දැන් සියලූ දෙනාම එක්වී විජයකලා මහේෂ්වරන් රාජ්‍ය ඇමතිවරියට ගල් ගසා අහවරය. දේශපාලන නිරීක්‍ෂකයකු මනුවර්ණ සමග කීවේ, ‘පාර්ලිමේන්තුවේ 224ම එක පැත්තක් ගෙන විජයකලාට ගල් ගැසූ බව’ය.
විජයකලා මහේෂ්වරන් මහත්මිය ලංකාවේ නීතිය අනුව නම් වරදක් කර තිබෙන බව ඔවුහු කියති. ඒ රටේ නීතියෙන් තහනම් සංවිධානයක් වන එල්ටීටීඊය යළි පණගැන්විය යුතුයැයි ප‍්‍රසිද්ධියේ කීමය. යාපනයේ වීරසිංහම් ශාලාවේදී ඇමති වජිර අබේවර්ධනද සහභාගිවී සිටි රැස්වීමකදී ඇය ඒ බව ප‍්‍රසිද්ධියේ කී නිසා සියල්ලෝම ඇය හා උරණව මේ දිනවල ඇය දේශපාලන වශයෙන් ඝාතනයේ යෙදෙති. තව පියවර තව ඉස්සරහටය.
මහේෂ්වරන් මහත්මිය ඒ ප‍්‍රකාශය කළේ, පසුගි ය දාක සිදුවුණු කුඩා දැරියකගේ ඝාතනය ගැන ආවේගයෙන්, වේදනාවෙන් විය හැකිය. එල්ටීටීඊය තිබුණා නම් මෙහෙම වෙන්නට ඉඩක් නැහැයැයි ඇය කියන කතාව විවේචනයට බඳුන් වුණත්, 88-89 කාලයේ දේශපේ‍්‍රමී ජනතා ව්‍යාපාරය බලවත්ව තිබුණු කාලයේදී, දකුණේ සිංහල ජනතාවද මෙවැනිම අදහසක සිටි බව අමතක නොකළ යුතුය. දේශපේ‍්‍රමී ජනතා ව්‍යාපාරය නිසා, ‘කසිප්පු පෙරන්න ලැබෙන්නේ නැහැ, ස්ත‍්‍රී දුෂණවලට ඉඩක් නැහැ. ගෑනු ළමයින්ට බයක් නැතිව පාරේ බැහැලා යන්න පුළුවන්’ වැනි කතා ඒ කාලයේ අසන්නට ලැබිණි. කතාව ඇත්ත වන්නටත් පුළුවන. ලෝකයේ හැම රටකම ගරිල්ලා ව්‍යාපාර ජනතාව නමැති ජලයේ නිරුපද්‍රිතව සිටීමට, පළමුව කරන්නේ ජනතාවගේ අනුමැතිය හිමිවන, සදාචාරාත්මක දේවල් යම් පමණකට කිරීමය. අපරාධවලට ඉඩක් දෙන්නේ නැහැයැ’යි කියන කතාව එවැන්නකි. අපරාධකාරයන්ද බිය වනු ඇත්තේ, එවැනි ව්‍යාපාරවලින් තමන්ට ලැබිය හැකි දඬුවම ගැනයි. එනම් නඩු ඇසීමක් නැති මරණයයි. එල්ටීටීඊය බලවත්ව සිටි කාලයේදී උතුරේ ද ඒ ක‍්‍රමයම පවත්වාගෙන යන ලදි. එහෙත්, එල්ටීටීඊය ඊට වඩා ටිකක් ‘ප‍්‍රජාතාන්ත‍්‍රික’ වෙමින්, තමන්ගේම දණ්ඩ නීති සංග‍්‍රහයක් අනුව නඩු විසඳන උසාවි ක‍්‍රමයක් පවත්වාගෙන ගියේය. සාමාන්‍ය පොලිසියක් වැනි පොලිසියක්ද පවත්වාගෙන ගියේය. දකුණෙන් උතුරට මත්පැන් ගෙනයන්නට තහනම් කර තිබුණත්, උතුරේ මත්පැන් නිෂ්පාදනයට අවසර දුන්නේය. වෙනම රාජ්‍යයක් හැටියට පවතින බව පෙනෙන්නට අවශ්‍ය එවැනි ව්‍යුහමය වෙනස්කම් එල්ටීටීඊය විසින් සැලසුම් සහගතව කරන ලද ඒවාය. එහෙත්, ඒ කාලයේ වුවද, අපරාධ උතුරේ නොතිබුණායැයි කියන කිසිවෙක් නැත.
