දේශපාලනික සහ ජනවාර්ගික ආන්දෝලනයත්, ලස්සන ජනාධිපතිවරියක් ගැන කතාවත් විසිකළේ කුණුබක්කියට. අකුරු කරන්නට සූදානම් වුණේ ලෝක කුසලාන අවසාන තරගයේ මතකයන්. ඉහත කී කාරණා අත්හරිද්දී කුසලානයේ ලස්සනම කොටස් මඟහරිනවායැයි කෙනෙක්ට කිව හැකියි. ඒත් ක‍්‍රීඩාවේ ලස්සන තියෙන්නෙ ඒ සියල්ලට පිටින්. ක‍්‍රීඩාශිලීත්වය සහ උද්වේගී අවස්ථා මත. දක්ෂතාව මෙන්ම ක‍්‍රීඩාවේදී අතිශය සාමාන්‍ය කාරණයක් වන ‘අත්වැරදීම්’ මත. රසය ඇත්තේ එතැන. කුතුහලය ඇත්තේ එතැන. බිය ඇත්තේ එතැන. ජයග‍්‍රාහී සතුට ඇත්තේ එතැන. ලෝකයේ රටවල් දෙසීය ගණනක් අතරින් අවසානයට තේරී පත්විය හැක්කේ විශිෂ්ටයන්ටම පමණයි. ඒ විශිෂ්ටයන් අතින්ද අන්තිම මොහොතේ සිදුවන අත්වැරදීම් පේ‍්‍රක්ෂකයා මවිතයට පත් කරවනවා. එදිරිවාදියා උද්දාමයට පත් කරවනවා. එවැනි අවස්ථාද ක‍්‍රීඩාව සුන්දර කරනවා. ඒ නිසායි ක‍්‍රිකට් රසිකයන් වන ලංකාවේ අපට ලංකාවේ පැවති විස්සයි විස්ස ලෝක කුසලාන අවසාන තරගයේදී බටහිර ඉන්දිය කොදෙව්වන්ගේ ලකුණු 130ක් හඹාගිය ලංකාවේ ලොකුම බලාපොරොත්තුව වූ මහේල ජයවර්ධනට මඟහැරුණු රිවර්ස් ස්වීප් පහර කිසිදා අමතක නොවෙන්නේ.
ක‍්‍රීඩාවේ වත් ක‍්‍රීඩාව නොදකින අයට විෂය වූ ආන්දෝලනාත්මක රසකතා ටික පැත්තකින් තැබුවත් ෆිෆා ෆයිනල් එකක් කියන්නෙ ආන්දෝලනයක්. ඒ ආන්දෝලනය හරිම රසවත්. ක‍්‍රීඩාව ගැනත්, ජයපරාජය ගැනත්, කිසිදා කලාවෙන් මැවිය නොහැකි ක‍්‍රීඩාවේ අසීමිත සුන්දරත්වය ගැනත් ඒ ආන්දෝලනය පාඩම් උගන්වනවා. මේ ලියැවෙන්නේ ලෝක කුසලාන මතකයන්ගෙන් මේ මොහොතට ගැළපෙන කතා කිහිපයක්.
අත්වැරදීම්
මෙවර අවසාන තරගයත් ආන්දෝලනයක්. ප‍්‍රංශයේ පුවරුවට එක්වූ පළවැනි ගෝල දෙකම අත්වැරදීම්. ක්‍රොඒෂියාවේ දෙවැනි ගෝලයත් අත්වැරදීමක්.
මෙවර කුසලානය ඉතිහාසයේ වැඩිම ඕන් ගෝල් ගණනක් වාර්තා කළ තරගාවලිය. මෙවර අවසාන තරගයේදී තමයි ප‍්‍රථම වතාවට අවසාන තරගයකදී ඕන් ගෝලයක් වාර්තා කළේ. ඒ අවාසනාවට මුහුණදුන් වාසනාවන්තයා මැන්ඞ්සුකික්. ඇත්තෙන්ම ගෝලය දෙසට පැමිණි පහරක් හිසින් වළක්වන්නට උත්සාහ කරද්දී බෝලය ගෝලයට එල්ලවීමකුයි සිදුවුණේ. එහෙත් එය පළවැනි ගෝලය ලෙස වාර්තා වුණා. අත්වැරදීම නිවැරදි කළ නොහැක්කක් වුණා.
