරුත්වයේ නාමයෙන්, කවර හේතුවක් නිසාවත්, රජයකට පුද්ගලයකුගේ ජීවිතයක් උදුරා ගත නොහැකි බව විශ්වාස කළ, ලියූ කියූ අතළොස්සක් සමාජයේ වූහ. ඉහත කී සතිඅන්ත පුවත්පත් කර්තෘවරයා විසින්, ඊනියා මානව හිතවාදීන් ලෙස හඳුන්වන ලද්දෝ ඔවුහු ය.
ශ්‍රී ලංකා මානව හිමිකම් කොමිසම නිර්භීත ලෙස ජනාධිපතිවරයාගේ තීරණය ප්‍රතිෙක‍ෂප කළේ ය. ඇම්නෙස්ටි ඉන්ටර්නැෂනල් ජනාධිපති සිරිසේනගේ තීරණය දැනගත් වහාම අවුරුදු 40කට පසු මරණ දඩුුවම ක්‍රියාත්මක කිරීමට විරුද්ධ වුණේ, එය ක්‍රියාත්මක නොකළ කාලයේ ලංකාව අත්පත් කර ගෙන සිටි කීර්තිමත් තත්ත්වය යළි අවධාරණය කරමිනි. ඊට පසු යුරෝපා සංගමය ජනාධිපතිවරයාගේ තීරණයට විරෝධය පෑවේය. අලූත් ම ආරංචිය වන්නේ, ජීඑස්පී ප්ලස් සහනය මරණ දඩුුවම ක්‍රියාත්මක කළහොත් අහිමි වන්නට හැකි බවයි. එක්සත් ජනපද ඩොලර මිලියන 350ක ආදායමක් වර්ෂයකට ලැඛෙන ජීඑස්පී ප්ලස් අහිමි කර ගැනීමට තරම් නිර්භීතභාවයක් ජනාධිපති සිරිසේනට නැති බව නම් පැහැදිලි ය.
මේ කොයි ආකාරයක බලපෑමෙන් වුණත්, මරණ දඩුුවම ක්‍රියාත්මක කිරීම වැළකේ නම්, මේ රටේ මානව ගරුත්වය අගයන මිනිසුන්ට හෙවත් ඉහත කී ඊනියා මානව හිතවාදීන්ට සතුටකි.
එහෙත්, මරණ දඩුුවම ක්‍රියාත්මක නොකළ යුත්තේ මේ ජාත්‍යන්තර බලපෑමට යටත් වී නොවේ. මරණ දඩුුවම තිරිසන්, පසුගාමී, ක්‍රෑර, ආපසු හැරවිය නොහැකි දඩුුවමක් වන නිසා ය. එය අද ලෝකයේ පොදු පිළිගැනීමයි. ඒ අදහසට එරෙහිව ගෙනෙන තර්ක වනාහි අප පසුකරගෙන ආ අශිෂ්ට අතීතයට අයත් පිළුණු තර්ක වෙයි. දැන් ලෝකය ඊයේට වඩා ශිෂ්ට ය. ඉදිරිගාමී ය.
මීට පෙර ද රටේ ආන්දෝලනාත්මක ඝාතනයක් වූ කල මරණ දඩුුවම ක්‍රියාත්මක කළ යුතුයැයි සමාජ බලපෑමක් ආ අතර, මේ උදවිය මේ ආකාරයෙන් ම ඒ පෙරහරේ ද ගියෝ ය. වෙනසකට තිබුණේ රාජ්‍ය නායකයා, තමා එය කරමියි ඉදිරිපත් නොවීමයි. ඒ අතින් ජනාධිපති සිරිසේන වෙනස් ය. ඔහු, තමා ම එය කරමියි කියයි. එමගින් තම දැනුම් තේරුම් සීමාව ද ලකුණු කරයි.•