අනෙක් අතට, දැරිය ඝාතනය ගැන අද විස්සෝපයෙන් කතාකරන විජයකලා මහේෂ්වරන්ට, පසුගිය කාලයේ ඝාතනය වුණු විද්‍යා දැරියගේ ඝාතකයන් ආරක්ෂා කළායැයි චෝදනාවක් තිබුණු බවද සමහරු මතක් කර දෙති.
කොහොම වුණත්, වෙනම රාජ්‍යයක් වෙනුවෙන් පෙනී සිටි එල්ටීටීඊය යළි ප‍්‍රාණවත් කරන්නට කීවායැයි විජයකලාට ඇති චෝදනාව ගැන, විමර්ශනයක් කරන ලෙස කතානායකවරයාද නීතිපතිට දන්වා තිබේ. අගමැතිවරයා කියූ පරිදි, පොලිස් නිලධාරීන් 600ක් දෙනා ඝාතනය කළායැයි කියන කරුණාට පක්‍ෂයේ උපසභාපතිකමක් දුන් පිරිසක් විජයකලාට එරෙහිව ඒ අතර අවි අතට ගෙන සිටිති. 2005දී එල්ටීටීඊයට කප්පම් දී බලයට ආ අය විජයකලාට අද එරෙහි වෙති. අගමැතිවරයා පාර්ලිමේන්තුවේදී තවදුරටත් කිව්වේ, ඇයට විරුද්ධව පියවර ගතයුතු බවට පක්ෂය දැනටමත් තීරණය කර ඇති බවය. එජාපයේම සමහරු, ඇය ඇමති ධුරයෙන් ඉවත්වීම හෝ ඉවත්කිරීම කළ යුතුයැයි කීහ. බදාදා රාත‍්‍රියේ ඇය අගමැතිවරයා හමුවන්නට නියමිතව සිටියාය. මේ සියල්ල අනුව, ඇගේ දේශපාලන ඉරණම කුමක්දැයි ඉදිරි දිනවල තීරණය වනු ඇත.
මතුපිටින් බැලූ විට ඇය ආණ්ඩුක‍්‍රම වයවස්ථාව උල්ලංඝනය කොට ඇති බව කිසිවකුට කිව හැකිය. එහෙත්, එයින් නොනැවතී, ආණ්ඩුක‍්‍රම ව්‍යවස්ථාවේ වචනවලට ගොස් සලකා බැලිය යුතුය.
හයවැනි සංශෝධනය හරහා ව්‍යවස්ථාවට එකතු කරන ලද 157 (අ) ව්‍යවස්ථාවෙන් කියන පරිදි, ‘ශ‍්‍රී ලංකාවේ දේශය තුළ වෙනම රජයක් පිහිටුවීමට, කෙළින්ම හෝ අන්‍යාකාරයකින්, ශ‍්‍රී ලංකාව තුළ හෝ ඉන් පිටත ආධාර දීම, අනුබල දීම, අනුග‍්‍රහය දැක්වීම, මුදල් යෙදවීම, ධෛර්යය දීම හෝ දේශනා කිරීම කිසිදු තැනැත්තකු විසින් නොකළ යුතුය. මේ විධිවිධාන කඩකරන අයකුට අධිචෝදනා ගොනුකොට, නඩු විභාගයකින් පසු අභියාචනාධිකරණය විසින් වරදකරු කළ විට, අවුරුදු හතකට අඩු කාලයක් සඳහා ප‍්‍රජා අයිතිවාසිකම් අහෝසි කළ හැකිය. ජීවිකා වෘත්තියට අත්‍යවශ්‍යයැයි අධිකරණය විසින් තීරණය කරන ඒවා හැර චංචල හා නිශ්චල දේපළ රාජසන්තක කළ යුතුය. මන්ත‍්‍රීධුරය අහිමි කෙරෙයි.
