අන්තිමේදී ඒකාබද්ධ විපක්‍ෂය පැමිණ තිබෙන්නේ තමන්ට ජනාධිපති අපේක්‍ෂකයකු නැති තැනටය. තමන්ට ජනාධිපති අපේක්‍ෂකයකු නැති බව නිල වශයෙන් පිළිගන්නට තරම් ඒකාබද්ධ විපක්‍ෂය පියවර ආපස්සට ගෙන තිබේ.
ගෝඨාභය රාජපක්‍ෂ නියමිත වේලාවට පෙරම පිට්ටනිය මැදට පැමිණ තනියෙන් දුවන්නට පටන්ගත්තේය. ඔහු ඒ කළේ තම වැඩිමහල් සහෝදරයා අනුගමනය කරමිනි. 2009 යුද ජයග‍්‍රහණයෙන් පසුව, 2010 සැප්තැම්බර් මාසයේ 18වැනි ආණ්ඩුක‍්‍රම ව්‍යවස්ථා සංශෝධනය සම්මත කරගත් ජනාධිපති මහින්ද රාජපක්‍ෂ, ඊළඟ ජනාධිපතිවරණයේදීද තමාගේ ජය සහතික බව ඇදහුවේය. ඔහුගේ සමීප නක්‍ෂත‍්‍රකාරයන් ඒ බව අදහන්නට සලස්වා තිබිණ. පැය විසිහතර පුරාම නොනැවතී අතේ තබාගෙන වශී බෝලයක් කරකවමින් (අද ඒ වශී බෝලය මැණික් කටුවේ පළඳින ගෙඩි මාලයක් දක්වා රූපාන්තරණය වී ඇත.) ගුප්ත ශාස්ත‍්‍ර කෙරෙහි තමාගේ අන්ධ භක්තිය ප‍්‍රදර්ශනය කළ මහින්ද රාජපක්‍ෂ මහතා, ඒ නක්‍ෂත‍්‍රකාරයන්ගේ බොරුවලට රැුවටී නියමිත කාලයට පෙර ජනාධිපතිවරණයද කැඳෙව්වේය. අද ගෝඨාභය කරනවාක් මෙන්ම වේලාසනින්ම පිට්ටනියට ආවේය. කෝ මගේ ප‍්‍රතිවාදියායැයි අභියෝග කළේය. රට පුරාම තනි අශ්වයකුගේ ධාවන තරගයක යෙදෙමින්, රාජ්‍ය බලය උපරිම ලෙස වියදම් කරමින්, මහා ප‍්‍රචාරක ව්‍යාපෘතියක නිරත වුණේය. එහෙත් අන්තිමට බලයේ සිටියදී පරාජයට පත්වුණු පළමු ජනාධිපතිවරයා ලෙස අතීතයට එකතු වුණේය.
ගෝඨාභය රාජපක්‍ෂ වගවිභාගයකින් තොරවම, ඒ වරද යළිත් කරමින් සිටියි. ඔහු තමාගේ ශක්තිය උරගා බලමින් සිටිනවා වන්නට පුළුවන. එහෙත්, ශක්තිය උරගා බැලීමද පරණ කාලයෙන් පාඩම් ඉගෙනගනිමින් කළ යුත්තකි. 2015 ජනවාරි 7 වනතුරුත්, මහජනතාව බලමුළු ගැන්වීම අතින් ඉදිරියෙන් සිටියේ මහින්ද රාජපක්‍ෂය. ඔහු යන යන තැන භික්‍ෂූහු රොදබැන්දාහ. වෙනත් ආගමික පූජකවරු රැුස්කෑහ. මහජනතාව අතුරු සිදුරු නැතිව ඔහු දකින රිසියෙන් රොක්වුණහ. සිනමා තරුද, ගායන තරුද ක‍්‍රීඩා තරුද ඈ මෙකී නොකී සියලූ තරුද සිටියේ රාජපක්‍ෂ වේදිකාවේය. ඒ ජනගඟ දුටු ඕනෑම කෙනකුට මහින්ද රාජපක්‍ෂගේ ජයග‍්‍රහණය ගැන සැකයක් නොවීය. එහෙත් ඒ සියල්ලන්ටම වැඩියෙන් නිහඬව සිටි ජනතාව බලවත්ද, සංඛ්‍යාත්මකව වැඩිද විය.