මොහොතක් යද්දී ක්‍රොඒෂියාවේ ඉවාන් පෙරිසික් ප‍්‍රංශ ගෝලයට අතිවිශිෂ්ට ප‍්‍රහාරයක් එල්ලකළා. අර අත්වැරදීම නොවුණා නම් ක්‍රොඒෂියාව ඉදිරියෙන්. පහර එල්ලවුණේ පැනල්ටි සීමාවට මඳක් එපිටින් සිටිමින්. ක්‍රොඒෂියන් සහ ප‍්‍රංශ ක‍්‍රීඩකයන් අතරින් මාර්ගය තෝරා බේරාගනිමින් බෝලය ගෝලය කරා ගිය අපූරුව වචනවලින් ලියා තැබීම අසීරුයි. එය තරගයේ සුන්දරම ගෝලය යැයි හැඳින්විය හැකියි. එය නම් කිසිවෙකුගේ අත්වැරදීමක් නෙවෙයි.
එහෙත් ඉන්පසුව ක්‍රොඒෂියාව දෙවැනි වතාවටත් වරද්දාගත්තා. ඒ ෆැනල්ටි සීමාව තුළ ක්‍රොඒෂියන් ක‍්‍රීඩකයෙකුගේ අතෙහි පන්දුව වැදී හෑන්ඞ් බෝල් අවස්ථාවක් ලැබීම නිසායි. ඒ ගෝලය ක්‍රොඒෂියාවට අවාසනාව ගෙනාවා. අසීරුවෙන් ඉදිරියට යමින් සිටි ක්‍රොඒෂියාවට නැවතත් මුණගැසුණේ ප‍්‍රංශයේ වර්ණවත් ක‍්‍රීඩකයා වූ පොග්බාගේ තියුණු ප‍්‍රහාරය. ප‍්‍රංශයේ ග‍්‍රීස්මන් සිටියේ පැනල්ටි සීමාව තුළ. පොග්බා සිටියේ සීමාවට මඳක් එළියෙන්. සීමාව තුළ සිට ග‍්‍රීස්මන් පොග්බාට පන්දුව දෙනවා. පොග්බා දකුණෙන් එල්ලකරන ප‍්‍රහාරය ක්‍රොඒෂියන් පසුපෙළින් නවත්වනවා. එහෙත් දෙවැනි ප‍්‍රහාරය පොග්බා වම් පාදයෙන් එල්ල කරන්නේ මගේ පාද දෙකම ශක්තිමත් යැයි කියාපාන්නාක් මෙන්. පළමු ප‍්‍රහාරය එල්ලවූ විගසම එල්ලවෙන දෙවැනි ප‍්‍රහාරයට සූදානම් වීමේ හැකියාවක් ක්‍රොඒෂියන් ගෝල රකින්නාට හෝ පසුපෙළට ලැබෙන්නේ නැහැ. පන්දුව ගෝලයට යනවා.
ඉන්පසුව ප‍්‍රංශයෙහි අනාගතයේ ගෝලය වාර්තා වුණා. දහනව හැවිරිදි කිලියන් ම්බාප්පේ ගෝලයක් වාර්තා කළා. එය ඒ මහා ශ්‍රේෂ්ඨ පේලේගෙන් පසුව ලෝක කුසලාන අවසාන තරගයකදී ගෝලයක් වාර්තා කළ එකම දහනව හැවිරිදි ක‍්‍රීඩකයායි.
අවසාන ගෝලය අහම්බයක්. එයත් අත්වැරදීමේ ගෝලයක්. තරගයේ තෙවැනි අත්වැරදීම් ගෝලය. ප‍්‍රංශයේ ගෝල රකින්නා ගෝල රකින්නෙක් නොකළ යුතු දෙයක් කරමින් ප‍්‍රංශ ක‍්‍රීඩකයාට වෙට්ටුවක් දමා බෝලය පිටිය තුළට කික් කිරීමට උත්සාහ ගන්නේ පැනල්ටි සීමාව තුළ හිඳිමින්. වෙට්ටුවෙන් බෝලය රැුකගන්නා ක්‍රොඒෂියාවේ මැන්ඞ්සුකික් ගෝලයට පන්දුව එල්ල කරනවා. එය මැන්ඞ්සුකික් කළ වරද නිවැරදි කිරීමක්ම නොවුණේ ඒ වෙද්දි ප‍්‍රංශය ගෝල හතරක් සහ ක්‍රොඒෂියාව ගෝල දෙකක් පමණක් ලෙස අසීරු තැනක සිටි නිසා.