6 වැනි සංශෝධනය අනුව මන්ත‍්‍රීවරයකු දිය යුතු ප‍්‍රතිඥාව මෙසේය. ‘… වන මම ශ‍්‍රී ලංකා ප‍්‍රජාතාන්ත‍්‍රික සමාජවාදී ජනරජයේ ආණ්ඩුක‍්‍රම ව්‍යවස්ථාව ආරක්ෂා කොට අනුගමනය කරන බවටද, ශ‍්‍රී ලංකාවේ දේශය තුළ වෙනම රජයක් පිහිටුවීමට, කෙළින්ම හෝ අන්‍යාකාරයකින්, ශ‍්‍රී ලංකාව තුළදී හෝ ඉන් පිටතදී, ආධාර දීම, අනුබල දීම, අනුග‍්‍රහ දැක්වීම, මුදල් යෙදවීම, ධෛර්යය දීම හෝ දේශනා කිරීම හෝ නොකරන බවටද ගෞරව බහුමානයෙන් යුක්තව ප‍්‍රතිඥා දෙමි.’
විජයකලා සිය ප‍්‍රසිද්ධ ප‍්‍රකාශයේදී, ශ‍්‍රී ලංකාවේ දේශය තුළ වෙනම රජයක් පිහිටුවීමට, කෙළින්ම හෝ අන්‍යාකාරයකින්, ශ‍්‍රී ලංකාව තුළ හෝ ඉන් පිටත ආධාර දීම, අනුබල දීම, අනුග‍්‍රහය දැක්වීම, මුදල් යෙදවීම, ධෛර්යය දීමක් කර නැතියැයි කිසිවකුට කිවහැකිය. එවැන්නක් ගැන දේශනා කිරීමද කර නැත. එල්ටීටීඊය එවැන්නක් වෙනුවෙන් පෙනීසිටියායැයි ගත්තත්, දැන් එල්ටීටීඊයක් නැත. ඒ නිසා ඔවුන්ට ආධාර අනුබල දීමද කළ නොහැකිය. එය ඇත්තේ තහනම් සංවිධාන ලැයිස්තුවේය. බොහෝ අය නිගමනයට එළැඹී ඇත්තේ, එල්ටීටීඊය තිබුණු කාලයේ ඉහත වරද කරන්නට උත්සාහ ගත් බව මතකයේ තබාගනිමිනි. ‘අනාගතයේ එල්ටීටීඊය ආයෙත් ආවොත්’ යන්න පූර්ව නිගමනය කරමිනි. යළි එල්ටීටීඊයක් ඒමේ හෝ, එවැන්නක් එන බවට සමාජය තුළ බියක් ඇතිකිරීමේ හෝ බලලෝභී වුවමනාව ඇත්තේ කාටද යන්න පැහැදිලිය. දැන් සිදුවී ඇත්තේ, ඒ අයගේ පදයට අනුව, අනෙක් සියලූම දෙනා නැටීමය.
කොහොම වුණත්, ඇය ආණ්ඩුක‍්‍රම ව්‍යවස්ථාව අනුව වරදක් කර ඇතිදැයි නිගමනය කළ යුත්තේ නඩු විභාගයකින් පසුව අභියාචනාධිකරණයයි. විමල් වීරවංශවත්, රනිල් වික‍්‍රමසිංහවත්, මහින්ද රාජපක්‍ෂවත් නොවේ. ඒ නිසා මේ ගැන පාර්ලිමේන්තුවේද පිටතද කෙරෙන පුහු ඝෝෂාවල ලොකු අර්ථයක් නැත.
ඒකාබද්ධ විපක්‍ෂයට මහේෂ්වරන්ගේ කතාව, නිව්යෝර්ක් ටයිම්ස් ගංවතුරේ ගසාගෙන යමින් සිටියදී එල්ලෙන්නට ලැබුණු තණකොළ ගසකි. මහජනයා ගෙවිය යුතු ණයවලින් රාජපක්‍ෂවරුන්ගේ මැතිවරණ ව්‍යාපාරයට ඩොලර් මිලියන 7.6ක් ගත්තායැයි කියන කතාව නිසා රාජපක්‍ෂ පාර්ශ්වය පසුගිය දිනවල මුනින් වැටී සිටි තත්ත්වය මගහරවා ගැනීමට, මහේෂ්වරන්ට විරුද්ධව පාර්ලිමේන්තුව තුළදීත්, මාධ්‍යවලදීත් පුළුවන් තරම් හයියෙන් කෑගැසීමෙන් හැකියැයි ඔවුන් සිතනවා ඇත.