අනෙක් අතට, අද ගෝඨාභය රාජපක්‍ෂ වටා සිටින්නේ එදා මහින්ද රාජපක්‍ෂ වටා සිටි පිරිසමය. සමහර විට, එදා රාජපක්‍ෂ අභ්‍යන්තර කවයට එකතුවන්නට බැරිව සිටි, එහෙත්, රාජපක්‍ෂ හිතවාදීහුය. ආණ්ඩු විරෝධී න්‍යාය පත‍්‍රයක් තිබෙන පුද්ගලික මාධ්‍යවලින් උත්කර්ෂයට නංවා උඩ දැමූවත්, රාජපක්‍ෂ නිකායේ පන්සල්වලට පිංකම් සඳහා කොයිතරම් ආරාධනා ලැබුවත්, අලූතෙන් ගෝඨාභය වෙත රොක්වුණු කිසිවෙක් නැත. වැදගත්ම කාරණය එයයි. මේ සියලූදෙනාගේම උපරිම සංඛ්‍යාව ලක්‍ෂ 58ක් බව 2015 දී දකින්නට හැකිවිය. ඊට පසු කාලයේ ඒ ගණන තවත් අඩුවිය. අදත්, ඒ ගණන වැඩිවී නැති බව පැහැදිලිය.
එහෙත්, දැන් ගෝඨාභයගේ ‘උදෙන්ම පැමිණි කුරුල්ලා’ගේ ව්‍යාපෘතිය යොමුවී තිබෙන්නේ හැම අතින්ම ඔහුගේ අවාසියටය. මරණ තුනක් ළඟ තබාගෙන සිටි මිනිසකු ගැන කියැවෙන පරණ කතාව සිහියට එන්නේ ඒ අනුවය.
ගෝඨාභයගේ දේශපාලන ජීවිතයේ එක් මරණයක් තීන්දු කරනු ඇත්තේ අමෙරිකා එක්සත් ජනපදය විසිනි. දැනටමත් තානාපති අතුල් කේශාප් ඒ බව අඟවා තිබේ. යුද අපරාධ, මානුෂවාදී නීති හා මානව හිමිකම් උල්ලංඝනයන් ගැන චෝදනා ඇතැ’යි කියන ගෝඨාභයට අමෙරිකානු පුරවැසිභාවය ඉවත්කර ගැනීම ඒ තරම් පහසු නොවේයැයි ඔහු කීවේය. එය එසේ වුවහොත්, ගෝඨාභය රාජපක්‍ෂගේ අනාගත දේශපාලන ගමන මුළුමනින්ම හෝ සමහර විට සැලකිය යුතු කාලයකට අඩපණ වනු ඇත. සැලකිය යුතු කාලයකටයැ’යි කිව්වේ, අනාගතයේ රාජපක්‍ෂ ආණ්ඩුවක් පැමිණියහොත්, ආණ්ඩුක‍්‍රම ව්‍යවස්ථාවෙන් ඔහුටත් බැසිල් රාජපක්‍ෂටත් ඇති බාධක ඉවත් කරන්නට ඉඩ ඇති නිසාය.