පාදයට වැරදීම
අත්වැරදීම් සහ මඟහැරීම් ක‍්‍රීඩාවේදී සුපුරුදුයි. පසුගි ය ලෝක කුසලාන දෙකේම තීරණය වෙනස් වුණේ එවැනි අතටම ආ අවස්ථා වැරදීම නිසා. ඉන් පළමුවන්න 2010 දකුණු අප‍්‍රිකාවේ දී නෙදර්ලන්තය අවසානයේදී සැබෑ කරගනිතැයි සිතූ සිහිනය අහිමි කරගැනීමයි. නෙදර්ලන්තය අවසාන තරගයට පැමිණියේ බ‍්‍රසීලයත් පරාජයට පත් කරමින්. නෙදර්ලන්තය ඒ වෙද්දී තමන් තරග කළ අවසාන තරග විසිපහකට වැඩි ප‍්‍රමාණයක් එකදිගට අපරාජිතව සිටියා. මේ තරගය තෙක්ම අර්ජෙන් රොබ්බෙන්, වැන් පර්සි සහ ෂ්නයිඩර් ප‍්‍රමුඛ නෙදර්ලන්ත පිල උපරිමය පෙන්වා සිටියා. ක‍්‍රිකට්වල දකුණු අප‍්‍රිකානුවන් මෙන් දක්ෂම පිලක් ඉදිරිපත් කොට කුසලානය පෙනී පෙනී අහිමි කරගැනීමේ පුරුද්දක් නෙදර්ලන්තයටත් තිබුණා. ඒ බිය, පීඩනය නෙදර්ලන්ත පිලට එදිනත් බලපෑවා.
රොබ්බෙන්ගේ විශ්වාසදායක දෙපාවල අග්ගිස්සෙන් ඉතාම පහසු ගෝල එකක් නොව දෙකක්ම අහිමි වීම ඕලන්ද හදවත් ගිනිතැබූ අත්දැකීමක්. තරගයට හිමිව තිබුණු විනාඩි අනූව මැද්දෑවේ දෙවතාවක්ම නෙදර්ලන්තයේ සිටි අසමසම ක‍්‍රීඩකයන් දෙපල ගෝලය පෙනි පෙනී ඉතාම විශ්වාසදායක ලෙස වාර්තා කළ හැකිව තිබුණු ගෝල් දෙකක් අහිමි කරගත්තා.
පළමු අවස්ථාවේදී කණ්ඩායම් දෙකම පිටිය මැද සිටි මොහොතක නෙදර්ලන්තයේ වෙස්ලි ෂ්නයිඩර් විසින් පන්දුව එකවරම ස්පාඤ්ඤයේ ගෝලය දෙසට යොමු කළා. ස්පාඤ්ඤ පසුපෙළ මැදින් රිංගා ගිය නෙදර්ලන්තයේ විශ්වාසදායකම ප‍්‍රහාරකයා වූ රොබ්බෙන් බෝලය පාලනයට ගත්තා. රොබ්බෙන් සහ ගෝලය අතර හිටියේ ස්පාඤ්ඤයේ අතිවිශිෂ්ට ගෝල රකින්නා කැෂියස් පමණයි. කැෂියස්ටත් බෝලය රැකගැනීම අසීරු වුණා. කෙතරම් දක්ෂ වුව ගෝල රකින්නෙක්ට හොඳ ප‍්‍රහාරකයෙකු ඉදිරියේ තනිව මුහුණදිය නොහැකියි. එහෙත් රොබ්බෙන්ට ගෝලය මඟහැරුණා. මෙයම යළිත් වතාවක් සිදුවුණා. රොබ්බෙන්ට බෝලය සමග නැවතත් එවැනිම අවස්ථාවක් ලැබුණා. එයත් මඟහැරුණා. විනාඩි අනූව අවසන්ව අතිරේක කාලයක් ලබාදුන්නා. ස්පාඤ්ඤයේ ඇන්ඩ‍්‍රසේ ඉනියෙස්ටා දකුණු පාදයෙන් වාර්තා කළ ජයග‍්‍රාහී ගෝලය ලැබුවේ අතිරේක කාලයේදී. ඒ මොහොත දැන් වුව මතකයෙන් ලිවිය හැකියි. ඒ 116 වැනි මිනිත්තුවේදී.