එජාපයද ඉන්නේ උගුලක වැටීය. පසුගිය කාලයේ ආණ්ඩුව බෙදුම්වාදීන්ගේ වුවමනාවන් අනුව වැඩ කරනවායැයි විපක්‍ෂයෙන් ආ චෝදනාවෙන් ගැලවෙන්නට උපායක‍්‍රමයක් නැතිව සිටින මේ අසමත් පක්ෂය, මහේෂ්වරන්ගේ කතාව දකිනු ඇත්තේ තමන්ගේ හිස මතට පාත්වුණු තවත් හෙණගෙඩියක් හැටියටය. ඒ නිසා, පක්‍ෂයට කරන්නට ඇත්තේ, අනිත් ඔක්කොම එක්ක එකතුවී මහේෂ්වරන්ටම ගල් ගැසීමය. මහේෂ්වරන් ආරක්ෂා කරන්නට වචනයක් හෝ කීම සියදිවි නසාග ැනීමකි. අගමැතිවරයා පටන්ගත්තේ එතැනිනි.
ජනාධිපති මෛත‍්‍රීපාල සිරිසේන මේ ගැන කියන්නේ කුමක්දැයි තවමත් දන්නේ නැත. ඔහුද අදහස් පළකළ විට මේ සිද්ධිය කුමන සිත්ගන්නාසුලූ මුහුණුවරක් ගනු ඇද්දැයි දේශපාලන උනන්දුවක් ඇති අය බලා සිටිති.
දැන් තිත්ත ඇත්තට එමු.
මහේෂ්වරන්ගේ මේ කතාව, වීරසිංහම් ශාලාවේදී, රජයේ ප‍්‍රධාන ඇමතිවරයකු ඉදිරියේ කළ ප‍්‍රසිද්ධ කතාවකි. සිංහලයට පරිවර්තනය කර ගත්විට, දළ වශයෙන් ඇය එහිදී වචන 1144ක් කතා කළාය. එහෙත්, මේ ආන්දෝලනාත්මක ප‍්‍රකාශය තිබුණේ ඉන් වචන 66ක පමණි. ඊනියා දේශපේ‍්‍රමීන් මුළු රටම ගිනි තියා, මහේෂ්වරන්ට ගල් ගසන්නට පටන්ගත්තේ ඒ වචන 66 නිසාය.
එහෙත්, ඇගේ මුළු කතාවෙන් කියැවුණේ කුමක්ද? උතුරේ ජනතාවගෙන් අත්පත් කරගත් ඉඩම් කොටසක් යළි භාරදීම ගැන ස්තුති කළ ඇය සිය කතාවේ වැඩි කොටස වෙන් කළේ තමාද සාමාජිකයකු වන ආණ්ඩුව උතුරේ ජනතාවට වුණු පොරොන්දු කඩකළ ආකාරය ගැන වේදනාව කියන්නටය. ගැහැනුන්ගේ දුක දන්නා තවත් ගැහැනියකගේ වේදනාව කියන්නටය. ඇගේ මුළු කතාවම වෙන්වී තිබුණේ ආණ්ඩුවට එරෙහි ඒ චෝදනා ගොනු කරන්නටය. එකක් එකක් පාසා ගතහොත් ඇගේ චෝදනා මේවාය.