අමෙරිකාවෙන් එන බාධාව තාක්‍ෂණික එකකි. වඩාත් වැදගත් වන්නේ, ලංකාවේ මහපොළවෙන් ගෝඨාභය රාජපක්‍ෂගේ දේශපාලන අනාගතයට එල්ලවන තර්ජන ය. එක පැත්තකින් ඒකාබද්ධ විපක්‍ෂය තුළින්ම ඔහුට එරෙහි විරෝධය ගොඩනැංවෙමින් පවතියි. එය ක‍්‍රමයෙන් වර්ධනය වන්නකි. මුලින් ගෝඨාභය රාජපක්‍ෂට එරෙහිව ප‍්‍රසිද්ධියේ පෙනීසිටියේ වාසුදේව නානායක්කාර පමණකි. තිස්ස විතාරණ, දිනේෂ් ගුණවර්ධන වැන්නන්ද ඔහුට විරුද්ධ නමුත්, සමාජය ඉදිරියේ දැඩි ලෙස ඒ වෙනුවෙන් පෙනීසිටින්නට දිනේෂ්වත් තිස්සවත් ඉදිරියට ආවේ නැත. එහෙත්, දැන් ශක්තිමත් සහායකයකු ඒ පිලට ලැබී තිබේ. ඒ කුමාර වෙල්ගමය. පසුගිය දින කිහිපයේදී ඔහු කියන දේවලින් පැහැදිලි වන්නේ ගෝඨාභය රාජපක්‍ෂ ගැන බලවත් විරෝධයක් ඔහුට තිබෙන බවය. ඒ සඳහා ඔහු ඉදිරිපත් කරන සමහර තර්ක ඉතාම ශක්තිමත් හා සාධාරණය. හමුදාකාරයකු ජනාධිපති වන රටක රාජ්‍යය විවේචනය කිරීම ?ට ගෙදර ඉන්නට නොහැකි තත්ත්වයක් ඇතිකරන බව ඔහු කියයි. ඔහු ඒ බව කියන්නේ, පරණ රාජපක්‍ෂ ආණ්ඩුවේ අත්දැකීම්ද, තොරතුරුද මත බව නිසැකය. එහිදී වෙන විදියකින් ඔහු කරන්නේ, රාජපක්‍ෂ ආණ්ඩුවේ මර්දන ක‍්‍රියාවලිය ඇත්තක් බවට සහතික කිරීමය. එකල ආණ්ඩුවට එරෙහිව, විශේෂයෙන් ගෝඨාභයට එරෙහිව කියූ ලියූ අයට අත්වුණු ඉරණම ඒ ආණ්ඩුවේ බලවත් කෙනකු හැටියට සිටි වෙල්ගම මහතා හොඳින් දන්නවා ඇත. වාසුදේවගේ විරෝධයද එන්න එන්නම ශක්තිමත් වෙයි. දැන් ඔහු සංයුක්තව. ගෝඨාභය රාජපක්‍ෂ වටා සිටින ධනපති ව්‍යාපාරිකයන් ගැනත්, මිලිටරි නායකයන් ගැනත් කියයි. ඔවුන්ට අනුව අනාගතයේ හැදෙන ගෝඨාභයගේ ආණ්ඩුවක්, මිලිටරිවාදී මෙන්ම වැඩකරන පන්තියේ අයිතිවාසිකම් මර්දනය කරන ආණ්ඩුවක් වන බවට ඔහු අනාවැකි කියයි. ඊට අමතරව ඒකාබද්ධ විපක්‍ෂයේ උපදේශකයකු වන දයාන් ජයතිලකද ගෝඨාභයට එරෙහි විරෝධය යළිත් උත්සන්න කර තිබේ. මේ විදියට දයාන්, වෙල්ගම, වාසුදේව, දිනේෂ් හා තිස්ස විතාරණගේ පිල හෙටානිද්දා තව තවත් ශක්තිමත් වනු ඇතැ’යිද ඊට තවත් සගයන් එකතුවනු ඇතැ’යිද සිතන්නට පුළුවන.
වාසුදේව නානායක්කාර තවත් ඉදිරියට යමින්, රාජපක්‍ෂ පවුලෙන්ම අලූත් අපේක්‍ෂකයා සොයාගෙන තිබේ. චමල් රාජපක්‍ෂය. චමල් ජනාධිපතිවරණයට යෝජනා කිරිම හරහා රාජපක්‍ෂ පවුලේ පැලීමක් සිදුවේදැයි කිවනොහැකි නමුත්, රාජපක්‍ෂ පවුල කිසියම් අපහසුතාවකට ලක්කරන බව නම් නිසැකය. තමාගේ නම වාසුදේව විසින් යෝජනා කරනු ලැබූ විට, චමල් රාජපක්‍ෂ එකහෙළාම එය ප‍්‍රතික්‍ෂෙප කළ බවක් තවමත් දැනගන්නටද නැත.