තරුවද? කණ්ඩායමද?
ඉන්පසු වතාවේ ලෝක කුසලානය බ‍්‍රසීලයේ පැවැත්වුණා. බැලූ බැල්මටම හොඳම කණ්ඩායම රැුගෙන බ‍්‍රසීලය පැමිණියා. එවර සිටි තරු කණ්ඩායම් දෙක වුණේ ජර්මනිය, බ‍්‍රසීලය, ස්පාඤ්ඤය, ආජන්ටිනාව, නෙදර්ලන්තය සහ පෘතුගාලය. වාසි තිබුණේ නිවෙස් ක‍්‍රීඩකයන්ට. බ‍්‍රසීලයට.
නෙයිමාර් ඛේදවාචකය සමඟ බ‍්‍රසීලයේ හීන බොඳ කරමින් ජර්මනිය අවසාන තරගයට ආවා. පැහැදිලිවම තමන් හොඳම කණ්ඩායම බව ජර්මනිය ඒ වෙද්දී පෙන්වා තිබුණා. එහෙත් අනෙක් පසින් නෙදර්ලන්තය පරාජය කරමින් පැමිණි ආජන්ටිනාව වෙත සියල්ලන්ගේ අවධානය යොමුව තිබුණා. ඒ හොඳම කණ්ඩායම නොවුණත් හොඳම ක‍්‍රීඩකයා ආජන්ටිනාව සතු වූ නිසා. මෙසී ඒ වෙද්දි පාපන්දු ලෝකයේ තරුව වී සිටියා. හොඳම ක‍්‍රීඩකයා සහ හොඳම කණ්ඩායම අතර තරඟය ලෙස ජර්මනිය සහ ආජන්ටිනාව අතර තරගය සැලකුණා. පේලේ, මැරඩෝනාගේ යුගයේ තිබුණු ක‍්‍රීඩා රටාව හොඳම තරුව සැලකිල්ලට ගත හැකි වුණත් මේ යුගයේදී තරුව වෙනුවට කණ්ඩායමට තැන ලැබෙන ක‍්‍රීඩා රටාවක් තිබුණා. ලංකාවේ පාපන්දු පුහුණුකරුවෙක් එදා තිබුණු රටාව සහ දැන් ඇති රටාව විස්තර කළේ මෙහෙම. ‘පේලේ, මැරඩෝනලා වෙට්ටු දාගෙන තනියෙන් බෝලෙ අරගෙන ගිහින් හුළඟටත් වෙට්ටු දාලා ගෝල් එක ඇතුළට බෝලෙ දැම්මා. දැන් තියෙන්නේ එහෙම නෙවෙයි. දැන් පසුපෙළ ශක්තිමත්. ටීම් එකම පාස් කරගන්න ඕනැ. එකයි, දෙකයි, ඩුම් වෙන්න ඕනෑ. බෝලෙ ගත්තා, කකුල ඉස්සරහට දාගත්තා, ඉඩ තියෙන තැනක් බලලා පාස් කළා.’