1. ජනාධිපතිතුමා තම පක්ෂය දියුණු කරගන්නවා මිස අපගේ ජනතාව ආරක්ෂා නොකරයි. 2. අපේ තරුණ තරුණියන්ට රැුකියා නැත. ඒ නිසා ඔවුහු මත්ද්‍රව්‍යවලට ඇබ්බැහි වී සිටිති. 3. යුද්ධයෙන් පසු මත්ද්‍රව්‍ය උතුරට ආවේ දේශපාලකයන්ගේ වාහනවලිනි. 4. යුද්ධයෙන් සැමියා අහිමි වූ පවුල්වලට ජීවනෝපායක් ඇති කර නැත. ගෘහමූලිකයා අහිමි පවුල් 30,000ක වැන්දඹුවනට සලකා නැත. 5. පුනරුත්ථාපනය වූ එල්ටීටීඊ සාමාජිකයන් 12,000කට පමණ ජනාධිපතිතුමා කිසිවක් කර නැත. ඒ ජනතාවට සහනයක් ලබාදීම සඳහා තිබුණ කැබිනට් යෝජනාවත් දකුණේ ඡුන්ද ගැන බලා ප‍්‍රතික්‍ෂෙප කෙරිණි. 6. උතුරු පළාතේ තනතුරු ලබා දී තිබෙන්නේ දකුණේ තරුණ තරුණියන්ටය. උතුරේ උපාධිධාරීහු එළවළු විකිණීම, සිමෙන්ති ඇනීම වගේ දේවල් කරති. 7. සංවර්ධනය, රැුකීරක්ෂා, උසස්වීම් සෑම දෙයකින්ම මුල් තැන හිමි වන්නේද අනෙක් පළාත්වල සිටින අයට පමණය. 8. තෙන්නමරාච්චි ප‍්‍රාදේශීය ලේකම් බල ප‍්‍රදේශයක් ලෙස වෙන් කර ලබා දෙන මෙන් පසුග ිය ආණ්ඩුවෙන් ඉල්ලූවත් සිදුවුණේ නැත. මේ ආණ්ඩුවේ අවුරුදු තුන ඇතුළතද සිදු නොවීය. වෙන් කර දී තිබුණා නම් පසුගිය අයවැය යටතේ ප‍්‍රතිපාදන මුදල් ලැබෙන්න ඉඩ තිබුණි. රැුකීරක්ෂා ලැබෙන්න ඉඩ තිබුණි. 9. පළාත් සභාවට ලැබෙන ප‍්‍රතිපාදන නැවතත් රජයේ භාණ්ඩාගාරය වෙතම යයි. පළාත් සභාවේ තීන්දු තීරණ ගත්තත් ඒවා ඉටු වෙන්නේත් නැත. 10. ප‍්‍රජාතන්ත‍්‍රවාදී රටක් නිසා නියමිත වෙලාවට මැතිවරණය පැවැත්විය යුතුය.
මහේෂ්වරන්ගේ ද්‍රෝහී කතාවට ගල්ගැසූවන් එසේ ගල් ගැසීම අහවර වුණු පසු, ඈ ඉහත කී අනෙක් දේවල් ගැන කියන්නේ කුමක්ද? ඒවා ඇත්තද? බොරුද? එවැනි අවාසනාවන්ත තත්ත්වයකට පත්වී ඇති ජනකොටසකගේ දේශපාලන නියෝජිතයා වන ඇයට ඒ දුක්ගැනවිල්ල ප‍්‍රසිද්ධියේ කියනවා හැර දැන් කරන්නට ඉතිරිවී ඇත්තේ කුමක්ද?
ඇගේ මුළු කතාවම, මේ ජනාධිපතිවරයාටත්, අගමැතිවරයාටත් එල්ල කළ එකම අධිචෝදනා පත‍්‍රයකි. අවාසනාවකට. ඒ එක් චුදිතයෙකු වන අගමැතිවරයාම, දැනටමත් ඇයට විරුද්ධව පියවර ගන්නා බවට තර්ජනය කොට තිබේ. ලිබරල් මනසකින් යුක්තයැයි කියන ඔහු පවා සිතනවා ඇත්තේ, මෙය දේශපාලන විවේචනයක් ලෙස නොගෙන රාජපක්‍ෂ කඳවුරේ පසුගාමීන් මෙන්, නීතියේ අකුරු ඇතුළතම විසඳා, තමන් වෙතින් ගිලිහී යමින් තිබෙන සිංහල බෞද්ධ ඡුන්ද ටික කොහොම හරි රැකගැනීම ගැනය.
බහුතර සිංහල බෞද්ධ ඡන්ද පදනම ගැන නිතර දෙවේලේ බියෙන් සිටින දේශපාලකයන් මහේෂ්වරන්ගේ වචන 66 ගැන කිපී ගල් ගසන්නට ඉක්මන්වීම ගැන පුදුමයක් නැත. එහෙත්, ඇය දංගෙඩියට යැවු පසුවවත්, ඇගේ ‘වැරදි වචන’ පසුපස තිබෙන ‘නිවැරදි ඇත්ත’ ගැන ගැඹුරින් බලා, දෙමළ මිනිසුන්ට සාධාරණයක් ඉටුකිරීමට දේශපාලන අධිෂ්ඨානය වඩා ගත යුතුය.