වෙඬරුවේ උපාලි අනුනායක භික්‍ෂුව මේ ගෝඨාභය විරෝධතාකරුවන්ට ඔසවාගෙන යා හැකි හොඳම රූපකය හඳුන්වා දුන්නේය. හිට්ලර්.
ඊට අමතරව ගෝඨාභය රාජපක්‍ෂ වටා සිටින පරණ හමුදාකාරයෝ කිසිම දැනුමකින් අවබෝධයකින් තොරව දොඩන තමන්ගේ මුඛවලින් තවත් අනතුරක් පාදාදුන්නෝය. ඒ මානව හිමිකම් කොමිසමේ සභාපතිනියට අනාගත තමන්ගේ ආණ්ඩුවකින් දඬුවම් දෙන බව කීමෙනි. ආචාර්ය දීපිකා උඩගම වනාහි ශ‍්‍රී ලංකාවේ මානව හිමිකම් ක්‍ෂෙත‍්‍රයේ මෙන්ම උසස් අධ්‍යාපන ක්‍ෂෙත‍්‍රයේද මහත්වු කීර්තියක් අත්පත්කරගත්, තමාගේ මුළු ජීවිතයෙන්ම මානව හිමිකම් රැුකගැනීම සඳහා කැපවූ තැනැත්තියකි. ඇය වැන්නියක ද්‍රෝහී කාන්තාවක ලෙස නම්කිරීම මේ පරණ හමුදාකාරයන්ගේ මොළයේ තරම පෙන්වන කැඩපතක් වන අතර ඔවුන් තුළ තවමත් තිබෙන හමුදා ඝාතක මානසිකත්වයද පිළිබිඹු කරන්නක් වෙයි. ආචාර්ය උඩගමට එල්ල කළ ප‍්‍රහාරය ගෝඨාභය රාජපක්‍ෂ කෙරෙහි කෙතරම් විනාශකාරී ලෙස ආපසු පත්තුවුණේද යත්, එක පැත්තකින් වාසුදේව නානායක්කාරට පවා ආචාර්ය උඩගම වෙනුවෙන් පෙනීසිටිමින් පරණ හමුදාකාරයන්ටත්, එනයින් ගෝඨාභය රාජපක්‍ෂටත් ප‍්‍රහාර එල්ල කරන්නට පදනමක් දැමුවේය. අනෙක් අතින්, 2015 ජනවාරියෙන් පසු, විවිධාකාර හේතු නිසා වෙන්ව සිටි මේ ආණ්ඩුව බලයට පත්කරන්නට කිසියම් අන්දමකින් දායකවුණු ශාස්ත‍්‍රාලයීය බුද්ධිමය ප‍්‍රජාව එකට එකතු කරන්නට එක හේතුවක් ඇතිකරන්නටද සමත් විය.