ඉතින් එහෙම පසුබිමක වෙට්ටු දමන්නට ඉඩ නොදී, මෙසීට එරෙහිව ලොව හොඳම ආරක්ෂක දැල ජර්මනියෙන් එලූ‍ණා. එහෙත් එක දශමයකට ඒ දැල බරපතළ ලෙස ලිහිල් වුණා. එක් මොහොතක පැනල්ටි කොටුව තුළ ගෝලයට වම් පසින් මෙසී ස්ථානගත වුණා. ඒ භයානක ප‍්‍රහාරකයා ඉදිරිපිට අසරණව ගෝල රකින්නා සිටියා. එහෙත් ඒ මොහොතේ එල්ල වූ පහර මෙසීගෙන් කිසිවෙකු බලාපොරොත්තු නොවූ ලෙස ගෝලයෙන් පිටට ගමන් කළා. තරුවට තමාගේ මොහොත රැුකගත නොහැකි වුණා. ඒ මොහොත ක‍්‍රීඩා රසිකයන්ට කිසිදා අමතක නොවනු ඇති. අවස්ථාව ලද අනෙක් ක‍්‍රීඩකයා ගොන්සාලෝ හිග්වේන්. එක් ගෝලයක් සඳහා හිග්වේන්ට ලද පහසු අවස්ථාවක් ගෝලයෙන් පිටට ඔහු එල්ල කළා. දෙවැනි වතාවේ ඕෆ්සයිඞ් උගුලට හසුවූ නිසා හිග්වේන් ලබාගත් ගෝලයක් අවලංගු කෙරුණා.
මිරොස්ලාව් ක්ලෝස්. ලෝක කුසලාන ඉතිහාසයේ වැඩිම ගෝල් වාර්තා කළ ක‍්‍රීඩකයා. ජර්මනියේ විශ්වාසවන්තම දැවැන්තයා. එවර අවසන් තරගයේදී ගෝලයක් වාර්තා කිරීමට අසමත්ව සිටියා. දෙවැනි භාගයේදී ඔහු පිටියෙන් පිටතට පැමිණෙන්නේ මාරියෝ ගොට්සේට අවස්ථාව ලබාදෙමින්. මේ තරුණයාත් පිටිය මැද රසවත් ගෝලයක් වාර්තා කරනවා. ඒ ජර්මනියේ ජය එක ගෝලයකින් තහවුරු කරමින්.
අනූඅටෙන් සෙවණැලි
ඩිඩියර් ඩෙෂැම්ප්ස්. මෙවර ප‍්‍රංශ කණ්ඩායමේ කළමනාකරු. මෙවර අවසාන තරගය අවසානයේදී ප‍්‍රංශ කණ්ඩායම එක්ව උඩ දමන්නේ ඔහුව. අනූඅටේ ලෝක කුසලානය ප‍්‍රංශයට ගෙනා කණ්ඩායමේ නායකයා ඔහු.
අනූඅටේ ලෝක කුසලානයෙන් මෙවර ලෝක කුසලානයට වැටුණු එකම සෙවණැල්ල ප‍්‍රංශය විතරක් නෙවෙයි. ක්‍රොඒෂියාව සහ ක්‍රොඒෂියාවේ අතිදක්ෂ ක‍්‍රීඩක ඩාවෝර් සුකෙර්ද අනූඅටේ ලෝක කුසලානයේදී කතාබහට ලක්වුණා. අවසන් පූර්ව තරගයේදී අනූඅටේදී ගෝල්ඩන් බූට් එක හෙවත් වැඩිම ගෝල ප‍්‍රමාණයක් ලබාගත් ක‍්‍රීඩකයාට ලැබුණු සම්මානය ලැබුවේ සුකෙර්. එවරත් සියල්ලන් විස්මයට පත්කරමින් ක්‍රොඒෂියාව ලෝක කුසලානය පෙනෙන මානයට පැමිණියා. එවරත් ක්‍රොඒෂියාවේ සිහින බොඳ කළේ මෙන්න මේ ප‍්‍රංශයමයි.