ගෝඨාභයගේ ඉක්මන්කාරකමෙන් ඇතිවුණු තුන්වැනි හානිය නම්, එලෙස 2015දී එකට සිට පසුගිය කාලයේ යම් යම් හේතු නිසා විසිර ගොස් සිටි පොදු ජනතා බලවේගවලට යළිත් එකතුවන්නට හේතුවක් පාදාදීමය. ජනවාරි 8 මහින්ද රාජපක්‍ෂ පරාජය ලබන්නට එක් බලවත් හේතුවක් වුණේ ගෝඨාභය රාජපක්‍ෂය. ඔහු මහින්ද රාජපක්‍ෂගේ දේශපාලන මිනීවළ කපන ප‍්‍රබල චරිතයක් හැටියට එදා දකින්නට ලැබුණි. ආණ්ඩුවේ මැති ඇමතිවරුන් මෙන්ම සියලූ රාජ්‍ය නිලධාරීහුද මේ බලයෙන් හිස උදුම්මාගත් අහංකාර නිලධාරියාට බලය පක්‍ෂපාත වූවෝය. නොවී බැරි විය. නීතිය ඔහු විය. විධානයද ඔහු විය. මර්දනයද ඔහු විය. සරල උදාහරණයකින් කිවහොත්, ඔහු ගමනක් යන විට මහමගදී වාහන තදබදයකට අසුවුවහොත්, ඒ මාර්ගයේ දෙපස රථවාහන නවතා තැබීම එදින සිට තහනම් විය. ඒ ගෝඨාභයගේ නියමය පරිදිය. අද කුමන හේතු මත විසිර ගොස් සිටියත්, ජනවාරි 8 දේශපාලන වෙනසට දායකවුණු පුද්ගල හා සමාජ බලවේග, ගෝඨාභය රාජපක්‍ෂට එරෙහිව නම් එකම තැනක බලමුළු ගැන්වෙන බව සිතන්නට පුළුවන. ඒ බලවේග දැන් එක තැනක නැහැ නොවේදැයි විමසන්නට කිසිවකුට හැකි නමුත්, මනුවර්ණ සිතන්නේ, ඔවුන් එකට සිටිනවාදැයි තීරණය කරන්නට තවමත් වේලාසන වැඩි බවය. 2015 ජනවාරි වන විට එකතු වුණේ ඊට පෙර දීර්ඝ කාලයක් එකට සිටි පිරිසක් නොවේ. ඒ එකතුව සිදුවුණේ, ඒ මොහොතේ තිබුණු දේශපාලන ගතිකයන් මතය. ඉදිරියේදීද ඒ හා සමාන ගතිකයන් මතුවන්නට හොඳින්ම ඉඩ තිබේ.
යම් හෙයකින් ඉදිරියේදී එක පැත්තක සිටින්නේ ගෝඨාභය රාජපක්‍ෂ නම්, ඊට එරෙහිව අනෙක් සියලූ බලවේග, ලක්‍ෂ හැට දෙකක්ම නොවුණත්, එකතු වන්නට තිබෙන ඉඩ තවමත් නොසලකා සිටිය නොහැකිය.
මේ සියල්ලටම වඩා ගෝඨාභයගේ සිහිනය බොඳ කරනු ඇත්තේ 20වැනි සංශෝධනය විසින්ය. යම් හෙයකින් දැන් හොරගල් අහුලමින් සිටින සිරිසේන-වික‍්‍රමසිංහ දෙපාර්ශ්වය, 20වැනි සංශෝධනයට තම සහාය ලබාදී විධායක ජනාධිපති ධුරය අහෝසි කරන්නට එකඟවුණහොත්, ගෝඨාභයගේ රාජ්‍ය නායක සිහිනය බිඳවැටෙයි. 20න් පසු එන පාර්ලිමේන්තු මැතිවරණයකදී තරුව වන්නේ මහින්ද රාජපක්‍ෂ මිස ගෝඨාභය නොවේ. ‘මම බලයට ආවාම ගෝඨාභය වැඩ කරනවායැ’යි මහින්ද රාජපක්‍ෂ ඊයේ පෙරේදා පන්සලකදී කිව්වේ ඒ ඇත්තයි. එවිට ගෝඨාභයට සිදුවන්නේ නැවතත් සදාකාලික ආරක්‍ෂක ලේකම් හෝ සමහර විට ආරක්‍ෂක ඇමති හෝ වන්නට මිස අඩු ගණනේ අගමැති වන්නටවත් නොවේ. යළිත් මහින්ද රාජපක්‍ෂට බලය ලැබුණොත්, ඒ බලය අවසන් වන්නේ නාමල් රාජපක්‍ෂගේ පා අසලින් මිස ගෝඨාභය හෝ බැසිල් හෝ චමල් රාජපක්‍ෂ අසලින් නොවන බවද සිහිතබාගැනීම වැදගත්ය. ඒ නිසා මේ දවස්වල මාධ්‍යවල ඉතාම සුහද එහෙත් අතිශය ව්‍යාජ සිනාවක් මවාගෙන පෙනීසිටින ගෝඨාභය, ‘මේ විදියටම’ අතීතයට එකතුවන්නට තිබෙන ඉඩ වැඩිය.