පාපන්දු තරගයක් කියන්නේ කතාවක්. අවසන් පූර්ව තරගය ලිලියන් තුරාම් නම් ප‍්‍රංශ වීරයාගේ කතාව. අවසන් පූර්ව වටයේදී ක්‍රොඒෂියාව සහ ප‍්‍රංශය අතර තරගය පැවතුණා. පළවැනි ගෝලය සුකෙර් වාර්තා කළේ ක්‍රොඒෂියාවට ජය සලකුණු පෙන්වමින්. සුකෙර් බෝලය ලබද්දි ඔහු ඕෆ්සයිඞ් වරදට හසු නොවුණේ ප‍්‍රංශ පිලේ ලිලියන් තුරාම් එහා කෙළවරේ සුකර්ට පසුපසින් සිටි නිසා. එය තුරාම් කළ වරදක්. බහුතරය සුද්දන් වූ මේ පේ‍්‍රක්ෂකයන් ඒ මොහොතේ තුරාම් සමඟ කේන්ති ගත්තා. ලෝක කුසලානයේ එතෙක් තරගවල තුරාම් කළ දෙයක් නෑ. ගෝලයක් ගෙන තිබුණේත් නැහැ. ඒ නිසා ඒ මොහොතේදී ඔහු ප‍්‍රංශයට ගෝලයක් අහිමි කළ නිකමෙක්. (ඇතැම් ජාතිවාදීන්ට අනුව කළු නිකමෙක්. එදා ෆෙස්බුක් තිබුණා නම් තුරාම්ගේ මව් ගුණ වැයෙමින්ට පෝස්ට් වැටෙන්න ඉඩ තිබුණා.) එහෙත් ඒ කේන්තිය ටික මොහොතක සීමා කළ තුරාම් ඒ දිව්‍යමය විස්මයජනක හැඩය පාපන්දු පිටියේ මැව්වා. පැනල්ටි සීමාවේදී දකුණු කකුලෙන් එල්ලකළ චිප් කිරීමක් ගෝලය ඇතුළට යොමු කරමින් තුරාම් සියල්ලන්ට පිළිතුරු දුන්නා. ඔහුම ලද දෙවැනි ගෝලය අතිඅනර්ඝයි. සම්පූර්ණ ගෞරවය තුරාම්ට හිමියි. පැනල්ටි සීමාවේ දකුණුපස ඉහළ කෙළවරේදී ක්‍රොඒෂියානු පසුපෙළ ක‍්‍රීඩකයාගෙන් බලහත්කාරයෙන් මෙන් ගත් බෝලය දකුණු කකුලෙන් ගෝලයට එල්ලකළේ දෝලනය කරවමින්. (තුරාම් තමයි ප‍්‍රංශය වෙනුවෙන් වැඩිම තරග ගණනක් නියෝජනය කළ පාපන්දු ක‍්‍රීඩකයා.)
එදා බ‍්‍රසීලය අවසාන තරගයට ආවේ කණ්ඩායම් රැුසක් මරා දැමීමකින් පසුව. බ‍්‍රසීලය හිටපු ශූරයන්. එමෙන්ම ඔවුන් සමග සිටියා මෑත යුගයේ අතිදැවැන්තයා. රොනාල්ඩෝ. ඒ කණ්ඩායම එතැනින් නැවතුණේ නැහැ. රොබටෝ කාලෝස්, රිවාල්ඩෝ, ගියෝවානි වැනි තවත් දැවැන්ත නම්වලින් පිරී තිබුණා. එහෙත් අවසාන තරගයේදී සුපුරුදු රොනාල්ඩෝ හිටියේ නැහැ. ඔහු අසනීපයකට මුහුණදී තිබුණා. එහෙත් ඔහු තරගයට සහභාගි වුණා. ඒ පසුබිම් කතා කෙසේ වුවත් ප‍්‍රංශයේ පසුපෙළ අතිශය ශක්තිමත් ලෙස රොනාල්ඩෝව ආවරණය කළ බව කිසිදා අමතක කළ නොහැකියි. අවසානයේදී තරුණ සිඩෑන් රොනාල්ඩෝගේ සමීපයේම සිටිමින් අතිවිශිෂ්ට ගෝලයක් වාර්තා කරන්නේ ඉහළින් පැමිණි කෝනර් පහරක් හිසින් ගෝලයට යොමු කරමින්. එතැනින් පසුව තවත් ගෝල දෙකක් ප‍්‍රංශය වාර්තා කරමින් කුසලානය ලබනවා.
මෙවැනි අමතක නොවන මතකයන් රැුසක් වසර හතරකට වතාවක් පැමිණෙන ලොව දැවැන්තම ක‍්‍රීඩා සැණකෙලියේදී යළි යළිත් ලියැවෙන්නට නියමිතයි. මෙවර මතකයන් දැනටමත් ලියැවී හමාරයි. දැනට විරාමයකට කාලයයි.
